Read Alladian Filipɛ̀n anmàn-bɔ̀ 4 Bible Online

Filipɛ̀n anmàn-bɔ̀ 4 - Alladian bible

Filipɛ̀n anmàn-bɔ̀ 4

¹Anwrɔn-nɛ́n-muan-ẅì hɔ̀n anvrɛnvrɛn, mɛ wá kpankpan mɛ̀n vru mɛ̀n kán nyɛ̀n! Nyɛ́n dú mɛ́n pɔpüɛ̀ mán m'ɛnkru-sɔ́n-kɔ̀nka-ci! Zɛtɛ́n, annyran-anvrɛn hɔ̀n, nyàn ɔmu le ke ji le nyɛ́n nyɔn ɛnshishiemɛ̀n ny'ɛwúvà lɔ mɛ̀n, nyɛ́n mán Ɛẅɛnwrɔn mɛhi.

²Evodi mán Sɛntishɛ̀n, mɛ sɛ́n nyɛ̀n, me wú bi nyɛ̀n, ɛwúvà mùan kɛ̀ krɔn nyɛ̀n, nyɛ́n mán Ɛẅɛnwrɔn mɛhi ny'ɔbɔ̀sɔ̀ lɔ mɛ̀n.

³Kɩ vɛ́n mán, m'ɔmùan-zri-di-wrɔn mán m'ɛkɔrɛ̀-wá-wrɔn mɛ dɔ́ mɛ́n ɛ̀ wá yɔ ɛkɔrɛ̀; Yɔ mán mɛ̀n mɛhi annanwɔrɛmɛ̀n lɔ, bɔ́ kɔ́n anhà, ô Ɛmɛẅi ankà Ankrankran lɔ kè bonyì, hán ɔmu le bɔ̀ hán bɔ́ mán Kleman mán ɛkɔrɛ̀-wá-bɔ̀ ndɔ hɔ̀n lɔ fɛn léyi y'ebi dú ɔkɔrɛ wrú lɔ mɛ̀n nɔn.

⁴Nyɛ́n dú ɛnvra lɔ fɛn pɔ̀püɛ̀ mɛ̀n, ô nyɛ́n dú Ɛẅɛnwrɔn tɛn. Mɛ sán dɔ̀: Nyɛ́n dú pɔ̀püɛ̀ mɛ̀n!

⁵Ke ji le ny'ɛzrɔ lɔ kè di ebɩ anwrɔn lɔ fɛn zìwú. Ɛẅɛnwrɔn kɛ lɛ vá ɛnvra bruemɛ̀n.

⁶Ɛnkrɛ̀ta ke bɩ́ ku nyɛ̀n eci zriɛmɛ́n mán mɛ̀n, tɛ́n eci lɔ fɛn mɛ̀n lɔ, nyɛ́n sán Ɔwɔ ny'Ɔwɔ-sɛ̀n lɔ mɛ̀n, eci léyi kɛ ẅɛn nyɛ̀n ɛmian nɔn, ô nyɛ́n sán eci lɔ enyri-kùɛn-tán bɔrɛ mɛ̀n.

⁷Kɩ anwɔwɔ léyi dú Ɔwɔ mɛ̀n, hɩ ká ankà-tro lɔ fɛn ankɔrɛ̀ nɔn, kɛ lɛ hɛ́n ny'ɛnbɔrɛ hɔ̀n lɔ mán ny'ankà-tro hɔ̀n lɔ Zhezü Krisì bɔ̀sɔ̀ lɔ mɛ̀n.

⁸Ɔtrɔmɛ̀n lɔ, anwrɔn-nɛ́n-muan-ẅì hɔ̀n, ny'esùva wá kè dú eci léyi zrɔ, hɩ ẅɛn vɔ̀nshɛ́ ɛmrɛ́n mɛ̀n nɔn wú: eci lɔ fɛn léyi dú annanwɔrɛ, dú ɔwá, dú ɛnyrɔnnan, dú ɛfifi, dú ɛzrɔ mɛ̀n mán ɛmrɛ́n mɛ̀n nɔn.

⁹Eci léyi nyɛ́n cɔ̀, mán ankà-yé léyi nyɛ́n cɔ́ m'eyri, ndɔ lɔ fɛn, nyɛ́n ẅɛ̀n hɛ́n, ndɔ léyi nyɛ́n yá mɛ́n dɔ̀, mán hɩ léyi nyɛ́n kàn mɛ̀n hán. Kɩ Ɔwɔ léyi kɛ tán anwɔwɔ nɔn, mɛhi nye le dù.

¹⁰Mɛ̀n cɔ́ pɔpüɛ̀-bra vri m'ɛwúvà lɔ mɛ̀n, mɛ̀n mán Ɛẅɛnwrɔn mɛhi: ɔtrɔmɛ̀n lɔ, nyɛ́n vru nyɛ́n yé mɛ̀n ny'ɛcüɛ̀n. Ɛcüɛ̀n ndɔ lɔ dú nyɛ̀n edomɛ̀n, tɛ́n nyɛ vá cɔ́ ɛnvra ô nyɛ́n yé mɛ̀n nɛ́n.

