Read Alladian Titɛ̀n 3 Bible Online

Titɛ̀n 3 - Alladian bible

Titɛ̀n 3

¹È kro ɔmùan-zri-di-bɔ̀ le, ke ji le yɔ die ɛcüìcüì-bɔ̀ mán ɛkɔrɛ̀levri-bɔ̀ nukùɛ, ô yɔ krɔn kpehɛ́n yɔ hán eci ankrànkràn.

²Yɔ bɩ́ dɔ́ ɔwrɔn zriɛmɛ́n ankà-gbàn, yɔ ẅɛn ɛnbɔrɛ wɔwɔ mán ɛcüɛ̀n, ô ɛnvra lɔ fɛn yɔ yé anwrɔn nyàntɛn hɔ̀n y'anwɔwɔ lɔ.

³Ɔmuhi bɔ́ mán, ɛnkrubɔmɛ̀n lɔ bɔ̀ dú ɔbɔ̀rɛsà-bɔ̀, bɔ́ sɩ́ die ankà nukùɛ, kɩ bɔ̀ dú ɛzɛ́n mɛ̀n nɔn. Bɔ́ gɔ̀ dú ankà-tro mɛ̀ntɛ mɛ̀ntɛ mán pɔpüɛ̀-brà wɔ̀n-bɔ̀; bɔ̀ ẅɛn anbɔrɛ wúvà kɩ ɔwrɔn ci kɛ cüɛn bɔ̀ ɛvɛ̀; bɔ́ hán ye gbri bɔ̀ kɩ yɔ mán bɔ́ gbri bɔ́ edòmɛ̀n.

⁴Tɛ́n ɛnvra léyi Ɔwɔ, bɔ́ Ebɩ̀die-wrɔn yé bɔ̀ n'anwɔwɔ mán n'ɛcüɛ̀n, anwrɔnẅì kruhú nɔn,

⁵nɛ̀n bɩ́ bɔ̀ nɛ̀n die, kɩ kè sɩ̀ dù bɔ́ ɛnyrɔnnan mán bɔ́ eci-ankrankran-hán mɛ̀n, tɛ́n ɔmuhi nɛ̀n ẅɛn bɔ́ ɛnhyɔ̀bɔ̀-nyrì nɔn. Nɛ̀n bɩ́ bɔ̀ nɛ̀n die ɛnshikru-wá léyi Ɛnhɛ́n Prɔnprɔn cüemɛ̀n tán bɔ̀ ebîemɛ̀n mán ɛwúvà wrù mɛ̀n nɔn.

⁶Ɔmuhi Ɔwɔ wá bɔ̀ Ɛnhɛ́n Prɔnprɔn cüì bobrebe edomɛ̀n bɔ́ Ebɩ̀die-wrɔn Zhezü Krisì bɩ́mɛ̀n,

⁷ɔmu lɔ de nɛ́n nboafɔ̀n kɛ srɔ bɔ̀ ɛnyrɔnnan-bɔ̀ n'ezìwú, ô kɛ̀ hán bɔ̀ bɔ́ cɔ́ ɛwúvà léyi ke sɩ́ trɔa hɩ bɔ̀ ẅɛn esɛ́ n'ɛwú nɔn.

⁸Ndɔ lɔ dú ankà-dɔ̀ léyi dú annànwɔrɛ nɔn. Me ji le ankà ndɔ hɔ̀n lɔ wú, ɛ̀ wá kpánkpán ɛ̀ tán fɛcüè hɔ̀n léyi ke bú Ɔwɔ ankà tán ankaẅì nɔn le, ke ji le yɔ wá y'edomɛ̀n kokroho eci-ankrankran-hán mɛ̀n. Nyàn eci léyi zrɔ tán anwrɔnẅì lɔ fɛn nɔn.

⁹Tɛ́n ke ji le è teze ɔbrɔ̀sà-cüìwrɔn mán bɔ́ nancüì hɔ̀n bɩ́ sheshe ankà-dɔ̀ mán ɛdrɛ̀-hán ɛnyànmàn wú, ankà-sɩ̀ mán anmùan-mɛ̀n-ji-kɔ̀n: eci-hán ndɔ hɔ̀n lɔ fɛn kè sɩ̀ wɛ̀n vɔ̀nshɛ́.

¹⁰Ɔwrɔn léyi kɛ hán ɛsɔ̀nvoyan kɔ̀hɔ̀n nɔn, è bi ankà ɛ̀ dɔ́ nɛ̀n ɛdɛ̀n zri mán anhyrɛ̀; zɛtɛn, è sɩ́ nɛ̀n ɔhɔ́nan.

¹¹E nyrì le ɔwrɔn ɔmu lɔ nɛ̀n sɩ̀ dù ɛnlevri ankrankran wú, kɩ ɛnvra léyi nɛ yɛ́ n'ɛzɛ̀n ci-hán lɔ mɛ̀n nɔn, kɛ hán nɛ̀n nɛ zrɛ́n n'edomɛ̀n.

¹²Ɛnvra léyi mɛ lɛ hán Artemasɛ̀n mán Tishikɛ̀n, anwrɔn anhyrɛ̀ lɔ ɔtɔ̀n kɛ̀ và cɔ́ mɛ́n nɔn, ɛ̀ hán kèkrèmɛ̀n ɛ̀ srɔ́n mɛ̀n ɛsù Nikopolisɛ̀n anmàn, ɔmuhi mɛ̀n wá le me le bɩ́ ɛbanshi nanvrɛn lɔ nɔn.

¹³Ɛ̀ wá esùva, ô ɛ̀ và sɩ́ Zenasɛ̀n, ɛmrɛ̀nci-kɔrɛ̀-wá-wrɔn mán Apolɔsɛ̀n, ɛkɔrɛ̀-wá, ô yɔ bɩ yɔ hɔ́n ɛyri; ɛ̀ hán tán eci zriɛmɛ́n ke bɩ́ ẅɛn yɔ ɛmìan.

¹⁴Ke ji le bɔ́ fɛcüè lɔ mán kè nyrì wá y'edomɛ̀n kokroho eci ankrànkràn hán mɛ̀n ô kè dú ɛkɔrɛ̀-wá anvrɛnvrɛn; kɩ ke sɩ́ ji le yɔ ẅɛn ɛwúvà woro.

¹⁵Anwrɔn hɔ̀n lɔ fɛn léyi yɔ mɛhi bɔ́ dù nɔn, ke yüre mɛ́n y'ebinyan. Ɛ̀ tán bɔ́ nyran hɔ̀n ebinyan ankàẅì-bùtan mɛ̀n. Ɔwɔ shi-fù kɛ̀ và dú nyɛ lɛ fɛn ɛmɛ̀n.