Read Alladian Galasi anmàn-bɔ̀ 4 Bible Online

Galasi anmàn-bɔ̀ 4 - Alladian bible

Galasi anmàn-bɔ̀ 4

¹Ankà-dɔ̀ zri lɔ wú, nyàn ankà léyi me ji mɛ̀n dɔ̀ nɔn: ɛnvra léyi anja-di-wrɔn dú ɛnẅì cɛ dudù nɔn, nɛ́n mán ɔwɔ̀n-wrɔn mɛhi y'edomɛ̀n ankà kè sɩ̀ vɛ́n hán, kɩ ke dú kɛ anja ci lɔ dú nɛ tɛn mán.

²Annànwɔrɛ mɛ̀n lɔ, nɛ̀n dú anwrɔn tamɛ̀n kɛ wá nɛ̀n esùvá kɩ kɛ wá anja ci hɔ̀n lɔ esùva hàn kɩ kɛ lɛ cɔ́ ɛnvra léyi nɛ́n zi wá tán nɔn.

³Ɔmu zri lɔ, bɔ́ mán bɔ̀ dú kpàkpà mɛ̀n lɔ hán ɛẅì hɔ̀n hɔ́, bɔ́ dú ɛnhibù kɔrɛ̀-srɔn hɔ̀n hɛ́n wɔ̀n-bɔ̀.

⁴Tɛ́n ɛnvra léyi yɛ wá, ncɔ̀ nɔn, Ɔwɔ hán n'Ɛnẅì nvà: ye bî nɛ̀n ɛnnyɔnwrɔn mɛ̀n kɩ nɛ̀n dú Zhüifɛ̀n-bɔ̀ nyànmàn kɔrɛ̀-levri wú,

⁵ô, nɛ̀n mrɛ́n anwrɔn hɔ̀n léyi dú ɛnyànmàn wú nɔn nɛ̀n sɔhɔ́, ô kɛ̀ tán bɔ̀ ɛkɔrɛ̀-levri ɔmu lɔ bɔ̀ srɔ Ɔwɔ ẅì hɔ̀n.

⁶Ɔwɔ hán n'Ɛnẅì Hɛ́n vá bɔ́ ɛnbɔrɛ hɔ̀n lɔ mɛ̀n, ô kè yé tán le nyɛ́n dú n'ɛẅì hɔ̀n annanwɔrɛ: Ɛnhɛ́n léyi ke di bobo le: “Abba, ô mɛ́n Dade!”

⁷Ɔmu lɔ, è sɩ̀ vrù dù ɔwɔ̀n-wrɔn tɛ́n ɛnẅì; kɩ ɔmuhi è dú n'ɛnẅì nɔn, Ɔwɔ kɛ lɛ tán mɛ́n anja-ci léyi nɛ̀n hɛ́n n'ɛẅì hɔ̀n nɔn.

⁸Ɛnbiɛhɛ́n vra lɔ, nyɛ́n sɩ̀ nyrì Ɔwɔ kɩ nyɛ́n dú anwɔ̀n-bɔ̀ nyɛ́n tán anwɔ hɔ̀n léyi kè sɩ̀ dù Ɔwɔ annanwɔrɛ nɔn.

⁹Tɛ́n zɛtɛ̀ léyi nyɛ́n nyri Ɔwɔ (kɩ Ɔwɔ mán nyri nyɛ̀n zɛtɛ̀ lɔ nɔn), anwɔntan kɛ hán ke cì kɛ̂ nye vru ɛmɛẅi nyɛ hɔ́n ɛjɛ̀ mán ɛmian hɛ́n cüì hɔ̀n yriɛ? Nye ji nyɛ́n vru nyɛ́n srɔ y'anwɔ̀n-bɔ̀a?

¹⁰Nyɛ́n ẅɛn vɔ̀nshɛ ci-hán tɔ̀n ɛnbì ndɔ hɔ̀n wú, okù ndɔ hɔ̀n wú, ɛnvra ndɔ hɔ̀n wú mán ɛnnànwàn ndɔ hɔ̀n wú!

¹¹Ny'ankà ke ku mɛ̀n ɛnkrɛ̀ta: ejüedì lɔ fɛn léyi mɛ̀n kán ny'ɛwú nɔn ke le dú eci woroɛ?

