Read Alladian Kɔlɔsèn anmàn-bɔ̀ 2 Bible Online

Kɔlɔsèn anmàn-bɔ̀ 2 - Alladian bible

Kɔlɔsèn anmàn-bɔ̀ 2

¹Me ji mɛ̀n tán nyɛ̀n nyɛ́n nyri ɛgbànkàn shishi léyi mɛ kán ny'ɛwú, nyɛ́n mán Laodise anmàn-bɔ̀ mɛhi mán anwrɔn nyàntɛn hɔ̀n léyi kè sɩ̀ nyri mɛ̀n antà-dùwrú mɛ̀n nɔn.

²Me ji le y'ɛnbɔrɛ lɔ, edùyì kè yɩ́ ɛmɛ̀n, yɔ dú ɛcüɛ̀n-bɔ̀sɔ mɛ̀n, ô yɔ di ɛnnɛ̀ncüì esɛ́ léyi annanwɔrɛ kruemɛ̀n-ẅɛ̀n kɛ tán nɔn mɛ̀n. Ɔmu lɔ de yɔ lɛ nyri Ɔwɔ ankɔ́nda ankà-bán-ankà lɔ, hɩ mɛ̀n kɛ dɔ̀ le Krisì dùku:

³n'ɛmɛ̀n de ankà-nyri nɛ̀ncüì-dì mán Ɔwɔ-nyrì bán ndù nɔn.

⁴Mɛ dɔ́ nyɛ̀n ankà ndɔ lɔ, ô Ɔwrɔn zriɛmɛ́n ke bɩ́ ci n'ɛfrɛ́n-ankà-dɔ̀ mrɛ́nmrɛ́n lɔ mɛ̀n kɛ hán nyɛ̀n nyɛ́n zɛ́n hán.

⁵Hɩ mán, ke dú kɛ, mɛ̀n sɩ̀ dú nyɛ̀n ɛmɛ̀n antà-dùwrúemɛ̀n hô, mɛ̀n dú nyɛ̀n ɛtɛ̀sɛ̀n ɛnhɛ́n mɛ̀n, kɩ mɛ̀n dú ɛnbɔrɛ-bruemɛ̀n, hɩ le mɛ kán nyɛ̀n nyɛ nyɔn ɛshishiemɛ̀n ny'ankaẅì-bùtan-ẅɛ̀n Krisì mɛ̀n nɔn.

⁶Ɔmu lɔ, ɔmuhi nyɛ́n shri Zhezü Krisì nyɛ́n bɩ dú ny'Ɛẅɛnwrɔn nɔn, nyɛ́n dú ɔbɔ̀sɔ mɛ̀n nyɛ́n mán nɛ́n mɛhi.

⁷Nyɛ́n di annyràn n'ɛmɛ̀n, ô nyɛ́n bɩ́ ny'ɛwúvà lɔ fɛn nyɛ́n wá nɛ̀n ɛmɛ̀n. Nyɛ́n nyɔn ɛnvra lɔ fɛn ɛshishiemɛ̀n ankaẅì-bùtan wú, kè ci ankà-yé léyi nyɛ́n cɔ̀ nɔn hɩ wú, ô enyri-kùɛn-tán kè dú nyɛ̀n ɛmɛ̀n.

⁸Nyɛ́n wá esùva, ɔwrɔn zriɛmɛ́n ke bɩ́ jrɛ́ nyɛ̀n ɛnkruemɛ̀n ɛfrɛ́n-ankà-dɔ̀ léyi ɔwrɔnẅì ankà-nyrì woro kɩ dú ɛmɛ̀n nɔn: ankà-nyrì ndɔ lɔ dú anwrɔnẅìemɛ̀n ankà-nyrì, nɛ̀n vru nɛ̀n dú ɛnhibù ɛnhɛ́n mɛ̀n cüì, kɩ nɛ̀n sɩ̀ dù Krisì mɛ̀n.

⁹Ɔmuhi eci lɔ fɛn léyi dú Ɔwɔ mɛ̀n nɔn, bɩ́ edùwrú Krisì mɛ̀n, kɩ sɔ́n ebɩ́ kokroho n'ɛmɛ̀n;

¹⁰kɩ n'ɛmɛ̀n de nyɛ́n cɔ́ eci lɔ fɛn kokroho nɔn, nɛ́n léyi nɛ́n kà shɛ́n ɛkɔrɛ̀-levri lɔ fɛn mán ɛnhɛ́n kɔrɛ̀-srɔn lɔ fɛn wú nɔn.

¹¹Nɛ́n mán nyɛ́n mɛhi ny'ɔbɔ̀sɔ̀ lɔ mɛ̀n, ye wi nyɛ̀n wúcɔ̀-domɛ̀n, kè sɩ̀ dù wùcɔ́-domɛ̀n-wì léyi anwrɔnẅì kɛ hán nɔn, tɛ́n wúcɔ̀-domɛ̀n-wì léyi dú Krisì yri và hɩ kɛ mrɛ́n bɔ́ edomɛ̀n gbàn lɔ sɔhɔ́ nɔn.

¹²Annanwɔrɛ mɛ̀n lɔ, ɛnvra léyi yɛ wá nyɛ̀n ɛnshi ɛnkru, nyɛ́n mán Krisì mɛhi yɛ wá nyɛ̀n ezhe-nànmàn mɛ̀n, kɩ nyɛ́n mán nɛ́n mɛhi nyɛ́n dú owúemɛ̀n nyɛ́n frɔ́, ɔmuhi nyɛ́n bú Ɔwɔ kɔrɛ̀-srɔn léyi bɩ́ nɛ̀n sɩ́ ɔkɔrɛ-bɔ̀ mɛ̀n nɔn ankà nyɛ́n tán ankaẅì nɔn.

