Read Alladian 1 Zhan 4 Bible Online

1 Zhan 4 - Alladian bible

1 Zhan 4

¹M'annyran hɔ̀n nyɛ́n bɩ́ ẅɛn esɛ́ anwrɔn hɔ̀n léyi kɛ dɔ̀ le yɔ ẅɛn Ɔwɔ Hɛ́n nɔn y'ɛwú, tɛ́n nyɛ́n wɔɛn yɔ nyɛ́n nyan, ô nyɛ́n nyrì ke dú kɛ ɛnhɛ́n léyi yɔ ẅɛ̀n nɔn, dú Ɔwɔ yri và. Annanwɔrɛ mɛ̀n lɔ ɛyɔ̀n wɔ-mùan-wú-ankà-dɔ́-bɔ̀ bobrebe bonyí ɛnhibù wú.

²Nyàn ɔmu le nyɛ lɛ hán nyɛ́n nyrì le Ɛnhɛ́n lɔ dú Ɔwɔ Hɛ́n nɔn: Ɔwrɔn totɔtɔ̀n léyi kɛ dɔ̀ le Zhezü Krisì srɔ annanwɔrɛ mɛ̀n ɔwrɔnẅì, ɛnhɛ́n léyi dú Ɔwɔ yri và nɔn n'ɛmɛ̀n.

³Tɛ́n ɔwrɔn totɔtɔ̀n léyi ke sɩ́ ji kè nyri Zhezü wú ankà ndɔ lɔ nɔn, nɛ̀n sɩ̀ ẅɛ̀n ɛnhɛ́n léyi dú Ɔwɔ yri và nɔn. Ɛnhɛ́n léyi nɛ́n ẅɛ̀n nɔn, dú Krisì Gbri-wrɔn hɛ́n: nyɛ́n yá le nɛ lɛ và, kɩ zɛtɛ̀ lɔ, nɛ̀n dú ɛnhibù wú.

⁴Tɛ́n nyɛ́n, m'ɛẅì hɔ̀n, nyɛ́n dú Ɔwɔ tɛn kɩ nyɛ́n kɔ̀nká ɛyɔ̀n wɔ-mùan-wú-ankà-dɔ́-bɔ̀; ɔmuhi ɛnhɛ́n léyi dú nyɛ̀n ɛmɛ̀n nɔn, ɛkɔrɛ̀ srɔn vrán ɛnhɛ́n léyi dú anwrɔn hɔ̀n léyi dú ɛnhibù wú nɔn mɛ̀n.

⁵Yɔ dɔ́ ankà kɛ cá ɛnhibù kɩ ɛnhibù ke die yɔ nukùɛ ɔmuhi yɔ dú ɛnhibù tɛn nɔn.

⁶Tɛ́n bɔ́, bò dú Ɔwɔ tɛn. Ɔwrɔn léyi nyri Ɔwɔ nɔn, ke die bɔ̀ nukùɛ; ɔwrɔn léyi kè sɩ̀ dù Ɔwɔ tɛ̀n nɔn, nɛ́n sɩ́ die bɔ̀ nukùɛ. Ɔmu lɔ de bɔ́ le nyri eci léyi dú annanwɔrɛ Hɛ́n mán ɛnhɛ́n léyi dú ɛzɛ́n mɛ̀n nɔn.

⁷M'annyran hɔ̀n, bɔ̀ cüɛn bɔ́ edomɛ̀n, ɔmuhi ɛcüɛ̀n dú Ɔwɔ yri và nɔn. Ɔwrɔn totɔtɔ̀n léyi ẅɛn ɛcüɛ̀n nɔn, nɛ̀n dú Ɔwɔ ẅì, kɩ nɛ̀n nyri Ɔwɔ.

⁸Ɔwrɔn léyi kè sɩ̀ ẅɛ̀n ɛcüɛ̀n nɔn, nɛ̀n sɩ̀ nyrì Ɔwɔ, ɔmuhi Ɔwɔ dú ɛcüɛ̀n nɔn.

⁹Nyàn ɔmu le Ɔwɔ yé bɔ̀ n'ɛcüɛ̀n lɔ nɔn: nɛ̀n wá n'Ɛnẅì zri lɔ ɔkɔ̀hɔ̀n ɛnhibù wú, ô bɔ̀ cɔ́ ɛwúvà n'ɛmɛ̀n.

