Read Alladian Filipɛ̀n anmàn-bɔ̀ 1 Bible Online

Filipɛ̀n anmàn-bɔ̀ 1 - Alladian bible

Filipɛ̀n anmàn-bɔ̀ 1

¹Ebinyan ndɔ lɔ dú Pɔlɛ̀n mán Timote léyi dú Zhezü Krisì ci-bɩ̀tan-bɔ̀ nɔn yri kɛ và. Anwrɔn hɔ̀n léyi dú Filipɛ̀n anmàn hɩ Zhezü Krisì bɩmɛ̀n lɔ, dú Ɔwɔ-fɛcüè tɛn, anwrɔn hɔ̀n léyi dú Ɔwɔ-fɛcüè nyrɔn-bɔ̀ mán eci-bɩ̀tan-bɔ̀ léyi kɛ wá ɛnlɔẅiɛ-bɔ̀ mán ɛmian-bɔ̀ esuva nɔn:

²Ɔwɔ léyi dú bɔ́ Zi mán Ɛẅɛnwrɔn Zhezü Krisì kɛ̀ tán nyɛ̀n nboafɔ̀n mán anwɔwɔ.

³Mɛ tán m'Ɔwɔ ɔkùɛn ɛnvra totɔtɔ̀n léyi me tro ny'ankà nɔn.

⁴Ɛnvra hɔ̀n lɔ fɛn léyi mɛ sɛ́n tán nyɛ̀n nɔn, mɛ hán nɛ̀n pɔpüɛ̀ mɛ̀n,

⁵ɛkɔrɛ̀-wá léyi mɛ̀n cɔ́ ny'eyri Ɛmɛẅi ankà Ankrankran lɔ n'ɛdɔ́ mɛ̀n, bukru kpàkpà bì lɔ hàn kɩ cɔ́ zɛtɛ̀ lɔ nɔn.

⁶Mɛ̀n ẅɛn esɛ́ ndɔ lɔ le: Ɔwɔ léyi bú ɔkɔ̀hɔ̀n ankrànkràn ndɔ lɔ ɛnkru ny'ɛmɛ̀n nɔn, kɛ lɛ hán nɛ̀n, nɛ̀n trɔ ɛnkru ɛnvra léyi Zhezü vá bì lɔ kɛ lɛ cɔ̀ nɔn.

⁷Annànwɔrɛ mɛ̀n ke ji le mɛ̀n ẅɛn ankà-tro ndɔ hɔ̀n lɔ ny'ɛwú. Annanwɔrɛ mɛ̀n lɔ, ny'ankà-tro ankrankran dú mɛ̀n ɛnbɔrɛ mɛ̀n, ɔmuhi nyɛ lɛ fɛn lɔ nyɛ́n dú ɛcüɛ̀n léyi Ɔwɔ tán mɛ̀n nɔn mɛ̀n, bukru zɛtɛ̀ léyi mɛ̀n dú anwɔn-mɛ̀n-wá-wɔn mɛ̀n mán ɛnvra léyi ye bi mɛ̀n, mɛ̀n wá Ɛmɛẅi ankà Ankrankran lɔ esùva kpankpan mɛ̀n nɔn.

⁸Ankà ndɔ lɔ wú lɔ, Ɔwɔ dú mɛ́n dalɛfuɛ-di-wrɔn: mɛ cüɛn nyɛ lɛ fɛn Zhezü Krisì cüɛ̀n vri lɔ mɛ̀n.

⁹Nyàn eci léyi mɛ sán m'Ɔwɔ-sɛ̀n lɔ mɛ̀n nɔn: ke ji le ny'ɛcüɛ̀n lɔ ke sevri ɛnvra lɔ fɛn, nɛ̀n di ɛnnɛ̀ncüì annanwɔrɛ-ci-nyriemɛ̀n mán ankà-yá anvrɛnvrɛn mɛ̀n,

¹⁰ô nyɛ́n cɔ́ ɛyri nyɛ́n nyri eci léyi zrɔ nɔn. Ɔmu lɔ de nye le dú ɛfifiemɛ̀n mán ɛyrɔnnan mɛ̀n ɛnbì léyi Krisì kɛ lɛ và nɔn.

