Read Alladian 1 Piɛrɛ̀n 4 Bible Online

1 Piɛrɛ̀n 4 - Alladian bible

1 Piɛrɛ̀n 4

¹Ɔmuhi Krisì kán ɛgbàn n'edùwru ẅia mɛ̀n nɔn, nyɛ́n mán nyɛ́n ẅɛn edùyì zri lɔ, kè dú nyɛ̀n ɛnhɛ́n mɛ̀n; ɔmuhi ɔwrɔn léyi kán ɛgbàn n'edùwru ẅia mɛ̀n nɔn, nɛ́n mán ɛgbàn mɛhi y'eci-hán trɔ.

²Bukru zɛtɛ̀ lɔ nɔn, ke ji le ny'ɛwúvà léyi wɔrɔ dú nyɛ̀n ɛnu hi nɔn, kè dú Ɔwɔ-ci-hán bɔ̀sɔ mɛ̀n, tɛ́n ke bɩ́ dú anwrɔnẅì ankàtro mɛ̀n.

³Annanwɔrɛ mɛ̀n lɔ, ɛnbiɛhɛ́n vra lɔ, nyɛ́n bɩ́ ɛnvra bobrebe nyɛ́n hán ɛci hɔ̀n léyi kɛ cüɛn anwrɔn hɔ̀n léyi kè sɩ̀ nyrì Ɔwɔ nɔn ɛvɛ̀. Ny'ɛwúvà dú eci-gbàngbàn-hán mɛ̀n, ankàtro gbàngbàn hɔ̀n mɛ̀n, ɛntàn-mí-kɔ̀hɔ̀n-hán mɛ̀n, wowie-kɔ̀hɔ̀n-hán mɛ̀n, ɛci-cüì-dì-kɔ̀hɔ̀n-hán mán eci fɔ́n ci-hán léyi dú antɛ̀buri-sɛ̀n nɔn kɔhɔ̀n-hán mɛ̀n.

⁴Kɩ zɛtɛ̀ lɔ, anwrɔn hɔ̀n léyi kè sɩ̀ nyrì Ɔwɔ nɔn, ankà kɛ frɛ́n anvɛmɛ̀n, ɔmuhi nyɛ́n sɩ́ vru cɔ́ yɔ mɛhi nyɛ́n nán esù gbàngbàn, kɩ yɔ wora nyɛ̀n.

⁵Tɛ́n yɔ ẅɛn eci krɛ̀ y'eci-hán mɛ̀n Ɔwɔ zìwú, nɛ́n léyi nɛ̀n krɔn kpehɛ́n, ne ci ɔkɔrɛ-bɔ̀ mán owú-bɔ̀ ɛmrɛ̀n nɔn.

⁶Nyàn eci le kruhú léyi yɛ dɔ́ Ɛmɛẅi ankà Ankrankran lɔ mán yɛ tán owú-bɔ̀ nɔn: ɔmu lɔ de yɔ ci yɔ ɛnhibù wú wúvà ẅɛ̀n mrɛ̀n hán anwrɔnẅì lɔ fɛn nɔn hɔ́, kɩ zɛtɛ̀ lɔ, yɔ cɔ́ ɛkɔrɛ̀levri, Ɛnhɛ́n Prɔnprɔn cüìemɛ̀n, yɔ dú Ɔwɔ wúvà lɔ mɛ̀n.

⁷Ɛci hɔ̀n lɔ fɛn y'ɔtrɔ vra bá ɛtɛ̀sɛ̀n: Zɛtɛn nyɛ́n dú ɛnkruemɛ̀n-ẅɛ̀n wúvà mɛ̀n, ɛnhɛ́n kè dú nyɛ̀n ɛvɛ̀ kpriemɛ̀n, ô nyɛ́n cɔ́ Ɔwɔ-sɛ́n yri.

⁸Eci lɔ fɛn mɛ̀n lɔ, nyɛ́n cüɛn ny'edomɛ̀n edùyiemɛ̀n, ɔmuhi ɛcüɛ̀n kɛ cɔ́ ɛgbàn bobrebe gbànbɩce nɔn.

⁹Nyɛ́n nyrì ẅɛn ny'edomɛ̀n nɛ̀nnyànbɔ̀, ezì-mù ke bɩ́ dú ɛmɛ̀n.

¹⁰Ke ji le ɔwrɔnwrɔn ke bɩ́ nɛ́n nyran hɔ̀n kruhú, ɛkɔrɛ̀-wá-ci léyi nɛ̀n cɔ́ Ɔwɔ yri nɔn nɛ̀n hán yɔ anvrɛn. Ɔmu lɔ de nyɛ lɛ srɔ Ɔwɔ kɔrɛ̀-wá-ci bobrebe hɔ̀n léyi nyɛ́n cɔ̀ nɔn, n'eci-hán-bɔ̀ ankrankràn.

