Read Alladian Ebre-bɔ̀ 9 Bible Online

Ebre-bɔ̀ 9 - Alladian bible

Ebre-bɔ̀ 9

¹Kpàkpà mìrɛ̀n lɔ ẅɛn ɛnyànmàn dú Ɔwɔ-sɛ́n ci-hán mɛ̀n kɩ nɛ̀n ẅɛn ɛnhiwú cice-wɔn.

²Ye ku ɛcàsa-wɔn anhyrɛ̀. Ɛnvrakpà yri léyi ye bi ɛyri prɔnprɔn nɔn, yɛ cɔ́ kɛ̀niɛn wú-hɛ́n-ci mán tɛbrɛ̀ léyi Ɔwɔ cice abutùkumɛ́n dú ɛwú nɔn.

³Anhyrɛmɛ̀n càsa léyi yɛ drɛ̀n nɔn, n'ɛmɛẅi lɔ yɛ cɔ́ anhyrɛmɛ̀n yri léyi ye bi ɛyri prɔnprɔn vri,

⁴nɛ́n mán n'ansìkɛ cice-tɛbrɛ̀ mɛhi; tɛbrɛ̀ léyi n'ɛwú, yɛ biɛ anjɔsàn, kɩ nanvrɛn lɔ yɛ cɔ́ mìrɛ̀n lakà-kpò léyi ansìkɛ dú edòmɛ̀n ɛyri lɔ fɛn nɔn. Lakà lɔ mɛ̀n yɛ cɔ́ ansìkɛ kpokpo léyi anhobɩ́ cizî dú ɛmɛ̀n, Arɔn kpanmán léyi ku anhyrà mán ɛbù tɛbrɛ̀ kpòkpò hɔ̀n léyi mìrɛ̀n nyànmàn hɔ̀n lɔ dú ɛwú nɔn.

⁵Lakà kpò lɔ n'ɛwú lɔ, Ɔwɔ kùyüre-bɔ̀ nyɔn ke yé Ɔwɔ dúyri; yɔ gbrɔ y'ɛtùvà-kɔrɛ̀ hɔ̀n lɔ ku ɛyri léyi ye ce ɛgbàn-bɩce krɛ̀ nɔn. Tɛ́n kè sɩ̀ dù ɛnvra léyi ke ji le bɔ̀ dɔ́ ankà ndɔ lɔ cɛcɛ nɔn.

⁶Ɔmu le eci lɔ fɛn hɛ́n krɔn kpehɛ́n nɔn, Ɔwɔ cice-bɔ̀ ke bru ɛnbì ɛnbì lɔ fɛn ɛcàsa-wɔn lɔ mɛ̀n ô yɔ hán y'ɔkɔ̀hɔ̀n.

⁷Tɛ́n Ɔwɔ cice-wrɔn cüìcüì zri kɩ ke bru anhyrɛmɛ̀n yri lɔ, kɩ eci-hán ndɔ lɔ, nɛ hán yi ɛdɛ̀n zri ɛnnanwàn. Ke ji le nɛ̀n sɩ́ ɔnɔ̀n krɛ̀ léyi ne le ce Ɔwɔ kè dú nɛ́n mán fɛcüè mɛhi y'ɛgbàn hɔ̀n léyi yɔ hán esùva-yuruemɛ̀n nɔn tɛn.

⁸Ɛnhɛ́n Prɔnprɔn ke yé ɔmu lɔ le, ɛyri prɔnprɔn vri levri lɔ kɛ vá srú ze, ke dú kɛ kpàkpà càsa-wɔn lɔ esù kè sɩ̀ srùɛ.

⁹Ndɔ lɔ dú zɛtɛ̀ vra lɔ, n'eci-hán picɛ̀ tɔn. N'ɛmɛ̀n kɛ dɔ̀ le, ɛcice hɔ̀n lɔ fɛn mán annɔn hɔ̀n cice léyi yɛ tán Ɔwɔ nɔn, ɔwrɔn totɔtɔ̀n léyi kɛ hán eci ndɔ lɔ nɔn, ke sɩ̀ crɔn n'ɛnbɔrɛ lɔ kè dú ankrànkràn rɔ́.

¹⁰Ndɔ lɔ fɛn dú edùwrú-ẅiamɛ̀n nyànmàn léyi dú ɛcizî, ɛntàn-mì mán edomɛ̀n fì ci-hán mɛ̀ntɛ mɛ̀ntɛ. Ndɔ lɔ dú eci-hán nyànmàn hɔ̀n léyi ẅɛn vɔ̀nshɛ́ hàn mán cɔ́ ɛnvra léyi Ɔwɔ crɔn eci lɔ fɛn nɔn.

