Read Alladian Ebre-bɔ̀ 5 Bible Online

Ebre-bɔ̀ 5 - Alladian bible

Ebre-bɔ̀ 5

¹Ɔwɔ cice-wrɔn totɔtɔ̀n léyi yɛ mrɛ́n anwrɔnẅiemɛ̀n ye bɩ nɔn, dú Ɔwɔ ci-bɩ̀tan-wrɔn, anwrɔnẅì kɔrɛ̀wá kruhú; ne ce ɛci ɛgbàn bɩce kruhú.

²Nɛ́n mumù mán nɛ̀n dú ɛjɛ̀ wɔ̀ɛn-nyan mɛ̀n; ke ji le nɛ̀n yá anwrɔn hɔ̀n léyi ke sɩ́ nyri ankà mán yɔ hɔ̀n léyi kɛ hán ɛzɛ́n-ci nɔn.

³Ɔmuhi nɛ́n mumù mán nɛ̀n ẅɛn ɛjɛ̀ nɔn, ke ji le nɛ̀n ce eci, kè sɩ̀ dù fɛcüè gbàn zri kruhú, tɛ́n n'ɛgbàn hɔ̀n lɔ mán kruhú.

⁴Ɔwrɔn zriɛmɛ́n ke sɩ̀ mrɛ́n n'edomɛ̀n ɔmuhi nɛ̀n srɔ Ɔwɔ cice-wrɔn cüìcüì nɔn. Yɛ srɔ Ɔwɔ cice-wrɔn cüìcüì ɛnvra léyi Ɔwɔ ke bí mɛ́n, hán ɔmu le ye bi Arɔn nɔn hɔ́.

⁵Krisì dùku mán kè sɩ̀ srɔ n'edomɛ̀n Ɔwɔ cice-wrɔn cüìcüì kɩ kɛ̀ tán n'edòmɛ̀n ɛmrɛ́n. Ɔwɔ de srɔ nɛ̀n ecice-wrɔn cüìcüì kɩ dɔ́ nɛ̀n le: “Vɛ́n de è dú m'Ɛnẅì nɔn, bukru ɛyɔnci lɔ nɔn, mɛ̀n dú e Zi.”

⁶Kɩ owrú nyantɛn mɛ̀n mán nɛ́n dɔ̀ le: “È dú ecice-wrɔn ɛnvra lɔ fɛn mɛ̀n, Mɛlkisedɛkɛ̀n dùci-hán lɔ mɛ̀n.”

⁷N'ɛnhiwú wúvà lɔ mɛ̀n, Zhezü sɛ́n Ɔwɔ, kɩ wú ɛnhyɔ̀bɔ̀, bobo cüìcüì diemɛ̀n, gbɛ́ anvɛshi tán Ɔwɔ léyi ẅɛn ɛkɔrɛ̀srɔn kɛ lɛ ẅɛn nɛ̀n owúemɛ̀n kɛ̀ sɔhɔ́ tɛ̀ nɔn. Kɩ Ɔwɔ yá n'Ɔwɔ-sɛ̀n lɔ, n'edomɛ̀n ɛnhi-sɩ́ kruhú.

⁸Nɛ̀n dú Ɔwɔ Ẅì, ɔmu tɛ̀kɩ nɛ̀n nyri ɔwá ci-hán n'ɛgbànkàn hɔ̀n lɔ mɛ̀n.

⁹Ɛnvra léyi ye sɩ́ nɛ̀n ɛwú n'eci-ankrànkràn-hán mɛ̀n nɔn, nɛ̀n srɔ ɛnkrukɔrɛ̀ léyi ke sɩ́ trɔa nɔn yi ɛnshibɛ́ nɛ̀n tán anwrɔn hɔ̀n léyi ẅɛn n'ɔwá nɔn.

¹⁰Annanwɔrɛ mɛ̀n lɔ, Ɔwɔ srɔ nɛ̀n ɛcice-wrɔn cüìcüì Mɛlkisedɛkɛ̀n dùci-hán lɔ mɛ̀n.

¹¹Bɔ̀ ẅɛn ankà bobrebe bɔ́ lɛ dɔ́ ankà ndɔ lɔ wú, tɛ́n n'ɛmɛ̀n ankà-dɔ̀ sɔ́, ɔmuhi ny'ankà-yá kɛ mɔ́ɛn nɔn.

¹²Ɛnvra bobrebe vácì, ô nyɛ́n srɔ ankà yé-bɔ̀, kɩ ɔmu tɛ̀kɩ nye vru nye ji le ye yé nyɛ̀n ɛnvrakpà ci hɔ̀n léyi dú Ɔwɔ mɛẅi ankà-dɔ̀ lɔ mɛ̀n nɔn. Nyɛ́n vru nye ji ɛnyàn-shi vrán ɛcizî dùku.

¹³Ɔwrɔn léyi ke ji ɛnyàn-shi nɔn, nɛ̀n dú ɛnẅì-cɛ, nɛ̀n sɩ̀ ẅɛ̀n ankà-nyrì eci léyi nyrɔn nɔn hɩ wú.

¹⁴Tɛ́n, ɛcizî dùku lɔ, dú ɛcüìcüì-bɔ̀ tɛn, yɔ léyi y'eci-hán mɛ̀n, yɔ nyri eci léyi dú anvrɛn mán ɛgbàn nɔn.