Read Alladian Ebre-bɔ̀ 11 Bible Online

Ebre-bɔ̀ 11 - Alladian bible

Ebre-bɔ̀ 11

¹Ɔwɔ mɛ̀n ankàẅì-bùtan-ẅɛ̀n lɔ, dú eci léyi yɛ ẅɛn esɛ́ n'ɛwú, dú annanwɔrɛ ankà léyi ye nyrì kɩ ye sɩ́ kán nɔn.

²Y'ankàẅìbùtan ẅɛ̀n kruhú de Ɔwɔ bi ɛnbiɛhɛ́n bɔ̀ ɛvrivri hɔ̀n lɔ hán n'ɔkɔ̀hɔ̀n nɔn.

³Ankaẅìbùtan mɛ̀n, de bɔ́ nyrì le, Ɔwɔ mùan-ankà-dɔ̀ de hán anhobɩ́ mán ɛnhi, ɔmu lɔ de eci léyi yɛ kàn nɔn, dú eci léyi ye sɩ́ kán nɔn, n'ɛmɛ̀n srɔ nɔn.

⁴Ankaẅìbùtan mɛ̀n de Abɛlɛ̀n ce Ɔwɔ eci zrɔ vrán Kàhɛ́n tɛn lɔ nɔn. Ɔwɔ srɔ nɛ̀n ɛnyrɔnnan-wrɔn n'ankaẅìbùtan lɔ kruhú, ɔmuhi Ɔwɔ dùku mán bɩ́ n'ɛcice hɔ̀n lɔ. Abɛlɛ̀n nwù, ɔmu tɛ̀kɩ nɛ̀n dú ɛmɛ̀n nɛ dɔ́ ankà, n'ankaẅìbùtan ẅɛ̀n kruhú.

⁵Enɔkɛ̀n ke sɩ̀ wùɛ, kɩ Ɔwɔ bɩ́ nɛ̀n sɩ́ n'ɛtɛ̀sɛ̀n, n'ankàẅìbùtan ẅɛ̀n kruhú. Ɔwrɔn zriɛmɛ́n kè sɩ̀ cɔ́ nɛ̀n rɔ̀a ɔmuhi Ɔwɔ bɩ́ nɛ̀n sɩ́ n'ɛtɛ̀sɛ̀n nɔn. Owrú Prɔnprɔn kɛ dɔ̀ le, ɛnvra léyi ye le sɩ́ Enɔkɛ̀n anhobɩ́ nɔn, nɛ́n gɔ̀ cüɛn Ɔwɔ ɛvɛ̀.

⁶Tɛ́n ɔwrɔn zriɛmɛ́n ke sɩ̀ cüɛn Ɔwɔ ɛvɛ̀, ke dú kɛ nɛ̀n sɩ̀ ẅɛ̀n ankàẅì-bùtan. Annanwɔrɛ mɛ̀n lɔ, ɔwrɔn léyi kɛ sɔnba Ɔwɔ ɛtɛ̀sɛ̀n nɔn, kè nyrì le Ɔwɔ dù, kɩ anwrɔn hɔ̀n léyi ke ji nɛ̀n nɔn, nɛ bó yɔ anjakpà.

⁷Ankàẅìbùtan de tán Noé ɛkɔrɛ̀levri die Ɔwɔ ankà-bi-dɔ̀ nukù eci léyi kɛ lɛ wɔ̀ɛn, hɩ yɛ vá kàn nɔn. Nɛ̀n ẅɛn Ɔwɔ sɛ́ kɩ nɛ̀n ku ebɩdie-hɛ̀ vri tɔ̀n léyi nɛ́n mán n'ɛmɛ̀n mɛ̀n-bɔ̀ mɛhi yɔ cɔ́ ɛkɔrɛ̀ ɛmɛ̀n nɔn. Ɔmu lɔ de n'ankaẅìbùtan-ẅɛ̀n kruhú lɔ nɛ̀n bó ɛnhibù nwù kɩ nɛ̀n cɔ́ ɛnyrɔnnan Ɔwɔ zìwú.

⁸Ankaẅìbùtan de hán Abrahamɛ̀n wá Ɔwɔ ɛnvra léyi Ɔwɔ bí nɛ̀n nɔn: nɛ̀n hɔ́n ɛnhi wú anmàn tɔ̀n wú léyi Ɔwɔ kɛ tán nɛ̀n kè dú nɛ tɛn nɔn. Nɛ́n hɔ̀n, kɩ nɛ́n sɩ́ nyri ɛyri léyi nɛ hɔ̀n nɔn.

