Read Alladian 2 Piɛrɛ̀n 3 Bible Online

2 Piɛrɛ̀n 3 - Alladian bible

2 Piɛrɛ̀n 3

¹Annyran anvrɛn hɔ̀n, vru nyàn anhyrɛmɛ̀n wrú léyi me yüre nyɛ̀n nɔn. Kpàkpà mán anhyrɛmɛ̀n wrú lɔ mɛ̀n, mɛ̀n ji, ô mɛ̀n kro sɩ́ ny'ɛnhɛ́n mɛ̀n, ankàtro prɔnprɔn hɔ̀n léyi m'eci-yé mɛ̀n, mɛ̀n kro nyɛ̀n nɔn.

²Me ji le, ankà-dɔ̀ hɔ̀n léyi ɛnbiɛhɛ́n Ɔwɔ-mùan-wú-ankà-dɔ́-bɔ̀ prɔnprɔn, bɔ́ Ɛẅɛnwrɔn mán Ebɩdiewrɔn nyànmàn tán ɔkɔ̀hɔ̀n-wá-bɔ̀ mùan mɛ̀n nɔn, kè bru nyɛ̀n.

³Eci lɔ fɛn mɛ̀n, nyɛ́n nyrì le, ɛnvra trɔ mùan mɛ̀n lɔ, anwrɔn hɔ̀n léyi ke ji kɛ̀ ẅɛn yɔ dùku y'ankàtro wúvà nɔn kɛ lɛ srɔ. Yɔ lɛ hán nyɛ̀n ɛnhyürɛ̀

⁴kɩ yɔ lɛ dɔ̀ le: “Nɛ̀n wá ɔmùan le, nɛ lɛ và, kè sɩ̀ dù yiɛ? Zɛtɛn, tɛyri nɛ́n dùɛ? Bó zi hɔ̀n gɔ́ wù, tɛ́n eci lɔ fɛn hɛ́n ɔmu zri lɔ ɛnhibù krubɔmɛ̀n anhɛ́n!”

⁵Yɔ kán bìì esùva ke yru yɔ eci ndɔ lɔ wú: ɛnvra sheshe mɛ̀n de Ɔwɔ hán anhobɩ́ mán ɛnhi n'ɔmùan ankà dɔ́ mɛ̀n. Ɛnhi mán ɛnshi gbɛ́ y'edomɛ̀n ɔmùan kɩ ɛnhi mán ɛnshi mɛhi ndù,

⁶kɩ ɛnshiemɛ̀n, ɛnshi ndɔ léyi ke yɩ́ bɩ́ ɛyri nɔn, n'ɛmɛ̀n de yɛ jrɛ́ ɛnhibù gbànvri lɔ nɔn.

⁷Hɩ le kɛ crɛ nyan anhobɩ́ mán ɛnhi léyi dú zɛtɛ nɔn, Ɔwɔ mùan-ankà-dɔ̀ zri lɔ ẅɛn yɔ hɛ́n kɛ̀ tán ɛnhyà léyi kɛ lɛ jrɛ́ yɔ nɔn. Ye bɩ́ yɔ, yɔ hɛ́n yɛ vrá ɛmrɛ̀nci bì lɔ mán ɛgbán-hán-bɔ̀ jrɛ́ vra.

⁸Tɛ́n eci tɔ̀n ndù ke sɩ́ ji le ke yru nyɛ̀n esùva m'annyran anvrɛn hɔ̀n: Ɛẅɛnwrɔn tɛn, ɛnbì zri ndù hán ɛnnanwàn tɛ̀buri, kɩ ɛnnanwàn tɛ̀buri ndù hán ɛnbì zri hɔ́.

⁹Ɛẅɛnwrɔn ke sɩ́ mɔɛn n'ɔmùan-wá ci-hán mɛ̀n, hán ɔmu le anwrɔn janbɔ̀ ke tro nɔn. Tɛ́n nɛ ẅɛn ɛnbɔrɛ hɛ́n n'eci-hán mɛ̀n ny'ɛwú, ɔmuhi nɛ́n sɩ́ ji le ɔwrɔn totɔtɔ̀n léyi dú mɛ́n nɔn, ɛ̀ hɔ́n v'ɛzrɛ́n mɛ̀n; tɛ́n ne ji le yɔ lɛ fɛn yɔ cɔ́ ɛkɔrɛ̀levri yɔ crɛ ejüì yɔ sɔ́n ɛgbàn.

