Read Alladian 2 Tesalonikɛ̀n anmàn-bɔ̀ 3 Bible Online

2 Tesalonikɛ̀n anmàn-bɔ̀ 3 - Alladian bible

2 Tesalonikɛ̀n anmàn-bɔ̀ 3

¹Ɔtrɔmɛ̀n lɔ, anwrɔn-nɛ́n-muan-ẅì hɔ̀n, nyɛ́n sɛ̀n nyɛ́n tán bɔ̀, ô Ɛẅɛnwrɔn mùan-ankà-dɔ̀ lɔ ke bonyi kpràkprà, ô kɛ̀ cɔ́ ɛmrɛ́n, hán ɔmu le eci-hán ndɔ lɔ dú nyɛ̀n ɛmɛ̀n nɔn.

²Nyɛ́n vru nyɛ́n sɛ́n Ɔwɔ kɛ̀ mrɛ́n bɔ̀ anwrɔn gbàngbàn hɔ̀n mán anbɔrɛ-bɔ̀ tamɛ̀n kɛ̀ sɔhɔ́. Ɔmuhi kè sɩ̀ dù anwrɔn lɔ fɛn de kè shrì ankaẅì-bùtan ankà lɔ kè bɩ́ɛ nɔn.

³Tɛ́n Ɛẅɛnwrɔn dú ɔmùan-zri-di-wrɔn. Nɛ lɛ tán nyɛ̀n edùsɔ kɩ nɛ lɛ mrɛ́n nyɛ̀n Ɔwrɔn gbàngbàn tamɛ̀n nɛ̀n sɔhɔ́.

⁴Kɩ Ɛẅɛnwrɔn kɛ tán bɔ̀ esɛ́ ny'ɛwú: bɔ̀ ẅɛn esɛ́ le nyɛ hán, kɩ nye le dú ɛmɛ̀n nyɛ́n hán eci léyi bɔ̀ wá bɔ̀ tán nyɛ̀n nɔn.

⁵Ɛẅɛnwrɔn kɛ̀ ẅɛn ny'ɛnbɔrɛ hɔ̀n lɔ kè dú Ɔwɔ cüɛn mɛ̀n mán ɛnbɔrɛ-ẅɛn-hɛ́n léyi Krisì kɛ tán nɔn mɛ̀n.

⁶Anwrɔn-nɛ́n-muan-ẅì hɔ̀n, bɔ́ sán nyɛ̀n ndɔ lɔ Ɛẅɛnwrɔn Zhezü Krisì bɩmɛ̀n: nyɛ́n mrɛ́n ny'edomɛ̀n nyɛ́n sɔhɔ́ anwrɔn-nɛ́n-muan-ẅì hɔ̀n ɛjɛ-bɔ̀ lɔ y'ɛtɛ̀sɛ̀n, yɔ léyi yɔ sɩ́ hán ankà-yé léyi bɔ̀ tán yɔ nɔn hɩ ci.

⁷Nyɛ́n dùku mán nyɛ́n nyri ɔmu le, ke ji le nyɛ́n bɩ́ bɔ́ sɛnpò lɔ. Ɔmuhi bɔ̀ sɩ̀ yɛ̀ ɛjɛmɛ̀n ny'anmàn lɔ nɔn.

⁸Bɔ̀ sɩ̀ sàn ɔwrɔn zriɛmɛ́n ɛci-zî kora; tɛ́n, bɔ̀ shri ɛgbànkàn mán edùkà, bɔ̀ hán ɔkɔ̀hɔ̀n ɛnnyran mán ɛcɛ̀n, ô bɔ́ bɩ́ srɔ ɛnlowru bɔ́ tán ɔwrɔn zriɛmɛ́n ny'ɛmɛ̀n lɔ.

⁹Bɔ̀ hán eci ndɔ lɔ, kè sɩ̀ dù hɩ le bɔ́ sɩ̀ ẅɛ̀n ny'ɛkɔrɛ̀-wá kɔrɛ̀levri, tɛ́n bɔ́ ji bɔ̀ tán nyɛ̀n sɛnpò léyi nyɛ lɛ nán esù ɛwú nɔn.

¹⁰Annanwɔrɛ mɛ̀n lɔ, ɛnvra léyi bɔ̀ dú ny'anmàn nɔn, bɔ́ bi-dɔ́ nyɛ̀n le: “Ɔwrɔn léyi ke sɩ́ ji kɛ hán ɔkɔ̀hɔ̀n nɔn, ke sɩ́ ji le nɛ̀n zî ɛci mán.”

¹¹Tɛ́n bɔ́ yá le ny'ɛmɛ̀n lɔ, ndɔ hɔ̀n ẅɛn ɛjɛ́-wúvà, ke sɩ́ hán eci zriɛmɛ́n, ke dú kɛ kè sɩ̀ dù anwrɔn nyàntɛn ankà-mɛ̀n-bru kɔ̀hɔ̀n kɩ yɔ hán.

¹²Anwrɔn ɔmu hɔ̀n lɔ bɔ́ sán yɔ, bɔ́ wá tán yɔ eci-hán ndɔ lɔ Ɛẅɛnwrɔn Zhezü Krisì bɩmɛ̀n: yɔ hán ɔkɔ̀hɔ̀n ɛnvra lɔ fɛn, ô yɔ cɔ́ y'ɔmùanmɛ̀n ci-zî.

¹³Tɛ́n, nyɛ́n, anwrɔn-nɛ́n-muan-ẅì hɔ̀n, edù ke bɩ́ ká nyɛ̀n anvrɛn-hán mɛ̀n.

¹⁴Ke dú kɛ ɔwrɔn tɔ̀n ke sɩ́ wá ɛnyànmàn hɔ̀n léyi bɔ́ tán owrú ndɔ lɔ mɛ̀n nɔn, nyɛ́n wá ndɔ lɔ owrúemɛ̀n, ô nyɛ́n cɔhɔ́ nɛ̀n ɛtɛ̀sɛ̀n, ô anvɛvrà kè dú nɛ tɛn.

¹⁵Kɩ, nyɛ́n bɩ́ hán nɛ̀n egbri-wrɔn ci, tɛ́n nyɛ́n bi-dɔ́ nɛ̀n ɔwrɔn-nɛ́n-muan-ẅì mɛ̀n.

¹⁶Ɛẅɛnwrɔn léyi dú anwɔwɔ shi-bɛ nɔn, kɛ̀ tán nyɛ̀n nɛ́n dùku anwɔwɔ ɛnvra lɔ fɛn mɛ̀n mán eci lɔ fɛn mɛ̀n. Ɛẅɛnwrɔn kè dú nyɛ̀n ɛmɛ̀n.

¹⁷Mɛ́n dùku de mɛ̀n merɛ́n owrú ndɔ lɔ nɔn: Pɔlɛ̀n binyan. Nyàn ɔmu lɔ de me wá m'ɛwrú hɔ̀n lɔ fɛn ɛkɔrɛ̀ ɛmɛ̀n nɔn; Ɔmu lɔ de me merɛ́n owrú nɔn.

¹⁸Bɔ́ Ɛẅɛnwrɔn Zhezü Krisì nboafɔ̀n lɔ kè dú nyɛ̀n ɛmɛ̀n.