⁹Ankaẅìbùtan kɔrɛ̀levri mɛ̀n, nɛ̀n yɛ́ hán ɛmɛ̀n-nyantɛn-mɛ̀n-wrɔn hɔ́, ɛnhiwú anmàn léyi Ɔwɔ wá nɛ̀n ɔmùan nɔn wú. Nɛ̀n sɔ́n ebɩ́ ɛcàsa-wɔn mɛ̀n, nɛ́n mán Izaakɛ̀n mán Zhakɔbɛ̀n mɛhi, yɔ léyi yɔ cɔ́ Ɔwɔ mùan-wá zri lɔ nɔn.

¹⁰Ɔmuhi Abrahamɛ̀n kɛ vrá anmàn léyi ẅɛn ɛbù-hinan shishi nɔn, anmàn léyi Ɔwɔ dú n'ɔbɔ̀sɔ-wrɔn mán n'oku-wrɔn nɔn.

¹¹Ankaẅìbùtan kɔrɛ̀levriemɛ̀n de Abrahamɛ̀n srɔ ɛnẅì nɛ́n zì, ɔmuhi n'ɛnẅì bî nanwàn vacì kɩ nɛ́n hi Sara mán dú ɛmɛ̀n-kpo-hi nɔn. Abrahamɛ̀n ẅɛn esɛ́ le Ɔwɔ ke di ɔmùan zri n'ɔmùan-wá lɔ mɛ̀n.

¹²Ɔmu lɔ de ɔwrɔn zri ndɔ léyi owù di ɛnrɛ̀n edomɛ̀n nɔn, n'ɛmɛ̀n de n'ɛmɛẅì-bɔ̀ bobrebe hɔ̀n léyi cüɛ́n hán anhobɩ́ kùcànkro mán ecüe gbata-mùan hiẅia hɔ́ nɔn, ndù srɔ nɔn.

¹³Ankaẅìbùtan mɛ̀n de anwrɔn ndɔ hɔ̀n lɔ fɛn nwù nɔn. Yɔ sɩ̀ cɔ̀ anvrɛn léyi Ɔwɔ wá ɔmùan nɔn, tɛ́n yɔ kán anvrɛn hɔ̀n lɔ, kɩ yɔ mrɛ́n anvrɛn hɔ̀n lɔ esù she mɛ̀n. Yɔ nyri kpetee le, yɔ dú ɛmɛ̀n-nyantɛn-mɛ̀n-bɔ̀ mán anwɔn-bɔ̀ ɛnu ɛnhi.

¹⁴Anwrɔn hɔ̀n léyi kɛ dɔ́ ɔmu lɔ nɔn, ke yé kpetee le yɔ ji ɛnhi wú anmàn tɔ̀n.

¹⁵Ke dú kɛ yɛ ẅɛn ɛnhi wú anmàn léyi yɔ teze nɔn, n'obòtò hô, yɔ lɛ cɔ́ ɛkɔrɛlevri yɔ vru ɛmɛẅi yɔ hɔ́n nanvrɛn lɔ.

¹⁶Annanwɔrɛ mɛ̀n lɔ yɔ ji ɛnhi wú anmàn tɔ̀n léyi zrɔ nɔn, hɩ mɛ̀n kɛ dɔ̀ le, anhobɩ́ anmàn. Hɩ le kruhú de Ɔwɔ anvɛvrà ke sɩ́ ẅɛn hán, ɛnvra léyi ye bi nɛ̀n y'Ɔwɔ nɔn; annanwɔrɛ mɛ̀n lɔ, nɛ̀n hán edúyri anmàn tɔ̀n nɛ̀n hɛ́n yɔa.

¹⁷Ankaẅìbùtan mɛ̀n de, Abrahamɛ̀n bɩ́ n'ɛnẅì Izaakɛ̀n ce eci ɛnvra léyi Ɔwɔ wɔɛn nɛ̀n nyan nɔn. Nɛ̀n krɔn kpehɛ́n, ô nɛ̀n ce n'ɛnẅì zri lɔ, tɛ́n Ɔwɔ wá nɛ̀n ɔmùan tɔ̀n:

¹⁸Ɔwɔ gɔ́ dɔ́ nɛ̀n le: “Izaakɛ̀n mɛ̀n de ɛ lɛ cɔ́ ɛmɛẅì-bɔ̀ léyi mɛ̀n wá mɛ́n ɔmùan nɔn.”

¹⁹Tɛ́n Abrahamɛ̀n ẅɛn esɛ́ le Ɔwɔ ẅɛn ɛkɔrɛ̀srɔn ke le bɩ́ Izaakɛ̀n owú-bɔ̀ mɛ̀n ke sɩ́ ɔkɔrɛ̀-bɔ̀ mɛ̀n; hɩ le kruhú de Ɔwɔ wɔrɛ n'ɛnẅì tán nɛ̀n, kɩ eci-hán ndɔ lɔ dú sɛnpò ci léyi ẅɛn vɔ̀nshɛ nɔn.