¹⁰Tɛ́n Ɛẅɛnwrɔn bì lɔ kɛ lɛ và kɛ lɛ hán ɛci-yerɛ-wrɔn hɔ́. Hɩ vra lɔ anhobɩ́ kɛ lɛ vàcí ɛjɔ̀kɔ mɛ̀n mán ɛnjansù vriemɛ̀n, ɛnhyà kɛ lɛ jrɛ́ anhobɩ́ dùwru hɔ̀n lɔ, ɛnhi mán n'ɛci hɔ̀n lɔ fɛn léyi dú nɛ̀n ɛmɛ̀n nɔn, ke sɩ̀ vru dùɛ.

¹¹Ɔmuhi eci lɔ fɛn kɛ lɛ zrɛ́n eci-hán-ci ndɔ lɔ mɛ̀n nɔn, nyɛ́n nyri anvrɛnvrɛn, eci léyi ke ji le nyɛ́n hán nɔn! Ke ji le ny'esùnàn kè dú prɔnprɔn, ô kè yé ny'Ɔwɔ tɛ̀sɛ̀n sɔ̀nba.

¹²Ke ji le nyɛ́n vrá ɛnbì léyi Ɔwɔ kɛ và nɔn, ô nyɛ́n hán kèkrèmɛ̀n nɛ̀n gɔ̀ vá ɛnvra bruemɛ̀n. Ke le dú ɛnbì léyi ɛnhyà kɛ lɛ jrɛ́ anhobɩ́ kɩ anhobɩ́ dùwru hɔ̀n lɔ ke le zru ɛnhyà ẅiemɛ̀n.

¹³Tɛ́n Ɔwɔ wá anhobɩ́ wrù mán ɛnhi wrù ɔmuan, nanvrɛn de ɛnyrɔnnan kɛ lɛ sɔ́n ebɩ́, kɩ nyàn eci léyi bɔ́ vrá nɔn.

¹⁴Hɩ le kruhú de, m'annyran anvrɛn hɔ̀n, ɛnbɩ̀ ndɔ lɔ n'ɛnvra lɔ, nyɛ́n hán kèkrèmɛ̀n, ô nyɛ́n dú efifiemɛ̀n, ye bɩ́ cɔ́ eci-gbàngbàn zriɛmɛ́n ny'ɛwú Ɔwɔ zìwú, ô nyɛ́n mán nɛ́n mɛhi nyɛ́n dú anwɔwɔ mɛ̀n.

¹⁵Nyɛ́n nyri ɔmu le Ɛẅɛnwrɔn bɔrɛ-ẅɛ̀n-hɛ́n ci-hán kɛ tán nyɛ̀n ɛkɔrɛ̀levri nyɛ́n cɔ́ ebɩdie, hán ɔmu le bɔ́ muanẅì ankrankran Pɔlɛ̀n, merɛ́n nyɛ̀n n'owrú, ankanyrì léyi Ɔwɔ tán nɛ̀n nɔn hɩ mɛ̀n.

¹⁶Ndɔ lɔ de nɛ̀n merɛ́n n'ɛwru hɔ̀n lɔ fɛn mɛ̀n, ankà-dɔ̀ ndɔ lɔ wú nɔn. Ankà-dɔ̀ ndɔ hɔ̀n dú ɛmɛ̀n, n'ɛyá kɛ sɔ́; ɔbrɔ̀sà-bɔ̀ mán ɛnkru-fe-bɔ̀ kɛ crɔn n'ɛwú ankà-yé, hán ɔmu le yɔ hán ɛyri janbɔ̀ Ɛwrú Prɔnprɔn hɔ̀n lɔ mɛ̀n nɔn. Ɔmu lɔ de yɔ ji yɔ dùku y'ɛzrɛ́n nɔn.

¹⁷Nyɛ tɛn, m'annyran anvrɛn hɔ̀n, ye bi dɔ́ nyɛ̀n zɛtɛ̀ lɔ. Zɛtɛn nyɛ́n wá esùva, nyɛ́n bɩ́ teze ny'edomɛ̀n nyɛ́n zrɛ́n hán, ɛzɛ̀n ci-hán mɛ̀n, nyɛ́n mán ɛnkru-fe-bɔ̀ mɛhi, kɩ nyɛ́n bɩ́ teze ny'esùnàn ankànkràn léyi nyɛ́n ẅɛ̀n nɔn.

¹⁸Tɛ́n nyɛ́n dú ɛnvra lɔ fɛn esùnàn ankrànkràn mɛ̀n bɔ́ Ɛẅɛnwrɔn mán bɔ́ Ebɩdiewrɔn Zhezü Krisì nboafɔ̀n mán n'enyrì lɔ mɛ̀n. Eci-zrɔ kè dú nɛ tɛn, zɛtɛ̀ lɔ mán ɛnvra lɔ fɛn! Kè dú ɔmu lɔ.