Read Alladian 1 Zhan 3 Bible Online

1 Zhan 3 - Alladian bible

1 Zhan 3

¹Nyɛ́n nyan ɔmu le Ɔwɔ Zi cüɛn bɔ̀ nɔn! N'ɛcüɛ̀n hán tán kɩ ye bí bɔ̀ Ɔwɔ ẅì hɔ̀n kɩ annanwɔrɛ mɛ̀n lɔ, bò dú n'ɛẅì hɔ̀n. Nyàn eci le kruhú léyi ɛnhibù kè sɩ̀ nyri bɔ̀ nɔn: ɛnhibù kè sɩ̀ nyrì Ɔwɔ.

²M'annyran anvrɛn hɔ̀n, zɛtɛ̀ lɔ bò dú Ɔwɔ ẅì hɔ̀n, tɛ́n eci léyi bɔ́ lɛ srɔ nɔn, kɛ vá yé tán bɔ̀ bò nyri kpete mɛ̀n. Tɛ́n, bò nyri ankà ndɔ lɔ: ɛnvra léyi Krisì kɛ lɛ srɔ nɔn, bɔ́ le dù kɛ lɛ cá nɛ̀n. Ɔmuhi bɔ́ lɛ kán ɔmu le nɛ̀n hán nɛ́n dù nɔn.

³Ɔwrɔn totɔtɔ̀n léyi kɛ ẅɛn esɛ́ ndɔ lɔ Krisì mɛ̀n nɔn, nɛ srɔ ɛfifi, hán ɔmu le Krisì dú ɛfifiemɛ̀n nɔn hɔ́.

⁴Ɔwrɔn totɔtɔ̀n léyi kɛ hán ɛgbàn nɔn, nɛ́n sɩ́ hán Ɔwɔ nyànmàn kɔrɛ̀zì-ci, ɔmuhi ɛgbàn dú ɛnyanmàn zì-kɛ́n-ci nɔn.

⁵Nyɛ́n nyri ndɔ lɔ, ɔmuhi Zhezü Krisì srɔ, ô kè jru ɛgbàn, kɩ ɛgbàn zriɛmɛ́n bàda nɛ̀n edomɛ̀n.

⁶Ɔmu lɔ de, ɔwrɔn totɔtɔ̀n léyi nɛ́n mɛhi yɔ dú ɔbɔ̀sɔ mɛ̀n nɔn, ke sɩ́ vru hán ɛgbàn; tɛ́n ɔwrɔn léyi ke dú ɛgbàn hán mɛ̀n nɔn, ke sɩ̀ kán nɛ̀n kɩ ke sɩ̀ nyri nɛ̀n.

⁷M'ɛẅì hɔ̀n, nyɛ́n bɩ́ teze ny'edomɛ̀n ɔwrɔn zriɛmɛ́n kɛ frɛ́n nyɛ̀n! Ɔwrɔn léyi kɛ hán eci léyi nyrɔn nɔn, nɛ̀n dú nɛ́n mumù mán ɛnnyrɔnnan mɛ̀n, hán ɔmu le Krisì dú ɛnnyrɔnnan-wrɔn nɔn.

⁸Ɔwrɔn léyi ke dú ɛgbàn-hán mɛ̀n nɔn, nɛ̀n dú anwawrɔn tɛn, ɔmuhi anwawrɔn hán ɛgbàn ɛnkrubɔmɛ̀n hàn hɛ́n nɔn. Ɔwɔ Ẅì srɔ ndɔ lɔ kruhú, ô kɛ̀ jrɛ́ anwawrɔn kɔrɛ̀-ci hɔ̀n lɔ.

⁹Ɔwrɔn totɔtɔ̀n léyi kɛ kɛ́n ɛgbàn-hán hɛ́n nɔn nɛ̀n dú Ɔwɔ ẅì, ɔmuhi ɛwúvà kɔrɛ̀srɔn léyi dú Ɔwɔ yri và nɔn, dú nɛ̀n ɛmɛ̀n; ɔmuhi Ɔwɔ dú nɛ́n Zi, nɛ́n sɩ̀ vru dú ɛgbàn-hán mɛ̀n hàn.

¹⁰Nyàn eci léyi kɛ hán ye nyri Ɔwɔ ẅì hɔ̀n mán anwawrɔn ẅì hɔ̀n nɔn: ɔwrɔn totɔtɔ̀n léyi ke sɩ́ hán eci léyi nyrɔn nɔn, hɩ ke sɩ́ cüɛn nɛ́n muan-ẅì nɔn, nɛ̀n sɩ̀ dù Ɔwɔ ẅì.

¹¹Annanwɔrɛ mɛ̀n lɔ, nyàn ɛmɛẅi ankà léyi nyɛ́n yá ɛnkrubɔmɛ̀n lɔ nɔn: bɔ̀ cüɛn bɔ́ edomɛ̀n.

