Read Alladian Efɛzɛ̀n anmàn-bɔ̀ 2 Bible Online

Efɛzɛ̀n anmàn-bɔ̀ 2 - Alladian bible

Efɛzɛ̀n anmàn-bɔ̀ 2

¹Ɛnbiɛhɛ́n lɔ, nyɛ́n wú ɛnhɛ́n mɛ̀n, ny'ɛfɔ̀ndɔ̀n mán ny'ɛgbàn hɔ̀n lɔ kruhú.

²Nyɛ hán ɛnu ɛnhi wúvà ci; nyɛ wá ɛnhɛ́n cüìcüì léyi ẅɛn ɛwú ɛkɔrɛ̀-srɔn, ɛnhɛ́n ndɔ léyi zɛtɛ̀ lɔ dú anwrɔn hɔ̀n léyi kɛ kɛ́n Ɔwɔ ezì nɔn edomɛ̀n.

³Bɔ́ lɔ fɛn bɔ́ gó dù hán yɔ hɔ́, bɔ́ hán eci léyi bɔ́ edùwru mán bɔ́ ɛnhɛ́n ke ji nɔn. Ɔmu lɔ de, ɔwrɔnẅì dù léyi bɔ́ dù nɔn, hɩ le kruhú de yɛ wá bɔ̀ Ɔwɔ mrɛ̀ncì lɔ mɛ̀n hán anwrɔn ndɔ hɔ̀n lɔ hɔ́.

⁴Tɛ́n Ɔwɔ yɔ̀bɔ̀-nyrì lɔ sevri, ecüɛ̀n léyi nɛ̀n ẅɛn bɔ́ ɛwú nɔn, hán tán,

⁵kɩ ɛnvra léyi bɔ̀ wú ɛnhɛ́n mɛ̀n, bɔ̀ ɛgbàn hɔ̀n lɔ kruhú nɔn, nɛ̀n hán bɔ̀, bɔ́ dú ɔkɔrɛ mɛ̀n bɔ́ mán Krisì mɛhi. Ɔwɔ boafɔ̀n mɛ̀n de nyɛ́n cɔ́ ebɩ̀die nɔn.

⁶Bɔ́ mán Krisì mɛhi b'ɔbɔ̀sɔ̀ lɔ mɛ̀n, Ɔwɔ hán nɛ́n mán bɔ́ mɛhi bɔ̀ vá ɔkɔrɛ-bɔ̀ mɛ̀n, ô nɛ́n mán bɔ́ mɛhi bɔ̀ ẅɛn ɛyri anhobɩ́ anmàn.

⁷N'ɛzrɔ léyi nɛ̀n yé bɔ̀ Zhezü Krisì bɩmɛ̀n nɔn, hɩ mɛ̀n lɔ, ne ji nɛ̀n hán tán ɛnvra hɔ̀n léyi dú ezì kɛ và nɔn, kè nyri nɛ́n boafɔ̀n nɛ̀ncüì-dì vri lɔ.

⁸Ɔmuhi Ɔwɔ boafɔ̀n mɛ̀n de nyɛ́n cɔ́ ebɩ̀die ankaẅì-bùtan-ẅɛn mɛ̀n nɔn. Ɛnkrukɔrɛ̀ ndɔ lɔ, kè sɩ̀ dù ny'eyri kɛ̀ và, nɛ̀n dú Ɔwɔ cice tɔ̀n;

⁹nɛ̀n sɩ̀ dù ny'ɛgbànkàn vɔ̀nshɛ́ ci, kɩ ɔmu lɔ, ɔwrɔn zriɛmɛ́n ke sɩ̀ mrɛ́n n'edomɛ̀n rɔ́.

¹⁰Annànwɔrɛ mɛ̀n lɔ, Ɔwɔ de hán bɔ̀ antà-hi mɛ̀n; nɛ̀n hán bɔ̀, bɔ́ mán Zhezü Krisì mɛhi b'ɔbɔ̀sɔ̀ lɔ mɛ̀n, ô bɔ̀ ẅɛn ɛwúvà léyi di ɛnnɛ̀ncüì ɛci-ankrankran-hán mɛ̀n, ɛci-ankrankran hɔ̀n léyi nɛ́n gɔ̀ hán nɛ̀n hɛ́n, ô bɔ̀ hán hɩ ci nɔn.

¹¹Kè bru nyɛ̀n eci léyi dú nyɛ̀n ɛnbiɛhɛ́n vra lɔ nɔn! Ebîemɛ̀n lɔ nyɛ́n sɩ̀ dù Zhüifɛ̀n-bɔ̀; Zhüifɛ̀n-bɔ̀ ke bú nyɛ̀n kɛ hán anwrɔn hɔ̀n léyi kè sɩ̀ nyrì Ɔwɔ, ɔmuhi ye sɩ̀ wi nyɛ̀n wúcɔ̀-dòmɛ̀n, kɩ zɛtɛn yɔ bi y'edomɛ̀n Ɔwɔ-ẅì hɔ̀n, ɔmuhi ye wi yɔ wúcɔ̀-domɛ̀n edùwrú-ẅia mɛ̀n nɔn.

