Read Alladian 1 Tesalonikɛ̀n anmàn-bɔ̀ 4 Bible Online

1 Tesalonikɛ̀n anmàn-bɔ̀ 4 - Alladian bible

1 Tesalonikɛ̀n anmàn-bɔ̀ 4

¹Ɔtrɔmɛ̀n lɔ, anwrɔn-nɛ́n-muan-ẅì hɔ̀n, bɔ̀ yé nyɛ̀n esùnan léyi ke ji le nyɛ́n ẅɛ̀n ô Ɔwɔ kɛ̀ cüɛn nyɛ̀n nɔn. Annànwɔrɛ mɛ̀n lɔ, esùnan ndɔ lɔ de nyɛ́n ẅɛ̀n nɔn. Tɛ́n zɛtɛ̀ lɔ, bɔ́ sán nyɛ̀n kɩ bɔ́ sɛ́n nyɛ̀n Ɛẅɛnwrɔn Zhezü bɩmɛ̀n: nyɛ́n vru nyɛ́n hán kɛ̀ vrán.

²Nyɛ́n nyri annanwɔrɛ mɛ̀n lɔ, ankà-yé hɔ̀n léyi bɔ̀ tán nyɛ̀n Ɛẅɛnwrɔn Zhezü bimɛ̀n nɔn.

³Nyàn eci léyi dú Ɔwɔ kɔrɛ̀-zì-ci-hán nɔn: ke ji le nyɛ́n dú prɔnprɔn mɛ̀n, ô nyɛ́n wá ny'edomɛ̀n esùva eci-gbangbàn-hán tɛ̀sɛ̀n.

⁴Ke ji le ɔwrɔnwrɔn kè nyrì bɩ́ ɛnnyɔnwrɔn prɔnprɔn mɛ̀n mán ɛwá mɛ̀n,

⁵nɛ́n bɩ́ teze n'edomɛ̀n nɛ́n hɔ́n ankà-tro gbàngbàn wú, kɛ hán anwrɔn hɔ̀n léyi kè sɩ̀ nyrì Ɔwɔ nɔn.

⁶Ankà ndɔ lɔ mɛ̀n, ke sɩ́ ji le ɔwrɔn kè hán nɛ́n muanẅì eci gbàngbàn, ô kɛ̀ jrɛ́ n'ɛkɔrɛ̀levri-ci. Bɔ́ gɔ̀ dɔ́ nyɛ̀n ankà ndɔ lɔ, kɩ bɔ́ bi-dɔ́ nyɛ̀n ɛshishiemɛ̀n: Ɛẅɛnwrɔn kɛ lɛ hán anwrɔn hɔ̀n léyi kɛ hán ɛci ndɔ hɔ̀n lɔ nɔn ɛgbàn.

⁷Ɔwɔ kè sɩ̀ bi bɔ̀, ô bɔ̀ dú ɛwúvà gbàngbàn-ẅɛn mɛ̀n, tɛ́n bɔ̀ dú prɔnprɔn mɛ̀n.

⁸Hɩ le kruhú de, ɔwrɔn léyi kɛ kɔ́n ankà-yé ndɔ hɔ̀n lɔ ke die nɔn, nɛ́n sɩ́ kɔ́n ɔwrɔn zriɛmɛ́n nɛ́n diɛ, tɛ́n Ɔwɔ léyi kɛ tán nyɛ̀n n'Ɛnhɛ́n Prɔnprɔn de nɛ kɔ́n die nɔn.

⁹Ɔwrɔn-nɛ́n-muan-ẅì cüɛ̀n ankà lɔ, ke sɩ́ ji le ye merɛ́n nyɛ̀n owrú, ɔmuhi annanwɔrɛ mɛ̀n lɔ, Ɔwɔ yé nyɛ̀n nyɛ́n dùku ny'edomɛ̀n cüɛ̀n.

