Read Alladian 1 Tesalonikɛ̀n anmàn-bɔ̀ 3 Bible Online

1 Tesalonikɛ̀n anmàn-bɔ̀ 3 - Alladian bible

1 Tesalonikɛ̀n anmàn-bɔ̀ 3

¹Ɔtrɔmɛ̀n lɔ, bɔ́ sɩ́ cɔ̀ ecüì bɔ̀ dù ɛvrá ndɔ lɔ mɛ̀n. Zɛtɛn bɔ̀ wá le, bɔ́ zri bɔ́ lɛ yɛ́ Atɛnɛ̀n anmàn,

²kɩ bɔ́ yüre nyɛ̀n Timote bɔ́ muan-ẅì; nɛ̀n dú Ɔwɔ-kɔ̀hɔ̀n-hán-wrɔn, Zhezü Krisì Mɛẅi ankà Ankrankran lɔ n'ɛdɔ́mɛ̀n. Ke ji le nɛ̀n wá nyɛ̀n ecüì edomɛ̀n, ô nɛ̀n yɩ́ nyɛ̀n edù ny'ankaẅì-bùtan lɔ mɛ̀n,

³ô ny'ɛmɛ̀n lɔ ɔwrɔn zriɛmɛ́n ke bɩ́ teze n'edomɛ̀n kɛ tán owú-gbànkàn léyi bɔ̀ cɔ́ Ɔwɔ-kɔ̀hɔ̀n-hán mɛ̀n nɔn kɛ kɔ́nká nɛ̀n. Nyɛ́n dùkú mán nyɛ́n nyrì le, owú-gbànkàn ndɔ hɔ̀n lɔ dú Ɔwɔ ankɔnda ci-hán lɔ mɛ̀n, bɔ́ ɛkruhú.

⁴Annanwɔrɛ mɛ̀n lɔ, ɛnvra léyi bɔ̀ dú nyɛ̀n ɛtɛ̀sɛ̀n nɔn, bɔ́ gɔ̀ dɔ́ nyɛ̀n le, bɔ́ lɛ srɔ́n owú-gbànkàn ɛsù; hɩ vra lɔ de ncɔ̀ nɔn, nyɛ́n nyri anvrɛnvrɛn.

⁵Hɩ le kruhú de, ɔmuhi ɛvrá ndɔ lɔ, mɛ́n sɩ̀ vru cɔ́ n'ɛkɔrɛ̀-levriɛ nɔn, mɛ̀n wá Timote ɔkɔ̀hɔ̀n kɛ̀ hɔ̀n kɛ̀ nyán ny'ankaẅì-bùtan-ẅɛ̀n. Me ku ɛnkrɛ̀ta le Anwa-wrɔn kɛ lɛ hán nyɛ̀n nyɛ́n bru ɛgbàn mɛ̀n, kɛ̀ hán tán b'ɔkɔ̀hɔ̀n gbànkàn lɔ fɛn kɛ̀ srɔ eci woro.

⁶Tɛ́n zɛtɛ̀ lɔ, Timote dú ny'eyri vru vá bɔ̀ ɛmɛ̀n, kɩ tán bɔ̀ ɛmɛẅi ankà ankrankran ny'ankaẅì-bùtan-ẅɛ̀n mán ny'ɛcüɛ̀n wú. Nɛ̀n dɔ́ bɔ̀ le nye tro ɛnvra lɔ fɛn bɔ́ ɛcüɛn-ankà kɩ nye ji le nyɛ́n vru nyɛ́n kán bɔ̀, hán ɔmu le, bɔ́ mán bɔ́ ji bɔ̀ vru bɔ̀ kán nyɛ̀n nɔn.

⁷Ɔmu lɔ de, bɔ́ ɛgbànkàn mán b'obòtò hɔ̀n lɔ fɛn wanzi, bɔ́ cɔ́ ɛnbɔrɛ-bi-wá ny'ɛwú, anwrɔn-nɛ́n-muan-ẅì hɔ̀n, ny'ankaẅì-bùtan-ẅɛ̀n kruhú.

⁸Zɛtɛ̀ lɔ bɔ̀ dú ɛwúvà wrù mɛ̀n, ɔmuhi nyɛ́n ẅɛn nɛ̀n ɛshishiemɛ̀n nyɛ́n hɛ́n nyɛ́n mán Krisì mɛhi ny'ɔbɔ̀sɔ̀ lɔ mɛ̀n nɔn.

⁹Anwɔntan de bɔ́ lɛ hán bɔ̀ tán b'Ɔwɔ ɔkùɛn anvrɛnvrɛn ny'ɛwú, ɔmuhi nyɛ́n tán bɔ̀ pɔpüɛ̀-brà lɔ fɛn n'ezìwú nɛ́n?

¹⁰Ɛnnyran mán ɛcɛ̀n, bɔ́ sán nɛ̀n edùyiemɛ̀n, nɛ̀n tán bɔ̀ ɛkɔrɛ̀levri bɔ̀ vru bɔ̀ kán nyɛ̀n edùwrú-ẅia mɛ̀n, ô bɔ̀ trɔ ny'ankaẅì-bùtan-ẅɛ̀n kɔ̀hɔ̀n-hán.

¹¹Ke ji le Ɔwɔ dùku, bɔ Zi, mán bɔ́ Ɛẅɛnwrɔn Zhezü kè srú bɔ̀ ɛnlevri léyi kɛ hɔ́n ny'anmàn nɔn esù!

¹²Ke ji le Ɛẅɛnwrɔn kɛ̀ hán tán ɛcüɛ̀n léyi nyɛ́n ẅɛn ny'edomɛ̀n mán anwrɔnẅì lɔ fɛn wú, kɛ̀ sàn sevri kè dù kɛ̀ cá ɛcüɛ̀n sɛnpò léyi bɔ̀ ẅɛn ny'ɛwú nɔn.

¹³Nɛ̀n tán ny'ɛnbɔrɛ hɔ̀n lɔ ecüì, ô nyɛ́n srɔ prɔnprɔn, ô Ɔwɔ bɔ́ Zi zìwú lɔ, bɔ̀ fì, ɛnvra léyi bɔ́ Ɛẅɛnwrɔn Zhezü kɛ lɛ và, nɛ́n mán anwrɔnẅì lɔ fɛn léyi dú nɛ tɛn nɔn. Kè dú ɔmu lɔ.