¹²Hɩ vra lɔ, nyɛ́n dú esù she Krisì tɛ̀sɛ̀n; nyɛ́n dú ɛmɛ̀n-nyantɛn-mɛ̀n-bɔ̀, nyɛ́n sɩ̀ dù Ɔwɔ-fɛcüè tɛn; nyɛ́n sɩ̀ dù mìrɛ̀n hɔ̀n léyi Ɔwɔ wá ɔmùan nɛ́n mán nɛ́n fɛcüè mɛhi nɔn mɛ̀n; nyɛ́n dú ɛnhibù wúvà mɛ̀n, kɩ esɛ́ mán Ɔwɔ bàda nyɛ̀n ɛmɛ̀n.

¹³Tɛ́n zɛtɛ̀ lɔ, nyɛ́n mán Zhezü Krisì mɛhi ny'ɔbɔ̀sɔ̀ lɔ mɛ̀n, nyɛ́n léyi zɛtɛn nyɛ́n dú esù she nɔn, nyɛ́n bá nɛ̀n ɛtɛ̀sɛ̀n n'ecice-ci lɔ mɛ̀n.

¹⁴Ɔmuhi Krisì dùku de vá sɩ́ bɔ̀ anwɔwɔ ɛnvra léyi nɛ̀n srɔ Zhüifɛ̀n-bɔ̀ mán yɔ léyi yɔ sɩ̀ dù Zhüifɛ̀n-bɔ̀ nɔn, fɛcüè zri. Ɛnvra léyi nɛ̀n ce n'edùwrú lɔ nɔn, nɛ̀n boyɛ ɛbùdrɛn léyi grɔ yɔ angranmɛ̀n hɩ dú yɔ egbri-bɔ̀ nɔn.

¹⁵Nɛ̀n jrɛ́ Zhüifɛ̀n-bɔ̀ nyànmàn mán yɔ eci-hán-ci hɔ̀n, ô nɛ̀n hán ɔwrɔnwrɔn mán yɔ nyran hɔ̀n kɛ̀ srɔ fɛcüè wrù zri, nɛ́n mán yɔ mɛhi y'ɔbɔ̀sɔ̀ lɔ mɛ̀n; ɔmu lɔ de nɛ̀n wá anwɔwɔ nɔn.

¹⁶N'ɛgbàn-hán-tɛ̀ domɛ̀n wù, Krisì bɔsɔ́ yɔ lɛ fɛn edùwrú-ẅia zriemɛ̀n kɩ wɔ́ yɔ angranmɛ̀n, yɔ mán Ɔwɔ mɛhi; Ɛgbàn-hán-tɛ̀ kɔrɛ̀-levriemɛ̀n, nɛ̀n jrɛ́ egbrì.

¹⁷Zɛtɛn Krisì nvà, ô kɛ̀ dɔ́ anwɔwɔ Mɛẅi ankà Ankrankran kɛ̀ tán nyɛ́n léyi nyɛ́n dú esù she mán yɔ léyi yɔ dú ɛtɛ̀sɛ̀n nɔn.

¹⁸Annanwɔrɛ mɛ̀n lɔ, Krisì mɛ̀n de bɔ lɛ fɛn, Zhüifɛ̀n-bɔ̀ mán yɔ hɔ̀n léyi kè sɩ̀ dù Zhüifɛ̀n-bɔ̀ nɔn, bɔ́ lɛ srɔ Ɔwɔ Zi ziwú tɛ̀, Ɛnhɛ́n Prɔnprɔn zri lɔ n'ecüìemɛ̀n.

¹⁹Hɩ le kruhú, nyɛ́n léyi nyɛ́n sɩ̀ dù Zhüifɛ̀n-bɔ̀ nɔn, nyɛ́n sɩ̀ vrù dù ɛmɛ̀n-nyàntɛn-mɛ̀n-bɔ̀, anwrɔn hɔ̀n léyi dú ɛyri nyàntɛn nvà nɔn; tɛ́n nyɛ́n dú zɛtɛ̀ lɔ Ɔwɔ-fɛcüè-mɛ̀n-bɔ̀, nyɛ́n dú Ɔwɔ mɛ̀n mɛ̀n-bɔ̀.

²⁰Nyɛ́n dú ɔwɔn léyi ye kù, kɩ ɔkɔhɔ̀n-wá-bɔ̀ mán Ɔwɔ-mùanwú-ankà-dɔ́-bɔ̀ dú ɛnhi-nan-bù, kɩ Zhezü Krisì dùku dú Ɔwɔn-kàvà-mɛ̀n-bù.

²¹Nɛ́n de nɛ tán ɔwɔn mumù lɔ fɛn ecüì kɩ nɛ hán yi kɛ hɔ́n ɛwú, ô kɛ̀ srɔ Ɛẅɛnwrɔn wɔ-sɛ́n-wɔn prɔnprɔn.

²²Nɛ́n mɛhi ny'ɔbɔ̀sɔ̀ lɔ mɛ̀n, nyɛ́n mán nyɛ́n dú ɔwɔn lɔ mɛ̀n, ô nyɛ́n mán nyɛ́n nyran hɔ̀n lɔ fɛn mɛhi nyɛ́n srɔ ɔwɔn léyi Ɔwɔ dú ɛmɛ̀n nɔn, n'Ɛnhɛ́n mɛ̀n.