Read Alladian Filipɛ̀n anmàn-bɔ̀ 2 Bible Online

Filipɛ̀n anmàn-bɔ̀ 2 - Alladian bible

Filipɛ̀n anmàn-bɔ̀ 2

¹Ny'ɔbɔ̀sɔ̀ nyɛ́n mán Krisì mɛhi kɛ tán nyɛ̀n edùyì hɛ̀? N'ɛcüɛ̀n kɛ vá sɩ́ nyɛ̀n ɛnbɔrɛ-bi-wá? Nyɛ́n mán Ɛnhɛ́n Prɔnprɔn mɛhi nyɛ́n dú ɔbɔ̀sɔmɛ̀n hàn? Nyɛ́n ẅɛn ɛcüɛ̀n mán ɛnbɔrɛ-wɔwɔ nyɛ tán ny'edomɛ̀n hàn?

²Zɛtɛn, nyɛ́n hán mɛ̀n, mɛ̀n dú ɛnbɔrɛ-bruemɛ̀n kokroho ny'ɔmùan-krɔn mɛ̀n, ny'ɛcüɛ̀n-zri-ẅɛn mɛ̀n, nyɛ́n dú ɔbɔ̀sɔ mɛ̀n ɛnbɔrɛ mɛ̀n mán ankà-tro mɛ̀n.

³Nyɛ́n bɩ́ hán eci zriɛmɛ́n annan-kran mɛ̀n, kɩ nyɛ́n bɩ́ ẅɛn ankà-tro woro ny'edomɛ̀n ɛwúsɩ́emɛ̀n, tɛ́n edomɛ̀n ɛnhisɩ́emɛ̀n lɔ, nyɛ́n tro le nyɛ́n nyran hɔ̀n dú nyɛ̀n ɛwú.

⁴Ɔwrɔn zriɛmɛ́n ke bɩ́ ji nɛ́n dùku nɛ́n vɔ̀nshɛ́, tɛ́n ɔwrɔn zrizri kè tro nɛ́n nyran hɔ̀n vɔ̀nshɛ́ ankà.

⁵Nyɛ́n ẅɛn ny'edomɛ̀n kɛ̀ hán ɔmu le yɛ hán ɛnvra léyi ye nyri Zhezü Krisì nɔn hɔ́:

⁶Ɛnkrubɔmɛ̀n hàn hɛ́n, nɛ̀n dú Ɔwɔ, tɛ́n nɛ̀n sɩ̀ jì ɔmu le, nɛ́n mán Ɔwɔ mɛhi ɛkɔrɛ̀ kɛ̀ krɔn yɔ.

⁷Tɛ́n nɛ́n dùku nɛ́n krɔ eci lɔ fɛn léyi nɛ́n ẅɛ̀n, kɩ nɛ̀n srɔ n'edomɛ̀n eci-bɩ̀tan-wrɔn. Nɛ̀n srɔ ɔwrɔnẅì anwrɔnẅiemɛ̀n, ye nyri nɛ̀n, nɛ́n dù nɛ̀n hán ɔwrɔnẅì hɔ́;

⁸nɛ̀n shri edomɛ̀n ɛnhi-sɩ́ wúvà nɛ̀n bɩ̀, kɩ nɛ̀n vru nɛ̀n shri owù ɛgbàn-hán-tɛ̀ wú.

⁹Hɩ le kruhú de Ɔwɔ sɩ́ nɛ̀n ɛwú, hɛ́n nɛ̀n ɛyɛ́yri vri wú kɩ tán nɛ̀n ebɩ́ léyi dú ebɩ́ totɔtɔ̀n lɔ fɛn ɛwú nɔn.

¹⁰Nɛ̀n ji ɔmu le, ɛnvra léyi yɛ lɛ mrɛ́n Zhezü bɩ lɔ nɔn, ɛci hɔ̀n lɔ fɛn léyi dú ɔkɔrɛ mɛ̀n, anhobɩ́, ɛnhi mán ɛnhibɩ́ nɔn, kɛ̀ shran annankruemɛ̀n,

¹¹ô yɔ lɔ fɛn yɔ dɔ́ Ɔwɔ Zi ci-zrɔ lɔ mɛ̀n le: “Zhezü dú Ɛẅɛnwrɔn!”

