Read Alladian Galasi anmàn-bɔ̀ 6 Bible Online

Galasi anmàn-bɔ̀ 6 - Alladian bible

Galasi anmàn-bɔ̀ 6

¹Anwrɔn-nɛ́n-muan-ẅì hɔ̀n, ke dú kɛ ɔwrɔn tɔ̀n ke bru ɛgbàn mɛ̀n hô, nyɛ́n léyi nyɛ́n ẅɛn Ɔwɔ Hɛ́n nɔn, nyɛ́n bɩ́ nɛ̀n nyɛ́n sɩ́ ɛnlevri ankrankran wú; tɛ́n nyɛ́n ẅɛn ɛnbɔrɛ-wɔ̀ n'ɛtɛ̀sɛ̀n. Kɩ nyɛ́n mán nyɛ́n wá esùva anvrɛnvrɛn, ô nyɛ́n bɩ́ teze ny'edòmɛ̀n ɔwɔɛ̀nnyan mɛ̀n.

²Nyɛ́n wá ny'edomɛ̀n ɛkɔrɛ̀ ny'ɛnlowru wɔrɔ mɛ̀n: ɔmu lɔ de nyɛ lɛ ẅɛn Krisì nyànmàn kɔrɛ̀-zì nyɛ́n hɛ́n nɔn.

³Ke dú kɛ ɔwrɔn tɔ̀n ke tro le nɛ̀n ẅɛn vɔ̀nshɛ́, tɛ́n nɛ̀n sɩ̀ dù eci zriɛmɛ́n, nɛ frɛ́n n'edomɛ̀n.

⁴Ke ji le ɔwrɔnwrɔn kɛ̀ crɛ́n nɛ́n dùku n'esùnàn; ke dú kɛ hɩ wú lɔ, nɛ lɛ mrɛ́n n'edomɛ̀n tɛ̀ hô, zɛtɛn ɛmrɛ́n ndɔ lɔ dú nɛ́n zri nɛ tɛn, kɩ ye sɩ̀ bɩ́ nɛ̀n yɛ krɔn ɔwrɔn nyantɛn.

⁵Ɔmuhi ke ji le ɔwrɔnwrɔn kɛ̀ wɔrɔ nɛ́n dùku n'ɛnlowrú lɔ nɔn.

⁶Ɔwrɔn léyi kɛ cɔ́ Krisì mɛ̀n ankaẅì-bùtan ankà-yé lɔ nɔn, ke ji le nɛ́n mán ankà-yé-wrɔn lɔ mɛhi yɔ dɛ́ vɔ̀nshɛ́ hɔ̀n léyi ankà-yé ndɔ lɔ kɛ tán nɔn.

⁷Hɩ mɛ̀n lɔ nyɛ́n bɩ́ zɛ́n hán: ye sɩ́ hán Ɔwɔ ɛnhyürɛ̀. Ɔwrɔnẅì kɛ lɛ küɛ eci léyi nɛ́n tɛ̀ nɔn.

⁸Ke dú kɛ nɛ tɛ́ eci léyi nɛ́n dùku n'antà dùwrú kɛ cüɛ̀n nɔn hô, antɛ̀-ẅì léyi nɛ lɛ küɛ nɔn dú owù; tɛ́n ke dú kɛ nɛ tɛ́ eci léyi Ɛnhɛ́n Prɔnprɔn kɛ cüɛ̀n nɔn hô, antɛ̀-ẅì léyi nɛ lɛ küɛ nɔn dú ɛwúvà léyi ke sɩ́ trɔa nɔn.

⁹Edù ke bɩ́ ká bɔ̀ anvrɛn-hán mɛ̀n; ɔmuhi ke dú kɛ edù ke sɩ̀ wú bɔ̀ hô, bɔ́ lɛ cɔ́ bɔ́ antɛ̀-ẅì ɛnvra léyi n'ɛküɛ vra kɛ lɛ cɔ̀ nɔn.

¹⁰Ɔmu lɔ, ɛnvra totɔtɔ̀n léyi bɔ́ ẅɛn ɛkɔrɛ̀-levri nɔn, bɔ̀ hán anwrɔn lɔ fɛn anvrɛn, kɩ annannan le anwrɔn-nɛ́n-muan-ẅì hɔ̀n léyi dú ankaẅì-bùtan mɛ̀n nɔn.

¹¹Mɛ́n dùku de zɛtɛ̀ lɔ, me merɛ́n nyɛ̀n m'antamɛ̀n wrú hán ɔmu le nyɛ kàn nɔn.

¹²Anwrɔn hɔ̀n léyi ke ji kɛ̀ hán nyɛ̀n kèkrèmɛ̀n ye wi nyɛ̀n wúcɔ̀-domɛ̀n nɔn, yɔ dú anwrɔn hɔ̀n léyi ke ji kè yé y'edomɛ̀n anwrɔnẅì ci-hán tɛ̀sɛ̀n nɔn. Yɔ sɩ́ ji le ye di yɔ ejüe Krisì gbàn-hán-tɛ̀ kruhú.

¹³Anwrɔn ndɔ hɔ̀n léyi kɛ hán wúcɔ̀-domɛ̀n-wí kɔhɔ̀n nɔn, yɔ mumù mán yɔ sɩ́ hán ɛnyànmàn kɔrɛ̀-zì-ci; yɔ ji le ye wi nyɛ̀n wúcɔ̀-domɛ̀n, ô yɔ gbú ɔmùan le, yɔ de yɔ hán ye di nyɛ̀n ɛnrɛ̀n ndɔ lɔ anẅia mɛ̀n nɔn.

¹⁴Mɛ tɛn tɛ́n, m'ɔmùan-gbù ke le dú bɔ́ Ɛẅɛnwrɔn Zhezü Krisì gbàn-hán-tɛ̀ wú kɩ; annanwɔrɛ mɛ̀n lɔ, n'ɛkɔrɛ̀levriemɛ̀n de ɛnhibù wú m'ɛkruhú kɩ mɛ̀n wú ɛnhibù kruhú.

¹⁵Hɩ le kruhú de, ke dú kɛ ye wi mɛ́n wúcɔ̀-domɛ̀n hô, kɩ ye sɩ̀ wì mɛ́n wúcɔ̀-domɛ̀n hô, vɔ̀nshɛ́ zriɛmɛ́n bàda nɛ̀n ɛmɛ̀n: hɩ le ẅɛn vɔ̀nshɛ́ nɔn, dú hɩ le ɛ lɛ srɔ ɔwrɔn wrù.

¹⁶Anwrɔn hɔ̀n léyi kɛ nán esù ɛnyànmàn ndɔ lɔ wú nɔn, mɛ dɔ̀ le: anwɔwɔ mán Ɔwɔ cüɛ̀n kɛ̀ và cɔ́ yɔ, ɔmu zri lɔ kè dù tán Ɔwɔ-fɛcüè-bɔ̀ lɔ fɛn.

¹⁷Ɛnbi nyantɛn, ke sɩ́ ji le ɔwrɔn zriɛmɛ́n ke vru kɛ̀ wá mɛ̀n ejüe; ɔmuhi annrɛ̀n hɔ̀n léyi cüe mɛ̀n edomɛ̀n nɔn, ke yé le mɛ̀n dú Zhezü tɛn.

¹⁸Anwrɔn-nɛ́n-muan-ẅì hɔ̀n, bɔ́ Ɛẅɛnwrɔn Zhezü Krisì boafɔ̀n kè dú nyɛ̀n ɛmɛ̀n. Kè dú ɔmu lɔ.