Read Alladian 1 Zhan 2 Bible Online

1 Zhan 2 - Alladian bible

1 Zhan 2

¹M'ɛẅì hɔ̀n, me merɛ́n nyɛ̀n owrú ndɔ lɔ, ô nyɛ́n bɩ́ hán ɛgbàn. Tɛ́n ke dú kɛ ɔwrɔn tɔ̀n kɛ hán ɛgbàn hô, bɔ̀ ẅɛn ankà-dɔ́-wrɔn dú Ɔwɔ Zi ɛtɛ̀sɛ̀n: Zhezü Krisì, ɛnnyrɔnnan-wrɔn lɔ.

²Ɔmuhi Zhezü Krisì bɩ́ n'edomɛ̀n ce eci, kè dú bɔ́ ɛgbàn wɔ̀ɛndì, kɩ kè sɩ̀ dù bɔ́ ɛgbàn zri kɩ, tɛ́n anwrɔn hɔ̀n léyi dú ɛnhibù mumù lɔ fɛn wú nɔn yɔ mán y'ɛgbàn kruhú.

³Ke dú kɛ bɔ́ ẅɛn Ɔwɔ nyanmàn wá, bɔ́ lɛ ẅɛn esɛ́ le bɔ̀ nyri Ɔwɔ.

⁴Ke dú kɛ Ɔwrɔn tɔ̀n kɛ dɔ̀ le: “Mɛ̀n nyri nɛ̀n”, tɛ́n ke sɩ́ wá n'ɛnyanmàn hɔ̀n lɔ, nɛ̀n dú ɛyɔ̀n-wrɔn kɩ annanwɔrɛ bàda nɛ̀n ɛmɛ̀n.

⁵Tɛ́n ke dú kɛ ɔwrɔn tɔ̀n ke die n'ɔmùan ankà nukùɛ, Ɔwɔ cüɛ̀n dú nɛ̀n ɛmɛ̀n annanwɔrɛ mɛ̀n kokroho. Nyàn ɔmu le bɔ́ lɛ ẅɛn esɛ́ le bɔ́ mán Ɔwɔ mɛhi bɔ́ bɔsɔ̀ nɔn:

⁶ɔwrɔn léyi kɛ dɔ̀ le, nɛ́n mán Ɔwɔ mɛhi ye dú eci zri nɔn, ke ji le nɛ̀n ẅɛn ɛwúvà kɛ̀ hán Zhezü hɔ́.

⁷Anyran hɔ̀n, kè sɩ̀ dù ɛnyanmàn wrù de mɛ́n tán nyɛ̀n nɔn; ndɔ lɔ dú ɛnyànmàn gbànvri léyi, nyɛ́n cɔ́ ɛnkrubɔmɛ̀n nɔn. Ɛnyànmàn gbànvri ndɔ lɔ dú ankà-dɔ̀ léyi nyɛ́n gɔ̀ yá nɔn.

⁸Ɔmu tɛ́kɩ nɛ̀n dú ɛnyanmàn wrù tɔ̀n léyi me merɛ́n tan nyɛ̀n kɩ n'annanwɔrɛ ke yé n'edomɛ̀n Krisì mɛ̀n, kɩ nyɛ́n mán ny'ɛmɛ̀n. Annanwɔrɛ mɛ̀n lɔ, ɛyri-yɔwɔ kɛ hɔ̀n, kɩ ɛyrikàn annanwɔrɛ bukru kɛ gbrɛ́n.

⁹Ɔwrɔn léyi kɛ dɔ̀ le n'ɛwúvà dú ɛyri-kan mɛ̀n, kɩ nɛ ẅɛn nɛ́n muan-ẅì gbrì, nɛ́n, ɔwrɔn ndɔ lɔ, nɛ̀n vru nɛ̀n dú ɛyri-yɔwɔ mɛ̀n.

¹⁰Ɔwrɔn léyi kɛ cüɛn nɛ́n muan-ẅì nɔn, nɛ̀n dú ɛyri-kan mɛ̀n, kɩ ɔmu lɔ, eci zriɛmɛ́n bàda nɛ̀n ɛmɛ̀n, hɩ ká hán ɔwrɔn nyàntɛn tɔ̀n ke bru ɛgbàn mɛ̀n nɔn.

¹¹Tɛ́n ɔwrɔn léyi ẅɛn nɛ́n muan-ẅì gbrì nɔn, nɛ̀n dú ɛyri-yɔwɔ mɛ̀n; nɛ nán esù ɛyri-yɔwɔ mɛ̀n kɩ nɛ́n sɩ́ nyri ɛyri léyi nɛ hɔ̀n nɔn, ɔmuhi ɛyri-yɔwɔ srɔ nɛ̀n anvɛ̀-boyɛ-wrɔn nɔn.

