Read Alladian 1 Tesalonikɛ̀n anmàn-bɔ̀ 2 Bible Online

1 Tesalonikɛ̀n anmàn-bɔ̀ 2 - Alladian bible

1 Tesalonikɛ̀n anmàn-bɔ̀ 2

¹Anwrɔn-nɛ́n-muan-ẅì hɔ̀n, nyɛ́n dùku mán nyɛ́n nyrì le: kè sɩ̀ dù ankora de bɔ̀ hɔ̀n ny'anmàn nɔn.

²Nyɛ́n vru nyɛ́n nyrì le, ɛnvra cá mɛ̀n yɛ wora bɔ̀ kɩ yɛ hán bɔ̀ ɛgbàn Filipɛ̀n anmàn. Tɛ́n Ɔwɔ tán bɔ̀ edùyì bɔ̀ dɔ́ nyɛ̀n n'Ɛmɛẅi ankà Ankrankran lɔ, ezìkɛ̀n shishiemɛ̀n.

³Annanwɔrɛ mɛ̀n lɔ, ebi léyi bɔ́ bi anwrɔn lɔ fɛn nɔn, kè sɩ̀ dù ɛzɛ̀n mán ɛnbrá mɛ̀n ci-hán kruhú, kɩ bɔ́ sɩ́ ji bɔ̀ frɛ́n ɔwrɔn zriɛmɛ́n.

⁴Tɛ́n, ɛnvra lɔ fɛn bɔ́ dɔ́ ankà kɛ hán ɔmu le Ɔwɔ ke ji nɔn, ɔmuhi nɛ̀n ẅɛn bɔ́ esɛ́ kɩ nɛ̀n tán bɔ̀ n'Ɛmɛẅi ankà Ankrankran lɔ nɔn. Bɔ́ sɩ́ ji anwrɔnẅì cüɛ̀n, tɛ́n Ɔwɔ cüɛ̀n léyi kɛ wɔɛn bɔ́ ɛnbɔrɛmɛ̀n ankà-tro hɔ̀n lɔ nɔn.

⁵Nyɛ́n nyri anvrɛnvrɛn le, ɛnbì zriɛmɛ́n bɔ́ vá dɔ́ ɛfrɛ́n ankà; bɔ́ ankà-dɔ́ mɛ̀n lɔ, bɔ́ sɩ́ bán ɔkùa-cɔ́ ankà-dɔ̀, Ɔwɔ dú bɔ́ dalɛfuɛ-di-wrɔn.

⁶Bɔ́ sɩ̀ jì ɔwrɔnẅì zriɛmɛ́n mrɛ́n léyi ke le dú ny'eyri mán ɔwrɔn nyàntɛn yri kɛ̀ và;

⁷ɔmu lɔ kɩ bɔ́ lɛ wá ɛkɔrɛ̀levri-ci tɛ̀ bɔ̀ tán nyɛ̀n ɔmuhi bɔ́ dú Krisì kɔ̀hɔ̀n-wá-bɔ̀ nɔn. Tɛ́n, bɔ̀ ẅɛn ɛnbɔrɛ-wɔ̀ ny'ɛwú, hán ɛnẅì-nɛ́n-muan léyi kɛ wá n'ɛẅì hɔ̀n esùva nɔn.

⁸Bɔ̀ ẅɛn ny'ɛcüɛ̀n vri anvrɛnvrɛn kɩ bɔ̀ krɔn kpehɛ́n ô bɔ̀ dɔ́ nyɛ̀n Ɔwɔ Mɛẅi ankà Ankrànkràn lɔ, tɛ́n bɔ̀ vru bɔ̀ tán nyɛ̀n bɔ́ ɛwúvà mumù lɔ fɛn. Nyɛ́n srɔ bɔ́ edù-yɔ-ci!

⁹Anwrɔn-nɛ́n-muan-ẅì hɔ̀n, annanwɔrɛ mɛ̀n lɔ, bɔ́ ɛgbànkàn mán bɔ́ edùkà ke bru nyɛ̀n: bɔ̀ hán ɔkɔ̀hɔ̀n ɛnnyran mán ɛcɛ̀n ô bɔ́ bɩ́ srɔ ɛnlowru bɔ́ tán ɔwrɔn zriɛmɛ́n, ɔmu tɛ̀kɩ bɔ́ dɔ́ nyɛ̀n Ɔwɔ Mɛẅi ankà Ankrànkràn lɔ.

¹⁰Hɩ wú lɔ, nyɛ́n mán Ɔwɔ mɛhi nyɛ́n dú bɔ́ dalɛfuɛ-di-bɔ̀: bɔ́ esùnàn ny'ɛtɛ̀sɛ̀n, ankaẅì-bùtan-ẅɛn-bɔ̀, dú ɛfifi mán ɛnyrɔnnan léyi ye sɩ̀ cɔ́ eci-gbàbgbàn n'ɛwú nɔn mɛ̀n.

¹¹Nyɛ́n nyri ɔmu le bɔ́ mán nyɛ́n mɛhi bɔ́ eci-hán ndù hán ɛnẅì-nɛ́n-zi mán n'ɛẅì hɔ̀n mɛhi hɔ́.

