Read Alladian 1 Piɛrɛ̀n 3 Bible Online

1 Piɛrɛ̀n 3 - Alladian bible

1 Piɛrɛ̀n 3

¹Wúyɔ nyɛ́n mán ɔmu zri lɔ, nyɛ́n sɩ́ ny'edomɛ̀n ɛnhi nyɛ́n tán nyɛ́n cüi hɔ̀n, ô ke dú kɛ ɛnjanbɔ̀ y'ɛmɛ̀n lɔ, ke sɩ́ bú Ɔwɔ ankà kɛ tán ankàẅì hô, ny'esùnàn anvrɛnvrɛn kɛ̀ hán tán yɔ cɔ́ ankaẅìbùtan. Ankà-dɔ̀ mán, ke sɩ̀ dú eci zriɛmɛ́n y'ɛwú:

²ke ji le yɔ kán ɔmu le ny'esùnàn nfì, kɩ ẅɛn ɔwá nɔn.

³Nyɛ́n bɩ́ ji ny'edomɛ̀n fì ɛntrɛ ci-hán mɛ̀n, hán ɛnkruẅie hɔ̀n léyi yɛ sanhán, ansíkɛ-ci hɔ̀n mán edomɛ̀n-ẅɛn-ci hɔ̀n fifi.

⁴Nyɛ́n ji ɛnhɛ́n mɛ̀n fì nyɛ́n wá edomɛ̀n, ɛnhɛ́n-mɛ̀n-fi-ci léyi ke sɩ́ wúɛ, dú sɔ̀hɔ̀ mán anwɔwɔ, kɩ ẅɛn vɔ̀nshɛ́ vri Ɔwɔ zìwú nɔn.

⁵Ndɔ lɔ de dú ɛnbiɛhɛ́n wúyɔ̀ hɔ̀n léyi kɛ sɛ́n Ɔwɔ nɔn, y'edomɛ̀n-ẅɛn-ci, yɔ léyi yɔ ẅɛn esɛ́ Ɔwɔ mɛ̀n nɔn. Yɔ sɩ́ y'edomɛ̀n ɛnhi yɔ tán yɔ cüì hɔ̀n,

⁶ndù hán Sara léyi kɛ wá Abrahamɛ̀n kɩ ke bi nɛ̀n “M'ankà-yé-wrɔn”. Nyɛ́n dú annanwɔrɛ mɛ̀n Ɔwɔ wúyɔ̀-ẅì hɔ̀n, ke dú kɛ nyɛ hán anvrɛn kɩ nyɛ́n sɩ́ teze ny'edomɛ̀n yɛ wá nyɛ̀n ɛnjansù zriɛmɛ́n.

⁷Nyɛ́n mán, wúcɔ̀, nyɛ́n yɛ́ nyɛ́n mán nyɛ́n hi hɔ̀n mɛhi, ô nyɛ́n nyri ɔmu le y'edùwru lɔ dú ɔbɔ̀sɔ-ci; nyɛ́n hán yɔ eci ɔwá mɛ̀n, ɔmuhi yɔ mán nyɛ́n mɛhi nyɛ lɛ cɔ́ ɛkɔrɛwá léyi dú annanwɔrɛ wúvà léyi Ɔwɔ kɛ tán nɔn mɛ̀n. Nyɛ́n hán ɔmu lɔ, ô eci zriɛmɛ́n ke bɩ́ wá ny'Ɔwɔ-sɛ̀n hɔ̀n lɔ ejüe.

⁸Ɔtrɔ mɛ̀n lɔ, nyɛ lɛ fɛn nyɛ́n ẅɛn eci wrolo-zri-hán mán ankàtro zri; nyɛ́n cüɛn ny'edomɛ̀n kɛ̀ hán anwrɔn nɛ́n muan-ẅì hɔ̀n hɔ́, nyɛ́n dú anvrɛnvrɛn mán sɔ̀hɔ̀ mɛ̀n nyɛ́n nyran hɔ̀n tɛ̀sɛ̀n.

⁹Nyɛ́n bɩ́ bɩ́ ɛgbàn nyɛ́n di ɛgbàn wɔ̀ɛn, kɩ ɔwora mán nyɛ́n bɩ́ bɩ́ nyɛ́n dí ɔwɔra wɔ̀ɛn. Tɛ́n nyɛ́n dɔ́ ɛnshifù ankà nyɛ́n tán, ɔmuhi ɛnshifù ankà tɔ̀n de Ɔwɔ wá ɔmùan kɛ̀ tán nyɛ̀n ɛnvra léyi nɛ̀n bi nyɛ̀n nɔn.

¹⁰Annanwɔrɛ mɛ̀n lɔ, nyàn eci léyi ye merɛ́n nɔn: “Ɔwrɔn léyi ke ji ɛwúvà anvrɛnvrɛn ẅɛ̀n, ô kè dú ɛnbɔrɛbruemɛ̀n nɔn, ke ji le nɛ́n bɩ́ dɔ́ ɔwrɔn ankà gbàn ɛmɛẅi kɩ nɛ́n bɩ́ ẅɛn ɛyɔ̀n.

¹¹Ke ji le nɛ̀n crɛ ejüi nɛ̀n sɔ́n ɛgbàn, nɛ̀n hán anvrɛn, ô nɛ̀n ji anwɔwɔ esɛ́ mɛ̀n.

