Read Alladian 2 Piɛrɛ̀n 1 Bible Online

2 Piɛrɛ̀n 1 - Alladian bible

2 Piɛrɛ̀n 1

¹Ebinyan ndɔ lɔ dú Simɔn Piɛrɛ̀n yri kɛ và, nɛ́n léyi nɛ̀n dú Zhezü Krisì ci-bɩtan-wrɔn mán n'ɔkɔ̀hɔ̀n-wá-wrɔn nɔn. Ebinyan ndɔ lɔ dú anwrɔn léyi b'Ɔwɔ mán b'ebɩdie-wrɔn Zhezü Krisì krukɔrɛ̀ kɔrɛ̀wá mɛ̀n, ncɔ́ ankaẅìbùtan léyi ẅɛn anhàn hán bɔ́ tɛn lɔ hɔ́ nɔn:

²Nboafɔ̀n mán anwɔwɔ bobrebe kɛ và cɔ́ nyɛ̀n, Ɔwɔ mán bɔ́ Ɛẅɛnwrɔn Zhezü nyrì annanwɔrɛ mɛ̀n.

³N'Ɔwɔ kɔrɛ̀srɔn mɛ̀n lɔ, Ɛẅɛnwrɔn tán bɔ̀ eci lɔ fɛn léyi ke ji, ô bɔ́ ɛwúvà kè dú Ɔwɔ mɛ̀n; nɛ̀n hán bɔ̀, bo nyri ɔwrɔn léyi bi bɔ̀, bɔ̀ và dú nɛ́n dùku n'eci-zrɔ mán n'ɛzrɔ lɔ mɛ̀n.

⁴Ɔmu lɔ de nɛ̀n tán bɔ̀ anhàn shishi mùan-wá vri, ô ɛnvra léyi nyɛ lɛ cɔ́ eci léyi nɛ̀n wá ɔmùan nɔn, nyɛ́n cɔ́ ɛyri nyɛ́n di ankàtro ci-jrɛ́ anta, yɔ léyi yɔ dú ɛyri-ẅɛn mɛ̀n ɛnhibù wú, ô nyɛ́n dú Ɔwɔ wúvà mɛ̀n.

⁵Ankà zrɔ dùku ndɔ lɔ kruhú, nyɛ́n hán kèkrèmɛ̀n nyɛ́n tán ny'ankàẅìbùtan lɔ esùnan ankrankran, ô esùnan ankrankran lɔ, nyɛ́n tán nɛ̀n eci-nyrì annanwɔrɛ;

⁶nyɛ́n hán kèkrèmɛ̀n nyɛ́n tán nɛ̀n eci-nyrì mán ny'edomɛ̀n bɔ̀sɔ̀, ny'edomɛ̀n bɔ̀sɔ̀ lɔ nyɛ́n tán nɛ̀n ɛnbɔrɛ-ẅɛ̀n-hɛ́n, ô ɛbɔrɛ-ẅɛ̀n hɛ́n lɔ, nyɛ́n wá nɛ̀n Ɔwɔ mɛ̀n;

⁷ɔtrɔ mɛ̀n lɔ, Ɔwɔ mɛ̀n dù lɔ, nyɛ́n tán nɛ̀n ɔwrɔn nɛ́n-muan-ẅì cüɛ̀n kɩ ɔwrɔn nɛ́n-muan-ẅì cüɛ̀n lɔ, nyɛ́n tán ɛcüɛ̀n.

⁸Ndɔ lɔ de dú eci-hán léyi ke ji kè dú ny'edùci, kɩ ke dú kɛ nyɛ ẅɛn yɔ, yɔ cüɛn, yɔ lɛ srɔ nyɛ̀n edùyi-bɔ̀ kɩ yɔ lɛ hán nyɛ̀n nyɛ́n hɔ́n ezì, bɔ́ Ɛẅɛnwrɔn Zhezü Krisì nyrì lɔ mɛ̀n.

⁹Tɛ́n ɔwrɔn léyi kè sɩ̀ ẅɛ̀n eci-hán ndɔ lɔ nɔn, anvɛ̀ ke sɩ́ kán nɛ̀n ɛyri esùshe, kɩ nɛ́n dù nɛ̀n hán anvɛ̀-boyɛ-wrɔn hɔ́; esùva yru nɛ̀n le, ye jru nɛ̀n ɛnbiɛhɛ́n gbàn edomɛ̀n yɛ sɔhɔ́.

¹⁰Hɩ le kruhú de, anwrɔn-nɛ́n-muan-ẅì hɔ̀n, nyɛ́n vru nyɛ́n hán kèkrèmɛ̀n, ô Ɔwɔ bì léyi bi nyɛ̀n mán ɛmrɛ̀n léyi nɛ̀n mrɛ́n nyɛ̀n nɛ́n bɩ nɔn, ɔmuhi ke dú kɛ ny'ɛhán ɔmu lɔ hô, nyɛ́n sɩ̀ bru ɛgbàn mɛ̀n mrìmrì.

