Read Alladian Anhyrɛmɛ̀n timote 2 Bible Online

Anhyrɛmɛ̀n timote 2 - Alladian bible

Anhyrɛmɛ̀n timote 2

¹Vɛ́n m'ɛnẅì, è bɩ́ ecüì, nboafɔ̀n léyi dú Zhezü Krisì yri vá cɔ́ bɔ̀ nɔn n'ɛmɛ̀n.

²Ankà léyi ɛ̀ yá mɛ̀n dɔ́ dalɛfuɛ-di-bɔ̀ bobrebe zìwú nɔn, è bɩ́ ankà lɔ ɛ̀ tán anwrɔn hɔ̀n léyi ɛ̀ ẅɛn esɛ́ y'ɛwú nɔn, kɩ yɔ mán yɔ lɛ ẅɛn ecüì yɛ lɛ dɔ̀ yé anwrɔn nyàntɛn.

³È bɩ́ v'ɛgbànkàn hɔ̀n kɛ̀ hán Zhezü Krisì mùan-zri-di gɔliɛ-wrɔn tɔ̀n hɔ́.

⁴Gɔliɛ-wrɔn tɔ̀n léyi dú n'ɔkɔ̀hɔ̀n hàn mɛ̀n nɔn, ke sɩ́ bɩ́ n'ɛwúvà ankà ke gbro n'ɔkɔhɔ̀n lɔ mɛ̀n, ke dú kɛ ne ji le nɛ́n gɔliɛ-wrɔn cüìcüì kɛ̀ cüɛn nɛ̀n.

⁵Ànnyàn-kɔ́n-wrɔn léyi ke ji kɛ kɔ̀nkà nɔn, ke ji le nɛ́n nyrì kɔ́n ànnyàn lɔ n'ɔkɔrɛ̀zì.

⁶Ecitɛ́-wrɔn léyi hán ɔkɔ̀hɔ̀n shishi ankɛ̀tɛ́ mɛ̀n nɔn, nɛ̀n dú ɛnvrapkà wrɔn léyi ke ji le kɛ̀ cɔ́ antɛ̀ẅì nɔn.

⁷È tro ɛnkruemɛ̀n anvrɛnvrɛn ankà léyi mɛ dɔ̀ nɔn. Ɛẅɛnwrɔn kɛ lɛ wá mɛ́n ɛkɔrɛ̀, ô è nyri eci lɔ fɛn.

⁸Zhezü Krisì ankà ke bru mɛ́n, nɛ́n léyi nɛ̀n dú Davidɛ̀n mɛẅi-wrɔn, kɩ dú owú bɔ̀ mɛ̀n vá ɔkɔrɛ bɔ̀ mɛ̀n, hán ɔmu le Ɛmɛẅi ankà Ankrànkràn léyi mɛ dɔ́ n'ankà ke yé nɔn.

⁹Ɛmɛẅi ankà Ankrankran ndɔ lɔ kruhú de mɛ̀n dú ɛgbànkán mɛ̀n, kɩ yɛ wá mɛ̀n angán hán eci gbàngbàn-hán-wrɔn hɔ́. Tɛ́n Ɔwɔ mùan ankà-dɔ̀ lɔ, kè sɩ̀ dù angán mɛ̀n!

¹⁰Hɩ le kruhú de mɛ̀n shri fɛn mɛ́n bɩ, kè dú anwrɔn hɔ̀n léyi Ɔwɔ mrɛ́n bɩ nɔn, y'anvrɛn, ô yɔ mán yɔ cɔ́ ɛnkru-kɔrɛ̀ léyi dú Zhezü Krisì yri nvà, hɩ mán ecizrɔ léyi ke sɩ́ trɔa nɔn.

¹¹Nyàn ankà-dɔ̀ léyi dú annanwɔrɛ nɔn: “Ke dú kɛ bɔ́ mán nɛ́n mɛhi bo wù hô, bɔ́ mán nɛ́n mɛhi bɔ́ lɛ kɔrɛ̀ bɔ́ le dù;

¹²ke dú kɛ bɔ́ nyɔn ɛshishiemɛ̀n, bɔ́ mán nɛ́n mɛhi bɔ́ lɛ ẅɛn ɛyri; ke dú kɛ bɔ́ kɔ́n nɛ̀n bɔ́ ze, nɛ́n mán nɛ lɛ kɔ́n bɔ̀ ne le ze;

¹³ke dú kɛ bɔ́ sɩ́ di ɔmùan-zri, nɛ tɛn ne di ɔmùan-zri, ɔmuhi nɛ́n sɩ̀ ẅɛn ɛyɔ̀n nɛ̀n tán n'edòmɛ̀n rɔ́ nɔn.”

¹⁴È kro yɔ lɛ fɛn ankà ndɔ lɔ, ô ɛ̀ dɔ́ yɔ ɔmùan ɛwú-síemɛ̀n Ɔwɔ zìwú le, yɔ bɩ́ sî ankà, ankà-dɔ̀ wú. Ankà-sî ndɔ hɔ̀n lɔ dú eci woro, tɛ́n yɔ zrɛ́n anwrɔn hɔ̀n léyi ke die ankà nukùɛ nɔn.

