Read Alladian Anhyrɛmɛ̀n timote 3 Bible Online

Anhyrɛmɛ̀n timote 3 - Alladian bible

Anhyrɛmɛ̀n timote 3

¹Ankà ndɔ lɔ kè bru mɛ́n anvrɛvrɛn: ɛmɛẅitrɔ vra hɔ̀n lɔ mɛ̀n, ɛgbànkán bì hɔ̀n ke le dù.

²Annànwɔrɛ mɛ̀n lɔ, anwrɔnẅì kɛ lɛ ẅɛn kɔ̀tɛ́, yɔ lɛ srɔ ɔkùa nɛ́n nyran anvrɛn hɔ̀n, yɔ lɛ dú ɔmùan-gbú-bɔ̀ mán tùtre-bɔ̀; yɔ lɛ wɔra Ɔwɔ kɩ yɔ lɛ kɛ́n yɔ zi mán yɔ muan hɔ̀n ezì, yɔ sɩ̀ nyri anvrɛn, kɩ yɔ sɩ̀ ẅɛn eci prɔnprɔn wá;

³yɔ lɛ ẅɛn ɛnkru shishi, ɛnhyɔ̀bɔ̀-nyrì ke sɩ̀ dú yɔ ɛmɛ̀n, yɔ lɛ ẅɛn ɛyɔ̀n ku anwrɔn ɛwú, yɔ lɛ hán ɛnkru-fé ci, yɔ lɛ ẅɛn anbɔrɛ kɩ yɔ le dú eci ankrankran gbri-bɔ̀;

⁴yɔ lɛ dú ankà-mrɛ́n-bɔ̀ kɩ tùtre ke le yɩ́ yɔ ɛnbɔrɛ mɛ̀n, yɔ lɛ cüɛn ɛmankɔ̀n kɛ lɛ vrán Ɔwɔ;

⁵yɔ lɛ di ankaẅìbùtan-ẅɛn-bɔ̀, tɛ́n yɔ lɛ kɔ́n n'ɛkɔrɛ̀srɔn lɔ yɔ ze. Ɛ̀ crɛ ejüi ɛ̀ sɔ́n anwrɔn ɔmu hɔ̀n lɔ!

⁶Y'ɛmɛ̀n lɔ, anwrɔn janbɔ̀ ke bru anwrɔn ɛbemɛ̀n kɩ ke bɩ́ ɛnkru-fé-wúyɔ̀ hɔ̀n léyi ɛgbàn yɩ́ edomɛ̀n kɩ kɛ hán ɛmànkɔ́n mɛ̀ntɛ mɛ̀ntɛ kɔ̀hɔ̀n;

⁷wúyɔ̀ ndɔ hɔ̀n lɔ ke ji ɛnvra lɔ fɛn kɛ̀ ván, tɛ́n yɔ sɩ́ cɔ́ nyri mrìmrì eci léyi dú ankà annanwɔrɛ nɔn.

⁸Ɔmu zri léyi Zhannɛsɛ̀n mán Zhanbrɛsɛ̀n kɛ́n Mohizì ezì nɔn, ɔmu zri lɔ de anwrɔn ndɔ hɔ̀n lɔ mán kɛ kɛ́n annanwɔrɛ ezì nɔn. Yɔ dú anwrɔn hɔ̀n léyi ɛnhɛ́n ke sɩ̀ nyrɔ̀n hàn, kɩ y'ankaẅìbùtan lɔ dú oworo.

⁹Tɛ́n yɔ sɩ̀ hɔ́n esù she, ɔmuhi anwrɔn lɔ fɛn nyri y'ɔbrɔ̀sà-di-ankà, ke le dù kɛ lɛ hán Zhannɛsɛ̀n mán Zhanbrɛsɛ̀n ankà lɔ hɔ́.

¹⁰Tɛ́n vɛ́n, ɛ̀ kɛ́n mɛ̀n ɛsɛ̀n m'ankà-yé kɔ̀hɔ̀n lɔ mɛ̀n, m'esùnàn, m'ankà-tro hɔ̀n, m'ankaẅìbùtan, m'ɛnbɔrɛ-ẅɛ̀n-hɛ́n, m'ɛcüɛ̀n, m'ɛnbɔrɛ-zri ci-hán,

¹¹m'ejüedì hɔ̀n mán m'ɛgbànkàn hɔ̀n mɛ̀n. È nyri eci léyi wɔɛn mɛ̀n Antiɔshɛ̀n, Ikoniɔmɛ̀n mán Listrɛ̀n anmàn nɔn, kɩ è nyri ejüedi hɔ̀n léyi mɛ̀n srɔ́n ɛsù nɔn. Tɛ́n Ɛẅɛnwrɔn mrɛ́n mɛ̀n ɛgbànkàn hɔ̀n lɔ fɛn mɛ̀n sɔhɔ́.

¹²Bɔ́ nyrì le, anwrɔn hɔ̀n lɔ fɛn léyi ke ji kɛ̀ ẅɛn ɔmùan-zri-di wúvà Ɔwɔ tɛsɛ̀n yɔ mán Zhezü Krisì mɛhi y'ɔbɔ̀sɔ̀ lɔ mɛ̀n nɔn, yɔ lɛ nyri ejüedi ankà.

¹³Tɛ́n anbɔrɛ-bɔ̀ mán anhyɔ̀n-bɔ̀ kɛ lɛ hɔ́n esù she y'eci-gbàngbàn hán mɛ̀n, yɔ lɛ frɛ́n anwrɔn ndɔ hɔ̀n kɩ yɔ mán yɔ lɛ frɛ́n yɔ.

¹⁴Vɛ tɛn tɛ́n, ɛ̀ nyɔn ɛnshishiemɛ̀n eci léyi è nyrì nɔn hɩ wú, ô è bɩ́ nɛ̀n ankàtro zriemɛ̀n. È nyri v'ankàyé-bɔ̀ hɔ̀n lɔ.

¹⁵Annanwɔrɛ mɛ̀n lɔ, v'ɛcɛmɛ̀n hàn hɛ́n, è nyri Ɛwrú Prɔnprɔn hɔ̀n lɔ; Ɛwrú Prɔnprɔn hɔ̀n lɔ kɛ lɛ tán mɛ́n ankànyrì tɛ̀, ankànyrì léyi ke sɩ́ ɛnkrukɔrɛ̀ mɛ̀n, ankaẅìbùtan ẅɛn mɛ̀n, Zhezü Krisì bɩmɛ̀n mɛ̀n nɔn.

¹⁶Owrú Prɔnprɔn mumù lɔ fɛn dú Ɔwɔ yri và kɩ ne yé annanwɔrɛ ankà léyi kɛ hán yɔ, yɛ kɔrɔ ɛzɛ́n levri, yɛ nyrɔn y'edomɛ̀n eci gbàngbàn tɛsɛ̀n, ô yɛ hán ɛnnyrɔnnan ci ɛwúvà ẅɛn mɛ̀n,

¹⁷ô Ɔwɔ wrɔn kɛ̀ krɔn kpehɛ́n n'eci ankrankran hán mɛ̀n.