¹²Ɔmu lɔ de, annyran anvrɛn hɔ̀n, nyɛ́n ẅɛn m'ɛwá ɛnvra léyi me dú nyɛ̀n ɛtɛ̀sɛ̀n nɔn. Zɛtɛn, nyɛ́n hán eci-zri lɔ zɛtɛ léyi mɛ̀n sɩ̀ dù nyɛ̀n ɛmɛ̀n nɔn. Nyɛ́n ji anvrɛnvrɛn mɛ̀n ny'ɛnkrukɔrɛ̀ lɔ edomɛ̀n ɛnhi-sɩ́emɛ̀n, ɛwá mɛ̀n,

¹³ɔmuhi Ɔwɔ kɛ hán ɔkɔ̀hɔ̀n ny'ɛmɛ̀n, nɛ tán nyɛ̀n ecüì, nyɛ́n ji, ô nyɛ́n hán eci léyi dú nɛ́n dùku n'ankɔnda ci-hán nɔn.

¹⁴Nyɛ́n hán eci lɔ fɛn, anẅìɛ-vrá mán ecüì-wrɔn ke bɩ́ dú ɛmɛ̀n,

¹⁵ô nyɛ́n dú ɛnyrɔnnanmɛ̀n mán ɛfifiemɛ̀n, nyɛ́n dú Ɔwɔ-ẅì hɔ̀n léyi ɛgbàn zriɛmɛ́n bàdà edomɛ̀n ɛnu ɛnhibù ndɔ lɔ wú, ɛyɔ̀n-bɔ̀ mán anwrɔn gbàngbàn hɔ̀n wanzi. Ke ji le nyɛ́n dú y'ɛmɛ̀n nyɛ́n gbrɛ́n kɛ̀ hán anhobɩ́ kùcànkrò hɔ́,

¹⁶ô nyɛ́n yé yɔ ɛwúvà mɛẅi ankà. Ɔmu lɔ de, me le gbú ɔmùan ny'ɛwú ɛnbì léyi Krisì kɛ lɛ và nɔn, ɔmuhi m'ɔkɔ̀hɔ̀n mán m'ɛgbànkàn ke sɩ̀ dú eci woro nɔn.

¹⁷Me bú tán le m'ɛnkrɛ̀ lɔ ke le cüe, ke le dù kɛ lɛ hán ecice-ci léyi ny'ankàẅì-bùtan kɛ tán Ɔwɔ nɔn. Ke dú kɛ ndɔ lɔ dú eci-hán-ci, mɛ̀n dú ɛnbɔrɛ-bruemɛ̀n, kɩ nyɛ lɛ fɛn lɔ mɛ wá nyɛ̀n mɛ́n pɔpüɛ̀-brà lɔ mɛ̀n.

¹⁸Ɔmu zri lɔ, nyɛ́n mán nyɛ́n dú ɛnbɔrɛ-bruemɛ̀n, ô nyɛ́n hán mɛ̀n mɛ̀n dú nyɛ́n pɔpüɛ̀-brà lɔ mɛ̀n.

¹⁹Ɛẅɛnwrɔn Zhezü bɩmɛ̀n mɛ̀n ẅɛn esɛ́ anvrɛnvrɛn le, me le yüre nyɛ̀n Timote, ô mɛ́n dùku mɛ̀n cɔ́ ɛnbɔrɛ-bi-wá ɛmɛẅi ankà léyi mɛ lɛ cɔ́ ny'ɛwú nɔn mɛ̀n.

²⁰Nɛ̀n dú ɔwrɔn zri léyi ke dú m'ɛci-hán hɔ̀n lɔ fɛn mɛ̀n, kɩ annanwɔrɛ mɛ̀n lɔ, kɛ ẅɛn ny'ankà-tro nɔn.

