Read Alladian Efɛzɛ̀n anmàn-bɔ̀ 5 Bible Online

Efɛzɛ̀n anmàn-bɔ̀ 5 - Alladian bible

Efɛzɛ̀n anmàn-bɔ̀ 5

¹Ɔmuhi nyɛ́n dú ɛẅì hɔ̀n léyi Ɔwɔ kɛ cüɛ̀n nɔn, nyɛ́n hán kèkrèmɛ̀n nyɛ́n dù kɛ̀ hán nɛ́n hɔ́.

²Ke ji le ny'ɛwúvà ci-hán lɔ kè dú ny'ɛcüɛ̀n ci-hán, kɛ̀ cá Krisì léyi cüɛ́n bɔ̀, kɩ tán bɔ̀ n'ɛwúvà, ndù hán ecice tɔ̀n mán ɛcɛ̀nbì-ci léyi Ɔwɔ kɛ cüɛ́n n'ɛndɔ̀ nɔn.

³Nyɛ́n dú Ɔwɔ-fɛcüè tɛn, hɩ le Kruhú de kè sɩ̀ zrɔ̀ tàn le, eci-gbangbàn-hán mɛ̀ntɛ mɛ̀ntɛ zriɛmɛ́n, ɛnbrámɛ̀n-ci mán ɔwrɔn-ci-vɛ̀-cüɛ̀n ci-hán kè dú nyɛ̀n ɛmɛ̀n nɔn.

⁴Kè sɩ̀ zrɔ̀ tán le nyɛ́n vru nyɛ́n dɔ́ ankà hɔ̀n léyi dú ɛnbrámɛ̀n-ci-hán ankà hɩ ẅɛn nyrànnyràn nɔn. Zrɔ tán le nyɛ́n hán ɛnyri-kùɛn-tán Wɔ-sɛ̀n.

⁵Nyɛ́n nyri anvrɛnvrɛn mɛ̀n le: eci-gbangbàn-hán-wrɔn zriɛmɛ́n, ɛnbrámɛ̀n-ci-hán-wrɔn zriɛmɛ́n mán kɔ̀tɛ́-wrɔn (ɔmuhi kɔ̀tɛ́ dú, antɛ̀-buri-ci-hán) ke sɩ̀ bru Krisì mán Ɔwɔ dúyri lɔ mrìmrì nɔn.

⁶Ɔwrɔn zriɛmɛ́n, ke bɩ́ hán nyɛ̀n nyɛ́n bore ankà-dɔ́ mɛ̀n, ô kɛ hán nyɛ̀n nyɛ́n zɛ́n hán: ɛgbàn ndɔ hɔ̀n lɔ de ke sɩ́ Ɔwɔ mɛ̀nhyì-bɩ̀ ku anwrɔn hɔ̀n léyi kɛ kɛ́n nɛ̀n ezì nɔn ɛwú.

⁷Anwrɔn ndɔ hɔ̀n lɔ, yɔ mɛhi nyɛ́n bɩ́ ẅɛn eci zri.

⁸Ɛnbiɛhɛ́n lɔ nyɛ́n dú ɛyri-yɔwɔ mɛ̀n; tɛ́n zɛtɛ̀ lɔ, nyɛ́n mán Ɛẅɛnwrɔn mɛhi ny'ɔbɔ̀sɔ̀ lɔ mɛ̀n, nyɛ́n dú ɛyri-kán mɛ̀n. Hɩ le kruhú de ke ji le, nyɛ́n nán esù kɛ̀ hán anwrɔn hɔ̀n léyi dú ɛyri-kán kɔrɛ̀-levri wú,

⁹ɔmuhi, ɛyri-kàn kɛ shi ɛzrɔ mɛ̀ntɛ mɛ̀ntɛ, esùnan anvrɛnvrɛn mán annanwɔrɛ nɔn.

