Read Alladian Filemɔn 1 Bible Online

Filemɔn 1 - Alladian bible

Filemɔn 1

¹Ebinyan ndɔ lɔ dú Pɔlɛ̀n yri và, nɛ́n léyi yɛ wá nɛ̀n anwɔn-mɛ̀n, ɔmuhi nɛ̀n srɔ Zhezü Krisì ci-bɩ̀tan-wrɔn nɔn, ebinyan zri lɔ dú bɔ́ muanẅì Timote yri và. Vɛ́n Filemɔn, bɔ́ nyran anvrɛn mán b'ɔkɔ̀hɔ̀n hán kɔrɛ̀-wá-wrɔn,

²mán Ɔwɔ-fɛcüè léyi kɛ bɔrɛ ɛkru v'ɔwɔn lɔ mɛ̀n, mán bɔ́ muan-ẅì ɛnnyɔnwrɔn Apia, mán Arshipɛ̀n, b'anhà kɔ́n kɔrɛ̀-wá-wrɔn:

³Ɔwɔ léyi dú bo Zi mán Ɛẅɛnrɔn Zhezü Krisì kɛ̀ tán nyɛ̀n nboafɔ̀n mán anwɔwɔ.

⁴Ɛnvra hɔ̀n lɔ fɛn léyi mɛ sɛ́n Ɔwɔ nɔn, me tro v'ankà, Filemɔn, kɩ mɛ tán Ɔwɔ ɔkùɛn;

⁵ɔmuhi mɛ yá yɛ dɔ́ ɛcüɛ̀n léyi ɛ̀ ẅɛn ankaẅìbùtan bɔ̀ wú, mán ankaẅìbùtan léyi dú mɛ́n Ɛẅɛnwrɔn Zhezü mɛ̀n nɔn.

⁶Mɛ dɔ́ Ɔwɔ le ankaẅìbùtan léyi bɔ́ mán vɛ́n mɛhi bɔ́ ẅɛ̀n nɔn, kè dú eci ankrankran v'ɛmɛ̀n, ô kɛ̀ hán ye nyri anvrɛnvrɛn, ɛci ankrankran hɔ̀n léyi bɔ̀ ẅɛn bɔ́ ɛwúvà lɔ mɛ̀n bɔ́ mán Krisì mɛhi nɔn.

⁷V'ɛcüɛn bɔrɛ lɔ, ɔwrɔn-nɛ́n-muanẅì, tán mɛ̀n pɔpüɛ̀-brà brobebe mán edùyì, ɔmuhi è bi ɛnbɔrɛ ɛ̀ wá ankàẅì-bùtan-ẅɛn-bɔ̀ nɔn.

⁸Ɔmu lɔ, Krisì bɔ̀sɔ̀ lɔ mɛ̀n, mɛ̀n ẅɛn ɛkɔrɛ̀levri mɛ lɛ wá tán mɛ́n eci léyi ke ji le ɛ̀ hán;

⁹mɛ cüɛ̀n le mɛ̀n sán mɛ́n eci ɛcüɛ̀n bɩ́mɛ̀n. Ɔmu léyi mɛ́n dù, mɛ̀n Pɔlɛ̀n, nɛ̀ngbanvri-wrɔn, kɩ zɛtɛ̀ lɔ yɛ hɛ́n mɛ̀n anwɔn-mɛ̀n-wá-wɔn mɛ̀n Zhezü Krisì kruhú,

¹⁰mɛ sán mɛ́n eci kè dú Onezimɛ̀n tɛn. Anwɔn-mɛ̀n-wá-wɔn mɛ̀n léyi mɛ́n dù nɔn, nɛ̀n srɔ m'ɛnẅì Zhezü Krisì mɛ̀n.

¹¹Ɛnbiɛhɛ́n lɔ, Onezimɛ̀n kè sɩ̀ dù vɛ́n vɔnshɛ́-ci, tɛ́n zɛtɛ̀ lɔ, nɛ̀n srɔ vɔ̀nshɛ́ ci nɛ̀n tán vɛ́n mán mɛ̀n mɛhi.

¹²Me bɩ́ nɛ̀n me yüre mɛ́n, zɛtɛ̀ lɔ, nɛ́n léyi nɛ́n dù nɛ̀n hán m'ɛcá hɔ́ nɔn.

¹³Mɛ cüɛn ɔmu le, mɛ̀n bɩ́ nɛ̀n mɛ̀n hɛ́n m'ɛtɛ̀sɛ̀n ɛnvra ɔmu léyi mɛ̀n dú anwɔn-mɛ̀n-wá-wɔn mɛ̀n Ɛmɛẅi ankà Ankrankran lɔ kruhú, ô nɛ̀n wá mɛ̀n ɛkɔrɛ̀ léyi, vɛ́n ɛ lɛ wá mɛ̀n nɔn.

