Read Alladian Zhakɛ̀n 2 Bible Online

Zhakɛ̀n 2 - Alladian bible

Zhakɛ̀n 2

¹Anwrɔn-nɛ́n-muan-ẅì hɔ̀n, nyɛ́n léyi ny'ɛwúvà dú ankaẅì-bùtan mɛ̀n, Ɛẅɛnwrɔn Zhezü Krisì ci-zrɔ mɛ̀n nɔn, ke sɩ́ ji le ɛnvra zri lɔ mɛ̀n ny'eci-hán-ci kɛ̀ vɛ́n anwrɔnwrɔn tɛ̀sɛ̀n.

²Nyɛ́n nyan ankà ndɔ lɔ: Ɛnnɛ̀ncüì tɔ̀n wá ansɩ̀kɛ kpɛ̀trɛva ɛtiɛ, ẅɛn ɛci ankrankran edomɛ̀n, bru nyɛ́n fɛcüè lɔ mɛ̀n; ɛmian-wrɔn tɔ̀n mán ẅɛn n'ɛmian-ci edomɛ̀n bru fɛcüè zri lɔ mɛ̀n.

³Nyɛ́n ẅɛn ɛnnɛ̀ncüì lɔ n'ɔwa kɩ nyɛ dɔ́ nɛ̀n le: “Và bɩ ɛyri anvrɛnvrɛn ndɔ lɔ ɛ̀ yɛ́”; kɩ nyɛ dɔ́ ɛmian-wrɔn lɔ le: “Vɛ tɛn nyɔ̀n ɛwúɛ, ɛ cüɛ́n hô, yɛ̀ ɛnu lɔ, ɛnhibɩ́ m'ɛnan tɛsɛ̀n”.

⁴Ke dú kɛ ɔmu lɔ de nyɛ hán nɔn hô, nyɛ́n hán ny'edomɛ̀n eci kɛ vɛ̀n, kɩ nyɛ́n ẅɛn ankà-tro gbàngbàn.

⁵Anwrɔn-nɛ́n-muan-ẅì hɔ̀n nyɛ́n die nukùɛ: Ɔwɔ mrɛ́n ɛmian-bɔ̀ lɔ dú ɛnhibù wú nɔn nbɩ, ô yɔ srɔ ɛnnɛ̀ncüì hɔ̀n ankaẅì-bùtan ẅɛn mɛ̀n, ô yɔ cɔ́ Anhobɩ́ Nɛ̀ncüì-dúyri léyi nɛ̀n wá anwrɔn léyi kɛ cüɛ́n nɛ̀n nɔn ɔmùan.

⁶Kɩ, nyɛ tɛn nye gbri ɛmian-wrɔn! Anwrɔn hɔ̀n léyi ke di nyɛ̀n ejüe, hɩ ke sɩ́ nyɛ̀n ɛmrɛ̀nci-bɔ̀ zìwú nɔn, kɛ̂, kè sɩ̀ dù yɔ de yɔ dù ɛnnɛ̀ncüì hɔ̀n lɔ nɛ́n?

⁷Yɔ de yɔ dɔ́ ankà gbàngbàn ku ebɩ́ ankrankran léyi Ɔwɔ tán nyɛ̀n nɔn ɛwú.

⁸Ankaẅì, nyɛ hán eci anvrɛnvrɛn, ke dú kɛ nyɛ ẅɛn Anhobɩ́ Nɛ̀ncüì-dúyri nyanmàn kɔrɛ̀zì-ci nyɛ hɛ́n, hán ɔmu le Owrú Prɔnprɔn yé nɔn: “Ɛ̀ cüɛ́n ɛnyran-wrɔnẅì kɛ̀ hán vɛ́n mumù hɔ́.”

⁹Tɛ́n, ke dú kɛ nyɛ hán eci kɛ vɛ́n ɔwrɔnwrɔn tɛ̀sɛ̀n hó, nyɛ hán ɛgbàn kɩ ɛnyanmàn kɛ bɔ́ nyɛ̀n nwù, ɔmuhi nyɛ fɔndɔn nɛ̀n nɔn.

¹⁰Ɔmuhi, ke dú kɛ ɔwrɔn kɛ fɔndɔn ɛnyanmàn zri hô, nwùbɔ̀ dú nɛ tɛn ɛnyanmàn lɔ fɛn zìwú.

¹¹Annanwɔrɛ mɛ̀n lɔ, ɔwrɔn léyi dɔ̀ le: “E bɩ́ hán ɛnnyɔnwrɔn mán ɛncɔnwrɔn bi-gbàn”, nɛ̀n vru nɛ́n dɔ̀ le: “E bɩ́ wri ɔwrɔn.” Zɛtɛn, ke dú kɛ, e sɩ́ hán ɛnnyɔnwrɔn mán ɛncɔnwrɔn bi-gbàn, tɛ́n e wri ɔwrɔn hô, ɛ fɔndɔn ɛnyanmàn.

¹²Nyɛ́n dɔ́ ankà, ô nyɛ́n hán eci, kè dù kɛ̀ cá anwrɔn hɔ̀n léyi ɛnyanmàn ke le ci ɛmrɛ̀n ô kɛ̀ tán ɛkɔrɛ̀levri eci-hán mɛ̀n nɔn.

¹³Ɔmuhi, Ɔwɔ mán ke sɩ̀ nyrí ɔwrɔn léyi ke sɩ́ nyrí nɛ́n nyran ɛnhyɔ̀bɔ̀ nɔn; tɛ́n ɛnhyɔ̀bɔ̀-nyrì kɔ́nká ɛmrɛ̀n-cì.

