Read Alladian 1 Zhan 1 Bible Online

1 Zhan 1 - Alladian bible

1 Zhan 1

¹Eci léyi dú ɛnkrubɔmɛ̀n nɔn, bɔ̀ yá n'ankà, bɔ̀ kán nɛ̀n bo dùku b'anvɛ̀ẅiemɛ̀n, kɩ b'ankɔrɛ̀ tɛ́ nɛ̀n: nɛ̀n dú Ɔwɔ mùan ankà-dɔ̀ léyi kɛ tán ɛwúvà-kɔrɛ̀ nɔn.

²Ɛwúvà ndɔ lɔ yé n'edomɛ̀n kɩ bɔ̀ kán nɛ̀n; bo di nɛ́n dalɛfuɛ kɩ hɩ le kruhú de bɔ́ dɔ́ ɛwúvà-kɔrɛ̀ ankà, nɛ́n léyi nɛ̀n dú Ɔwɔ Zi ɛtɛ̀sɛ̀n kɩ ye yé bɔ̀ nɛ́n.

³Eci léyi bɔ́ kàn, mán ankà léyi bɔ̀ yá nɔn, nyɛ́n mán bɔ́ dɔ́ tán nyɛ̀n; ɔmu lɔ de nyɛ lɛ cɔ́ bɔ̀ bò dú ɔbɔ̀sɔ̀ léyi bɔ̀ ẅɛn Ɔwɔ Zi mán n'Ɛnẅì Zhezü-Krisì mɛ̀n nɔn.

⁴Kɩ bɔ́ dùku bó merɛ́n ndɔ lɔ, ô bɔ́ pɔpüɛ̀-brà lɔ kɛ̀ sɛ́n nmù.

⁵Nyàn ɛmɛẅi ankà léyi bɔ̀ yá Zhezü Krisì mùan mɛ̀n, kɩ bɔ́ dɔ́ tán nyɛ̀n nɔn: Ɔwɔ dú ɛyrikàn kɩ ɛyri-yɔwɔ zriɛmɛ́n bàda nɛ̀n ɛmɛ̀n.

⁶Ke dú kɛ bo tro tán le nɛ́n mɛhi bɔ̀ dú ɔbɔ̀sɔ̀ mɛ̀n, kɩ zɛtɛn bɔ̀ dú ɛyri-yɔwɔ mɛ̀n; bɔ̀ dú anhyɔ̀n-bɔ̀, bó sɩ́ hán annanwɔrɛ ci.

⁷Tɛ́n ke dú kɛ bɔ̀ dú ɛwúvà-yrikàn mɛ̀n, hán Ɔwɔ mumù léyi dú ɛyrikàn mɛ̀n nɔn, zɛtɛn ɔmu lɔ bó dú ɔbɔ̀sɔ mɛ̀n bɔ́ mán bɔ́ nyran hɔ̀n mɛhi, kɩ n'Ɛnẅì Zhezü krɛ̀ lɔ, ke jru bɔ̀ ɛgbàn lɔ fɛn edomɛ̀n.

⁸Ke dú kɛ bó tro tán le, ɛgbàn bàda bɔ̀ edomɛ̀n, bɔ́ frɛ́n bɔ́ dùku bɔ́ edomɛ̀n kɩ annanwɔrɛ bàda bɔ̀ ɛmɛ̀n.

⁹Tɛ́n ke dú kɛ bɔ́ krɛ́ bɔ́ ɛgbàn hɔ̀n lɔ, bɔ́ lɛ ẅɛn esɛ́ Ɔwɔ mɛ̀n tɛ̀, ɔmuhi nɛ̀n dú ɛnnyrɔnnan-wrɔn nɔn: ne le ce bɔ̀ bɔ́ ɛgbàn hɔ̀n lɔ kɩ ne le jru bɔ̀ ɛgbàn lɔ fɛn edomɛ̀n.

¹⁰Ke dú kɛ bɔ́ dɔ̀ le ɛgbàn bàda bɔ̀ edomɛ̀n, bɔ́ srɔ Ɔwɔ ɛyɔ̀n-wrɔn, kɩ n'ankà-dɔ̀ bàda bɔ̀ ɛmɛ̀n.