¹¹Ɔmu lɔ de ɛnlevri kɛ lɛ trɛ́ nyɛ̀n Anhobɩ́ Nɛ̀ncüì-dúyri léyi ke sɩ̀ ẅɛn ɔtrɔ nɔn, n'ebruemɛ̀n, Anhobɩ́ Nɛncüì-dúyri ndɔ léyi dú bɔ́ Ɛẅɛnwrɔn mán bɔ́ Ebɩdie-wrɔn Zhezü Krisì tɛn nɔn.

¹²Nyàn eci le kruhú léyi me le kro nyɛ̀n ɛnvra lɔ fɛn, ɛci ndɔ hɔ̀n léyi nyɛ́n gó nyrì kɩ nyɛ́n yɛ́ ɛshishiemɛ̀n annanwɔrɛ ankà léyi nyɛ́n cɔ̀ nɔn wú.

¹³Tɛ́n me tro le, dú eci léyi nyrɔn, me kro nyɛ̀n ankà ɛnvra ɔmu léyi mɛ̀n vru mɛ̀n dú ɛwúvà mɛ̀n nɔn.

¹⁴Ɔmuhi mɛ̀n nyri ɔmu le, ɛnvra bruemɛ̀n me le teze owú dùwru ndɔ lɔ, hán ɔmu le bɔ́ Ɛẅɛnwrɔn Zhezü Krisì dɔ́ mɛ̀n nɔn hɔ́.

¹⁵Mɛ lɛ hán kèkrèmɛ̀n mɛ̀n tán nyɛ̀n ankà-krɔsi ɛnvra lɔ fɛn eci-hán ndɔ hɔ̀n lɔ wú, ô m'owù mɛẅi lɔ nyɛ́n krosi ny'edomɛ̀n.

¹⁶Annanwɔrɛ mɛ̀n lɔ, bɔ́ sɩ̀ nyɔ̀n ɛyɔ̀n-dùgɔ́n ankà wú, bɔ̀ yé nyɛ̀n bɔ́ Ɛẅɛnwrɔn Zhezü Krisì kɔrɛ̀srɔn và lɔ: bɔ́ dùku b'anvɛmɛ̀n de bɔ̀ kán n'evrisì lɔ nɔn.

¹⁷Annanwɔrɛ mɛ̀n lɔ, nɛ̀n cɔ́ Ɔwɔ Zi yri, ɛmrɛ́n mán eci-zrɔ; kɩ Ɔwɔ léyi dú eci-zrɔ vri nɔn, zɛtɛn hán nɛ̀n nɛ̀n yá n'esùva, kɩ nɛ dɔ̀ le: “Ɔwrɔn ndɔ lɔ dú m'ɛcüɛn-ẅì léyi mɛ́n pɔpüɛ̀-brà lɔ fɛn dú ɛwú nɔn.”

¹⁸Bɔ́ dùku bɔ̀ yá esùva ndɔ lɔ dú anhobɩ́ và ɛnvra léyi bɔ́ mán nɛ́n mɛhi bò dú nkpò prɔnprɔn lɔ wú nɔn.

¹⁹Ɔmu lɔ de bɔ́ esɛ́ vru dú Ɔwɔ-mùan-ankà-dɔ́-bɔ̀ ankà-dɔ̀ lɔ wú nɔn. Zrɔ tán le nyɛ́n ẅɛn nukù nyɛ́n hɛ́n n'ɛwúɛ: nɛ́n dù nɛ̀n cá kɛniɛn tɔ̀n léyi kɛ gbrɛ́n ɛyri yɔwɔ mɛ̀n hàn kɩ ɛcɛ̀n kɛ kɛ̀n, kɩ ɔsɔwɔrɔ̀ kùcànkrò kɛ wá nyɛ̀n pɔpüɛ̀ ɛnbɔrɛmɛ̀n nɔn.

²⁰Eci lɔ fɛn mɛ̀n, nyɛ́n nyrí ankà ndɔ lɔ anvrɛnvrɛn: ɔwrɔn zriɛmɛ́n ke sɩ̀ cɔ́ nɛ́n dùku ankà-yé léyi dú Ɔwɔ-mùan-wú-ankà-dɔ́-bɔ̀ mɛẅi ankà-dɔ̀ léyi dú Ɔwrú Prɔnprɔn lɔ mɛ̀n nɔn rɔ́.

²¹Ɔmuhi Ɔwɔ ankà-dɔ̀ zriɛmɛ́n kè sɩ̀ dù ɔwrɔnẅì kɔrɛ̀levriemɛ̀n kɛ̀ srɔa, tɛ́n, Ɛnhɛ́n Prɔnprɔn de kɛ wá tán anwrɔnẅì kɛ dɔ́ Ɔwɔ mùan-wú ankà nɔn.