Read Alladian Filipɛ̀n anmàn-bɔ̀ 3 Bible Online

Filipɛ̀n anmàn-bɔ̀ 3 - Alladian bible

Filipɛ̀n anmàn-bɔ̀ 3

¹Kɩ zɛtɛ̀ lɔ, anwrɔn-nɛ́n-muan-ẅì hɔ̀n, nyɛ́n dú pɔpüɛ̀ mɛ̀n, ɔmuhi nyɛ́n dú Ɛẅɛnwrɔn bɔ̀sɔ̀ lɔ mɛ̀n nɔn. Ankà léyi mɛ́n gɔ̀ dɔ́ nyɛ̀n nɔn, n'ɛsàn merɛ́n ke sɩ́ wá mɛ̀n ejüe, kɩ nyɛ tɛn ndɔ lɔ dú eci ankrankran.

²Nyɛ́n wá ny'edomɛ̀n esùva anwrɔn hɔ̀n léyi kɛ hán eci gbàngbàn nɔn y'ɛtɛ̀sɛ̀n; ɛnlɛtù ndɔ hɔ̀n lɔ, yɔ hɔ̀n léyi yɔ dú ɛyɔ̀n-bɔ̀ wúcɔ̀-dòmɛ̀n-wì ankà wú!

³Annanwɔrɛ mɛ̀n lɔ, bɔ́ de bɔ̀ ẅɛn annanwɔrɛ ankà wúcɔ̀-dòmɛ̀n-wì ankà wú nɔn, ɔmuhi bɔ̀ dú Ɔwɔ ci-bɩtan-bɔ̀ n'Ɛnhɛ́n Prɔnprɔn mɛ̀n, bɔ́ dú ɔmùan-gbuemɛ̀n kɩ bɔ̀ dú Zhezü Krisì tɛn, kɩ bɔ́ sɩ́ wá bɔ́ esɛ́ lɔ anwrɔnẅì nyànmàn wú nɔn.

⁴Tɛ́n, mɛ̀n mán me le bɩ́ m'esɛ́ mɛ̀n wá eci-hán ndɔ lɔ wú tɛ̀. Mɛ lɛ cɔ́ ankà zrɔ n'ɛhán mɛ̀n kɛ lɛ vrán ɔwrɔn nyàntɛn tɔ̀n.

⁵Ye wi mɛ̀n wúcɔ̀-domɛ̀n ɛnvra léyi ye bî mɛ̀n, n'ɛbi eẅiriemɛ̀n. Ebîemɛ̀n lɔ mɛ̀n dú Izraɛlɛ̀n-wrɔn, Bɛnzhamɛn mɛ̀n lɔ mɛ̀n, Ebre hɔ̀n mɛẅi-wrɔn. Ɔwɔ-nyànmàn-sùva-wá-wrɔn ankrànkràn diemɛ̀n lɔ, mɛ̀n ẅɛn Zhüifɛ̀n-bɔ̀ nyànmàn mɛ̀n hɛ́n,

⁶kɩ mɛ̀n dú ankà-tro-zri-wrɔn ɛnyànmàn ci-hán mɛ̀n, kɩ mɛ hán Ɔwɔ-fɛcüè-bɔ̀ ɛgbàn. Eci léyi dú ɛwúvà nyrɔnnan-ci, hɩ ɛnyànmàn wá nɔn, mɛ̀n dú n'ɛẅɛnmɛ̀n ɛshishiemɛ̀n.

⁷Tɛ́n eci-ankrankran-hán ndɔ lɔ hɩ mɛ tán vɔ̀nshɛ́ nɔn, mɛ nyan yɔ zɛtɛ̀ lɔ kɛ hán eci-zrɛ́n-ci Krisì kruhú.

⁸Kɩ mɛ nyan eci totɔtɔ̀n kɛ hán ɛzrɛ́n-ci, anvrɛn vri ndɔ lɔ zìwú: mɛ̀n nyri Zhezü Krisì m'ɛẅɛnwrɔn, nɛ́n léyi n'ɛkruhú mɛ́n tecüe mɛ́n dùku mɛ́n vɔ̀nshɛ́ ci; mɛ nyan eci ndɔ lɔ fɛn kɛ hán anwrɔ̀n-ci hɔ́, ô mɛ̀n cɔ́ Krisì,

⁹ô nɛ́n mɛhi bɔ́ dú ɔbɔ̀sɔ mɛ̀n kokroho. Mɛ́n sɩ́ vru ẅɛn ankà-tro le mɛ̀n dú ɛnyrɔnnan-wrɔn m'ɛnyànmàn ci-hán mɛ̀n. Krisì ankaẅì-bùtan-ẅɛn mɛ̀n de mɛ̀n dú ɛnyrɔnnan-wrɔn, ɛkɔrɛ̀levri ci-hán ndɔ lɛ́yi, Ɔwɔ hán kè dú ankàẅì-bùtan-ẅɛ̀n ci-tán nɔn.