¹⁰Nyɛ́n hán kèkrèmɛ̀n nyɛ́n nyri eci léyi kɛ zrɔ Ɛẅɛnwrɔn nɔn.

¹¹Nyɛ́n bɩ́ ẅɛn eci zriɛmɛ́n ke dú eci-hán-ci woro hɔ̀n léyi yɛ hán ɛyri-yɔwɔ mɛ̀n nɔn; nyɛ́n sɩ́ yɔ ɛntrɛ kpràkprà.

¹²Eci léyi anwrɔn janbɔ̀ kɛ hán ɛbán mɛ̀n nɔn, anvɛvrà ke sɩ́ tán n'anka-dɔ̀.

¹³Tɛ́n, eci lɔ fɛn léyi ye sɩ́ ɛntrɛ nɔn dú ɛyri-kán mɛ̀n kokroho;

¹⁴n'ɛwú lɔ, eci lɔ fɛn léyi ye sɩ́ ɛyri-kán mɛ̀n kokroho nɔn, nɛ́n mán nɛ srɔ ɛyri-kàn. Hɩ le kruhú de yɛ dɔ̀ le: “Gbɛ́ ɛvɛ̀, vɛ́n léyi ɛ di ɛndà nɔn, dú owú-bɔ̀ mɛ̀n tɔhú, kɩ Krisì kɛ lɛ tán mɛ́n ɛyri-kàn.”

¹⁵Ɔmu lɔ, nyɛ́n wá esùva anvrɛnvrɛn ny'ɛwúvà ẅɛn mɛ̀n. Nyɛ́n bɩ́ nán esù kɛ hán ɔbrɔ̀sà-bɔ̀ hɔ́, tɛ́n kɛ̀ hán ankà-nyri-bɔ̀ hɔ́.

¹⁶Eci lɔ fɛn mɛ̀n lɔ, nyɛ́n hán eci anvrɛnvrɛn, ɔmuhi ɛnbì hɔ̀n léyi bɔ̀ dú ɛmɛ̀n nɔn krɛfɔn.

¹⁷Nyɛ́n bɩ́ srɔ ɔbrɔ̀sà-bɔ̀, tɛ́n nyɛ́n hán kèkrèmɛ̀n, ô nyɛ́n nyri eci léyi Ɛẅɛnwrɔn kɛ vrá ny'antamɛ̀n nɔn.

¹⁸Nyɛ́n bɩ́ kɔ́n ɛntàn: ɛntàn-kɔ̀n kɛ lɛ jrɛ́ ny'ɛwúvà lɔ; tɛ́n Ɛnhɛ́n Prɔnprɔn kè yɩ́ nyɛ̀n ɛmɛ̀n.

¹⁹Nyɛ́n yɩ́ ny'edomɛ̀n edù Ɔwɔ mrɛ́n mán Ɔwɔ ci-zrɔ cɔ̀ prɔnprɔn léyi Ɛnhɛ́n Prɔnprɔn kɛ wá nyɛ̀n ɛnbɔrɛ mɛ̀n nɔn, n'ɛkrɛmɛ̀n; nyɛ́n krɛ́ ɛcɔ̀, ô nyɛ́n mrɛ́n Ɛẅɛnwrɔn ny'ɛnbɔrɛ mumù lɔ fɛn mɛ̀n.

²⁰Nyɛ́n tán Ɔwɔ Zi ɔkùɛn ɛnvra lɔ fɛn mán eci lɔ fɛn mɛ̀n, bɔ́ Ɛẅɛnwrɔn Zhezü Krisì bɩmɛ̀n.

²¹Nyɛ́n sɩ́ ny'edomɛ̀n ɛnhi nyɛ́n tán ny'edomɛ̀n, Krisì wá léyi nyɛ́n ẅɛ̀n nɔn hɩ kruhú.