¹⁴Tɛ́n mɛ́n sɩ́ ji mɛ̀n hán eci zriɛmɛ́n v'ɛmɛẅi, ô kɛ̀ hán tán mɛ́n ɛ̀ hán anvrɛn kèkrèmɛ̀n, tɛ́n ɛnbɔrɛ ankrankran mɛ̀n.

¹⁵Me bú tán le Onezimɛ̀n cɔ́hɔ́ mɛ́n ɛtɛsɛ̀n ɛnvra bruemɛ̀n, ô è vru ɛ̀ cɔ́ nɛ̀n kè dú ɛnvra lɔ fɛn.

¹⁶Ɔmuhi zɛtɛ̀ lɔ nɛ̀n sɩ̀ vrù dù ɔwɔ̀n-wrɔn hán; tɛ́n nɛ̀n vrán ɔwɔ̀n-wrɔn tɔ̀n: nɛ̀n dú ɔwrɔn-nɛ̀n-muanẅì léyi ẅɛn anhàn nɔn. Nɛ̀n dú m'anhàn shishi ci, tɛ́n ke ji le nɛ̀n ẅɛn anhàn bobrebe nɛ̀n tán mɛ́n, kè dú n'ɔwɔ̀n-wrɔn wúvà lɔ mɛ̀n kɛ̀ hán ɔwrɔn-nɛ́n-muanẅì Krisì sɛ̀nkɛn-wrɔn hɔ́.

¹⁷Ke dú kɛ e bɩ́ mɛ̀n ɛ hán ɛnyran hɔ́, è bɩ́ nɛ̀n kɛ̀ hán mɛ́n mumù hɔ́.

¹⁸Ke dú kɛ nɛ̀n hán mɛ́n ɛgbàn, kɩ nɛ̀n ẅɛn mɛ́n ɔwɔ̀ɛn hô, è bɩ́ ndɔ lɔ kɛ̀ dú m'ɔwɔ̀ɛn.

¹⁹M'ɛkɔrɛ̀ wrú de dú ankà-dɔ̀ ndɔ hɔ̀n lɔ nɔn: Mɛ̀n Pɔlɛ̀n, mɛ lɛ wɔrɛ̀ tán mɛ́n. Mɛ́n sɩ́ ji mɛ̀n kore mɛ́n le, v'ɛwúvà lɔ, ɛ̀ ẅɛn mɛ̀n n'ɔwɔ̀ɛn.

²⁰Hɛ̀ɛ̀, ɔwrɔn-nɛ́n-muanẅì, mɛ sɛ́n mɛ́n, ɛ̀ tán mɛ̀n eci-sán ndɔ lɔ Ɛẅɛnwrɔn cüɛ̀n lɔ mɛ̀n: ɛ̀ bi ɛnbɔrɛ ɛ̀ wá mɛ̀n, Krisì mɛhi b'ɔbɔ̀sɔ̀ lɔ, n'ebɩ́mɛ̀n.

²¹Mɛ̀n ẅɛn esɛ́ le, owrú léyi mɛ̀n merɛ́n mɛ́n nɔn, ɛ lɛ hán eci léyi mɛ sán mɛ́n nɔn; mɛ̀n nyri ɔmu le ɛ lɛ hán kɛ lɛ vrán ndɔ lɔ mán.

²²Ɛnvra zri lɔ mɛ̀n, ɛ̀ wá m'ɛdɛ́yri tɔ̀n esùva, ɔmuhi, mɛ̀n ẅɛn esɛ́ le ny'ɔwɔ-sɛ̀n lɔ kɛ lɛ hán tán mɛ̀n và cɔ́ nyɛ̀n.

²³Epafrasɛ̀n léyi nɛ́n mɛhi bo dú anwɔn-mɛ̀n-wá-wɔn mɛ̀n Zhezü Krisì kruhú nɔn, ke bi nyɛ̀n nyan,

²⁴ɔmu zri lɔ de dú Markɛ̀n, Aristarkɛ̀n, Demasɛ̀n; mán Lükɛ̀n léyi dú anyran hɔ̀n ɔkɔ̀hɔ̀n-hán mɛ̀n nɔn.

²⁵Ɛẅɛnwrɔn Zhezü Krisì boafɔ̀n lɔ, kè dú nyɛ̀n ɛmɛ̀n.