¹⁰Eci lɔ fɛn léyi me ji nɔn, dú hɩ le me le nyri Krisì mán n'owúemɛ̀n-dùfrɔ́ kɔrɛ̀srɔn lɔ, mɛ̀n dú m'ɛgbànkàn hɔ̀n lɔ mɛ̀n, ô mɛ̀n dù mɛ̀n cá nɛ̀n, n'owù lɔ mɛ̀n,

¹¹ô mɛ̀n ẅɛn esɛ́ le ɛnbì tɔ̀n, mɛ̀n mán me le dú owú-bɔ̀ mɛ̀n, mɛ̀n vá ɔkɔrɛ-bɔ̀ mɛ̀n.

¹²Mɛ́n sɩ́ tro le zɛtɛn mɛ̀n cɔ́ ɛsànnyɔn-yri, kɩ mɛ́n sɩ́ bú tán le mɛ̀n zrɔ kokroho. Tɛ́n mɛ̀n dú ɛnlevri sùnan mɛ̀n, ô mɛ̀n hán kekrèmɛ̀n mɛ̀n cɔ́ n'ɔwɔɛ̀n-dì, ɔmuhi mɛ́n mumù mán Krisì di mɛ̀n ɛkɔrɛ̀ ɛwú nɔn.

¹³Hɔ̂, anwrɔn-nɛ́n-muan-ẅì hɔ̀n, mɛ́n sɩ́ tro le zɛtɛn mɛ̀n cɔ́ ɔwɔɛ̀n-dìɛ; tɛ́n mɛ hán eci tɔ̀n: eci léyi dú mɛ̀n ɛmɛẅi nɔn, me yuru n'ankà esùva kɩ mɛ hán kekrèmɛ̀n, ô mɛ̀n cɔ́ ndɔ léyi dú mɛ̀n ezì nɔn.

¹⁴Ɔmu lɔ de, mɛ srɛ́ hɔ́n ɛsànnyɔn-yri, ô mɛ̀n cɔ́ ɔwɔɛ̀n-dì léyi Zhezü Krisì bɩmɛ̀n, Ɔwɔ bi bɔ̀, bɔ̀ và cɔ́ anhobɩ́ nɔn.

¹⁵Bɔ́ lɛ fɛn lɔ bɔ̀ srɔ ɛcüìcüì Ɛnhɛ́n mɛ̀n, ke ji le ankà-tro ndɔ lɔ kè dú bɔ́ tɛn. Tɛ́n, ke dú kɛ nyɛ́n ẅɛn ankà-tro nyàntɛn, Ɔwɔ kɛ lɛ tán nyɛ̀n ɛyri-kàn hɩ wú.

¹⁶Eci lɔ fɛn mɛ̀n, ke ji le bɔ́ dú esùnan mɛ̀n bɔ̀ hɔ́n ezì, bɔ̀ bɩ́ ɛnlevri léyi bɔ́ bɩ hàn kɩ cɔ́ zɛtɛ̀ lɔ nɔn.

¹⁷Anwrɔn-nɛ́n-muan-ẅì hɔ̀n, nyɛ lɛ fɛn nyɛ́n hán kɛ̀ hán mɛ̀n hɔ́. Bɔ̀ tán sɛnpò; zɛtɛn nyɛ́n crɛ̀ nyan anwrɔn hɔ̀n léyi kɛ hán sɛnpò ndɔ lɔ ne ci nɔn.

¹⁸Mɛ́n gɔ̀ dɔ́ nyɛ̀n ankà ndɔ lɔ ɛnvra zrizri kɩ mɛ̀n vru mɛ dɔ́ nyɛ̀n ankà zri lɔ eyuwúemɛ̀n: anwrɔn bobrebe de kɛ nán egbri sù kɛ tán Krisì gban-hán-tɛ̀ lɔ nɔn.

¹⁹Yɔ srɛ́ hɔ́n y'ɛzrɛ́n mɛ̀n, ɔmuhi y'Ɔwɔ lɔ dú y'ɛmɛ̀ntɛ̀, yɔ dú ɔmùan-gbúemɛ̀n anvɛvrà ci-hán mɛ̀n, kɩ ɛnhibù ci hɔ̀n lɔ ankà kɩ dú yɔ ɛnkruemɛ̀n.

²⁰Tɛ́n bɔ́ tɛn, bɔ̀ dú anhobɩ́-bɔ̀, nanvrɛn lɔ de bɔ́ vrá, bɔ́ Ebɩ̀die-wrɔn, Ɛẅɛnwrɔn Zhezü Krisì kè dù kɛ̀ và nɔn.

²¹Nɛ lɛ crɛ bɔ́ ɛmian mán b'ɔwú-dùwrú lɔ ke le dù kɛ lɛ cá n'eci-zrɔ dùwrú lɔ, ɛkɔrɛ̀-srɔn léyi kɛ tán nɛ̀n eci lɔ fɛn ẅɛ̀n kɔrɛ̀levri nɔn mɛ̀n.