¹¹Nye le di ɛnnɛ̀ncüì ny'ɛnyrɔnnan ci-hán mɛ̀n Zhezü Krisì kɔrɛ̀levriemɛ̀n, ke le dú Ɔwɔ ci-zrɔ mán n'ɛmrɛ́n mɛ̀n.

¹²Anwrɔn-nɛ́n-muan-ẅì hɔ̀n, me ji le nyɛ́n nyri eci léyi wá tán mɛ̀n hɩ annanwɔrɛ mɛ̀n lɔ, mɛ̀n hán Ɛmɛẅi ankà Ankrankran lɔ n'ɔkɔhɔ̀n nán esù hɔ́n ezì nɔn.

¹³Ɔmu lɔ de yɔ lɛ fɛn, govràn bɩ́ lɔ mɛ̀n mán ɛyri nyàntɛn, yɔ nyri ɔmu le mɛ̀n dú anwɔn-mɛ̀n-wá-wɔn mɛ̀n Krisì ci-bɩ̀tan-kɔhɔ̀n kruhú.

¹⁴Hɩ le yɛ kán mɛ̀n anwɔn-mɛ̀n-wá-wɔn mɛ̀n nɔn, anwrɔn-nɛ́n-muan-ẅì hɔ̀n janbɔ̀ cɔ́ esɛ́ Ɛẅɛnwrɔn mɛ̀n, hán tán kɩ yɔ bobrebe, ɛnjansù ke sɩ́ ẅɛn hán Ɔwɔ ankà-dɔ́ mɛ̀n.

¹⁵Annanwɔrɛ mɛ̀n y'ɛmɛ̀n lɔ, ndɔ hɔ̀n kɛ dɔ́ Krisì ankà ecüì-hi-kɔ́n mɛ̀n, kɩ yɔ ẅɛn ankà-tro drɛ̀-hán m'ɛwú; tɛ́n ɛnjanbɔ̀ kɛ dɔ́ Krisì ankà ankà-tro ankrankran ẅɛn mɛ̀n.

¹⁶Anwrɔn ndɔ hɔ̀n lɔ kɛ hán eci ɛcüɛn mɛ̀n, ɔmuhi yɔ nyri ɔmu le m'ɔkɔhɔ̀n-hán ɛnu lɔ, dú Ɛmɛẅi ankà Ankrankran lɔ, n'ɛnan mán n'esùva-wá.

¹⁷Anwrɔn janbɔ̀ kɛ dɔ́ Krisì ankà annan-kran mɛ̀n, y'ankà-tro ci-hán dú ɛfrɛ́n mɛ̀n; yɔ tro le yɔ lɛ hán, m'anwɔn-mɛ̀n-wá gbànkàn lɔ kɛ̀ sàn sevri.

¹⁸Ke sɩ́ hán eci-zriɛmɛ́n! Y'ankà-tro dú angbàngbàn hô, dú ankrankran hô, Krisì mɛẅi ankà lɔ yɛ dɔ́a, kɩ hɩ pɔpüɛ̀ kɛ brá mɛ̀n. Me le dú pɔpüɛ̀-brà lɔ mɛ̀n,

¹⁹ɔmuhi mɛ̀n nyri ɔmu le ndɔ lɔ fɛn ke le dú m'ɛnkrukɔrɛ̀, ny'Ɔwɔ-sɛ̀n mán Zhezü Krisì Hɛ́n kɔrɛ̀-wá léyi kɛ vá sɩ́ mɛ̀n nɔn, n'ɛkɔrɛ̀levri mɛ̀n.

²⁰Annanwɔrɛ mɛ̀n lɔ, eci léyi mɛ vrá hɩ mɛ ẅɛn esɛ́ n'ɛwú nɔn, ke sɩ̀ tán mɛ̀n anvɛvrà zriɛmɛ́n. Tɛ́n, zɛtɛ̀ lɔ mán ɛnvra lɔ fɛn, esɛ́ vri mɛ̀n, me le yé Krisì vrisɩ̀ lɔ, m'antà-duwrú mumù lɔ fɛn mɛ̀n, ke dú ɔkɔrɛ mɛ̀n mán, ke dú owúemɛ̀n mán.