¹⁰Ɛcüɛ̀n ndɔ de nye yé tán nyɛ́n muan-ẅì hɔ̀n lɔ fɛn léyi dú Maseduhanɛ̀n kpɔsɔ wú nɔn. Tɛ́n bɔ́ yɩ́ nyɛ̀n edù, anwrɔn-nɛ́n-muan-ẅì hɔ̀n, nyɛ́n vru nyɛ́n hán kɛ̀ vrán ndɔ lɔ.

¹¹Anwɔwɔ-wúvà-ẅɛ̀n kè dú ny'ankà shishi, nyɛ́n dùku nyɛ́n wá ny'ɛci hɔ̀n esùva, ô nyɛ́n cɔ́ ny'ɛkɔrɛ̀-kɔhɔ̀n-hán ci-zî, hán ɔmu le bɔ́ gɔ̀ dɔ́ nyɛ̀n nɔn hɔ́.

¹²Ɔmu lɔ de ny'esùnàn kɛ lɛ wá tán ny'ɛwá, anwrɔn léyi kè sɩ̀ dù Krisì-sɛ̀nkɛn-bɔ̀ nɔn y'ɛtɛ̀sɛ̀n, kɩ nyɛ́n sɩ̀ srɔ ɔwrɔn zriɛmɛ́n lowru.

¹³Anwrɔn-nɛ́n-muan-ẅì hɔ̀n, bɔ́ ji le nyɛ́n nyri ankà annanwɔrɛ léyi dú owú-bɔ̀ ankà wú, ô nyɛ́n bɩ́ dú obòto mɛ̀n kɛ hán anwrɔn hɔ̀n léyi kè sɩ̀ ẅɛ̀n esɛ́ nɔn.

¹⁴Bɔ bú tán le Zhezü nwù kɩ dú owúemɛ̀n frɔ́; ɔmu zri lɔ, bɔ́ bú tán le Ɔwɔ ke le sɩ́ anwrɔn hɔ̀n léyi ke le wù nɔn, yɔ mán Zhezü mɛhi ɔkɔrɛ-bɔ̀ mɛ̀n ke dú kɛ yɔ bú n'ankà yɔ tán ankaẅì.

¹⁵Annanwɔrɛ mɛ̀n lɔ, nyàn ankà léyi bɔ́ dɔ́ Ɛẅɛnwrɔn ankà-yé tɔ̀n wú nɔn: bɔ́ ɛmɛ̀n lɔ, anwrɔn hɔ̀n léyi ke le dú ɔkɔrɛ-bɔ̀ mɛ̀n ɛnvra léyi Ɛẅɛnwrɔn kɛ lɛ và nɔn, yɔ sɩ̀ ẅɛn vɔ̀nshɛ́ kɛ̀ vrán yɔ hɔ̀n léyi nwù nɔn.

¹⁶Yɛ lɛ yá ɛnyànmàn-tán bobo tɔ̀n, Ɔwɔ-kùyüre-wrɔn cüìcüì sùva mán Ɔwɔ brɛ̀n kù-dì, kɩ Ɛẅɛnwrɔn dùku ke le dú anhobɩ́ kɛ lɛ kàkɛ. Anwrɔn hɔ̀n léyi wú Krisì ankàẅì-bùtan lɔ mɛ̀n nɔn, yɔ le dú kpàkpà-bɔ̀ yɔ vá ɔkɔrɛ-bɔ̀ mɛ̀n;

¹⁷zɛtɛn, bɔ́ léyi bɔ́ le dú ɔkɔrɛ-bɔ̀ mɛ̀n hɩ vra lɔ nɔn, ye le bɩ́ bɔ̀, yɔ mán bɔ́ mɛhi ye ci ɛnwì-gbú granmɛ̀n, ô bɔ̀ srɔ́n Ɛẅɛnwrɔn ɛsù ɔwràn mɛ̀n. Kɩ ɔmu lɔ, bɔ́ le dú bɔ́ mán Ɛẅɛnwrɔn mɛhi ɛnvra lɔ fɛn.

¹⁸Zɛtɛn nyɛ́n bi ɛnborɛ nyɛ́n wá ny'edòmɛ̀n ankàdɔ̀ ndɔ hɔ̀n lɔ wú.