Read Alladian 1 Piɛrɛ̀n 1 Bible Online

1 Piɛrɛ̀n 1 - Alladian bible

1 Piɛrɛ̀n 1

¹Ebinyan ndɔ lɔ dú Piɛrɛ̀n yri kɛ và, nɛ́n léyi nɛ̀n dú Zhezü Krisì kɔhɔ̀n-wá-wrɔn nɔn. Ebinyan lɔ dú anwrɔn hɔ̀n léyi Ɔwɔ mrɛ́n bɩ hɩ dú anwɔ̀nẅiemɛ̀n, bonyí ɔkpɔsɔ hɔ̀n léyi dú Pɔn, Galasi, Kapadɔsɛ̀n, Azi mán Bitini wú nɔn, yɔ tɛn.

²Ɔwɔ Zi mrɛ́n nyɛ̀n nbɩ hán ɔmu le nɛ́n gɔ̀ wá n'ankɔ́nda ci-hán mɛ̀n nɛ̀n hɛ́n; nɛ̀n mrɛ́n nyɛ̀n nɛ̀n hɛ́n ɔhɔ́nan, Ɛnhɛ́n Prɔnprɔn kɔrɛ̀levriemɛ̀n, ô nyɛ́n ẅɛn Zhezü Krisì wá, ô n'ɛnkrɛ̀ kè fi nyɛ̀n edomɛ̀n. Ɔwɔ kɛ̀ tán nyɛ̀n nboafɔ̀n mán anwɔwɔ bobrebe.

³Bɔ̀ mrɛ́n Ɔwɔ Zi léyi dú bɔ́ Ɛẅɛnwrɔn Zhezü Krisì nɛ́n Zi nɔn! N'ɛcüɛ̀n vri lɔ mɛ̀n, nɛ̀n tán bɔ̀ ɛwúvà wrù tɔ̀n Zhezü Krisì wúemɛ̀n-dùfrɔ́ lɔ mɛ̀n. Ɔmu lɔ de bɔ̀ ẅɛn ɔkɔrɛ-sɛ́ tɔ̀n,

⁴kɩ bɔ́ vrá anvrɛn hɔ̀n léyi Ɔwɔ wá hɛ́n n'anwrɔn hɔ̀n nɔn. Yɔ dú anvrɛn hɔ̀n léyi ke sɩ̀ zrɛ́n rɔ́, ke sɩ̀ cɔ́ nbrá, yɔ gbrɛ́n lɔ ke sɩ̀ wù rɔ́. Ɔwɔ hɛ́n nyɛ̀n anvrɛn hɔ̀n lɔ anhobɩ́,

⁵nyɛ́n léyi n'ɛkɔrɛ̀srɔn kɛ nán nyɛ̀n ankaẅìbùtan mɛ̀n, ô nyɛ́n cɔ́ ɛnkrukɔrɛ̀ léyi krɔn kpehɛ́n ke le yé n'edomɛ̀n ɛnvra trɔ mùan mɛ̀n nɔn.

⁶Pɔ̀püɛ̀ kɛ̀ brá nyɛ̀n ɛnkrukɔrɛ̀ lɔ kruhú, ke dú kɛ zɛtɛ̀ lɔ ke ji le nyɛ́n dú obòto mɛ̀n ɛnvra jan ejüedì mɛ̀ntɛ mɛ̀ntɛ mɛ̀n.

⁷Ansìkɛ dùku léyi dú eci-jrɛ́ ci nɔn, ɔmu tɛ̀kɩ ɛnhyà kɛ fi nɛ̀n; ɔmu zri lɔ, ny'ankaẅìbùtan léyi ẅɛn vɔ̀nshɛ́ vrán ansíkɛ nɔn, dú ɔwɔ̀ɛn-nyan mɛ̀n, ô nɛ̀n yé nɛ́n vɔ̀nshɛ́ léyi nɛ́n ẅɛ̀n nɔn. Ɔmu lɔ de nyɛ lɛ cɔ́ ɛmrɛ́n, eci-zrɔ mán ezìwú-gbà ɛnvra léyi Zhezü Krisì kɛ lɛ srɔ nɔn.