¹⁵Ɛ̀ hán kèkrèmɛ̀n Ɔwɔ zìwú lɔ, yɛ mrɛ́n mɛ́n kɛ̀ hán ɔkɔ̀hɔ̀n-hán-wrɔn tɔ̀n léyi n'ɔkɔ̀hɔ̀n-hán ke sɩ́ tán anvɛvrà kɩ kɛ dɔ́ annànwɔrɛ mɛẅi ankà lɔ anvrɛnvrɛn mɛ̀n.

¹⁶È teze ɛdrɛ̀ woro hɔ̀n léyi kɛ kɛ́n ankaẅìbùtan ezì nɔn, ɔmuhi anwrɔn hɔ̀n léyi kɛ hán yi kɔ̀hɔ̀n lɔ nɔn, kɛ cɔhɔ́ Ɔwɔ tɛsɛ̀n esù she.

¹⁷Y'ankà-yé lɔ ndù cá eci-fɔn léyi jru kɩ kɛ rá anẅia nɔn. Ɛnu lɔ me trɔ Imene mán Filɛtɛ̀n ankà:

¹⁸yɔ cɔhɔ́ ankaẅì annanwɔrɛ levri wú kɩ yɔ zrɛ́n anwrɔn bobrebe ankaẅì-bùtan, kɩ yɔ dɔ̀ le, bɔ̀ cɔ́ b'owúemɛ̀n-dúfrɔ́ lɔa.

¹⁹Ɔmu tɛ̀kɩ ɛbù-hi-nan hɔ̀n léyi Ɔwɔ wá ɛnhibɩ́ nɔn dú edùsɔ mɛ̀n. Nyàn ankà-dɔ̀ hɔ̀n léyi ye merɛ́n yɛ wá yɔ ɛwú nɔn: “Ɛẅɛnwrɔn nyri nɛ́n fɛcüè hɔ̀n”, kɩ: “Ɔwrɔn totɔtɔ̀n léyi kɛ dɔ̀ le nɛ́n dú Ɛẅɛnwrɔn tɛn nɔn, ke ji le nɛ̀n crɛ ejüi nɛ̀n sɔ́n ɛgbàn.”

²⁰Kè sɩ̀ dù ansìkɛ mán ɔkùa-ci kɩ, de yɛ hɛ́n ɔwɔn vriemɛ̀n, ɛci ndɔ hɔ̀n ndù dú ɛtɛ̀ mán antà ci. Kpàkpà ci lɔ, ye sɩ́ yɔ ɛntrɛ ɛnvra léyi ɔkoran vri ke dù nɔn, ndɔ lɔ dú ɛnvra lɔ fɛn ci-hán kɔ̀hɔ́n mɛ̀n.

²¹Ke dú kɛ ɔwrɔn tɔ̀n ke fi n'edomɛ̀n ɛgbàn hɔ̀n lɔ fɛn léyi mɛ́n krɛ̀ nɔn hɩ wú, nɛ lɛ krɔn kpehɛ́n nɛ̀n hán ɔkɔ̀hɔ̀n wrù nyàntɛn hɔ̀n: nɛ̀n dú nɛ́n mumù lɔ fɛn n'ankà-yé-wrɔn tamɛ̀n, nɛ̀n dú yi kɔrɛ̀-wá-wrɔn, nɛ̀n krɔn kpehɛ́n ô nɛ̀n hán eci anvrɛnvrɛn.

²²È teze sùgban-ẅì hɔ̀n mɛ̀n afùyà ci-hán hɔ̀n lɔ; è ji ɛnyrɔnnan, ankaẅìbùtan, ɛcüɛ̀n, anwɔwɔ vɛ́n mán anwrɔn hɔ̀n léyi ɛnbɔrɛ fifiemɛ̀n, ke bi Ɛẅɛnwrɔn nɔn.

²³Tɛ́n è teze nmù mán ɔbrɔ̀sà cüìwrɔn hɔ̀n lɔ: è nyri ɔmu le yɔ sɩ́ ɛdrɛ̀.

²⁴Tɛ́n, ke sɩ́ ji le Ɛẅɛnwrɔn ci-bɩ̀tan-wrɔn kɛ̀ hán ɛdrɛ́-ci. Ke ji le nɛ̀n ẅɛn ɛcüɛ̀n anwrɔn lɔ fɛn tɛsɛ̀n, nɛ̀n nyrì yé eci, ô nɛ̀n ẅɛn ɛnbɔrɛ nɛ̀n hɛ́n ankà gbàngbàn hɔ̀n lɔ fɛn léyi yɛ dɔ́ ku nɛ̀n ɛwú nɔn,

²⁵ke ji le nɛ̀n yé n'ezì-kɛ́n-bɔ̀ ankà anwɔwɔ mɛ̀n: me bú tán le, Ɔwɔ kɛ lɛ tán yɔ ɛnkru-sàn-crɔn, ô yɔ nyri ankà annanwɔrɛ.

²⁶Zɛtɛn yɔ lɛ cɔ́ y'ɛnkruemɛ̀n ankà-yrì, kɩ yɔ lɛ cɔhɔ́ anwa-wrɔn tanwrɔn hɔ̀n léyi ẅɛn yɔ hɛ́n n'ɛkɔrɛ̀levri wú nɔn mɛ̀n.