Read Alladian Kpàkpà timote 4 Bible Online

Kpàkpà timote 4 - Alladian bible

Kpàkpà timote 4

¹Ɛnhɛ́n kɛ dɔ́ kpete mɛ̀n le: ɛmɛẅi-trɔ vra hɔ̀n mɛ̀n lɔ, anwrɔn ndɔ hɔ̀n ke le tecüe ankaẅìbùtan ô kɛ̀ kɛ́n ɛfrɛ́n hɛ́n hɔ̀n mán ankà-yé hɔ̀n léyi anwabɔ̀ kɛ tán nɔn ɛsɛ̀n.

²Yɔ lɛ teze y'edomɛ̀n yɔ tán anbradi-bɔ̀ mán anhyɔ̀n-bɔ̀ kɛ zrɛ́n yɔ, yɔ léyi ye di yɔ ɛnhyà gbɛnẅì wɔnsɛ́n nrɛ̀n wàwúyɛ wú nɔn.

³Anwrɔn ndɔ hɔ̀n lɔ kɛ dɔ̀ le, ke sɩ́ ji le ye yri ɛnnyɔnwrɔn, ye zî ɛci ndɔ hɔ̀n. Tɛ́n Ɔwɔ hán ɛcizî ndɔ hɔ̀n lɔ, ô ankaẅìbùtan-ẅɛn-bɔ̀ léyi nyri ankà annànwɔrɛ ke zî ɛci hɔ̀n lɔ Ɔwɔ sɛ́n mɛ̀n nɔn, kɛ̀ tán Ɔwɔ ɔkùɛn.

⁴Ɛci lɔ fɛn léyi Ɔwɔ hán nɔn zrɔ; nzriɛmɛ́n kè sɩ̀ dù ɛkɔ̀nze-ci, tɛ́n ke ji le ye bɩ́ eci lɔ fɛn Ɔwɔ kùɛn tán mɛ̀n,

⁵ɔmuhi Ɔwɔ ankà-dɔ̀ mán ɔwɔ-sɛ̀n kɛ srɔ eci lɔ fɛn ɛcizî anvrɛnvrɛn Ɔwɔ zìwú nɔn.

⁶Ke dú kɛ e yé anwrɔn nɛ́n muan-ẅì hɔ̀n ankà ndɔ hɔ̀n lɔ hô, e le dú Zhezü Krisì ci-bɩ̀tan-wrɔn ankrankran tɔ̀n, e le yé tán le ankaẅìbùtan ankà-dɔ̀ mán ankà-yé annanwɔrɛ léyi ɛ kɛ́n ɛsɛ̀n nɔn, dú v'ɛcizî.

⁷Tɛ́n è tecüe ɔbrɔ̀sà dùgɔ́n ankà hɔ̀n léyi kɛ kɛ́n ankaẅìbùtan ezì nɔn. Ɛ̀ hán kèkrèmɛ̀n, ô v'ɛwúvà lɔ kɛ̀ bá Ɔwɔ ɛtɛ̀sɛ̀n.

⁸Edùwrú ẅia cüì-tán dú eci ankrankran, tɛ́n nɛ̀n dú eci ẅiɛ; Ɔwɔ tɛ̀sɛ̀n sɔ̀nba ẅɛn vɔ̀nshɛ́ eci lɔ fɛn mɛ̀n, ɔmuhi nɛ tán bɔ̀ ɛnhibù wú wúvà kɩ nɛ wá bɔ̀ ɛwúvà wrù mùan.

⁹Ndɔ lɔ dú ankà-dɔ̀ annànwɔrɛ tɔ̀n léyi ke ji le anwrɔn lɔ fɛn kè bɩ nɔn.

¹⁰Annànwɔrɛ mɛ̀n lɔ, ke dú kɛ bɔ́ kán ɛgbàn kɩ bɔ́ dú ɛcüìwrɔn mɛ̀n hô, bɔ̀ nyri ɔmu le, bɔ̀ bɩ́ bɔ́ esɛ́ lɔ bɔ̀ wá Ɔwɔ kɔrɛkɔrɛ lɔ mɛ̀n, nɛ́n léyi nɛ̀n dú anwrɔnẅì lɔ fɛn bɩdie-wrɔn, anannan le yɔ hɔ̀n léyi ẅɛn ankaẅìbùtan nɔn.

¹¹Ɛ̀ wá tán, ô è yé eci ndɔ lɔ fɛn.

¹²Ke sɩ́ ji le ɔwrɔn zriɛmɛ́n kɛ ẅɛn v'egbrì ɔmuhi è dú sùgban-wrɔn nɔn; tɛ́n è dú sɛnpò ɛ̀ tán ankaẅì-bùtan-ẅɛn-bɔ̀, v'ankà-dɔ́ mɛ̀n, v'esùnan mɛ̀n, v'ɛcüɛ̀n ci-hán mɛ̀n, v'ankaẅì-bùtan-ẅɛn mɛ̀n mán v'efifiemɛ̀n dù.

¹³È bɩ́ edùyì ɛ̀ krɛ́ anwrɔn lɔ fɛn zìwú, Owrú Prɔnprɔn lɔ, yakɛ kɛ̀ cɔ́ m'ɛvá bì, è yɩ́ anwrɔn edù, ô è yé Ɔwɔ ankà.

¹⁴Ɛnhɛ́n mɛ̀n cice léyi Ɔwɔ tán mɛ́n nɔn, e bɩ́ di nɛ̀n zàngɔnhán, ecice léyi yɛ tán mɛ́n ɛnvra léyi Ɔwɔ-mùan-wú-ankà-dɔ́-bɔ̀ dɔ́ ankà, kɩ ɛcüìcüì-bɔ̀ di mɛ́n ankɔrɛ̀ ɛwú nɔn.

¹⁵Ɛ̀ hán ndɔ lɔ esùva-wá mɛ̀n, è bɩ́ vɛ́n mumù lɔ fɛn ɛ̀ wá v'ɔkɔ̀hɔ̀n lɔ mɛ̀n. Zɛtɛn yɔ lɛ fɛn yɔ lɛ kán v'ɔkɔ̀hɔ̀n-hán sùnàn.

¹⁶Ɛ̀ wá v'edomɛ̀n mán v'ankà-yé esùva. Ɛ̀ nyɔn ɛshishiemɛ̀n, ndɔ lɔ mɛ̀n. Annànwɔrɛ mɛ̀n lɔ, ke dú kɛ ɛ hán ɔmu lɔ hô, e le bɩ́ vɛ́n mumù mán anwrɔn hɔ̀n léyi ke die mɛ́n nukùɛ nɔn è die.