Read Alladian Kɔlɔsèn anmàn-bɔ̀ 3 Bible Online

Kɔlɔsèn anmàn-bɔ̀ 3 - Alladian bible

Kɔlɔsèn anmàn-bɔ̀ 3

¹Nyɛ́n mán Krisì mɛhi nyɛ́n dú owú-bɔ̀ mɛ̀n nyɛ́n vá ɔkɔrɛ-bɔ̀ mɛ̀n. Zɛtɛn, nyɛ́n ji ɛci hɔ̀n léyi dú anhobɩ́ ci, ɛyri léyi Krisì yɛ́ Ɔwɔ ezì-kɔrɛ̀a nɔn.

²Ɛci hɔ̀n léyi dú ɛwú nɔn, y'ankà kè dú ny'ankà shishi, tɛ́n ke bɩ́ dú yɔ hɔ̀n léyi dú ɛnu ɛnhi nɔn.

³Ɔmuhi nyɛ́n wù kɩ ny'ɛwúvà lɔ mán Krisì mɛhi bán dú Ɔwɔ mɛ̀n.

⁴Ny'ɛwúvà annanwɔrɛ lɔ dú Krisì, kɩ ɛnvra léyi nɛ lɛ srɔ nɔn, zɛtɛn nyɛ lɛ srɔ nyɛ́n mán nɛ́n mɛhi, kɩ nye le dú n'eci-zrɔ lɔ mɛ̀n.

⁵Nyɛ́n hán ɛci hɔ̀n lɔ fɛn léyi dú ɛnhibù wú ci nɔn, kè wú ny'ɛmɛ̀n: ɛwúvà gbàngbàn, ɛnbrámɛ̀n-ci, afùyà hɔ̀n, ankà-tro gbàngbàn mán kɔ̀tɛ (ɔmuhi kɔ̀tɛ dú antɛ̀-buri-sɛ̀n) nɔn.

⁶Ɛgbàn ndɔ hɔ̀n lɔ de ke sɩ́ Ɔwɔ mɛ̀nhyì-bɩ̀ ku anwrɔn hɔ̀n léyi kɛ kɛ́n nɛ̀n ezì nɔn ɛwú.

⁷Nyàn ɔmu lɔ de ny'esùnàn dú ɛnbiɛhɛ́n vra lɔ mɛ̀n, ɛnvra léyi ny'ewúva dú ɛgbàn ndɔ lɔ kɔrɛ̀levri wú nɔn.

⁸Tɛ́n zɛtɛ̀ lɔ, nyɛ́n kɔ́n eci ndɔ lɔ fɛn nyɛ́n cüe: ɛmɛ̀nhyì, ɛmɛ̀nhyì-wá mán anbɔrɛ-ci. Ke sɩ́ ji le ɔwra mán ankà-dɔ̀ gbàngbàn zriɛmɛ́n kè dú ny'ɔmùan lɔ mɛ̀n kɛ̀ srɔ ɛntrɛ.

⁹Nyɛ́n bɩ́ ẅɛn ɛyɔ̀n nyɛ́n tán ny'edomɛ̀n, ɔmuhi nyɛ́n teze ny'edùci gbànvri mán n'ɛci-hán hɔ̀n,

¹⁰kɩ nyɛ́n bɩ́ edù-ci wrù nyɛ́n ẅɛn edomɛ̀n: nyɛ́n dú ɛci wrù hɔ̀n léyi Ɔwɔ, bɔ́ ɛnhibù-hán-wrɔn, kɛ crɔn ɛnvra lɔ fɛn nɛ́n picɛ̀ mɛ̀n, ô nyɛ́n nyri nɛ̀n kokroho nɔn.

¹¹Ke sɩ̀ vrù dù vɔ̀nshɛ́ ci ke dú kɛ ye dú Zhüifɛ̀n-wrɔn, kɩ ye sɩ̀ dù Zhüifɛ̀n-wrɔn, kɩ ye wi mɛ́n wúcɔ̀-domɛ̀n, kɩ ye sɩ̀ wì mɛ́n wúcɔ̀-domɛ̀n, kɩ è dú owrú-kán-wrɔn, kɩ è sɩ̀ dù owrú-kán-wrɔn, kɩ è dú ɔwɔ̀n-wrɔn, kɩ è dú ɔwrɔn kora, tɛ́n ndɔ lɔ fɛn, hɩ le ẅɛn vɔ̀nshɛ́ nɔn, dú Krisì léyi dú bɔ̀ ɛmɛ̀n eci lɔ fɛn mɛ̀n nɔn.

¹²Nyɛ́n dú Ɔwɔ-fɛcüè mɛ̀n mɛ̀n-bɔ̀; Ɔwɔ mrɛ́n nyɛ̀n nbɩ kɩ nɛ cüɛn nyɛ̀n. Hɩ le kruhú de ke ji le ɛnbɔrɛ-wɔ̀, ɛcüɛn-bɔrɛ, edomɛ̀n-ɛnhi-sɩ́, anwɔwɔ mán ɛnbɔrɛ-ẅɛ̀n-hɛ́n kè dú ny'edòmɛ̀n-ẅɛn-ci.