¹¹Tɛ́n Krisì nvà dú anvrɛn hɔ̀n léyi gɔ́ dù nɔn, y'Ɔwɔ-cice-wrɔn cüìcüì. Ɛcasà-wɔn tɔ̀n léyi n'ɛmɛ̀n nɛ hán n'ɔkɔ̀hɔ̀n nɔn, ẅɛn vɔ̀nshɛ́ kɩ vru sɛ́n nmu; kè sɩ̀ dù anwrɔnẅì de kè ku nɛ̀n nɔn, n'ɛmɛ̀n kɛ dɔ̀ le nɛ̀n sɩ̀ dù ɛnhibù ndɔ léyi yɛ hán nɔn tɛn.

¹²Ɛnvra léyi Krisì bru brɛzri ɛyri prɔnprɔn vri lɔ mɛ̀n nɔn, nɛ̀n sɩ̀ cè ɛbùrì mán ɛnnànman hɔ̀n krɛ̀; nɛ̀n ce nɛ́n dùku nɛ́n krɛ̀, kɩ ɔmu lɔ de, nɛ̀n mrɛ́n bɔ̀ ɛgbàn hɔ̀n lɔ mɛ̀n, nɛ̀n sɔhɔ́ brɛzri.

¹³Ɛbùrì mán ɛnnànman hɔ̀n krɛ̀ mán ɛnnànman-sɛ̀n léyi yɛ biɛ, nɛ́n wɔ̀n léyi ye ku ɛnbramɛ̀n-bɔ̀ hɔ̀n ɛwú nɔn, ke fí yɔ ɛntrɛ dòmɛ̀n.

¹⁴Ke dú ɔmu lɔ de ndù nɔn hô, andɛ̀n ɛ̀bɛ́ de Krisì krɛ̀ lɔ kɛ lɛ ẅɛn vɔnshɛ́! Ɛnhɛ́n léyi kè sɩ̀ ẅɛ̀n ɔtrɔ nɔn, n'ecüiemɛ̀n de nɛ̀n bɩ́ nɛ́n dùku n'edomɛ̀n nɛ̀n ce Ɔwɔ, dú nmù sà cice. N'ɛnkrɛ̀ ke le fi bɔ́ wàwúyɛ lɔ n'ɛci-hán gbàngbàn hɔ̀n lɔ mɛ̀n, ô Ɔwɔ kɔrɛkɔrɛ lɔ, bɔ́ dú n'eci-bɩ̀tan-bɔ̀.

¹⁵Nyàn eci le kruhú léyi Krisì dú mìrɛ̀n wrù lɔ, n'angranmɛ̀n nyɔn-wrɔn, ô anwrɔn hɔ̀n léyi Ɔwɔ bi nɔn, kɛ̀ cɔ́ anvrɛn léyi kè sɩ̀ ẅɛ̀n ɔtrɔ, hɩ nɛ̀n wá ɔmùan nɛ̀n hɛ́n n'anwrɔn hɔ̀n nɔn. Yɔ lɛ cɔ́ anvrɛn ndɔ lɔ ɔmuhi owù tɔ̀n nvà, kɩ owù ndɔ lɔ n'ɛkruhú anwrɔnẅì cɔ́ ebɩdie ɛgbàn hɔ̀n léyi yɔ hán ɛnvrakpà mìrɛ̀n lɔ mɛ̀n nɔn.

¹⁶Ɛyri léyi ɔmùan-wá wrú ndù nɔn, ke ji le ye yé tán le ɔwrɔn léyi hán ɔmùan-wá wrú lɔ nɔn, nɛ́n wù.

¹⁷Annanwɔrɛ mɛ̀n lɔ ɔmùan-wá-wrú kè sɩ̀ dù eci zriɛmɛ́n ke dú kɛ ɔwrɔn léyi hán nɛ̀n nɔn, dú ɛkɔrɛ-bɔ̀ mɛ̀n dudù; nɛ ẅɛn vɔnshɛ́ ɛnvra léyi ɔwrɔn léyi hán nɛ̀n nɔn ke wù.

¹⁸Hɩ le kruhú de kpàkpà mìrɛ̀n lɔ dùku mán kè sɩ̀ ẅɛ̀n eci-hán ɛnvra léyi ɛnkrɛ̀ kɛ vá cüe nɔn.

