Read Alladian Titɛ̀n 2 Bible Online

Titɛ̀n 2 - Alladian bible

Titɛ̀n 2

¹Tɛ́n vɛ́n, è yé ankà léyi dú ɛnyrɔnnan ankà-yé annànwɔrɛ nɔn.

²Ɛ̀ dɔ́ nɛ̀ngbànvri-bɔ̀ le, yɔ bɩ́ zî ɛci bobrebe, yɔ ẅɛn ɔwá, yɔ hán ankà-nyri-ci, yɔ nyɔn ɛshishiemɛ̀n ankàẅì-bùtan-ẅɛ̀n annànwɔrɛ mɛ̀n, ɛcüɛn mɛ̀n, mán ɛnbɔrɛ-ẅɛ̀n hɛ́n mɛ̀n.

³Ɔmu zri lɔ, ɛ̀ dɔ́ nɛ̀ngbànvri-wúyɔ̀ hɔ̀n le, y'esùnansù kè dú prɔnprɔn mɛ̀n. Ke sɩ́ ji le ye dú ɛdrɛ̀-hán-wúyɔ̀ mán ɛntàn wɔ̀n-hi hɔ̀n. Ke ji le yɔ woro ankà ankrankran yɔ yé anwrɔn,

⁴ô kɛ̀ hán tán sùgban-wúyɔ̀ kɛ cüɛn yɔ cüì hɔ̀n mán y'ɛẅì hɔ̀n,

⁵ye dú ankà-nyri-wúyɔ̀, ô ɛnhɛ́n mɛ̀n kè fi yɔ, ye dú ebɩ́-sɔ́n-nɛ́n-muan hɔ̀n léyi ke nyri ẅɛn y'ebɩ́-sɔ̀n-bɩ́ lɔ anvrɛnvrɛn nɔn, hɩ ɛnbɔrɛ nwɔ̀, ke die yɔ cüì hɔ̀n nukùɛ, ô ɔwrɔn zriɛmɛ́n ke bɩ́ dɔ́ ɔwora ankà ke ku Ɔwɔ mùan-ankà-dɔ̀ lɔ wú.

⁶Ɔmu zri lɔ, ɛ̀ dɔ́ sùgban-ẅì hɔ̀n kɛ̀ wɛn ankà-nyrì eci lɔ fɛn mɛ̀n.

⁷Vɛ́n dùku mán ke ji le è dú sɛnpò v'eci-ankrànkràn-hán mɛ̀n. V'eci-yé kè dú ɔmùan-zri mán anvrɛnvrɛn.

⁸Ɛ̀ dɔ́ ɛnyrɔnnan ankà léyi ye sɩ̀ cɔ́ n'edù-jrɛ́-yri, ô kɛ hán tán v'egbri-bɔ̀ kè dú anvɛvrà mɛ̀n, ɔmuhi ye sɩ̀ cɔ́ ankà gbàngbàn yɔ dɔ́ bɔ́ ɛwú nɔn.

⁹Ke ji le anwɔ̀n-bɔ̀ kè die y'ɛẅɛn-bɔ̀ nukùɛ eci lɔ fɛn mɛ̀n, ô yɔ hán eci kɛ̀ zrɔ y'ɛẅɛn-bɔ̀. Ke sɩ́ ji le yɔ tú yɔ ɔmùan,

¹⁰ô yɔ yerɛ yɔ ɛci. Yɔ yé y'edomɛ̀n ɛnvra lɔ fɛn anwrɔn ankrankràn, yɔ di ɔmùan-zri, ô kè dú Ɔwɔ, bɔ́ Ebɩdie-wrɔn ankà-yé lɔ n'ezìwú gbà.

¹¹Ɔmuhi Ɔwɔ yé nɛ́n nboafɔ̀n léyi dú ɛnkrukɔrɛ shi-bɛ́ tán anwrɔnẅì lɔ fɛn nɔn.

¹²Nboafɔ̀n ndɔ lɔ kɛ wá tán bɔ̀, bɔ́ teze bɔ́ ɛwúvà gbàngbàn mán bɔ́ ɛnhibù wú ankà-tro hɔ̀n lɔ, ô bɔ̀ ẅɛn ankà-nyrì wúvà, bɔ̀ dú ɛnyrɔnnanmɛ̀n, ô bɔ̀ di ɔmùan-zri Ɔwɔ tɛ̀sɛ̀n.

¹³Ɔmu lɔ de ke ji le bɔ̀ vrá ɛnbɔrɛbru léyi bɔ̀ ẅɛn esɛ́ n'ɛwú ɛnbì léyi Zhezü Krisì léyi dú b'Ɔwɔ vri mán bɔ́ Ebɩdie-wrɔn ci-zrɔ kɛ lɛ srɔ nɔn.

¹⁴Nɛ̀n bɩ́ n'edomɛ̀n nɛ́n dí bɔ́ ɛgbàn-ẅɔ̀ɛn, ô nɛ̀n srɔ bɔ̀ fɛcüè fifi tɔ̀n léyi ke le dú nɛ́n zri nɛ tɛn, ô kɛ̀ ẅɛn edùyì ɛci-ankrànkràn-hán mɛ̀n.

¹⁵Nyàn eci léyi ke ji le è yé, ô è bɩ́ v'ecüì kɔrɛ̀levri lɔ fɛn è yɩ́ vɛ́n nukù-die-bɔ̀ edù, kɛ wá tán hô, è di yɔ ebrè. E bɩ́ teze ɔwrɔn zriɛmɛ́n y'ɛmɛ̀n lɔ kɛ ẅɛn v'egbrì.