¹²Ke sɩ́ ji le bò dù kɛ̀ hán Kaɛ́n hɔ́; nɛ̀n dú Eci-gbàngbàn tɛn, kɩ nɛ̀n wri nɛ́n muan-ẅì. Kɩ cɛci kruhú kɛ ne wri yi hɛ́? Ɔmuhi Kaɛ́n ci-hán hɔ̀n lɔ fɛn dú ɛgbàn, tɛ́n nɛ́n muan-ẅì tɛn lɔ dú ɛnyrɔnnan mɛ̀n.

¹³Ke bɩ́ frɛ́n nyɛ̀n anvɛmɛ̀n, anwrɔn-nɛ́n-muan-ẅì hɔ̀n, ke dú kɛ ɛnhibù ndɔ lɔ bɔ̀, ke gbri nyɛ̀n.

¹⁴Bɔ́ nyri ɔmu le bɔ̀ cɔhɔ́ owù tɛsɛ̀n, ô bɔ̀ bru ɛwúvà mɛ̀n; bɔ̀ nyri ndɔ lɔ ɔmuhi bɔ́ cüɛn bɔ́ muan-ẅì hɔ̀n nɔn. Ɔwrɔn léyi kè sɩ̀ ẅɛ̀n ɛcüɛ̀n nɔn, nɛ̀n vru nɛ̀n dú owúemɛ̀n.

¹⁵Ɔwrɔn totɔtɔ̀n léyi kɛ ẅɛn nɛ́n muan-ẅì gbri nɔn, nɛ́n dú ɔwrɔn-wri-wrɔn tɔ̀n kɩ nyɛ́n nyrì le ɔwrɔn-wri-wrɔn lɔ, ɛwúvà léyi ke sɩ́ trɔa nɔn bàda nɛ̀n ɛmɛ̀n.

¹⁶Nyàn ɔmu le bo nyri eci léyi dú ɛcüɛ̀n nɔn: Zhezü Krisì tán n'ɛwuvà bɔ́ kruhú. Zɛtɛn, bɔ́ mán ke ji le bɔ̀ tán bɔ́ ɛwuvà, bɔ́ muan-ẅì hɔ̀n kruhú.

¹⁷Ke dú kɛ ɔwrɔn tɔ̀n léyi di ɛnnɛncüì kɛ kán nɛ́n muanẅì léyi dú ɛmian mɛ̀n nɔn, tɛ́n nɛ sɛ́n n'ɛnbɔrɛ lɔ esù, anhɔntán de nɛ lɛ hán nɛ̀n dɔ̀ le, nɛ̀n ẅɛn Ɔwɔ cüɛ̀n dú n'ɛnbɔrɛ lɔ mɛ̀n nɛ́n?

¹⁸M'ɛẅì hɔ̀n, ke sɩ́ ji le bɔ́ ɛcüɛ̀n lɔ kè dú ankà ankrankran dɔ́ mɛ̀n tɛ̀kɩ; ke ji le kè dú ɛcüɛ̀n annanwɔrɛ léyi ke yé n'edomɛ̀n eci-hán mɛ̀n nɔn.

¹⁹Nyàn ɔmu le bɔ́ le nyrì le bɔ́ dú annanwɔrɛ tɛn nɔn. Nyàn ɔmu le bɔ́ ɛnbɔrɛ lɔ ke le dú esɛ́ mɛ̀n Ɔwɔ zìwú nɔn.

²⁰Annanwɔrɛ mɛ̀n lɔ, ke dú kɛ bɔ́ ɛnbɔrɛ kɛ bɔ́ bɔ̀ nwù, bɔ́ nyri ɔmu le Ɔwɔ sevri vrán bɔ́ ɛnbɔrɛ lɔ, kɩ nɛ̀n nyri eci lɔ fɛn.

²¹Ɔmu lɔ, m'annyran hɔ̀n, ke dú kɛ bɔ́ ɛnbɔrɛ ke sɩ́ bɔ́ bɔ̀ nwù, bɔ̀ ẅɛn esɛ́ vri Ɔwɔ zìwú.

²²Bɔ́ cɔ́ eci lɔ fɛn léyi bɔ́ sán n'eyri, ɔmuhi bɔ́ hán n'ɛnyanmàn kɔrɛ̀zi-ci, kɩ bɔ́ hán eci léyi nɛ cüɛ̀n nɔn.

²³Nyàn eci léyi nɛ wá tán bɔ̀ nɔn: ke ji le bɔ̀ ẅɛn ankaẅìbùtan n'Ɛnẅì Zhezü Krisì bɩmɛ̀n, ô bɔ̀ cüɛn bɔ́ edomɛ̀n hán ɔmu le Krisì wá tán bɔ̀ nɔn.

²⁴Ɔwrɔn léyi kɛ hán Ɔwɔ nyanmàn kɔrɛ̀zì-ci nɔn, nɛ̀n dú Ɔwɔ mɛ̀n kɩ Ɔwɔ mán dú nɛ̀n ɛmɛ̀n. Nyàn ɔmu le bo nyrì le Ɔwɔ dú bɔ̀ ɛmɛ̀n nɔn: bɔ́ nyri ndɔ lɔ, Ɛnhɛ́n Prɔnprɔn léyi nɛ̀n tán bɔ̀ nɔn yi kruhú.