¹³Ɛnbiɛhɛ́n vra lɔ, nyɛ́n wú ɛnhɛ́n mɛ̀n ny'ɛgbàn hɔ̀n lɔ kruhú, ɔmuhi nyɛ́n dú anwrɔn hɔ̀n léyi kè sɩ̀ nyrì Ɔwɔ nɔn. Tɛ́n zɛtɛ̀ lɔ, Ɔwɔ tán nyɛ̀n ɛwúvà wrù Krisì mɛ̀n. Nɛ̀n bɩ́ bɔ́ ɛgbàn hɔ̀n lɔ fɛn nɛ̀n ce bɔ̀.

¹⁴Nɛ̀n jrɛ́ ɛwrú ankà-dɔ̀ lɔ fɛn léyi kɛ bó bɔ̀ nwù hɩ kè sɩ̀ dù eci ankrànkràn kɛ̀ tán bɔ̀ nɔn: nɛ̀n jrɛ́ ɛwrú ankà-dɔ̀ ndɔ lɔ ɛgbàn-hán-tɛ̀ wú.

¹⁵Ɔmu lɔ de Ɔwɔ mrɛ́n ɛnhɛ́nmɛ̀n-kɔrɛ̀-levri-bɔ̀ mán ɛkɔrɛ̀-srɔn-bɔ̀ anhà-kɔ́n-ci edomɛ̀n sɔhɔ́; nɛ̀n bɩ́ yɔ nɛ̀n yé anwrɔn lɔ fɛn kɩ nɛ̀n srɔ yɔ anwɔn-mɛ̀n-wá-bɔ̀ kɩ yɔ dú n'Ɛnẅì ci-zrɔ sùnàn lɔ ɛmɛẅi.

¹⁶Ɔmu lɔ, nyɛ́n bɩ́ teze ɔwrɔn zriɛmɛ́n ke ci nyɛ̀n ɛmrɛ̀n ny'ɛci-zî, ny'ɛnshi-mì, ny'ɔkoran, okù wrù mán ɛnyànmán-bì ankà wú.

¹⁷Ndɔ lɔ fɛn dú ɛnnɛ̀ncüì ci-ẅɛn-ci hɔ̀n léyi dú ezì kɛ lɛ và nɔn, y'ɔwɔ̀n; tɛ́n Krisì de dú eci annanwɔrɛ nɔn.

¹⁸Nyɛ́n bɩ́ teze anwrɔn kɛ bɔ́ nyɛ̀n nwù, yɔ léyi yɔ cüɛn ɛntrɛ ci-hán y'edomɛ̀n ɛnhisɩemɛ̀n, kɩ yɔ cüe Ɔwɔ-kùyüre-bɔ̀ ankɔrɛ̀ ezìwúɛ, kɩ yɔ bɩ́ y'ɔwɔ-mɛ̀n-yri-kàn lɔ yɛ srɔ vɔ̀nshɛ́-ci nɔn. Anwrɔn ɔmu hɔ̀n lɔ, tutre woro yɩ́ yɔ ɛmɛ̀n, y'anwrɔnẅì ankà-tro ci-hán mɛ̀n;

¹⁹yɔ sɩ́ cɔ́ Krisì mɛhi yɔ yɛ́a, nɛ́n léyi nɛ̀n dú ɛnkru nɔn. Kɩ ndɔ lɔ mán Krisì kɔrɛ̀levriemɛ̀n de antà-dùwrú mumù lɔ fɛn kɛ cɔ́ ɛci-zî, kɩ ke dú ɔbɔ̀sɔ mɛ̀n nɛ́n mán esruyri hɔ̀n léyi dú anẅia mɛ̀n nɔn, kɩ nɛ sɔ́ kɛ hán ɔmu le Ɔwɔ ke ji nɔn.

²⁰Nyɛ́n mán Krisì mɛhi nyɛ́n wù, kɩ yɛ mrɛ́n nyɛ̀n ɛnhibù wú anhɛ́n hɔ̀n cüì tamɛ̀n yɛ sɔhɔ́. Zɛtɛn, cɛci kruhú kɛ ny'ɛwúvà ke dù kɛ hán le nyɛ́n dú ɛnhibù ndɔ lɔ n'ɛkɔrɛ̀levri wú, kɩ nye shrì yɛ wá ɛnyànmàn ɔmu lɔ yɛ tán nyɛ̀n:

²¹“E bɩ́ bɩ́ eci ndɔ lɔ”, “E bɩ́ sɔ́n eci ndɔ lɔ ɔmùan”, “E bɩ́ tɛ́ eci ndɔ lɔ ɛkɔrɛ̀”?

²²Yɔ dú ɛci hɔ̀n léyi ke ji le yɛ kɔ́n yɔ ye cüe ɛnvra léyi yɛ hán y'eci kɛ trɔ nɔn. Ndɔ lɔ dú anwrɔnẅì nyànmàn ci-hán mán n'ankà-yé.

²³Annanwɔrɛ mɛ̀n lɔ, ɛnyànmàn ndɔ hɔ̀n lɔ kɛ cá ankà-nyrì ci-hán, ɔmuhi yɛ dɔ́ ɔwrɔnẅì domɛ̀n sùva-wá, n'edomɛ̀n ɛnhi-sɩ́ mán n'antà-dùwrú ɛshishiemɛ̀n ẅɛ̀n ankà; tɛ́n yɔ sɩ̀ ẅɛ̀n vɔ̀nshɛ́ zriɛmɛ́n hɩ ká ẅɛn bɔ́ eci-gbangbàn hɔ̀n ankà-tro lɔ kɛ̀ sɔhɔ́ nɔn.