¹¹Ɔwrɔn léyi kɛ dɔ́ ankà anvrɛnvrɛn nɔn, ke ji le nɛ̀n dɔ́ Ɔwɔ ankà; ɔwrɔn léyi ẅɛn eci-bɩtan kɔrɛ̀-wá nɔn, kè bɩ́ nɛ̀n kɛ̀ hán eci Ɔwɔ kɔrɛ̀-wá cüìemɛ̀n: ke ji le eci lɔ fɛn mɛ̀n lɔ, Ɔwɔ kɛ̀ cɔ́ eci-zrɔ Zhezü Krisì bɩmɛ̀n, nɛ́n léyi ɛkɔrɛ̀srɔn mán eci-zrɔ dú nɛ tɛn ɛnvra lɔ fɛn! Kè dú ɔmu lɔ.

¹²Annyran anvrɛn hɔ̀n, ke bɩ́ frɛ́n nyɛ̀n anvɛmɛ̀n ke dú kɛ nyɛ́n dú ɔwɔ̀ɛn-nyan shishiemɛ̀n, kɛ hán le eci vɛ́n nyantɛn de kɛ vá ny'ɛwú nɔn.

¹³Pɔpüɛ̀ kɛ̀ hɛ́ ezì kɛ̀ brá nyɛ̀n, ɔmuhi nyɛ́n cɔ́ Krisì gbànkàn lɔ nɔn, ô pɔpüɛ̀-brà vri ke vru ke yɩ́ ny'ɛnbɔrɛ hɔ̀n lɔ mɛ̀n, ɛnvra léyi ne le yé yɔ lɛ fɛn n'eci-zrɔ lɔ nɔn.

¹⁴Ke dú kɛ yɛ wora nyɛ̀n ɔmuhi nyɛ́n dú Krisì sɛ̀nkɛn-bɔ̀ nɔn, nyɛ́n dú ɛnbɔrɛbruemɛ̀n, ɔmuhi Ɔwɔ ci-zrɔ Hɛ́n dú nyɛ̀n ɛwú nɔn.

¹⁵Ɔwrɔn zriɛmɛ́n ny'ɛmɛ̀n lɔ ke bɩ́ cɔ́ ɛgbànkàn kɛ hán ɔwrɔn-wri-wrɔn, ɛciyerɛ-wrɔn mán eci-gbangbàn-hán-wrɔn hɔ́, kɩ ɛnvra tɔ̀n hô, ɔmuhi nɛ̀n bru anwrɔn ankà mɛ̀n nɔn.

¹⁶Tɛ́n ke dú kɛ ɔwrɔn tɔ̀n kɛ kán ɛgbàn ɔmuhi nɛ̀n dú Krisì sɛ̀nkɛn-wrɔn nɔn, anvɛvrà ke bɩ́ ẅɛn nɛ̀n; nɛ̀n gɔ̀ tán Ɔwɔ ɔkùɛn ɔmuhi nɛ̀n cɔ́ ɛkɔrɛ̀levri nɛ̀n bɩ́ ebi ndɔ lɔ nɔn.

¹⁷Ɛmrɛ̀nci vra lɔ ncɔ̀a, kɩ Ɔwɔ fɛcüè de yɛ gɔ́ ci ɛmrɛ̀n nɔn. Tɛ́n, ke dú kɛ ɛmrɛ̀ncì lɔ ke bukru bɔ́ yri, anhɔntan de kɛ lɛ hán kè dú ɔtrɔ mɛ̀n lɔ, ɛnvra léyi nɛ lɛ bó nwù nɛ tán anwrɔn hɔ̀n léyi ke sɩ́ ji kè bú Ɔwɔ Mɛẅi ankà Ankrankran kɛ tán ankaẅì nɛ́n?

¹⁸Hán ɔmu le Owrú Prɔnprɔn kɛ dɔ̀ nɔn: “Ke dú kɛ ɛnyrɔnnanwrɔn kɛ cɔ́ ebɩdie ɛshishiemɛ̀n hô, anhɔntan de kɛ lɛ hán kè dù tán anbɔrɛ-wrɔn mán ɛgbàn-hán-wrɔn nɛ́n?”

¹⁹Ɔmu lɔ, anwrɔn hɔ̀n léyi dú ɛgbàn-kán mɛ̀n Ɔwɔ kɔrɛ̀levriemɛ̀n nɔn, yɔ dú ɛmɛ̀n yɔ hán anvrɛn, ô yɔ bɩ́ y'edomɛ̀n yɔ wá eci-lɔ-fɛn hán-wrɔn antamɛ̀n, nɛ́n léyi ne di ɔmùan zri n'ɔmùan-wá hɔ̀n lɔ mɛ̀n nɔn.