¹³Nyɛ́n bɔ́sɔ ny'edomɛ̀n; kɩ ke dú kɛ ny'ɛmɛ̀n lɔ ɔwrɔn tɔ̀n ke tro le nɛ́n nyran hán nɛ̀n eci gbàngbàn, nyɛ́n bɩ ce ny'edomɛ̀n, hán ɔmu le Ɛẅɛnwrɔn ke bɩ́ ce nyɛ̀n nɔn hɔ́.

¹⁴Kɩ eci lɔ fɛn wú, nyɛ́n bɩ́ ɛcüɛ̀n nyɛ́n hɛ́n, ɛhɛ́ ndɔ léyi kɛ lɛ tán nyɛ̀n ɔbɔ̀sɔ kɔrɛ̀levri kokroho nɔn.

¹⁵Krisì, n'anwɔwɔ lɔ kɛ̀ ẅɛn ɛyri ny'ɛnbɔrɛ hɔ̀n lɔ mɛ̀n; annanwɔrɛ mɛ̀n lɔ, anwɔwɔ ndɔ lɔ mɛ̀n de Ɔwɔ bi nyɛ̀n, nyɛ́n dú edùwrú zri mɛ̀n ci. Nyɛ́n hán enyrì-kùɛn-tán ci.

¹⁶Ke ji le Krisì mùan-ankà-dɔ̀ mán n'ecüì-nɛ̀ncüì-dì lɔ fɛn, kɛ̀ sɔ́n ebɩ́ ny'ɛmɛ̀n. Nyɛ́n yé ny'edomɛ̀n ankà, ô nyɛ́n bi-dɔ́ ny'edomɛ̀n ankà-nyrì anvrɛnvrɛn mɛ̀n. Nyɛ́n bɩ́ ny'ɛnbɔrɛ lɔ fɛn mán ny'enyri-kùɛn-tán, nyɛ́n krɛ́ ɛmrɛ́n cɔ̀ mán eci-zrɔ cɔ̀ hɔ̀n léyi Ɛnhɛ́n Prɔnprɔn wá nyɛ̀n ɛnbɔrɛ mɛ̀n nɔn, nyɛ́n tán Ɔwɔ.

¹⁷Eci lɔ fɛn léyi nyɛ hán, ankà-dɔ́ mɛ̀n, eci-hán mɛ̀n, nyɛ́n hán nɛ̀n Ɛẅɛnwrɔn Zhezü bɩmɛ̀n, ô ny'Ɔwɔ kùɛn-tán kè ci n'eyri.

¹⁸Wúyɔ̀ nyɛ́n sɩ́ ny'edomɛ̀n ɛnhi nyɛ́n tán nyɛ́n cüì hɔ̀n, hán ɔmu le ke ji le nyɛ́n hán Ɛẅɛnwrɔn zìwú nɔn.

¹⁹Wúcɔ̀, nyɛ́n cüɛn nyɛ́n hi hɔ̀n, ô nyɛ́n bɩ́ yé yɔ ezì gbàngbàn.

²⁰Ɛẅì hɔ̀n, eci lɔ fɛn mɛ̀n, nyɛ́n wá nyɛ́n zi hɔ̀n mán nyɛ́n muan hɔ̀n, ɔmuhi nyàn eci léyi Ɛẅɛnwrɔn kɛ cüɛ̀n nɔn.

²¹Ɛẅì-nɛ́n-zi hɔ̀n, nyɛ́n bɩ́ wá ny'ɛẅì hɔ̀n ɛmɛ̀nhyì kɛ tán yɔ ɛnbɔrɛ-wù.

²²Anwɔ̀n-bɔ̀, eci lɔ fɛn mɛ̀n, nyɛ́n wá ny'ankà-yé-bɔ̀ léyi dú ɛnu ɛnhibù wú nɔn. Nyɛ́n bɩ́ hán eci lɔ ɛnvra léyi yɛ nán nyɛ̀n nɔn kɩ, ô yɔ cüɛn nyɛ̀n; tɛ́n nyɛ́n hán nɛ̀n ɛnbɔrɛ zri mɛ̀n anvrɛnvrɛn mɛ̀n, ɛwá léyi nyɛ́n ẅɛn Ɛẅɛnwrɔn wú nɔn, hɩ kruhú.

²³Ɔkɔ̀hɔ̀n totɔtɔ̀n léyi dú nyɛ tɛn nɔn, nyɛ́n hán nɛ̀n ɛnbɔrɛ anvrɛnvrɛn mɛ̀n kè dù kɛ̀ hán Ɛẅɛnwrɔn tɛn hɔ́, tɛ́n ke bɩ́ dú kɛ hán anwrɔnẅì tɛn.

²⁴Kè bru nyɛ̀n le, Ɛẅɛnwrɔn ke le bó nyɛ̀n anjakpà: nyɛ lɛ cɔ́ anvrɛn hɔ̀n léyi nɛ̀n hɛ́n n'anwrɔn hɔ̀n nɔn. Ɔmuhi Ankà-yé-wrɔn annanwɔrɛ léyi nye bɩ́ eci tán nɔn, dú Krisì.

²⁵Tɛ́n ɔwrɔn léyi kɛ hán eci gbàngbàn nɔn kɛ lɛ cɔ́ ɛgbàn-wɔ̀ɛn-dì, ɔmuhi Ɔwɔ ke sɩ́ cüɛn ɔwrɔn zriɛmɛ́n kɛ vrán nɛ́n nyran nɔn.