Read Alladian Ebre-bɔ̀ 12 Bible Online

Ebre-bɔ̀ 12 - Alladian bible

Ebre-bɔ̀ 12

¹Bɔ tɛn, fɛcüè vri ndɔ léyi dú bɔ́ dalɛfùɛ-di-bɔ̀ nɔn, de gbrɛnkɛn bɔ̀ ɔmùan nɔn. Bɔ̀ ẅɛn eci lɔ fɛn léyi kɛ hán bɔ́ esùnan lɔ kɛ srɔn nɔn bɔ̀ sɔhɔ́, annànnàn le ɛgbàn léyi kɛ brɛ́ bɔ̀ edomɛ̀n hɩ ke sɩ́ tán bɔ̀ esù anvrɛnvrɛn nán yri, ô bɔ̀ bɩ́ ɛnbɔrɛ zriemɛ̀n ɛsrɛ́ léyi yɛ wá tán bɔ̀ nɔn ô bɔ̀ hán n'eci.

²Bɔ̀ crɛ anvɛ̀ bɔ̀ kɛ́n Zhezü, nɛ́n léyi b'ankaẅìbùtan kɛ crɛ nyan nɛ̀n, ɛnkrubɔmɛ̀n hàn mán ɔtrɔmɛ̀n nɔn. Nɛ́n shrì nɛ̀n wú ɛgbàn-hán-tɛ̀ wú, kɩ anvɛvrà wù ndɔ lɔ, nɛ̀n sɩ̀ mrɛ̀n yi ankà zriɛmɛ́n, ɔmuhi nɛ̀n kán pɔpüɛ̀ léyi yɛ wá yɛ hɛ́n nɛ̀n hàn nɔn; kɩ zɛtɛ̀ lɔ nɛ̀n yɛ́ Ɔwɔ-gbútòbù lɔ n'ezìkɔrɛ̀ kɔrɛ̀a.

³Nyɛ́n tro n'ankà, kɛ̀ hán ɔmu le nɛ́n shrì nɛ̀n bɩ́ ezì léyi ɛgbàn-hán-bɔ̀ kɛ́n nɛ̀n nɔn. Kɩ ɔmu lɔ de nyɛ́n sɩ̀ cɔ́ ɛjɛ̀, edù ke sɩ̀ wú nyɛ̀n.

⁴Ɔmuhi anhà léyi nyɛ kɔ́n ɛgbàn nɔn, nyɛ vá wrɔ́n ecüì hàn mán owuemɛ̀n.

⁵Esùva yru nyɛ̀n eduyì léyi Ɔwɔ kɛ tán nyɛ̀n, hán n'ɛẅì hɔ̀n hɔ́ nɛ́n? “M'ɛnẅì ɛnjansù ke bɩ́ ẅɛn mɛ́n ɛnvra léyi Ɛẅɛnwrɔn kɛ lɛ ẅɛn mɛ́n nuku, kɩ ke sɩ́ ji le edù kè wú mɛ́n ɛnvra léyi ne le di mɛ́n ebrè nɔn.

⁶Ɔmuhi Ɛẅɛnwrɔn kɛ ẅɛn ɔwrɔn léyi nɛ cüɛ̀n nɔn nukù, nɛ kɔ́n ɔwrɔn léyi ne bɩ́ hán n'ɛnẅì hɔ́ nɔn ejì.”

⁷Nyɛ́n ẅɛn ɛgbànkàn hɔ̀n léyi hɩ mɛ̀n lɔ, Ɔwɔ kɛ ẅɛn nyɛ̀n nukù nɔn, nyɛ́n hɛ́n: annànwɔrɛ mɛ̀n lɔ ne bɩ́ nyɛ̀n nɛ hán n'ɛẅì hɔ̀n. Ɛnẅì tán de ndù hɩ nɛ́n zi ke sɩ̀ ẅɛn nɛ̀n nukù nɛ́n?

⁸Ke dú kɛ nɛ̀n sɩ̀ ẅɛ̀n nyɛ̀n nukù kɛ̀ hàn n'ɛẅì hɔ̀n lɔ fɛn hɔ́ nɔn hô, zɛtɛn nyɛ́n sɩ̀ dù ɛẅì hɔ̀n annanwɔrɛ, tɛ́n nyɛ́n dú ɛntrɛ ẅì hɔ̀n.

⁹Bú zi hɔ̀n léyi dú ɛnu ɛnhi nɔn, bò kro y'ankà bɔ̀ sɩ́: yɔ ẅɛn bɔ̀ nukù kɩ bɔ́ wá yɔ. Zɛtɛn ke ji le, ankanyriemɛ̀n lɔ, bɔ́ sɩ́ bɔ́ edomɛ̀n ɛnhi bɔ̀ tán bó Zi Ɔwɔ léyi dú anhobɩ́ nɔn, ô bɔ̀ cɔ́ ɛwuvà ne yri.

