Read Alladian 1 Piɛrɛ̀n 2 Bible Online

1 Piɛrɛ̀n 2 - Alladian bible

1 Piɛrɛ̀n 2

¹Zɛtɛn eci lɔ fɛn léyi dú ɛgbàndì, ɛyɔ̀n, amùan-anhyrɛ̀-dì, ecüì-hi-kɔ̀n mán ɔwrɔn ankà-gbangbàn-dɔ̀, ndɔ lɔ fɛn nyɛ́n kɔ̀n cüe.

²Nyɛ́n dù nyɛ́n cá ɛẅì hɔ̀n wrù léyi ye bî nɔn, nyɛ́n ji ɛnhɛ́n mɛ̀n nyàn-shi léyi nfi nɔn, ô nye mi nɛ̀n, hô nyɛ́n sɔ́, ô nyɛ́n cɔ́ ɛnkrukɔrɛ̀.

³Annanwɔrɛ mɛ̀n lɔ “nyɛ́n kán ɔmu le Ɛẅɛnwrɔn zrɔ nɔn.”

⁴Nyɛ́n sɔ̀nba Ɛẅɛnwrɔn ɛtɛ̀sɛ̀n, obù kɔrɛkɔrɛ léyi anwrɔnẅì kɔ́n ze nɔn, tɛ́n Ɔwɔ mrɛ́n nɛ̀n nbɩ, kɩ nyri nɛ́n vɔ̀nshɛ́ ẅɛ̀n.

⁵Nyɛ́n mán nyɛ́n bɩ́ ɛyri kè dù kɛ̀ hán ɛbù kɔrɛkɔrɛ hɔ̀n léyi srɔ ɛnhɛ́n cice wɔn bù nɔn. Nyɛ lɛ wá Ɔwɔ cice-bɔ̀ kpɔsɔ krumù, yɛ lɛ wá ɛnzhì ɛnkru yɛ tán Ɔwɔ, nye le ce nɛ̀n ɛnhɛ́n mɛ̀n ci léyi kɛ lɛ cüɛn nɛ̀n ɛvɛ̀, Zhezü Krisì bɩmɛ̀n nɔn.

⁶Ɔmuhi nyàn ankà léyi yɛ dɔ́ Owrú Prɔnprɔn lɔ mɛ̀n nɔn: “Mɛ̀n mrɛ́n vɔ̀nshɛ́ bù tɔ̀n mɛ́n bɩ, kɩ me le bɩ́ nɛ̀n mɛ̀n hɛ́n kɛ̀ hán ɔwɔn kavà-mɛ̀n-bù Siɔn anmàn; kɩ ɔwrɔn léyi kɛ ẅɛn n'esɛ́ nɔn, nɛ́n sɩ̀ cɔ́ anvɛvrà mrìmrì.”

⁷Ɔbù ndɔ lɔ ẅɛn vɔ̀nshɛ́ vri tán nyɛ́n ankaẅìbùtan-ẅɛn-bɔ̀, tɛ́n anwrɔn hɔ̀n léyi kè sɩ̀ ẅɛ̀n ankaẅìbùtan nɔn, “Ɔbù léyi ɔwɔn-ku-bɔ̀ kɔ́n ze nɔn, srɔ ɔwɔn kavà-mɛ̀n-bù.”

⁸Kɩ ɛyri nyantɛn ye vru yɛ dɔ̀ le: “Nɛ̀n dú ɔbù léyi ɛnvra léyi nɛ sɔ́n mɛ́n ɛnan nɔn, nɛ hán mɛ́n ɛ trɛnshɛn, ɔbù tɔ̀n léyi kɛ hán mɛ́n e bore.” Anwrɔn ndɔ hɔ̀n lɔ, ɔbù sɔ́n yɔ ɛnan, yɔ trɛnshɛn, yɔ krɔ, yɔ sɩ̀ die Ɔwɔ muan-ankà nukùɛ, kɩ eci-hán-ci ndɔ lɔ de yɛ wá yɛ hɛ́n yɔ nɔn.