²¹Ɔmuhi mɛ tɛn, ɛwúvà dú Krisì, kɩ owù dú vɔ̀nshɛ̀.

²²Tɛ́n ke dú kɛ me dú ɛwúvà mɛ̀n, kɩ ndɔ lɔ kɛ lɛ tán mɛ̀n ɛkɔrɛ̀levri mɛ̀n hán eci ankrankran, zɛtɛn mɛ́n sɩ́ nyri hɩ le mɛ lɛ mrɛ́n mɛ̀n bɩ nɔn.

²³Mɛ̀n mán ankà-tro anhyrɛ̀ mɛhi bɔ́ wrɔ́n ecüì: mɛ cüɛn ɔmu le mɛ̀n teze ɛwúvà ndɔ lɔ, ô mɛ̀n mán Krisì mɛhi bɔ̀ dù, hɩ de ke le zeze kɛ̀ zrɔ nɔn;

²⁴tɛ́n zrɔ tán le ny'ɛkruhú, mɛ̀n vru mɛ̀n dú ɛwúvà mɛ̀n.

²⁵Ɔmuhi mɛ̀n ẅɛn esɛ́ ndɔ lɔ mɛ̀n nɔn, mɛ̀n nyri ɔmu le mɛ lɛ yɛ́, kɩ nyɛ lɛ fɛn mɛhi bɔ́ le dù, ô mɛ̀n wá nyɛ̀n ɛkɔrɛ̀ ezì-hɔ́n mɛ̀n, ô nyɛ́n dú pɔpüɛ̀ mɛ̀n ankaẅì-bùtan-ẅɛn mɛ̀n.

²⁶Ɔmu lɔ de, ɛnvra léyi me le vru mɛ̀n vá nyɛ̀n ɛtɛ̀sɛ̀n nɔn, m'ɛkruhú nye le dú ɔmùan-gbúemɛ̀n nyɛ́n mán Krisì mɛhi ny'ɔbɔ̀sɔ̀ lɔ mɛ̀n.

²⁷Tɛ́n, ny'esùnàn kè ci Krisì Mɛẅi ankà Ankrankran ci-hán lɔ wú. Ɔmu lɔ de, ke dú kɛ mɛ hɔ́n nyan nyɛ̀n, kɩ mɛ́n sɩ́ dú nyɛ̀n ɛmɛ̀n mán, mɛ lɛ yá le nyɛ́n dú ɔbɔ̀sɔ mɛ̀n ɛshishiemɛ̀n mán ɛnhɛ́n zriemɛ̀n, kɩ nyɛ kɔ́n anhà ɛnbɔrɛ zriemɛ̀n, ankaẅì-bùtan léyi nyɛ cɔ́ Ɛmɛẅi ankà Ankrankran lɔ wú nɔn hɩ kruhú.

²⁸Nyɛ́n bɩ́ teze ny'edomɛ̀n nyɛ́n tán ny'egbri-bɔ̀ kɛ wá nyɛ̀n ɛnjansù eci zriɛmɛ́n mán mɛ̀n: ndɔ lɔ de ke le yé le, yɔ hɔ́n ɛzrɛ́n mɛ̀n, kɩ nyɛ tɛn nyɛ́n dú ɛnkrukɔrɛ̀ levri wú; kɩ ndɔ lɔ dú Ɔwɔ yri và.

²⁹Ɔmuhi Ɔwɔ tán bɔ̀ ɛcüɛ̀n léyi kɛ srɔ bɔ̀ Krisì ci-bɩ̀tan-bɔ̀, kè sɩ̀ dù hɩ le bɔ́ bú n'ankà bɔ́ tán ankaẅì nɔn kɩ, tɛ́n hɩ le bɔ́ vru bɔ́ kán ɛgbàn n'ɛkruhú nɔn.

³⁰Zɛtɛ̀ lɔ, nyɛ kɔ́n anhà zri léyi nyɛ́n kán mɛ̀n ɛnbìɛhɛ́n vra mɛ kɔ̀n, kɩ mɛ̀n vru mɛ kɔ̀n, hán ɔmu le nyɛ́n nyrì nɔn hɔ́.