¹²Anwrɔn-nɛ́n-mùan-ẅì hɔ̀n, mɛ sɛ́n nyɛ̀n, nyɛ́n dù nyɛ́n cá mɛ̀n, ɔmuhi mɛ̀n hán m'edomɛ̀n ndú cá nyɛ̀n nɔn. Nyɛ́n sɩ̀ hán mɛ̀n eci gbàngbàn zriɛmɛ́n.

¹³Ke bru nyɛ̀n eci le kruhú léyi kpàkpà mɛ̀n lɔ mɛ̀n dɔ́ nyɛ̀n Ɛmɛẅi ankà Ankrànkràn lɔ nɔn: ɔmuhi mɛ̀n dú ɛnlɔẅiɛ mɛ̀n nɔn.

¹⁴M'ɛnlɔẅiɛ dùwrú wá nyɛ̀n ɛnjansù, kɩ ɔmu tɛ̀kɩ nyɛ́n sɩ̀ ẅɛ̀n m'egbrì kɩ nyɛ́n sɩ̀ srɛ́ mɛ̀n ɛtɛ̀sɛ̀n. Tɛ́n, nyɛ́n bɩ́ mɛ̀n hán Ɔwɔ-kùyüre-wrɔn tɔ̀n hɔ́, kɩ vru hán le Zhezü Krisì hɔ́.

¹⁵Nyɛ́n dú ɛnbɔrɛ-bruemɛ̀n anvrɛnvrɛn mɛ̀n! Ankà tán de srɔ́n nyɛ̀n esù nɛ́n? Me le dí nyɛ̀n dalɛfuɛ ndɔ lɔ tɛ̀: ke dú kɛ kè dú eci-hán-ci hô, nye le frɛ ny'anvɛ̀ hɔ̀n lɔ nyɛ́n tán mɛ̀n!

¹⁶Kɩ zɛtɛ̀ lɔ, mɛ̀n srɔ ny'egbri-wrɔn ɔmuhi mɛ dɔ́ nyɛ̀n ankà annanwɔrɛ nɛ́n?

¹⁷Anwrɔn ndɔ hɔ̀n ndù ke yé vɔ̀nshɛ́ bobrebe léyi yɔ ẅɛn ny'ɛwú, tɛ́n y'ankà-tro kè sɩ̀ zrɔa. Eci léyi yɔ ji nɔn, yɔ mrɛ́n nyɛ̀n m'ɛtɛ̀sɛ̀n yɔ sɔhɔ́, ô nyɛ́n vɔ̀nshɛ́ ankà-tro lɔ fɛn kè dú yɔ tɛn.

¹⁸Annanwɔrɛ mɛ̀n, zrɔ tán le vɔ̀nshɛ́ kè dú ɔwrɔn edomɛ̀n, tɛ́n kè dú anvrɛn hán tɛn, kɩ ndɔ lɔ ɛnvra lɔ fɛn mɛ̀n, kɩ kè sɩ̀ dù ɛnvra léyi mɛ̀n dú nyɛ̀n anwanzi nɔn tɛ̀kɩ.

¹⁹M'ɛẅì hɔ̀n, mɛ̀n vru me di ejüe ny'ɛkruhú hán ɛnnyɔnwrɔn tɔ̀n léyi ke bî ɛnẅì nɔn, hàn kɩ nyɛ́n nyri kpete mɛ̀n le Krisì dú nyɛ̀n ɛmɛ̀n.

²⁰Andɛ̀n ɛbɛ de mɛ cüɛn ɔmu le mɛ̀n dú nyɛ̀n ɛmɛ̀n ɛnvra ndɔ lɔ mɛ̀n, ô mɛ̀n cɔ́ ɛyri mɛ̀n dɔ́ nyɛ̀n ankà nyàntɛn. Mɛ̀n dú ekpùsuemɛ̀n ny'ɛkruhú!

²¹Nyɛ́n dɔ́ mɛ̀n, nyɛ́n léyi nye ji nyɛ́n dú ɛnyànmàn kɔrɛ̀-levri wú nɔn: nyɛ́n sɩ́ yá ankà léyi ɛnyànmàn ndɔ lɔ kɛ dɔ̀ nɛ́n?

