Read Alladian Ebre-bɔ̀ 3 Bible Online

Ebre-bɔ̀ 3 - Alladian bible

Ebre-bɔ̀ 3

¹Nmàn-ẅì hɔ̀n, nyɛ́n dú Ɔwɔ tɛn, nɛ́n léyi nɛ̀n bi nyɛ̀n nɔn. Zɛtɛn, nyɛ́n bɩ́ Zhezü kɛ̀ hán Ɔwɔ kɔ̀hɔ̀n-wá-wrɔn mán ankaẅìbùtan-cice-wrɔn cüìcüì léyi bɔ́ sɔ́n lele bɔ́ tán nɔn.

²Annanwɔrɛ mɛ̀n lɔ, Ɔwɔ mrɛ́n nɛ̀n nbɩ́ ɔkɔ̀hɔ̀n ndɔ lɔ kruhú, kɩ nɛ̀n di ɔmùan zri Ɔwɔ tɛsɛ̀n hán Mohizì léyi ye merɛ́n n'ɛwú ankà yɛ dɔ̀ le: “Nɛ̀n di ɔmùan zri, Ɔwɔ bɩ́ mumù lɔ fɛn mɛ̀n.”

³Ɔwrɔn léyi ke ku ɔwɔn nɔn, nɛ̀n ẅɛn ɛmrɛ́n vrán ɔwɔn dùku lɔ. Ɔmu lɔ, Zhezü ẅɛn ecizrɔ vrán Mohizì.

⁴Annanwɔrɛ mɛ̀n lɔ ɔwrɔn de ke ku ɔwɔn totɔtɔ̀n lɔ fɛn nɔn; tɛ́n ɔwrɔn léyi ku eci lɔ fɛn nɔn, dú Ɔwɔ.

⁵Mohizì tɛn, di ɔmùan zri Ɔwɔ bɩ́ mumù lɔ fɛn mɛ̀n, ɔmuhi nɛ̀n dú eci-bɩtan-wrɔn léyi yɛ wá kè di dalɛfuɛ ankà léyi Ɔwɔ kɛ lɛ dɔ̀ nɔn mɛ̀n.

⁶Tɛ́n Krisì dú ɔmùan-zri-di-wrɔn, nɛ́n léyi nɛ̀n dú ɛnkru, Ɔwɔ wɔn lɔ mɛ̀n nɔn. Kɩ bɔ̀ dú n'ɔwɔn lɔ, ke dú kɛ bɔ́ bɩ́ b'ankàẅì-bùtan mán bɔ́ esɛ́ ke dú b'ɔmùan-gbú-ci.

⁷Hɩ le kruhú de, hán ɔmu le Ɛnhɛ́n Prɔnprɔn kɛ dɔ̀ nɔn: “Ke dú nyɛ yá Ɔwɔ sùva ɛnyɔncì lɔ,

⁸nyɛ́n bɩ́ cɔ́ nɛ̀n ecüiwrɔn kɛ hán ɛnvra léyi nyɛ kɛ́n nɛ̀n ezì, ɛnbì léyi nyɛ́n wɔɛn nɛ̀n nyɛ́n nyan ɛnnùwì nɔn hɔ́.

⁹Ɔwɔ kɛ dɔ̀ le, nanvrɛn lɔ nyɛ́n nancüì hɔ̀n kɛ́n mɛ̀n ezì kɩ wɔɛn mɛ̀n nyan, kɩ hɩ lɔ mán ɛnvra léyi yɔ kán ɛci hɔ̀n lɔ fɛn léyi mɛ̀n hán ɛnnanwàn kru ɛkɔẅì anhyrɛ̀ mɛ̀n nɔn.

¹⁰Hɩ le kruhú de mɛ̀n bɩ́ ɛmɛ̀nhyì ku anwrɔn ndɔ hɔ̀n lɔ ɛwú, kɩ mɛ́n dɔ̀ le: ‘Y'ankàtro dú ɛzɛ́n mɛ̀n ɛnvra lɔ fɛn, yɔ sɩ̀ nyrì eci léyi me ji yɔ yri nɔn.’