⁸Nyɛ́n cüɛn nɛ̀n ke dú kɛ nyɛ́n sɩ́ kán nɛ̀n mán; nye bú n'ankà nyɛ tán ankaẅì kɩ nyɛ vá kán nɛ̀n; hɩ le kruhú de ecizrɔ pɔpüɛ̀ vri kɛ brá nyɛ̀n, ye sɩ́ cɔ́ n'ɛdɔ́-yri,

⁹ɔmuhi nyɛ́n cɔ́ ny'ankaẅìbùtan sùnan krutrɔ: nyɛ́n wawùyɛ krukɔrɛ̀.

¹⁰Ɔwɔ-mùanwú-ankà-dɔ́-bɔ̀ ji ɛnkrukɔrɛ̀ ndɔ lɔ n'ɛwú ankà, kɩ yɔ dɔ́ ɛkɔrɛ̀wá léyi Ɔwɔ tán nyɛ̀n nɔn n'ɛwú ankà.

¹¹Yɔ ji kèkrèmɛ̀n, ô yɔ cɔ́ ɛnvra lɔ mɛ̀n mán eci-hán-ci hɔ̀n léyi Krisì Hɛ́n kɛ tán; ɔmuhi Ɛnhɛ́n ndɔ léyi dú y'ɛmɛ̀n nɔn, gɔ́ dɔ́ yɔ ɛgbànkàn léyi Krisì kɛ lɛ srɔ́n ɛsù mán ecizrɔ léyi zɛtɛn ke le dú nɛ tɛn nɔn hɩ ankà.

¹²Ɔwɔ hán tán n'ɔmùan-wú-ankà-dɔ́ bɔ̀ nyri ɔmu le ɛmɛẅi ankà léyi nɛ̀n wá yɔ antamɛ̀n nɔn, kè sɩ̀ dù yɔ dùku yɔ tɛn, tɛ́n ny'ankà de yɔ dɔ̀ nɔn. Ɛmɛẅi ankà ndɔ lɔ, nyɛ́n cɔ́ nɛ̀n zɛtɛ̀ lɔ Ɔwɔ-ankà-dɔ́-bɔ̀ mùan mɛ̀n; yɔ dɔ́ Ɛmɛẅi ankà Ankrankran lɔ, Ɛnhɛ́n Prɔnprɔn léyi dú anhobɩ́ nvà nɔn, n'ɛkɔrɛ̀srɔn mɛ̀n. Kɩ Ɔwɔ kùyüre-bɔ̀ dùku mán ke ji kè nyri Ɛmɛẅi ankà Ankrànkràn ndɔ lɔ.

¹³Hɩ le kruhú de ke ji le nyɛ́n krɔn kpehɛ́n eci-hán mɛ̀n, ny'ɛnhɛ́n lɔ kè dú ɛvɛ̀ kpriemɛ̀n. Nyɛ́n bɩ́ ny'esɛ́ lɔ fɛn nyɛ́n wá ɛkɔrɛ̀wá léyi yɛ lɛ tán nyɛ̀n ɛnvra léyi Krisì kɛ lɛ và nɔn mɛ̀n.

¹⁴Nyɛ́n wá Ɔwɔ, ô nyɛ́n bɩ́ hán ɛnbiɛhɛ́n ny'ɛnbɔrɛ mɛ̀n cí-hɔ̀n lɔ ɛnvra léyi nyɛ́n dú ɔbrɔsa mɛ̀n nɔn.

¹⁵Tɛ́n nyɛ́n dú prɔnprɔn ny'esùnan lɔ fɛn mɛ̀n, hán ɔmu le Ɔwɔ léyi bi nyɛ̀n nɔn dú prɔnprɔn.

¹⁶Annanwɔrɛ mɛ̀n lɔ Owrú Prɔnprɔn kɛ dɔ̀ le: “Nyɛ́n dú prɔnprɔn, ɔmuhi mɛ̀n dú Prɔnprɔn nɔn.”