¹⁹Mohizì gɔ́ dɔ́ fɛcüè zìwú ɛnyanmàn hɔ̀n lɔ fɛn ankà, hán ɔmu le ɛnyanmàn wrú ke yé nɔn. Zɛtɛn Mohizì bɩ́ ɛnnànman mán ɛbùrì krɛ̀ mán ɛnshi mɛhi ku ɛnyanmàn wrú mán fɛcüè lɔ fɛn wú, nɛ̀n bɩ́ ɛtɛ̀ léyi ye bí Izɔpɛ̀n nɔn, n'anda mán kɔ̀kɔ̀sɛ̀-tù càsa ẅie wɔnsɛn de nɛ̀n ku yɔ ɛnkrɛ̀ mán ɛnshi edomɛ̀n nɔn.

²⁰Nɛ́n dɔ̀ le: “Ndɔ lɔ dú ɛnkrɛ̀ léyi ke yé mìrɛ̀n léyi Ɔwɔ wá tán nyɛ̀n, ô nyɛ́n ẅɛn n'ɔwá nɔn.”

²¹Mohizì vru bɩ́ ɛnkrɛ̀ ku ɛcàsa wɔn lɔ wú mán ɛci hɔ̀n léyi ye bɩ yɔ hán ɛcice kɔ̀hɔ̀n nɔn wú.

²²Ɛnyànmàn wú lɔ, ɛnkrɛ̀ de ye bɩ ye fi eci lɔ fɛn, kɩ yɛ cɔ́ ɛgbàn-bɩce ɛnvra léyi ɛnkrɛ̀ ke cüe nɔn.

²³Anhobɩ́ picɛ̀ annanwɔrɛ ndɔ hɔ̀n lɔ, ɔmu lɔ de ke ji le ye fi yɔ edòmɛ̀n nɔn. Tɛ́n anhobɩ́ annànwɔrɛ-ci hɔ̀n lɔ mán ke ji ecice ci-hán anvrɛnvrɛn.

²⁴Ɔmuhi Krisì kè sɩ̀ brù Ɔwɔ yri prɔnprɔn léyi anwrɔnẅì nkù, hɩ dú Ɔwɔ yri prɔnprɔn lɔ nɛ́n picɛ̀ annanwɔrɛ tɔ̀n nɔn. Nɛ́n bru anhobɩ́ dùku, nanvrɛn lɔ de zɛtɛ̀ lɔ ne yé n'edomɛ̀n Ɔwɔ zìwú bɔ́ kruhú.

²⁵Zhüìfɛ̀n-bɔ̀ fɛcüè Wɔ cice-wrɔn cüìcüì ke bru annànwàn lɔ fɛn Ɔwɔ yri prɔnprɔn lɔ mɛ̀n nɛ́n mán ɔnɔ̀n krɛ̀ mɛhi. Tɛ́n Krisì ke sɩ̀ bru ɛyri ndɔ lɔ andɛ̀n bobrebe yakɛ kè bɩ nɛ́n dùku n'edòmɛ̀n kè cè eci.

²⁶Kè sɩ̀ dù ɔmu lɔ hô, nɛ lɛ kán ɛgbàn andɛ̀n bɔbrebe ɛnhibù krubɔmɛ̀n anhɛ́n. Annanwɔrɛ mɛ̀n lɔ, nɛ̀n srɔ ɛdɛ̀n zri brɛzri zɛtɛ̀ lɔ, ɛnvra trɔ mùan mɛ̀n, ô nɛ̀n bɩ́ nɛ́n mumù n'edòmɛ̀n nɛ̀n ce, ô nɛ̀n ẅɛn ɛgbàn nɛ̀n sɔhɔ́.

²⁷Ɔwrɔn totɔtɔ̀n dú eci léyi ke le wú ɛdɛ̀n zri kɩ Ɔwɔ ke le ci nɛ̀n ɛmrɛ̀n.

²⁸Ɔmu zri lɔ, Krisì mán ye bɩ ye ce eci ɛdɛ̀n zri, ô kɛ̀ mrɛ́n anwrɔn fɛcüè hɔ̀n ɛgbàn mɛ̀n kɛ̀ sɔhɔ́. Nɛ lɛ srɔ andɛ̀n anhyrɛmɛ̀n, kè sɩ̀ dù hɩ le ne le gbú ɛgbàn nɛ̀n sɔhɔ́ nɔn, tɛ́n, nɛ̀n bɩ́ ɛnkrukɔrɛ̀ nɛ̀n tán anwrɔn hɔ̀n léyi kɛ vrá nɛ̀n nɔn.