¹⁰Bɔ́ zi hɔ̀n kɛ ẅɛn bɔ̀ nuku ɛnvra jan, hán ɔmu le yɔ cüɛ̀n nɔn hɔ́. Tɛ́n Ɔwɔ kɛ ẅɛn bɔ̀ nukù b'anvrɛn kruhú, ô bɔ̀ dú prɔnprɔn kɛ hán nɛ́n hɔ́.

¹¹Ɛnvra léyi yɛ ẅɛn bɔ̀ nukù nɔn, bo tro ɛnvra zri lɔ mɛ̀n le, ndɔ lɔ dú obòtò-ci-hán, kɩ kè sɩ̀ dù pɔ̀püɛ̀-brá-ci. Tɛ́n ɛnvra sheshe kɛ lɛ vacì, anwrɔn hɔ̀n léyi kɛ cɔ́ ankà-yé ɔmu lɔ nɔn, kɛ cɔ́ vɔ̀nshɛ́ léyi dú anka-yé lɔ mɛ̀n nɔn: anwɔwɔ léyi yɛ cɔ́ ɛnyrɔnnan wúvà tɔ̀n mɛ̀n nɔn.

¹²Ny'ɛmàn hɔ̀n léyi edù nkà nɔn, nyɛ́n hán yɔ trɛ́n, ny'annankru hɔ̀n léyi kɛ tán nyɛ̀n ɛsɔ̀ze nɔn, nyɛ́n tán yɔ ecüì!

¹³Nyɛ́n nán esù ɛnlevri léyi nyrɔn anvrɛnvrɛn nɔn wú, ô ɛnan léyi kɛ soze nɔn, ke bɩ́ cɔ́ ɛnlɔẅiɛ, tɛ́n nɛ̀n cɔ́ ɛkɔrɛ̀ kpàkprà.

¹⁴Nyɛ́n hán kèkrèmɛ̀n, ô nyɛ́n mán anwrɔn hɔ̀n lɔ fɛn mɛhi nyɛ́n dú anwɔwɔ mɛ̀n, ô nyɛ́n ẅɛn ɛwúvà prɔnprɔn; ɔmuhi, kè sɩ̀ dù ɔmu lɔ hô, ɔwrɔn zriɛmɛ́n ny'ɛmɛ̀n lɔ ke sɩ̀ kán Ɛẅɛnwrɔn lɔ rɔ́.

¹⁵Nyɛ́n wá esùva hô ɔwrɔn zriɛmɛ́n ke bɩ́ crɛ ejüi kɛ kɛ́n Ɔwɔ nboafɔ̀n. Ɔwrɔn zriɛmɛ́n ke bɩ́ srɔ ɛtɛ̀ gbàngbàn léyi ke dì, kɛ ẅɛn ecrukrɛ̀ kɩ ke wri ɔwrɔn brobebe nɔn.

¹⁶Ɔwrɔn zriɛmɛ́n ny'ɛmɛ̀n lɔ ke bɩ́ ẅɛn eci-hán gbàngbàn ankàtro, ɔwrɔn zriɛmɛ́n ke bɩ́ ẅɛn egbrì ɛci prɔnprɔn hɔ̀n wú, hán Ezàhü léyi ɛcizî zri kruhú hɛ́ n'ecüìcüì-dì lɔ nɔn.

¹⁷Ɛnvra nvacì, nyɛ́n nyrì le, nɛ̀n ji ɛnshifù nɛ́n zi yri, tɛ́n nɛ́n zi kɛ́n nɛ̀n hɛ́n. Nɛ̀n sɩ̀ cɔ̀ ankà lɔ n'ɛnkru n'eyúwuemɛ̀n mán.

¹⁸Nyɛ́n sɩ̀ sɔ̀nba eci tɔ̀n léyi yɛ lɛ tɛ́ ɛkɔrɛ tɛ̀, Sinahi kpò lɔ, nɛ́n mán n'ɛnhyà léyi ke wrú ecüemɛ̀n, n'ɛyri yɔwɔ mán ɛnshi-nyran, mán n'ɛnshi vri nàn,

¹⁹ɛbrɛ̀n gbá kùdì mán esùva tɔ̀n ankà-dɔ̀. Ɛnvra léyi Izraɛlɛ̀n ẅì hɔ̀n yá esùva ndɔ lɔ nɔn, yɔ sɩ́ ji le yɛ dɔ́ yɔ ankà-ẅì zriɛmɛ́n.