¹²Ɔmuhi Ɛẅɛnwrɔn vɛ̀ dú ɔmùan-zri-di-bɔ̀ wú, krɔn kpehɛ́n kè die y'Ɔwɔ-sɛ̀n lɔ nukùɛ; tɛ́n, Ɛẅɛnwrɔn kɛ kɛ́n ɛgbàn-hán-bɔ̀ ezì.”

¹³Antɔ̀n de kɛ lɛ hán nyɛ̀n ɛgbàn ke dú kɛ nyɛ́n dú edùyiemɛ̀n nyɛ hán anvrɛn nɛ́n?

¹⁴Ke dú kɛ nyɛ lɛ kán ɛgbàn mán, ɔmuhi nyɛ hán ɛnyrɔnnan-ci nɔn, nyɛ́n dú ɛnbɔrɛbruemɛ̀n. Nyɛ́n bɩ́ ẅɛn anwrɔn ndɔ hɔ̀n sù, kɩ nyɛ́n bɩ́ teze ny'edomɛ̀n gbɔ̀gbɔ̀ mɛ̀n.

¹⁵Tɛ́n nyɛ́n ẅɛn Krisì wá kè dú ny'ɛnbɔrɛ hɔ̀n lɔ mɛ̀n, kɛ hán ny'Ɛẅɛnwrɔn hɔ́. Ɛnbì lɔ fɛn nyɛ́n krɔn kpehɛ́n, ô nyɛ́n dɔ́ ankà nyɛ́n tán ny'edomɛ̀n ɛnvra léyi ye le yrɛ nyɛ̀n ny'esɛ́ léyi nyɛ́n ẅɛn Ɔwɔ mɛ̀n nɔn n'ɛwú ankà.

¹⁶Tɛ́n eci-hán ndɔ lɔ, nyɛ́n hán nɛ̀n sɔ̀hɔ̀ mɛ̀n mán ɔwá mɛ̀n. Nyɛ́n ẅɛn wàwúyɛ fifi, ô anwrɔn hɔ̀n léyi kɛ dɔ́ ankà gbàn ku nyɛ́n Krisì sɛnkɛn-bɔ̀ sùnan ankrànkràn lɔ ɛwú nɔn, y'ɛyɔ̀n anvɛvrà kɛ̀ ẅɛn yɔ.

¹⁷Ɔmuhi zrɔ tán le yɛ kán ɛgbàn anvrɛn-hán mɛ̀n, ke dú kɛ ndɔ lɔ de dú Ɔwɔ kɔrɛzì-ci nɔn, kɩ yɛ hán ɛgbàn.

¹⁸Annanwɔrɛ mɛ̀n lɔ Krisì dùku mán kán ɛgbàn ɛdɛ̀n zri brɛzri anwrɔnẅì gbàn kruhú; nɛ̀n sɩ̀ hán eci zriɛmɛ́n, kɩ nɛ̀n wú ɛgbàn-hán-bɔ̀ kruhú, ô nɛ̀n bɩ́ nyɛ̀n nɛ̀n hɔ́n sɩ́ Ɔwɔ. Ye di nɛ̀n owúemɛ̀n n'edùwrú ẅia mɛ̀n, tɛ́n ye sɩ́ nɛ̀n ɛwúvà-kɔrɛ mɛ̀n Ɛnhɛ́n Prɔnprɔn cüiemɛ̀n.

¹⁹Ɛnhɛ́n prɔnprɔn ndɔ lɔ, n'ɛkɔrɛ̀srɔn mɛ̀n lɔ, nɛ́n hɔ̀n nɛ̀n dɔ́ anhɛ́n hɔ̀n léyi dú anwɔn-mɛ̀n-wá-wɔn mɛ̀n nɔn, Ɔwɔ ankà,

²⁰hɩ mɛ̀n kɛ dɔ̀ le, anwrɔn hɔ̀n léyi ɛnbiɛhɛ́n kɛ́n Ɔwɔ ezì, ɛnvra léyi nɛ vrá ɛnbɔrɛ-ẅɛ̀n-hɛ́n mɛ̀n Noe bɩdie-hɛ̀ lɔ nɔn. Anwrɔn ẅiɛ kɩ, yɔ dú anwrɔn eẅirì kɩ bru anhàka lɔ mɛ̀n kɩ cɔ́ ebɩdie ɛnshiemɛ̀n.

²¹Ndɔ lɔ de ke yé bɔ̀ ɛnshi-kruwá picɛ̀ léyi kɛ tán bɔ̀ ebɩdie zɛtɛ̀ lɔ nɔn; ɛnshi-kru-wá ndɔ lɔ, kè sɩ̀ dù eci léyi ke jru bɔ̀ ɛnbrá edomɛ̀n nɔn, tɛ́n kɛ sán Ɔwɔ wàwúyɛ fifi. Ne bɩ́ bɔ̀ die Zhezü Krisì owúemɛ̀n-dùfrɔ́ lɔ n'ɛnboafɔ̀n mɛ̀n,

²²nɛ́n léyi nɛ̀n hɔ́n anhobɩ́, nɛ̀n yɛ́ Ɔwɔ ezì-kɔrɛ̀a, nanvrɛn de nɛ̀n ẅɛn ɛyri Ɔwɔ kùyüre-bɔ̀ mán anhobɩ́ kɔrɛ̀srɔn-bɔ̀ wú nɔn.