Read Alladian Kpàkpà timote 2 Bible Online

Kpàkpà timote 2 - Alladian bible

Kpàkpà timote 2

¹Ɛnvrapkà lɔ, mɛ wá tán le yɛ sán Ɔwɔ eci, yɛ sɛ́n nɛ̀n, ye wùbi nɛ̀n, ô yɛ tán nɛ̀n ɔkùɛn kè dú ɛci kɔrɛkɔrɛ lɔ fɛn tɛn.

²Ke ji le yɛ sɛ̀n tán ɛnnɛncüì hɔ̀n mán ɛyri-ẅɛn-bɔ̀, ô bɔ̀ ẅɛn ɛwúvà wɔwɔ léyi ɛwá dú ɛmɛ̀n, b'Ɔwɔ tɛ̀sɛ̀n và anvrɛnvrɛn mɛ̀n.

³Nyàn eci léyi zrɔ, kɩ kɛ cüɛn Ɔwɔ ɛvɛ̀, bɔ́ Ebɩ̀die-wrɔn

⁴léyi ke ji le anwrɔnẅì lɔ fɛn kɛ̀ cɔ́ ebɩ̀die, ô yɔ nyri eci léyi dú ankà annanwɔrɛ nɔn.

⁵Ɔmuhi Ɔwɔ zri kɩ dù kɩ ɔwrɔn zri Zhezü Krisì dú Ɔwɔ mán anwrɔnẅì granmɛ̀n nyɔnwrɔn, ɔwrɔnẅì Zhezü Krisì

⁶léyi srɔ n'edomɛ̀n anwɔba-ci, ô nɛ̀n srú bɔ́ lɛ fɛn nɛ̀n die. Ɔmu lɔ de ɛnvra léyi yɛ wá nɔn, nɛ̀n yé tán le, Ɔwɔ ke ji le anwrɔnẅì lɔ fɛn kɛ̀ cɔ́ ebɩdie nɔn.

⁷Ndɔ lɔ kruhú de, yɛ wá mɛ̀n ɔkɔ̀hɔ̀n-wá-wrɔn léyi ke ji le kè yé anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, ankaẅì-bùtan mán annànwɔrɛ ankà. Mɛ́n sɩ́ ẅɛn ɛyɔ̀n, mɛ dɔ́ annànwɔrɛ ankà.

⁸Me ji le eci lɔ fɛn mɛ̀n, anwrɔnẅì kɛ̀ sɛ̀n, yɔ sɩ́ ɛmàn fifi hɔ̀n ɛwú, ɛmɛ̀nhyì mán ecüìwrɔn hɛ́n ke bɩ́ dú ɛmɛ̀n.

⁹Me ji le wúyɔ̀ mán kɛ ẅɛn ɛci edomɛ̀n anvrɛnvrɛn, ɔwá mán edomɛ̀n ɛnhi-sɩ́ kè dú ɛmɛ̀n; yɔ bɩ́ há ɛnkru vɛnvɛn, yɔ bɩ́ wá ansìkɛ mán ɛbrɛci brobebe edomɛ̀n, kɩ edomɛ̀n ẅɛn-ci mán ke bɩ́ dú eci-gbrɛ́n-ci,

¹⁰tɛ́n y'eci-hán kè dú anvrɛnvrɛn, kɛ̀ cá wúyɔ̀ hɔ̀n léyi ẅɛn Ɔwɔ wá nɔn.

¹¹Ke ji le wúyɔ̀ kɛ̀ cɔ́ ankà-yé ɔmùan-kɛ̀n-hɛ́n mɛ̀n mán edomɛ̀n ɛnhi-sɩ́emɛ̀n kokroo.

¹²Mɛ́n sɩ́ tán ɛnnyɔnwrɔn ɛkɔrɛ̀levri kè yé ankà, ô kɛ̀ hɛ́n ɛncɔnwrɔn hán; ke ji le nɛ̀n kɛ́n ɔmùan nɛ̀n hɛ́n.

¹³Annanwɔrɛ mɛ̀n lɔ, Ɔwɔ gɔ́ hán Adamɛ̀n, kɩ Ɛvɛ̀n kɛ́n nɛ̀n.

¹⁴Kɩ kè sɩ̀ dù Adamɛ̀n de kè tezè n'edomɛ̀n anwawrɔn kɛ̀ frɛ́n nɛ̀n, tɛ́n Ɛvɛ̀n léyi dú ɛnnyɔnwrɔn nɔn, de bru ɛfrɛ́n ankà mɛ̀n, kɩ fɔndɔ́n Ɔwɔ nyanmàn.

¹⁵Tɛ́n ɛnnyɔnwrɔn kɛ lɛ cɔ́ ebɩdie n'ɛẅì bîemɛn, ke dú kɛ ne dú ankaẅìbùtan ẅɛn mɛ̀n, ɛcüɛ̀n mán prɔnprɔn mɛ̀n, edomɛ̀n ɛnhi-sɩemɛ̀n.