¹²Me merɛ́n nyɛ̀n owrú m'ɛwì hɔ̀n, ɔmuhi ny'ɛgbàn hɔ̀n lɔ bɩ́ ce nyɛ̀n Zhezü Krisì bɩmɛ̀n nɔn.

¹³Me merɛ́n nyɛ̀n owrú, dàde hɔ̀n, ɔmuhi nyɛ́n nyri ɔwrɔn léyi dú ɛnkrubɔmɛ̀n hàn hɛ́n nɔn. Me merɛ́n nyɛ̀n owrú, sùgban-bɔ̀, ɔmuhi nyɛ́n kɔ̀nká eci gbàngbàn nɔn.

¹⁴Me merɛ́n nyɛ̀n owrú, ɛẅì hɔ̀n, ɔmuhi nyɛ́n nyri Ɔwɔ Zi nɔn. Me merɛ́n nyɛ̀n owrú dàde hɔ̀n, ɔmuhi nyɛ́n nyri ɔwrɔn léyi du ɛnkrubɔmɛ̀n hàn hɛ́n nɔn. Me merɛ́n nyɛ̀n owrú sùgban-bɔ̀ ɔmuhi ecüì dú nyɛ̀n edomɛ̀n; Ɔwɔ mùan-ankà-dɔ̀ dú nyɛ̀n ɛmɛ̀n, kɩ nyɛ́n kɔ̀nká eci gbàngbàn.

¹⁵Nyɛ́n bɩ́ cüɛn ɛnhibù, eci lɔ fɛn léyi dú nɛ tɛn nɔn, nyɛ́n bɩ́ cüɛn zriɛmɛ́n. Ke dú kɛ ɔwrɔn tɔ̀n kɛ cüɛn ɛnhibù, Ɔwɔ Zi cüɛ̀n bàda nɛ̀n ɛmɛ̀n.

¹⁶Eci lɔ fɛn léyi dú ɛnhibù tɛn nɔn, ɔwrɔnẅì ankà-tro gbàngbàn hɔ̀n, eci ɛvɛ̀ cüɛ̀n mán ɛnhibù-ci wú tùtre-dì, ndɔ lɔ fɛn kè sɩ̀ dù Ɔwɔ Zi yri kɛ̀ và, tɛ́n ɛnhibù wú de dù nvà nɔn.

¹⁷Ɛnhibù dú ɛvàciemɛ̀n, nɛ́n mán ɛci hɔ̀n lɔ fɛn léyi anwrɔnẅì kɛ cüɛ̀n nɔn; tɛ́n ɔwrɔn léyi kɛ hán Ɔwɔ kɔrɛ̀zì-ci nɔn, nɛ̀n dú ɛwúvà mɛ̀n ɛnvra lɔ fɛn.

¹⁸M'ɛẅì hɔ̀n, ɛnvra trɔ mùan bá ɛtɛsɛn! Nyɛ́n yá yɛ dɔ̀ le Krisì Gbri-wrɔn kɛ lɛ và; tɛ́n zɛtɛ̀ lɔ Krisì gbri-bɔ̀ bobrebe srɔ, kɩ ɔmu lɔ bó nyrì le, ɛnvra trɔ mùan bá ɛtɛsɛ̀n.

¹⁹Anwrɔn ndɔ hɔ̀n lɔ, annanwɔrɛ mɛ̀n, yɔ sɩ̀ dú bɔ̀ ɛmɛ̀n, kɩ hɩ le kruhú de yɔ cɔhɔ́ bɔ́ ɛmɛ̀n nɔn; annanwɔrɛ mɛ̀n lɔ, kè dú kɛ yɔ dú bɔ̀ ɛmɛ̀n hô, yɔ lɛ cɔ́ bɔ̀ mɛhi bɔ̀ yɛ́. Tɛ́n yɔ cɔhɔ́ bɔ̀ ɛmɛ̀n, ô ye nyri kpetemɛ̀n le, y'ɛmɛ̀n lɔ, ɔwrɔn zriɛmɛ́n annanwɔrɛ mɛ̀n lɔ, bàda bɔ̀ ɛmɛ̀n.

²⁰Nyɛ tɛn, nyɛ́n cɔ́ Ɛnhɛ́n Prɔnprɔn léyi Krisì wá nyɛ̀n edomɛ̀n, kɩ ɔmu lɔ, nyɛ lɛ fɛn nyɛ́n nyri annanwɔrɛ ankà.