²²Wúyɔ̀, nyɛ́n sɩ́ ny'edomɛ̀n ɛnhi nyɛ́n tán nyɛ́n cüì hɔ̀n, hán ɔmu le nyɛ hán Ɛẅɛnwrɔn tɛ̀sɛ̀n nɔn.

²³Ɔmuhi ɛncɔnwrɔn dú nɛ́n hi fra-wrɔn, hán ɔmu le Krisì dú Ɔwɔ-fɛcüe-bɔ̀ fra-wrɔn hɔ́ nɔn. Krisì dú annanwɔrɛ mɛ̀n lɔ, Ɔwɔ-fɛcüè léyi dú n'edùwrú nɔn, n'ebɩ̀die-wrɔn.

²⁴Ke ji le, eci lɔ fɛn mɛ̀n, wúyɔ̀ kè sɩ́ y'edomɛ̀n ɛnhi kɛ̀ tán yɔ cüì hɔ̀n, hán ɔmu le Ɔwɔ-fɛcüè ke sɩ́ n'edomɛ̀n ɛnhi kɛ tán Krisì nɔn hɔ́.

²⁵Wúcɔ̀, nyɛ́n cüɛ́n nyɛ́n hi hɔ̀n hán ɔmu le Krisì cüɛn Ɔwɔ-fɛcüè hàn mán bɩ́ n'ɛwúvà lɔ tán nɛ̀n nɔn.

²⁶Nɛ̀n ji ɔmu lɔ hán, ô Ɔwɔ-fɛcüè kè dú Ɔwɔ tɛn annanwɔrɛ, ɛnvra léyi nɛ̀n bɩ́ ɛnshi mán ankà-dɔ̀ nɛ̀n fí yi edomɛ̀n nɔn;

²⁷nɛ̀n ji nɛ̀n bɩ́, nɛ́n dúku n'edòmɛ̀n fì lɔ nɛ̀n yé Ɔwɔ-fɛcüè, efi léyi ɛnbrá-ci mán eci-fɔ́n-ci zriɛmɛ́n bàda nɛ́n nmù sá lɔ mɛ̀n.

²⁸Ke ji le wúcɔ̀ kɛ̀ cüɛn yɔ hi hɔ̀n hán ɔmu le yɔ cüɛn yɔ dùku y'edùwrú lɔ nɔn. Ɔwrɔn léyi kɛ cüɛn nɛ́n hi nɔn, nɛ cüɛn n'edòmɛ̀n.

²⁹Annanwɔrɛ mɛ̀n lɔ, ɔwrɔn zriɛmɛ́n kɛ vá gbri nɛ́n dùku n'edùwru; tɛ́n yɛ tán nɛ̀n ɛci-zî, yɛ wá nɛ̀n esùva, hán ɔmu le Krisì kɛ hán tán Ɔwɔ-fɛcüè,

³⁰n'edùwrú léyi bɔ́ lɛ fɛn bɔ́ dú nɛ̀n ɛmɛ̀n nɔn.

³¹Hán ɔmu le ye merɛ́n nɔn: “Hɩ le kruhú de ɛncɔnwrɔn ke le teze nɛ́n zi mán nɛ́n muan, ô nɛ̀n hɔ̀n cɔ́ nɛ́n hi, kɩ yɔ, anwrɔn anhyrɛ̀ lɔ, yɔ lɛ srɔ eci zri.”

³²Ankà-bán-ankà vri tɔ̀n annanwɔrɛ de dú ankà-dɔ̀ ndɔ lɔ mɛ̀n nɔn. Mɛ tɛn, mɛ dɔ̀ le, ankà lɔ kɛ crɛ nyan Krisì mán Ɔwɔ-fɛcüè.

³³Tɛ́n kɛ crɛ nyán nyɛ́n mán: ke ji le ɛncɔnwrɔn kɛ̀ cüɛn nɛ́n hi kɛ hán nɛ́n dùku hɔ́, ô ɛnnyɔnwrɔn mán kɛ wá nɛ́n cüì.