¹²Bɔ̀ yɩ́ nyɛ̀n edù kɩ bɔ́ bi ɛnbɔrɛ bɔ̀ wá nyɛ̀n, bɔ̀ wá tán nyɛ̀n ɛshishiemɛ̀n le ny'esùnàn kɛ̀ cüɛn Ɔwɔ ɛvɛ̀, nɛ́n léyi ne bi nyɛ̀n ô nyɛ́n bru n'Ɛnnɛ̀ncüì-dúyri mán n'ecizrɔ lɔ mɛ̀n nɔn.

¹³Ɛnvra lɔ fɛn bɔ́ tán Ɔwɔ ɔkùɛn ankà nyàntɛn kruhú: ɛnvra léyi bɔ̀ dɔ́ nyɛ̀n Ɔwɔ-mùan-ankà lɔ nɔn, nyɛ́n die nɛ̀n nukùɛ kɩ nyɛ́n bɩ́ nɛ̀n, kɩ kè sɩ̀ dù kɛ̀ hàn anwrɔnẅì mùan-ankà hɔ́, tɛ́n nyɛ́n bɩ́ nɛ̀n hán Ɔwɔ-mùan-ankà hɔ́, eci léyi dú nɛ̀n annanwɔrɛ nɔn. Ɔmu lɔ de n'eci-hán dú nyɛ̀n ɛmɛ̀n, nyɛ́n ankaẅì-bùtan-ẅɛn-bɔ̀.

¹⁴Anwrɔn-nɛ́n-muan-ẅì hɔ̀n, nyɛ́n ci eci-hán zri lɔ wú hán Zhüde kpɔsɔ wú Ɔwɔ-fɛcüè-bɔ̀ léyi dú Ɔwɔ tɛ́n, kɩ bú Zhezü Krisì ankà tán ankaẅì nɔn. Nyɛ́n kán ɛgbàn nyɛ́n muan-ẅì hɔ̀n anmàn-zri-bɔ̀ tamɛ̀n, hán ɔmu le yɔ mán yɔ kán ɛgbàn Zhüifɛ̀n-bɔ̀ tamɛ̀n nɔn hɔ́.

¹⁵Anwrɔn ndɔ hɔ̀n lɔ di Ɛẅɛnwrɔn Zhezü mán Ɔwɔ-mùanwú-ankà-dɔ́-bɔ̀ owúemɛ̀n, kɩ yɔ kɔ́n bɔ̀ anhà. Ɔwɔ kè sɩ̀ ẅɛ̀n y'ɛcüɛ̀n kɩ yɔ dú anwrɔn lɔ fɛn gbri-bɔ̀!

¹⁶Yɔ ji yɔ sɩ́ bɔ̀, ô bɔ́ bɩ́ dɔ́ fɛcüè nyàntɛn hɔ̀n Ɛmɛẅi ankà Ankrànkràn léyi ke le bɩ́ yɔ kè die nɔn. Ɔmu lɔ de ɛgbàn bobrebe ndɔ hɔ̀n léyi yɔ hán nɔn, yɔ sán hán kɛ́n nɛ̀n ɛwú. Tɛ́n ɔtrɔmɛ̀n lɔ, Ɔwɔ mɛ̀nhyì dú yɔ ɛwú.

¹⁷Bɔ́ tɛn, anwrɔn-nɛ́n-muan-ẅì hɔ̀n, bɔ̀ cɔhɔ́ nyɛ̀n ɛmɛ̀n edùwrú-ẅia mɛ̀n ɛnvra cá mɛ̀n tɛ̀kɩ, kɩ annànwɔrɛ mɛ̀n lɔ kè sɩ̀ dù ɛnbɔrɛmɛ̀n annànwɔrɛ mɛ̀n. Tɛ́n bɔ̀ ẅɛn ny'ankà-tro, kɩ bɔ̀ bɩ́ edùyì, ô bɔ̀ vru bɔ̀ kán nyɛ̀n.

¹⁸Zɛtɛn bɔ̀ ji ɛyri ô bɔ̀ vru bɔ̀ hɔ́n ny'anmàn, kɩ mɛ̀n Pɔlɛ̀n mɛ̀n ji n'ɛhán-yri, wi ɛdɛ̀n zri. Tɛ́n Anwa-wrɔn kɛ́n bɔ̀ hɛ́n.

¹⁹Annanwɔrɛ mɛ̀n lɔ, nyɛ́n kɩ, kè sɩ̀ dù ɔwrɔn nyàntɛn zriɛmɛ́n, de nyɛ́n dú bɔ́ esɛ́, bɔ́ pɔpüɛ̀ mán bɔ́ ɛkɔ̀nkà ci-woroan-ci léyi kɛ lɛ tán bɔ̀ ɔmùan-gbù, bɔ́ Ɛẅɛnwrɔn Zhezü zìwú ɛnvra léyi nɛ lɛ và nɔn.

²⁰Hɛ̀ɛ̀, nyɛ́n dú bɔ́ eci-zrɔ mán bɔ́ pɔ̀püɛ̀-brà!