²⁰Annanwɔrɛ mɛ̀n lɔ, yɔ sɩ̀ ẅɛn ɛnyanmàn ndɔ lɔ yɔ hɛ́n rɔ́; “Ɔwrɔn totɔtɔ̀n léyi kɛ lɛ tɛ́ ɛnkpò ndɔ lɔ ɛkɔrɛ̀ nɔn, ke dú kɛ ɔnɔ̀n dú nɛ̀n mán, yɛ lɛ sroan nɛ̀n ɛbù wri nɛ̀n.”

²¹Eci ndɔ léyi kɛ wɔɛ̀n nɔn, ẅɛn ɛnjansù, hán tán kɩ Mohizì dɔ̀ le: “Me cüì hàn mán, ɛnjansù kɛ ẅɛn mɛ̀n!”

²²Tɛ́n nyɛ tɛn nyɛ́n sɔ̀nba Siɔn kpò mán Ɔwɔ kɔrɛkɔrɛ dúyri tɛsɛ̀n, anhobɩ́ Zherüzalɛmɛ̀n, nyɛ́n mán n'ɛkùyüre-bɔ̀ fɛcüè mɛhi.

²³Nyɛ́n sɔ̀nba fɛcüè tɔ̀n léyi dú ɔkoran mɛ̀n, fɛcüè léyi dú Ɔwɔ kpàkpà ẅì hɔ̀n tɛ́n, yɔ léyi ye merɛ́n y'ebɩ dú anhobɩ́ nɔn. Nyɛ́n sɔ̀nbà Ɔwɔ ɛtɛ̀sɛ̀n, anwrɔnẅi lɔ fɛn mrɛ̀nci-wrɔn, mán anhɛ́n hɔ̀n léyi dú ɛnyrɔnnan mɛ̀n, hɩ cɔ́ ɛzrɔ krutrɔ nɔn.

²⁴Nyɛ́n sɔ̀nba Zhezü ɛtɛ̀sɛ̀n, nɛ́n léyi nɛ̀n dú mìrɛ̀n wrù lɔ n'angranmɛ̀n nyɔnwrɔn mán n'ɛnkrɛ̀ léyi cüe, kɛ dɔ́ ankà anvrɛnvrɛn vrán Abɛlɛ̀n tɛn lɔ nɔn.

²⁵Zɛtɛn nyɛ́n wá esùva! Nyɛ́n díe ɔwrɔn léyi kɛ dɔ́ nyɛ̀n ankà nɔn nukùɛ. Anwrɔn hɔ̀n léyi krɔ kɩ kè sɩ̀ dìe ankà-bi-dɔ́-wrɔn nukù ɛnu ɛnhibù wú nɔn, ɛgbàn-wɔ̀ɛndì lɔ, kè sɩ̀ vɔ́n yɔ ɛwú. Annànnàn le, ɛgbàn-wɔ̀ɛndì n'd'o lɔ, ke sɩ̀ vɔ́n bɔ̀ ɛwú ke dú kɛ bɔ́ crɛ ejüí bɔ́ sɔ́n ɔwrɔn léyi dú anhobɩ́ kɛ dɔ́ bɔ̀ ankà nɔn.

²⁶Ɛnbiɛhɛ́n vra lɔ n'esùva jɔkɔ ɛnhi; tɛ́n zɛtɛ̀ lɔ nɛ̀n wá bɔ̀ ɔmùan ndɔ lɔ: “Me le vru mɛ̀n jɔ̀kɔ ɛyri ɛdɛn zri, ke sɩ̀ dú ɛnhi zri kɩ, tɛ́n anhobɩ́ mán.”

²⁷Ankà-dɔ̀ hɔ̀n léyi dú “Me le vru, ɛdɛ̀n zri” ke yé le ɛci hɔ̀n lɔ fɛn léyi yɛ hán nɔn, yɛ lɛ jɔ̀kɔ yɔ kɩ, yɔ lɛ vàcì, ô eci léyi ye sɩ̀ jɔ̀kɔ̀ rɔ́ nɔn kè dù.

²⁸Zɛtɛn bɔ̀ hán enyri-kùɛn-tán ci; ɔmuhi bɔ̀ cɔ́ anhobɩ́-nɛ̀ncüì-dúyri tɔ̀n léyi ke sɩ̀ jɔ̀kɔ̀ rɔ́ nɔn. Bɔ̀ yé enyrì-kùɛn-tán ci ndɔ lɔ, b'Ɔwɔ ci-bɩtan kɔ̀hɔ̀n lɔ mɛ̀n, kè dù kɛ̀ hán hɩ le nɛ cüɛ̀n nɔn hɔ́, ɔwá mán ɛnjansù kè dú ɛmɛ̀n.

²⁹Annanwɔrɛ mɛ̀n lɔ, b'Ɔwɔ lɔ dú ɛnhyà tɔ̀n léyi kɛ jrɛ́ eci nɔn.