²²Ye merɛ́n, annanwɔrɛmɛ̀n le, Abrahamɛ̀n bî ɛẅì hɔ̀n anhyrɛ̀, ɔtɔ̀n dú ɔwɔ̀n-hi Agarɛ̀n ẅì, kɩ ndɔ lɔ ɛnnyrɔnwrɔn kora Sara ẅì.

²³Kpàkpà ẅì léyi nɛ́n bî nɔn dú ɛnẅì léyi ye sɩ̀ wà ɔmùan nɔn, tɛ́n ɛnẅì léyi ye bî anhyrɛmɛ̀n nɔn, dú Ɔwɔ mùan-wá ẅì.

²⁴Ankà-dɔ̀ ndɔ lɔ n'ɛmɛ̀n vrɛ́n: wúyɔ̀ anhyrɛ̀ lɔ ke yé mìrɛ̀n anhyrɛ̀. Mìrɛ̀n anhyrɛ̀ ndɔ lɔ, ɔtɔ̀n léyi Agarɛ̀n ke yé nɔn dú Sinahi kpò lɔ; mìrɛ̀n ndɔ lɔ ke bî anwɔ̀n-bɔ̀.

²⁵Agarɛ̀n dú Sinahi kpò Arabi anmàn hi wú; nɛ̀n dú eci zri nɛ́n mán zɛtɛ̀ Zherüzalɛmɛ̀n anmàn léyi dú anwɔ̀nẅiemɛ̀n nɛ́n mán n'anwrɔn hɔ̀n lɔ fɛn mɛhi.

²⁶Tɛ́n anhobɩ́ Zherüzalɛmɛ̀n lɔ nɛ̀n sɩ̀ dù anwɔ̀nẅiemɛ̀n, kɩ nɛ́n de nɛ̀n dù bɔ́ muan nɔn.

²⁷Annanwɔrɛmɛ̀n lɔ, Owrú Prɔnprɔn kɛ dɔ̀ le: “Pɔ̀püɛ̀ kɛ brá mɛ́n ɛnnyɔnwrɔn léyi kè sɩ̀ bî ɛnẅì nɔn! È di pɔpüɛ̀-brà bobo, vɛ́n léyi e sɩ̀ nyrì ɛnẅì bî gbànkàn nɔn! Ɔmuhi, ɛnnyɔnwrɔn léyi nɛ́n cüì teze nɔn, kɛ lɛ bî ɛnẅì kɛ lɛ vrán ɛnnyɔnwrɔn léyi nɛ́n cüì kɛ cüɛ̀n nɔn.”

²⁸Nyɛ tɛn, anwrɔn-nɛ́n-muan-ẅì hɔ̀n, nyɛ́n dú ɛẅì hɔ̀n léyi ye bî Ɔwɔ mùan-wá mɛ̀n nɔn, ndù hán Izaakɛ̀n hɔ́.

²⁹Ɛnbiɛhɛ́n vra lɔ, ɛnẅì léyi ye sɩ̀ bî Ɔwɔ mùan-wá mɛ̀n nɔn, nɛ kɔ́n ɔmùan-wá ẅì léyi ye bî Ɔwɔ Hɛ́n mɛ̀n nɔn anhà, kɩ ndɔ lɔ dú zɛtɛ̀ lɔ mán.

³⁰Tɛ́n ankà tán de Owrú Prɔnprɔn kɛ dɔ̀ nɛ́n? Ndɔ lɔ: “Ɛ̀ wrɔ́ ɔwɔ̀n-hi ndɔ lɔ mán n'ɛnẅì mɛhi; ɔmuhi ɔwɔ̀n-hi ẅì kè sɩ̀ ẅɛ̀n nɛ́n Zi anja-di-ci korɛ̀levri nɛ́n mán ɛnnyɔnwrɔn kora ẅì mɛhi.”

³¹Ɔmu zri lɔ de, anwrɔn-nɛ́n-muan-ẅì hɔ̀n bɔ̀ sɩ̀ dù ɛnnyɔnwrɔn léyi dú ɔwɔ̀n-hi nɔn n'ɛẅì hɔ̀n, tɛ́n bɔ̀ dú ɛnnyɔnwrɔn kora ẅì hɔ̀n.