⁹Tɛ́n nyɛ́n, nyɛ́n dú ɛnbrɛ̀ léyi yɛ mrɛ́n ye bɩ, Ɛnnɛ̀ncüì cice-bɔ̀, ɛnhi wú anmàn prɔnprɔn, fɛcüè léyi dú Ɔwɔ tɛn nɔn. Nɛ̀n bi nyɛ̀n nyɛ́n dú ɛyri yɔwɔ mɛ̀n nyɛ́n srɔ n'ɛyrikàn anvrɛnvrɛn lɔ mɛ̀n, ô nyɛ́n dɔ́ ɔkɔ̀hɔ̀n fifi hɔ̀n léyi nɛ̀n hán nɔn hɩ ankà.

¹⁰Ɛnbiɛhɛ́n vra lɔ nyɛ́n sɩ̀ dù Ɔwɔ fɛcüè-bɔ̀ tɛ́n, tɛ́n zɛtɛ̀ lɔ nyɛ́n dú nɛ́n fɛcüè; ɛnbiɛhɛ́n vra lɔ nyɛ́n sɩ̀ cɔ̀ Ɔwɔ-yɔ̀bɔ̀-nyrì, tɛ́n zɛtɛ̀ lɔ nyɛ́n cɔ́ Ɔwɔ-yɔ̀bɔ̀-nyrì.

¹¹Mɛ dɔ́ nyɛ̀n, annyran anvrɛn hɔ̀n, nyɛ́n léyi nyɛ́n dú ɛmɛ̀n-nyantɛn mɛ̀n bɔ̀, kɩ nyɛ́n dú anwɔ̀nẅiemɛ̀n ɛnhi wú nɔn: nyɛ́n wá ny'edomɛ̀n esùva anwrɔnẅì afùyà ci-hán tɛ̀sɛ̀n, afùyà hɔ̀n léyi kɛ kɔ́n nyɛ̀n anhà edomɛ̀n nɔn.

¹²Nyɛ́n ẅɛn esunàn ankrankran anwrɔn hɔ̀n léyi kè sɩ̀ nyrì Ɔwɔ nɔn y'ɛtɛ̀sɛ̀n; ɔmu lɔ de, ke dú kɛ yɔ ẅɛn ɛyɔ̀n yɔ ku nyɛ̀n ɛwú, yɔ dɔ̀ le nyɛ́n dú eci-gbàngbàn hán-bɔ̀, ô ɔtrɔ mɛ̀n lɔ, yɔ le nyri ɛci ankrankran hɔ̀n léyi nyɛ́n hán nɔn, kɩ yɔ lɛ mrɛ́n Ɔwɔ, ɛnbì léyi dú n'ɛvá bì nɔn.

¹³Nyɛ́n sɩ́ ny'edomɛ̀n ɛnhi nyɛ́n tán ɛkɔrɛ̀levri-bɔ̀ lɔ fɛn, Ɛẅɛnwrɔn kruhú: ɛnhi wú nɛ̀ncüì léyi ẅɛn ɛkɔrɛ̀srɔn ɔwrɔnẅì wú

¹⁴mán govràn hɔ̀n léyi nɛ wá ɔkɔ̀hɔ̀n kɛ hán anwrɔn gbàngbàn ɛgbàn, ô kɛ̀ mrɛ́n yɔ hɔ̀n léyi kɛ hán anvrɛn nɔn.

¹⁵Annanwɔrɛ mɛ̀n lɔ, eci léyi Ɔwɔ ke ji nɔn, dú hɩ le ke ji le bɔ̀ hán anvrɛn kɔ̀hɔ̀n, ô ɔbrɔ̀sà-bɔ̀ mán yɔ hɔ̀n léyi kè sɩ̀ ẅɛ̀n ɛnkruemɛ̀n nɔn, bɔ̀ kɛ́n yɔ ɔmùan bɔ̀ hɛ́n.

¹⁶Nyɛ́n nyrɔn ny'edomɛ̀n kɛ̀ hán anwrɔn kora hɔ̀n hɔ́; tɛ́n nyɛ́n bɩ́ bɩ́ ny'anwrɔn kora hɔ̀n kɔrɛ̀levri lɔ nyɛ́n bán ɛgbàn, tɛ́n nyɛ́n hán Ɔwɔ ci-bɩtan-bɔ̀ kɔ̀hɔ̀n.

