Read Alladian Kpàkpà timote 1 Bible Online

Kpàkpà timote 1 - Alladian bible

Kpàkpà timote 1

¹Ebinyan ndɔ lɔ dú Pɔlɛ̀n yri kɛ và, nɛ́n léyi nɛ̀n dú Zhezü Krisì sɛnkɛn-wrɔn, Ɔwɔ, bɔ́ ebɩdie-wrɔn mán Zhezü Krisi, bɔ́ esɛ́-wrɔn kɔrɛ̀levriemɛ̀n nɔn.

²Ebinyan ndɔ lɔ dú Timote tɛn, nɛ́n léyi nɛ̀n dú m'ɛnẅì annanwɔrɛ ankaẅìbùtan mɛ̀n nɔn: Ɔwɔ léyi dú bɔ́ Zi mán Zhezü Krisì, bɔ́ Ɛẅɛnwrɔn kɛ̀ tán mɛ́n nboafɔ̀n, ɛgbán-bɩ-ce mán anwɔwɔ.

³Ɛ̀ yɛ́ Efɛzɛ̀n anmàn hán ɔmu le mɛ̀n wá tán mɛ́n, ɛnvra léyi mɛ́n dù mɛ hɔ́n Maseduanɛ̀n kpɔsɔ wú nɔn. Nanvrɛn lɔ anwrɔn dù ke yé anhyɔ̀n wɔ ankà kɩ ke ji le ɛ̀ wá tán, yɔ kɛ́n ɔmùan yɔ hɛ́n.

⁴Ɛ̀ dɔ́ yɔ, yɔ tecüe edùgɔ̀n ankà-dɔ̀ ndɔ hɔ̀n lɔ mán yɔ nancüì hɔ̀n bɩ́ sheshe hɔ̀n lɔ ankà; ankà ndɔ hɔ̀n lɔ ke sɩ́ ecüìwrɔn kɩ, yɔ sɩ́ hán Ɔwɔ ankɔnda ankà ci léyi kɛ tán ɛnkrukɔrɛ̀ ankaẅìbùtan-ẅɛn mɛ̀n nɔn.

⁵Eci wá tán ndɔ lɔ, kɛ tán ɛcüɛ̀n léyi ke dú ɛnbɔrɛ fifiemɛ̀n, wàwúyɛ anvrɛnvrɛn mɛ̀n mán ankaẅìbùtan annanwɔrɛ mɛ̀n kɛ̀ và nɔn.

⁶Anwrɔn ndɔ hɔ̀n cɔ́hɔ́ esùnan anvrɛnvrɛn ndɔ lɔ wú kɩ zrɛ́n y'edomɛ̀n ɔbrɔ̀sà cüìwrɔn mɛ̀n.

⁷Yɔ bú y'edomɛ̀n yɔ hán ankà-yé-bɔ̀ eci léyi kɛ crɛ nyan Ɔwɔ nyanmàn ankà wú, tɛ́n yɔ sɩ́ yá, kɩ yɔ sɩ́ nyriɛn ankà léyi yɔ dɔ́ esɛ́ mɛ̀n nɔn, n'ɛwú ankà anvrɛnvrɛn.

⁸Bɔ́ nyri ɔmu le ɛnyanmàn zrɔ, ke dú kɛ yɛ hán n'ɛkɔrɛ̀-zì-ci.

⁹Ke ji le kè bru bɔ̀ le ye sɩ̀ wá ɛnyanmàn yɛ tàn anwrɔn hɔ̀n léyi dú ɛnyrɔnnan mɛ̀n nɔn, tɛ́n yɛ hán ɛnyanmàn kè dú eci-gbàngbàn-hán-bɔ̀ mán ɛnkru shishi bɔ̀ tɛn, kè dú anbɔrɛ-bɔ̀ mán ɛgbàn-hán-bɔ̀ tɛn, kè dú anwrɔn hɔ̀n léyi kè sɩ̀ ẅɛ̀n Ɔwɔ mán eci prɔnprɔn wá nɔn tɛn, kè dú anwrɔn hɔ̀n léyi ke wri yɔ zi mán yɔ muan hɔ̀n, kè dú anwrɔn wri bɔ̀,

¹⁰kè dú ɛwúvà gbàngbàn-ẅɛn-bɔ̀, wúcɔ̀ hɔ̀n léyi ke dɛ́ y'edomɛ̀n, anwrɔn hɛ́-bɔ̀, anhyɔ̀n-bɔ̀ mán anwrɔn hɔ̀n léyi kɛ wá ɛyɔ̀n mùan, mán anwrɔn hɔ̀n léyi kɛ hán eci nyantɛn kɛ kɛ́n ankà-yé annanwɔrɛ ezì nɔn tɛn.