²¹Anwrɔn ndɔ hɔ̀n lɔ fɛn kɛ nyan y'ɔkɔ̀hɔ̀n ankà kɩ, kè sɩ̀ dù Zhezü Krisì ankà ke bru yɔ.

²²Nyɛ́n dùku nyɛ́n nyri ɔmu le, Timote yé n'ɔmùan-zri-dì lɔ: hán ɛnẅì mán nɛ́n zi mɛhi, nɛ̀n yɩ́ edù nɛ́n mán mɛ̀n mɛhi Ɛmɛẅi ankà Ankrankran ci-bɩ̀tan-kɔ̀hɔ̀n lɔ mɛ̀n.

²³Mɛ̀n ẅɛn esɛ́ le me le yüre nyɛ̀n nɛ́n ɛnvra léyi m'ankà lɔ ɛmɛ̀n ke le bi nɔn;

²⁴kɩ, mɛ̀n vru mɛ̀n ẅɛn esɛ́ léyi dú Ɛẅɛnwrɔn mɛ̀n nɔn le, mɛ́n dùku mɛ lɛ hɔ̀n mɛ̀n nyan nyɛ̀n ɛnvra bruemɛ̀n.

²⁵Mɛ̀n tro le dú eci anvrɛnvrɛn ke dú kɛ me yüre nyɛ̀n bɔ́ muan-ẅì Epafroditɛ̀n m'ɔkɔhɔ̀n mán m'ɛgbànkàn kɔrɛ̀-wá-wrɔn, nɛ́n léyi nyɛ́n wá nɛ̀n ɔkɔ̀hɔ̀n nɛ̀n bɩ́ ny'ɛkɔrɛ̀-wá-ci lɔ nɛ̀n và sɩ́ mɛ̀n nɔn.

²⁶Nɛ wá kpankpan nɛ̀n vru nɛ̀n và kán nyɛ lɛ fɛn, kɩ nɛ̀n dú ankàtro mɛ̀n, ɔmuhi nyɛ́n yá n'ɛnlɔẅiɛ mùan nɔn.

²⁷Ɛnlɔẅiɛ dá nɛ̀n, annanwɔrɛ mɛ̀n lɔ, nɛ̀n bá ɔwú tɛ̀sɛ̀n; tɛ́n Ɔwɔ nyri nɛ̀n ɛnhyɔ̀bɔ̀, kɩ kè sɩ̀ dù nɛ́n zri kɩ, tɛ́n mɛ̀n mán, ô mɛ́n bɩ́ cɔ́ obòtò ke vru ke sevri.

²⁸Mɛ̀n dú edù cüìcüìemɛ̀n, ô mɛ̀n yüre nyɛ̀n nɛ́n, nyɛ́n brá pɔpüɛ̀ n'ɛkán mɛ̀n, ô m'obòtò lɔ kɛ̀ zrɛ́n.

²⁹Ɔmu lɔ, nyɛ́n ẅɛn nɛ̀n pɔpüɛ̀ vri mɛ̀n, kè dù kɛ̀ hán ɔwrɔn-nɛ́n-muan-ẅì tɔ̀n Ɛẅɛnwrɔn bɩ́mɛ̀n. Ke ji le nyɛ́n ẅɛn ɛcüɛ̀n nyɛ́n tán anwrɔn hɔ̀n léyi ndù hán nɛ́n hɔ́ nɔn,

³⁰ɔmuhi nɛ̀n bá owú tɛ̀sɛ̀n Krisì kɔhɔ̀n lɔ kruhú nɔn: nɛ̀n vá owú yri ɛnvra léyi nɛ̀n bɩ́ ny'ɛkɔrɛ̀-wá-ci léyi nyɛ́n dùku nyɛ́n sɩ̀ sɩ̀ɛ, hɩ nɛ́n bɩ̀ nɛ́n và sɩ́ mɛ̀n nɔn.