¹⁴Anwrɔn-nɛ́n-muan-ẅì hɔ̀n, vɔnshɛ́ tán de dú nɛ̀n ɛmɛ̀n, ɛnvra léyi ɔwrɔn tɔ̀n kɛ dɔ̀ le: “Mɛ̀n ẅɛn ankaẅì-bùtan”, ke dú kɛ n'eci-hán ke sɩ́ yé n'ankaẅì-bùtan léyi nɛ́n ẅɛ̀n nɔn hô, ankaẅì-bùtan ndɔ lɔ ke le bɩ́ nɛ̀n ke die tɛ̀a?

¹⁵Nyɛ́n tro, ke dú kɛ ɔwrɔn-nɛ́n-muan-ẅì tɔ̀n ɛncɔnwrɔn dú nɛ̀n hô, ɛnnyɔnwrɔn dú nɛ̀n hô, yɔ sɩ̀ ẅɛ̀n edùku-ci, kɩ yɔ sɩ̀ ẅɛ̀n nbi nbi ci-zî.

¹⁶Anvrɛn tán de nyɛ hán, ke dú kɛ nyɛ dɔ́ yɔ le: “Nyɛ́n hɔ́n anwɔwɔ mɛ̀n, edù kɛ̀ sɔ́ nyɛ̀n, ô nyɛ́n zî ɛci kɛ̀ fɔ́n nyɛ̀n!” ke dú kɛ nyɛ́n sɩ̀ tán yɔ eci léyi ke ji, ô yɔ bɩ yɔ wrɔ y'edomɛ̀n nɛ́n?

¹⁷Ɔmu lɔ de ankaẅì-bùtan ankà mán ndù nɔn; nɛ́n zri lɔ, ke dú kɛ eci-hán bàdá nɛ̀n ɛmɛ̀n hô, nɛ̀n dú eci woro.

¹⁸Ɔwrɔn tɔ̀n kɛ lɛ dɔ́ tɛ̀ le: “Anwrɔn ndù ẅɛn ankaẅì-bùtan, kɩ ndɔ hɔ̀n ẅɛn eci-hán-ci”, zɛtɛn mɛ lɛ mrɛ́n nɛ̀n ɔmùan le: “È yé mɛ̀n ɔmu le v'ankaẅì-bùtan lɔ hán dù, hɩ eci-hán ke sɩ̀ dú nɛ̀n ɛmɛ̀n! Kɩ mɛ tɛn, me le yé mɛ́n m'ankaẅì-bùtan lɔ m'eci-hán mɛ̀n.”

¹⁹E bú tán le Ɔwɔ zri kɩ dùɛ? Kɛ zrɔ. Anwa-bɔ̀ mán ke bú tán ankàẅì kɩ ɛnjansú mán gbɔ̀gbɔ̀ dú y'edomɛ̀n.

²⁰Ɔbɔrɛsà-wrɔn léyi dú mɛ́n nɔn! E ji è nyrí ɔmu le ankaẅì-bùtan léyi eci-hán bàdà ɛmɛ̀n nɔn, dú eci kora sà nɛ́n?

²¹Anwɔntan de bɔ́ nancüì Abrahamɛ̀n hán hɩ cɔ́ ɛnyrɔnnan Ɔwɔ zìwú nɛ́n? N'eci-hán mɛ̀n kruhú, ɔmuhi nɛ̀n ce n'ɛnẅì Izaakɛ̀n Ɔwɔ-cice-tɛbrɛ̀ wú nɔn.

²²Ɛ kàn: n'ankaẅì-bùtan mán n'eci-hán kɛ hɔ́n owròlò zri, kɩ n'ankaẅì-bùtan srɔ eci ankrankran léyi kɛ kɛ́n nɛ̀n ɛsɛ̀n nɔn.

²³Ɔmu lɔ de Owrú Prɔnprɔn ankà lɔ dɔ̀ nɔn sá nmù: “Abrahamɛ̀n ẅɛn Ɔwɔ sɛ́ kɩ Ɔwɔ bɩ́ nɛ̀n hán ɛnyrɔnnan-wrɔn n'ankaẅì-bùtan lɔ mɛ̀n.” Kɩ, Ɔwɔ ke bi nɛ̀n, nɛ́n nyran-anvrɛn.

²⁴Zɛtɛn nyɛ́n nyri ɔmu le ɔwrɔnẅì kɛ srɔ ɛnyrɔnnan-wrɔn Ɔwɔ zìwú, eci léyi nɛ hán nɔn kruhú, tɛ́n kè sɩ̀ dù ankaẅì-bùtan léyi nɛ́n ẅɛ̀n nɔn kruhú tɛ̀kɩ.

²⁵Eci zri lɔ de Rahabɛ̀n woẅie-nyɔnwrɔn lɔ hán nɔn. Nɛ̀n srɔ ɛnyrɔnnan-hi Ɔwɔ zìwú n'eci-hán mɛ̀n, nɛ́n léyi nɛ̀n ẅɛn Zhüifɛn-bɔ̀ nɛ̀nnyan-bɔ̀, hɩ nɛ̀n wá yɔ ɛkɔrɛ̀ yɔ bɩ́ ɛnlevri nyantɛn yɔ hɔ́n y'anmàn nɔn.

²⁶Annànwɔrɛ mɛ̀n lɔ ɔmu zri lɔ de edùwrú léyi kè sɩ̀ ẅɛ̀n ɔkɔrɛ́-dɔ̀nwrɔ̀n nɔn dú owúemɛ̀n, hɩ zri lɔ de ankaẅì-bùtan léyi kè sɩ̀ ẅɛ̀n eci-hán nɔn mán, dú owúemɛ̀n.