¹¹Kɩ mɛ́n sɩ́ dɔ́ ankà ndɔ lɔ ɔmuhi eci kɛ ẅɛn mɛ̀n ɛmìan nɔn. Annanwɔrɛ mɛ̀n lɔ, mɛ̀n nyri ɔmu le mɛ hán mɛ bɔsɔ́ eci léyi dú mɛ tɛn nɔn.

¹²Me nyri ẅɛn ɛmian wúvà kɩ ɔmu zri lɔ, mɛ ẅɛn ɛnbɔrɛ-bru wúvà. Mɛ̀n nyri ɔmu le yɛ hán ye dú pɔpüɛ̀ mɛ̀n ɛyri lɔ fɛn mán eci lɔ fɛn mɛ̀n, ɛci mɛ́n ẅɛ̀n me zî hô, ɔmùanwù kɛ ẅɛn mɛ̀n hô, eci bobrebe mɛ́n ẅɛ̀n hô, ɛci kɛ ẅɛn mɛ̀n ɛmiàn hô.

¹³Mɛ lɛ kɛ́n ankà-jüedì lɔ fɛn ezì tɛ̀, Krisì léyi kɛ tán mɛ̀n ecüì nɔn, n'ɛkɔrɛ̀levri mɛ̀n.

¹⁴Tɛ́n nyɛ́n hán eci ankrankran, ɔmuhi nyɛ́n bɩ́ m'ɛgbànkàn hɔ̀n lɔ ɛcá nɔn.

¹⁵Nyɛ́n dùku nyɛ́n nyri Filipɛ̀n anmàn-bɔ̀: ɛnbì léyi mɛ̀n cɔhɔ́ Maseduhanɛ̀n kpɔsɔ wú, ɛnvra léyi Ɛmɛẅi ankà Ankrankran lɔ n'ɛdɔ́ ankà bukru nɔn, nyɛ́n dú Ɔwɔ-fɛcüè-bɔ̀ zri léyi wá mɛ̀n ɛkɔrɛ̀ nɔn, nyɛ́n zri kɩ nyɛ́n dú m'ɛkɔrɛ̀-wá ci-hán-bɔ̀.

¹⁶Ɛnvra léyi mɛ́n gɔ̀ dú Tɛsalonikɛ̀n anmàn nɔn, nyɛ́n yüre mɛ̀n vrán ɛdɛ̀n zri, ɛkɔrɛ̀-wá léyi me ji nɔn.

¹⁷Kè sɩ̀ dù hɩ le me ji mɛ̀n cɔ́ ɛkɔrɛ̀-wá; tɛ́n mɛ cüɛn ɔmu le, vɔ̀nshɛ́ kè dú ny'eci-hán lɔ mɛ̀n.

¹⁸Mɛ dɔ́ nyɛ̀n annanwɔrɛ mɛ̀n le, mɛ̀n cɔ́ eci lɔ fɛn léyi nyɛ́n yüre mɛ̀n nɔn; ɛncüɛn ká ankɔrɛ̀. Zɛtɛ̀ léyi Epafroditɛ̀n bɩ́ ny'ɛkɔrɛ̀-wá vá sɩ́ mɛ̀n nɔn, mɛ̀n ẅɛn eci lɔ fɛn léyi me ji nɔn. Ɛkɔrɛ̀-wá-ci ndɔ hɔ̀n lɔ, ndù hán ecice-ci tɔ̀n léyi nɛ́n ndɔ̀ kɛ ẅɛn ɛnniɛ̀n anvrɛnvrɛn nɔn, ecice tɔ̀n léyi Ɔwɔ ke bɩ hɩ kɛ zrɔ nɛ̀n nɔn.

¹⁹M'Ɔwɔ kɛ lɛ tán nyɛ̀n ɛkɔrɛ̀-wá lɔ fɛn n'ɛnnɛ̀ncüì-dì vri lɔ mɛ̀n Zhezü Krisì bɩmɛ̀n.

²⁰Eci-zrɔ kè dú bɔ́ Zi Ɔwɔ tɛn ɛnvra lɔ fɛn. Kè dú ɔmu lɔ.

²¹Zhezü Krisì bɩmɛ̀n ebinyan dú anwrɔn lɔ fɛn léyi dú Ɔwɔ-fɛcüè lɔ mɛ̀n nɔn tɛn. Anwrɔn-nɛ́n-muan-ẅì hɔ̀n léyi yɔ mɛhi bɔ́ dù nɔn, ke bi nyɛ̀n nyan.

²²Ankaẅì-bùtan-ẅɛn-bɔ̀ lɔ fɛn dú ɛnu lɔ nɔn, annannan le, yɔ hɔ̀n léyi dú ɛnhi wú nɛ̀ncüì lɔ n'eci-bɩ̀tan-bɔ̀ nɔn, ke bi nyɛ̀n nyan.

²³Ɛẅɛnwrɔn Zhezü Krisì shi-fù lɔ kè dú nyɛ lɛ fɛn ɛmɛ̀n.