²¹Zɛtɛn, ke dú me merɛ́n nyɛ̀n owrú, kè sɩ̀ dù hɩ le nyɛ́n sɩ̀ nyrì annanwɔrɛ ankà nɔn, tɛ́n ɔmuhi nyɛ́n nyri annanwɔrɛ ankà lɔ; nyɛ́n vru nyɛ́n nyri ɔmu le ɛyɔ̀n ankà zriɛmɛ́n ke sɩ̀ dú annanwɔrɛ mɛ̀n kɛ̀ và rɔ́.

²²Zɛtɛn antɔn dú ɛyɔ̀n-wrɔn lɔ nɛ́n? Nɛ̀n dú ɔwrɔn léyi kɛ dɔ̀ le Zhezü kè sɩ̀ dù Krisì. Ɔwrɔn ndɔ lɔ nɛ̀n dú Krisì Gbri-wrɔn: ɛnvra zri lɔ mɛ̀n nɛ̀n sɩ̀ nyrì Ɔwɔ Zi mán Ɔwɔ Ẅì.

²³Annanwɔrɛ mɛ̀n lɔ, ɔwrɔn léyi ke sɩ́ ji kè nyri Ɔwɔ Ẅì nɔn, ɛnvra zri lɔ mɛ̀n, nɛ́n sɩ́ ji nɛ̀n nyri Ɔwɔ Zi mán; Ɔwrɔn léyi ke nyri Ɛnẅì nɔn, nɛ cɔ́ Ɔwɔ Zi mán.

²⁴Hɩ le kruhú de ke ji le ɛmɛẅi ankà léyi nyɛ́n cɔ̀ nyɛ́n yá ɛnkrubɔmɛ̀n lɔ nɔn, kè dú ny'ɛnbɔrɛ lɔ mɛ̀n kɛ̀ hɛ́n. Ke dú kɛ ankà léyi nyɛ́n yá ɛnkrubɔmɛ̀n hàn hɛ́n nɔn, ke dú ny'ɛnbɔrɛ lɔ mɛ̀n hô, nyɛ́n mán nyɛ́n dú Ɛnẅì mán nɛ́n Zì bɔ̀sɔ̀ lɔ mɛ̀n.

²⁵Kɩ nyàn eci léyi Krisì wá ɔmùan kɛ̀ tán bɔ̀ nɔn: ɛwúvà léyi ke sɩ́ trɔa nɔn.

²⁶Me merɛ́n nyɛ̀n owrú ndɔ lɔ kè dú anwrɔn hɔ̀n léyi ke ji ɛyri, ô kɛ̀ frɛ́n nyɛ̀n nɔn y'ɛwú ankà-dɔ̀.

²⁷Nyɛ tɛn, Krisì wá nyɛ̀n n'Ɛnhɛ́n edomɛ̀n. Ɔmuhi n'Ɛnhɛ́n lɔ dú nyɛ̀n ɛmɛ̀n nɔn, nyɛ́n sɩ́ vru ji ɔwrɔn tɔ̀n kɛ̀ và kè yé nyɛ̀n ankà. Annanwɔrɛ mɛ̀n lɔ, Ɛnhɛ́n ke yé nyɛ̀n ankà lɔ fɛn, kɩ ankà léyi ne yé nɔn, dú annanwɔrɛ, kɩ kè sɩ̀ dù ɛyɔ̀n. Hɩ le kruhú de ke ji le nyɛ́n ẅɛn ɔwá nyɛ́n tán Ɛnhɛ́n ankà-yé lɔ, ô nyɛ́n mán Krisì mɛhi nyɛ́n dú ɔbɔ̀sɔ mɛ̀n.

²⁸Hɛ̀ɛ̀, m'ɛẅì hɔ̀n, nyɛ́n yɛ́ Krisì bɔ̀sɔ̀ lɔ mɛ̀n, ô bɔ̀ ẅɛn esɛ́ vri kè dú bɔ́ ɛmɛ̀n ɛnvra léyi nɛ lɛ srɔ, ô anvɛvrà ke bɩ́ cɔ́ bɔ̀ n'ezìwú, n'ɛvá bì lɔ.

²⁹Nyɛ́n nyri ɔmu le Krisì dú ɛnyrɔnnan-wrɔn; zɛtɛn ke ji le nyɛ́n vru nyɛ́n nyrì le, ɔwrɔn totɔtɔ̀n léyi kɛ hán ɛnnyrɔnnan-ci nɔn, nɛ̀n dú Ɔwɔ Ẅì.