²⁰Ankaẅìbùtan mɛ̀n de Izaakɛ̀n tán Zhakɔbɛ̀n mán Ezàhü ɛnshìfù tɔ̀n léyi kɛ crɛ nyan y'ɛwuvà lɔ nɔn.

²¹Ankaẅìbùtan mɛ̀n de, Zhakɔbɛ̀n fú Zhozɛfɛ̀n ẅì hɔ̀n ɔwrɔn nzrizri ɛnshi ɛnvra bruemɛ̀n yakɛ nwù; nɛ̀n ẅɛn nɛ́n kpanmàn anta kɩ nɛ̀n cüe Ɔwɔ ankɔrɛ̀ ezìwúɛ.

²²Ankaẅìbùtan mɛ̀n de n'ɛmɛẅi wúvà trɔ mɛ̀n lɔ, Zhozɛfɛ̀n ndɔ̀ le Izraɛlɛ̀n ẅì hɔ̀n ke le dú Ezhiptɛ̀n hiwú kɛ̀ srɔ ɛntrɛ, kɩ yé yɔ eci léyi ye le bɩ́ n'ɛwi hɔ̀n lɔ yɛ hán nɔn.

²³Ankaẅìbùtan mɛ̀n, de Mohizì mɛ̀n mɛ̀n bɔ̀ ẅɛn nɛ̀n bán okù anhɔ̀n ɛnvra léyi ye bî nɛ̀n nɔn. Yɔ kán ɔmu le nɛ̀n dú ɛnẅì fifi, kɩ ɛnjansù kè sɩ̀ ẅɛ̀n yɔ, kɩ yɔ fɔndɔ́n ɛnnɛ̀ncüì nyànmàn lɔ.

²⁴Ankaẅìbùtan mɛ̀n de, ɛnvra léyi Mohizì sɔ́ nɔn, nɛ́n sɩ́ ji nɛ̀n dú Farahɔ́n nyɔnwrɔnẅì lɔ nɛ̀n ẅì.

²⁵Nɛ cüɛn ɔmu le, nɛ́n mán Ɔwɔ fɛcüè mɛhi yɛ hán yɔ ɛgbàn, kɩ nɛ̀n dú ɛgbàn pɔpüɛ̀ brá mɛ̀n, ɛnvra bruemɛ̀n.

²⁶Nɛ cüɛn ɔmu le ye gbri nɛ̀n kɛ̀ hán ebɩdie-wrɔn hɔ́, kɩ ndɔ lɔ ẅɛn vɔ̀nshɛ́ vri vrán Ezhiptɛ̀n nɛ̀ncüì-di-ci hɔ̀n lɔ fɛn, ɔmuhi n'anvɛ̀ dú anjakpà léyi dú ezì kɛ và nɔn wú.

²⁷Ankaẅìbùtan mɛ̀n de, Mohizì cɔhɔ́ Ezhiptɛ̀n hiwú, ɛnjansù kè sɩ̀ ẅɛn nɛ̀n ɛnnɛ̀ncüì mɛ̀nhyì-bɩ lɔ wú; nɛ̀n nyɔ́n ɛshishiemɛ̀n, hán le, nɛ kán Ɔwɔ léyi ye sɩ́ kán nɔn.

²⁸Ankaẅìbùtan mɛ̀n de nɛ̀n wá ɛẅɛnwrɔn-bemɛ̀n-cì ci-hán lɔ, kɩ nɛ̀n hán ye bɩ́ ɛnkrɛ̀ yɛ wá anwɔn sùgbàtà domɛ̀n, ô Ɔwɔ-kùyüre-wrɔn ke bɩ́ wri Izraɛlɛ̀n bɔ̀ kpàkpà ẅì hɔ̀n lɔ nɔn.

²⁹Ankaẅìbùtan mɛ̀n de Izraɛlɛ̀n bɔ̀ vɔ́n ecüe wɔnsɛn annantrɛmɛ̀n, hán le ɛnhì shishi wú hɔ́; tɛ́n ɛnvra léyi Ezhiptɛ̀n-bɔ̀ ke ji kɛ̀ hán eci zri lɔ nɔn, yɔ lɛ fɛn yɔ wú ecue mɛ̀n.

³⁰Ankaẅìbùtan mɛ̀n de Zheriko bù-drɛn hɔ̀n lɔ cue ɛnhibɩ́ ɛnvra léyi Izraɛlɛ̀n-bɔ̀ gbrɛnkɛn ɛbù-drɛn hɔ̀n lɔ ɔmùan ɛbi ɔbɔ̀ɛn nɔn.