¹⁰Kɩ ɛcüɛ̀n dú eci ndɔ lɔ: ke sɩ̀ dù hɩ le bɔ̀ cüɛn Ɔwɔ nɔn, tɛ́n hɩ le nɛ̀n cüɛn bɔ̀ kɩ nɛ̀n wá n'Ɛnẅì ɔkɔ̀hɔ̀n, ô n'ecice lɔ mɛ̀n, bɔ̀ cɔ́ ɛgbàn-bɩ̀ce.

¹¹M'annyran hɔ̀n, ke dú ɔmu lɔ de Ɔwɔ cüɛn bɔ̀ nɔn hô, ke ji le bɔ́ mán bɔ̀ cüɛn bɔ́ edomɛ̀n.

¹²Ɔwrɔn zriɛmɛ́n kɛ vá kán Ɔwɔ; ke dú kɛ bɔ́ cüɛn bɔ́ edomɛ̀n, Ɔwɔ dú bɔ̀ ɛmɛ̀n kɩ n'ɛcüɛ̀n lɔ ke yé n'edomɛ̀n anvrɛnvrɛn bɔ́ ɛmɛ̀n.

¹³Nyàn ɔmu le bɔ́ hán bɔ́ nyrì le, bɔ́ dú Ɔwɔ mɛ̀n kɩ nɛ́n mán nɛ̀n dú bɔ̀ ɛmɛ̀n nɔn: nɛ̀n tán bɔ̀ n'ɛnhɛ́n.

¹⁴Kɩ bɔ́ kàn, kɩ bɔ́ dɔ̀ le Ɔwɔ wá n'Ɛnẅì ɔkɔhɔ̀n kè dú ɛnhibù Bɩdie-wrɔn.

¹⁵Ke dú kɛ ɔwrɔn tɔ̀n kɛ dɔ̀ le Zhezü dú Ɔwɔ ẅì, Ɔwɔ dú nɛ̀n ɛmɛ̀n, kɩ nɛ̀n dú Ɔwɔ mɛ̀n.

¹⁶Kɩ bɔ́, bò nyri ɛcüɛ̀n léyi Ɔwɔ ẅɛn bɔ́ ɛwú, kɩ bɔ́ bú tán ankaẅì. Ɔwɔ dú ɛcüɛ̀n: ɔwrɔn léyi ke dú ɛcüɛ̀n mɛ̀n nɔn, nɛ̀n dú Ɔwɔ mɛ̀n kɩ Ɔwɔ dú nɛ̀n ɛmɛ̀n.

¹⁷Ke dú kɛ ɛcüɛ̀n kɛ krɔn kpehɛ́n ke dú bɔ̀ ɛmɛ̀n hô, zɛtɛn esɛ́ vri ke le dú bɔ̀ ɛmɛ̀n ɛmrɛ̀nci bì lɔ, ɔmuhi bɔ́ ɛwúvà ɛnhibù ndɔ lɔ wú, ndù cá Zhezü Krisì tɛn lɔ nɔn.

¹⁸Ɛnjansù bàdà ɛcüɛ̀n mɛ̀n; ɛcüɛ̀n annanwɔrɛ lɔ ɛnjansù bàda nɛ̀n ɛmɛ̀n. Ɔmu lɔ de ɛcüɛ̀n ke sɩ̀ sɛ̀n nmù ɔwrɔn léyi ɛnjansù kɛ ẅɛ̀n nɔn mɛ̀n, ɔmuhi ɛnjansù dú ɛgbàn-hán-ci tɔ̀n mɛ̀n nɔn.

¹⁹Bɔ tɛn, bɔ̀ ẅɛn ɛcüɛ̀n, ɔmuhi Ɔwɔ gɔ́ cüɛn bɔ̀ kpàkpà mɛ̀n nɔn.

²⁰Ke dú kɛ ɔwrɔn tɔ̀n kɛ dɔ̀ le: “Mɛ cüɛn Ɔwɔ”, kɩ ne gbri nɛ́n muanẅì, nɛ̀n dú ɛyɔ̀n-wrɔn. Annanwɔrɛ mɛ̀n lɔ nɛ́n sɩ́ cüɛn Ɔwɔ léyi nɛ́n sɩ́ kán rɔa nɔn, ke dú kɛ nɛ́n sɩ́ cüɛn nɛ́n muan-ẅì léyi nɛ kàn nɔn.

²¹Nyàn ɛnyanmàn léyi Krisì tán bɔ̀ nɔn: Ɔwrɔn léyi kɛ cüɛn Ɔwɔ nɔn, ke ji le nɛ̀n cüɛn nɛ́n muanẅì mán.