¹¹Ankà-yé ndɔ lɔ yɛ cɔ́ nɛ̀n Ɛmɛẅi ankà Ankrankran léyi yɛ wá mɛ̀n antamɛ̀n, hɩ dú eci-zrɔ-Wɔ yri nvà, nɛ́n léyi nɛ̀n dú ɛnbɔrɛbru-shi-bɛ́ nɔn.

¹²Mɛ tán Zhezü Krisì bɔ́ Ɛẅɛnwrɔn ɔkùɛn, nɛ́n léyi nɛ̀n tán mɛ̀n ecüì léyi mɛ́n cɔ̀ mɛ̀n hán m'ɔkɔ̀hɔ̀n lɔ nɔn. Mɛ tán nɛ̀n ɔkùɛn, nɛ́n léyi nɛ̀n ẅɛn m'esɛ́, kɩ nɛ̀n bɩ́ mɛ̀n n'eci-bɩtan kɔ̀hɔ̀n lɔ mɛ̀n nɔn,

¹³kɩ nɛ̀n sɩ̀ crɛ̀ nyan ɛnbìɛhɛ́n ci gbàngbàn léyi mɛ̀n hán nɛ̀n, mán ɔwra léyi mɛ̀n ku nɛ̀n ɛwú nɔn. Tɛ́n Ɔwɔ nyri mɛ̀n ɛnhyɔ̀bɔ̀, ɔmuhi mɛ̀n sɩ̀ ẅɛ̀n ankaẅìbùtan, kɩ mɛ́n sɩ́ nyri eci léyi mɛ hán nɔn.

¹⁴Bɔ́ Ɛẅɛnwrɔn ku mɛ̀n nɛ́n nboafɔ̀n bobrebe ɛwú, nɛ̀n tán mɛ̀n ankaẅìbùtan mán ɛcüɛ̀n léyi dú Zhezü Krisì mɛhi b'ɔbɔ̀sɔ̀ lɔ mɛ̀n nvà nɔn.

¹⁵Nyàn ankà annanwɔrɛ tɔ̀n léyi anwrɔn lɔ fɛn ke le shrì kè bɩ nɔn: Zhezü Krisì vá ɛnhibù lɔ wú, ô kè bɩ́ ɛgbàn-hán bɔ̀ kè die. Mɛ̀n krɛgbàn mɛ̀n vrán ɛgbàn-hán-bɔ̀ lɔ fɛn,

¹⁶tɛ́n hɩ le kruhú de Ɔwɔ nyri mɛ̀n ɛnhyɔ̀bɔ̀ nɔn: nɛ̀n ji ɔmu le, Zhezü Krisì kè yé le mɛ̀n dú ɛgbàn-hán-wrɔn vri, hɩ le kruhú de ne yé n'ɛnbɔrɛ-ẅɛ̀n-hɛ́n kè dú sɛnpò kɛ tán anwrɔn hɔ̀n léyi ɛnbi tɔ̀n, ke le bú n'ankà kɛ̀ tán ankaẅì, kɩ kɛ lɛ cɔ́ ɛwúvà léyi ke sɩ́ trɔa nɔn.

¹⁷Ɛnnɛ̀ncüì léyi kè sɩ̀ ẅɛ̀n ɔtrɔ, ke sɩ́ wúɛ, ye sɩ́ kán kɩ dú Ɔwɔ zri nɔn, ɛmrɛ́n mán eci-zrɔ dú nɛ tɛn ɛnvra lɔ fɛn! Kè dú ɔmu lɔ.

¹⁸Timote, m'ɛnẅì, mɛ tán mɛ́n eci-wá-tán ndɔ léyi dú Ɔwɔ-mùan-wú ankà-dɔ̀, hɩ yɛ dɔ́ ɛnbìɛhɛ́n vra ku mɛ́n ɛwú nɔn. Ke ji le ankà-dɔ̀ ndɔ hɔ̀n lɔ kè dú v'ecüì anhà ankrankran kɔ̀n léyi è dú ɛmɛ̀n nɔn,

¹⁹Ɛ̀ ẅɛn ankaẅì-bùtan mán wàwúyɛ ankrankran ɛ̀ hɛ́n. Anwrɔn janbɔ̀ krɔ kè sɩ̀ die yɔ wàwúyɛ nukùɛ, hán tán kɩ y'ankaẅì-bùtan lɔ sɔ́n hɔ́n ɛnshiemɛ̀n.

²⁰Y'ɛmɛ̀n lɔ yɛ cɔ́ Imene mán Alɛksandrɛ̀n; mɛ̀n bɩ́ yɔ mɛ̀n tán Anwarɔn, ô yɔ ván ɔmu le ke ji le yɛ wá Ɔwɔ nɔn.