¹⁷Nyɛ́n ẅɛn anwrɔnẅì lɔ fɛn wá, nyɛ́n cüɛn nyɛ́n muan-ẅì hɔ̀n ankàẅìbùtan mɛ̀n, nyɛ́n cüe Ɔwɔ ankɔrɛ̀ ezìwúɛ, nyɛ́n wá ɛnhi wú nɛncüì.

¹⁸Eci-bɩtan-bɔ̀, nyɛ́n sɩ́ ny'edomɛ̀n ɛnhi nyɛ́n tán ny'ankà-yé-bɔ̀, hɩ mán ɔwá lɔ fɛn léyi dú nɛ̀n ɛmɛ̀n, kè sɩ̀ dù yɔ hɔ̀n léyi zrɔ, kɩ dú anvrɛnvrɛn nɔn kɩ, tɛ́n yɔ hɔ̀n léyi dú ɛnkru shishi bɔ̀ nɔn mán.

¹⁹Annanwɔrɛ mɛ̀n lɔ, dú eci ankrankran, Ɔwɔ kɔrɛ̀zì-ci-hán mɛ̀n lɔ, ke dú kɛ bɔ́ shrì bɔ́ bɩ́ ɛgbàn hɔ̀n léyi yɔ hán bɔ̀ ɛfrɛ́n mɛ̀n nɔn.

²⁰Ɔmuhi vɔ̀nshɛ́ tán de dú nɛ̀n ɛmɛ̀n, ke dú kɛ ye gorɛ bɔ̀ ɛgbàn léyi bɔ̀ hán nɔn kruhúɛ? Tɛ́n ke dú kɛ nyɛ kán ɛgbàn eci ankrankran hán mɛ̀n, kɩ nye shri ɛgbànkàn lɔ nye bɩ, ndɔ lɔ dú anvrɛn ci-hán Ɔwɔ zìwú.

²¹Eci ndɔ lɔ kruhú de nɛ̀n bi nyɛ̀n, ɔmuhi Krisì dùku mán kán ɛgbàn ny'ɛkruhú; nɛ̀n tán nyɛ̀n sɛnpò, ô nyɛ́n ci n'esùnàn wú.

²²Nɛ̀n sɩ̀ hán ɛgbàn; ɛyɔ̀n ankà zriɛmɛ́n kè sɩ̀ dú n'ɔmùan lɔ mɛ̀n kɛ̀ srɔa mrìmrì.

²³Ɛnvra léyi yɛ wora nɛ̀n nɔn, nɛ̀n sɩ̀ bɩ́ ɔwɔra nɛ̀n di yɔ ɔwɔ̀ɛn; ɛnvra léyi yɛ hán nɛ̀n, nɛ̀n kán ɛgbàn nɔn, nɛ̀n sɩ̀ dɔ̀ ɛẅiɛ̀-dá ankà zriɛmɛ́n, tɛ́n nɛ̀n bɩ́ fɛn lɔ nɛ̀n wá Ɔwɔ antamɛ̀n, nɛ́n léyi ne ci ɛmrɛ̀n ɛnyrɔnnan mɛ̀n nɔn.

²⁴Nɛ́n dùku n'edùwru ẅia lɔ mɛ̀n, nɛ̀n bɩ́ bɔ́ ɛgbàn hɔ̀n lɔ ɛgbàn-hán-tɛ̀ wú, ô bɔ̀ wú ɛgbàn mɛ̀n, ô bɔ̀ cɔ́ ɛnyrɔnnan wúvà. N'ecifɔn hɔ̀n lɔ mɛ̀n de nyɛ́n cɔ́ ɔkɔrɛ̀ nɔn.

²⁵Ɔmuhi nyɛ́n dù nyɛ́n cá kɔ̀kɔ̀sɛ̀ hɔ̀n léyi zrɛ́n, tɛ́n zɛtɛ̀ lɔ ye bɩ́ nyɛ̀n yɛ vá sɩ́ nɛ̀n, nɛ́n léyi nɛ̀n dú ny'ɔkuawrɔn kɩ nɛ nán nyɛ̀n nɔn.