¹⁷Ny'ɔwɔ-sɛ̀n hɔ̀n lɔ mɛ̀n, nyɛ tán Ɔwɔ ebi, Ezi, nɛ́n léyi nɛ́n sɩ̀ ẅɛ̀n anmùan anhyrɛ̀, kɩ ne ci anwrɔnẅì lɔ fɛn ɛmrɛ̀n, ɔwrɔnwrɔn v'eci léyi ɛ̀ hán nɔn, hɩ wú; hɩ le kruhú de ɛnvra léyi wɔrɔ, hɩ nye le dú ɛnu hi-wúvà lɔ mɛ̀n nɔn, ke ji le ny'esùnan kè yé ɔwá léyi nyɛ tán Ɔwɔ nɔn.

¹⁸Annanwɔrɛ mɛ̀n lɔ, nyɛ́n nyri ɔwɔ̀ɛn-dì léyi srú nyɛ̀n ɛgbàn mɛ̀n sɔhɔ́, ny'ɔbrɔ̀sà wúvà léyi nyɛ́n nancüì hɔ̀n tán nyɛ̀n nɔn mɛ̀n. Ke sɩ̀ dù eci-jrɛ́ ci hɔ̀n léyi ndù hán ɔkùa mán ansíkɛ hɔ́,

¹⁹de ye bɩ ye srú nyɛ̀n ɛgbàn mɛ̀n nɔn; hɔ̂, Krisì krɛ̀ prɔnprɔn lɔ n'ɛmɛ̀n de ye ce eci dú cá kɔ̀kɔ̀sɛ-ẅì léyi eci-fɔn mán nbrá bàdà edomɛ̀n nɔn.

²⁰Ɔwɔ wá eci-hán ndɔ lɔ ɛnvra léyi ɛnhibù kɛ vá bukru, kɩ ɛnvra trɔ mùan mɛ̀n lɔ, nɛ̀n yé eci-hán ndɔ lɔ ny'anvrɛn kruhú.

²¹N'ɛmɛ̀n de nye bú Ɔwɔ ankà nyɛ tán ankàẅì, nɛ́n léyi nɛ̀n bɩ́ n'ɛnẅì nɛ̀n sɔhɔ́ owú-bɔ̀ mɛ̀n kɩ nɛ̀n tán yi eci-zrɔ; ɔmu lɔ de nyɛ́n bɩ́ ny'ankaẅìbùtan mán ny'esɛ́ nyɛ́n wá Ɔwɔ mɛ̀n nɔn.

²²Ankà annanwɔrɛ anhyɛyì de fi nyɛ̀n edòmɛ̀n nɔn, ô nyɛ́n cüɛn ny'edomɛ̀n kɛ̀ hán anwrɔn-nɛ́n-muan-ẅì hɔ̀n hɔ́. Zɛtɛn nyɛ́n cüɛn ny'edomɛ̀n anvrɛnvrɛn mɛ̀n, ɛnbɔrɛ fifiemɛ̀n.

²³Annanwɔrɛ mɛ̀n lɔ, ye vru yɛ sán bî nyɛ̀n owrù, kɩ nyɛ́n zi hɔ̀n kè sɩ̀ dù owú-bɔ̀, tɛ́n ɛtɛ̀ẅì léyi ke sɩ̀ wúɛ, mán Ɔwɔ mùan-ankà-dɔ̀ kɔrɛkɔrɛ léyi kè sɩ̀ ẅɛ̀n ɔtrɔ nɔn, n'ɛkɔrɛ̀srɔn mɛ̀n.

²⁴Ɔmuhi ye merɛ́n le: “Anwrɔnẅì lɔ fɛn ndù cá ɛfi hɔ́ kɩ y'ecizrɔ lɔ ndù hán ankɛ̀tɛ́mɛ̀n anhyrà hɔ́; ɛfi ke wrú kɩ anhyrà kɛ kɔ́ bore,

²⁵tɛ́n Ɔwɔ mùan-ankà-dɔ̀ dú ɛnvra lɔ fɛn.” Tɛ́n, ankà-dɔ̀ ndɔ lɔ, dú Ɛmɛẅi ankà Ankrankran léyi yɛ dɔ́ tán nyɛ̀n nɔn.