¹¹M'ɛmɛ̀nhyì-bɩ lɔ mɛ̀n, mɛ̀n wá ɔmùan ndɔ lɔ: Yɔ sɩ̀ bru ɛnhiwú anmàn léyi mɛ̀n hán ɛwrɔncüe-yri mɛ̀n hɛ́n yɔ hàn nɔn mrìmrì!”

¹²Nmàn-ẅì hɔ̀n, nyɛ́n wá esùva, ɔwrɔn zriɛmɛ́n ny'ɛmɛ̀n lɔ, ke bɩ́ ẅɛn ɛnbɔrɛ gbàngbàn léyi ankaẅìbùtan bàdà ɛmɛ̀n, kɩ kɛ wá tán nɛ̀n, nɛ̀n kɛ́n Ɔwɔ kɔrɛkɔrɛ lɔ ezì.

¹³Nyɛ́n yɩ́ ny'edomɛ̀n edù ɛnbɩ̀ lɔ fɛn, hàn mán kɛ̀ cɔ́ “Ɛnyɔncì” léyi Owrú kɛ dɔ́ n'ankà, ô ny'ɛmɛ̀n lɔ ɔwrɔn zriɛmɛ́n ke bɩ́ krɔ ankà yá, ke teze n'edomɛ̀n ɛgbàn kɛ frɛ́n nɛ̀n.

¹⁴Annanwɔrɛ mɛ̀n lɔ, bɔ̀ dú Krisì sɛnkɛn-bɔ̀, ke dú kɛ bɔ́ ẅɛn nɛ̀n eshishiemɛ̀n hàn mán kɛ cɔ́ ɔtrɔ vra, esɛ́ léyi bɔ̀ ẅɛn ɛnkrubɔmɛ̀n nɔn.

¹⁵Ɔmu lɔ de yɛ dɔ̀ le: “Ke dú kɛ nyɛ yá Ɔwɔ sùva ɛnyɔncì lɔ, nyɛ́n bɩ́ cɔ́ nɛ̀n ecüìwrɔn kɛ hán ɛnvra léyi nyɛ́n kɛ́n nɛ̀n ezì nɔn hɔ́.”

¹⁶Tɛ́n antɔn hɔ̀n de yá Ɔwɔ sùva kɩ kɛ́n nɛ̀n ezì nɛ́n? Yɔ dú anwrɔn lɔ fɛn léyi Mohizì bɩ́ sɔhɔ́ Ezhiptɛ̀n anmàn nɔn.

¹⁷Antɔn hɔ̀n de Ɔwɔ bɩ́ ɛmɛ̀nhyì ɛtɛ̀sɛ̀n annanwàn kru ɛkoẅi-anhyrɛmɛ̀n nɛ́n? Nɛ̀n bɩ́ ɛmɛ̀nhyì nɛ̀n ku anwrɔn hɔ̀n léyi hán ɛgbàn kɩ wú nanvrɛn ɛnnùwì lɔ nɔn.

¹⁸Ɛnvra léyi Ɔwɔ wá ɔmùan ndɔ lɔ le: “Yɔ sɩ̀ bru mrìmrì ɛnhi wú anmàn léyi mɛ̀n hán ɛwrɔncüe yri mɛ̀n hɛ́n yɔ hàn nɔn”, antɔn ankà de nɛ dɔ̀ nɛ́n? Anwrɔn hɔ̀n léyi kɛ́n nɛ̀n ezì nɔn y'ankà de nɛ́n dɔ̀ nɔn.

¹⁹Annanwɔrɛ mɛ̀n lɔ, bɔ́ kàn le yɔ sɩ̀ cɔ̀ brù ɛwrɔncüe yri ndɔ lɔ, ɔmuhi yɔ krɔ, yɔ sɩ̀ bù tàn ankaẅì nɔn.