³¹Ankaẅìbùtan mɛ̀n de woẅie nyɔnwrɔn Rahabɛ̀n kè sɩ̀ wùɛ nɛ́n mán anwrɔn hɔ̀n léyi kɛ kɛ́n Ɔwɔ ezì nɔn, ɔmuhi nɛ̀n ẅɛn ɛyri-kpra-bɔ̀ nɛ́nnyan-bɔ̀ anvrɛnvrɛn nɔn.

³²Ankà tán de me le vru mɛ̀n dɔ̀ nɛ́n? Ɛnvra kɛ lɛ trɔ mɛ̀n, ô mɛ̀n dɔ́ Zhedeɔn, Barakɛ̀n, Sansɔn, Zhɛfte, Davidɛ̀n, Samüɛlɛ̀n mán Ɔwɔ-mùanwú-ankà-dɔ̀-bɔ̀ ankà.

³³Ankaẅìbùtan mɛ̀n de yɔ kɔ́nká ɛnhiwú anmàn nɛ̀ncüì hɔ̀n, yɔ hán ɛnyrɔnnan-ci, kɩ yɛ cɔ́ eci léyi Ɔwɔ wá ɔmùan nɔn. Yɔ mú gɔ̀ngɔ̀sɔvɛ̀ hɔ̀n ɔmùan yɔ hɛ́n,

³⁴yɔ zɛ́n ɛnhyà shishi hɔ̀n, kɩ yɔ srɛ́ di owù anta anhà-kɔ́n-nyan mɛ̀n. Yɔ dú ɛjɛ-bɔ̀, kɩ yɔ srɔ ecüì-ẅɛn-bɔ̀; yɔ dú bìakpa-bɔ̀ anhà-kɔ́n mɛ̀n, kɩ yɔ kɛ́n ɛmɛ̀n nyantɛn anhà-kɔ́n-bɔ̀, sɩ́ ɛmɛẅi.

³⁵Ankaẅìbùtan mɛ̀n de wúyɔ̀ hɔ̀n kán y'owú-bɔ̀ tohú nyɔn, kɩ ye bɩ́ yɔ yɛ tán yɔ nɔn. Anwrɔn janbɔ̀ yɛ hán ɛgbàn hán mán owúemɛ̀n, yɔ krɔ, yɔ sɩ́ ji ye teze yɔ, yɔ ji yɔ dú owúbɔ̀ mɛ̀n yɔ frɔ́, ô yɔ cɔ́ ɛwúvà anvrɛnvrɛn tɔ̀n.

³⁶Anwrɔn ndɔ hɔ̀n yɛ hán ɛnhyürɛ̀, yɛ crɔnhan ngbèlè, ɛnjanbɔ̀ yɛ wá yɔ gbràka, kɩ yɛ ku yɔ anwɔn-mɛ̀n-wá-wɔn-mɛ̀n.

³⁷Ndɔ hɔ̀n ye wri ɛbùemɛ̀n, ndɔ hɔ̀n yɛ voyan sùkùemɛ̀n kɩ ɛnvra tɔ̀n hô, ye wri yɔ anhà-kɔ́n-nyan mɛ̀n. Ɛnvra tɔ̀n hô, yɔ ci ɛyri yri yɛ cɔ́ yɔ kɔ̀kɔ̀sɛ̀ mán ɛbùrì wrú ceci, yɔ dú ɛmian mɛ̀n, ejüediemɛ̀n mán ɛgbànkanmɛ̀n.

³⁸Ɛnhibù kè sɩ̀ vɛ̀n anwrɔn ndɔ hɔ̀n lɔ! Yɔ dú ɛnnùwì mán nkpò hɔ̀n wú yɛ becì, yɔ dú ɛbù worokòmɛ̀n mán ɛnhibɩ́ Ɛnnànmàn mɛ̀n.

³⁹Ɔwɔ bɩ́ yɔ lɔ fɛn y'ankaẅìbùtan ẅɛ̀n kruhú; ɔmu tɛ̀kɩ yɔ sɩ̀ cɔ̀ eci léyi Ɔwɔ wá ɔmùan nɔn.

⁴⁰Annanwɔrɛ mɛ̀n lɔ, Ɔwɔ wá bɔ̀ ɔmùan vrán ndɔ lɔ, kɩ nɛ́n sɩ́ ji le, yɔ zri kɩ yɔ cɔ́ ɛzrɔ-krutrɔ ke dú kɛ bɔ̀ sɩ̀ dù yɔ ɛmɛ̀n.