Read Alladian 1 Zhan 5 Bible Online

1 Zhan 5 - Alladian bible

1 Zhan 5

¹Ɔwrɔn totɔtɔ̀n léyi ke bú tán le Zhezü dú Krisì nɔn, nɛ̀n dú Ɔwɔ ẅì; kɩ ɔwrɔn totɔtɔ̀n léyi kɛ cüɛn ɛẅì nɛ́n zi tɔ̀n nɔn, ɔwrɔn ndɔ lɔ nɛ cüɛn ɛẅì nɛ́n zi lɔ n'ɛẅì hɔ̀n.

²Nyàn ɔmu le bɔ́ hán bɔ́ nyrì le bɔ́ cüɛn Ɔwɔ ẅì hɔ̀n nɔn: Ɔwɔ cüɛn mɛ̀n mán n'ɛnyanmàn hɔ̀n kɔrɛ̀zì-ci hán mɛ̀n.

³Annanwɔrɛ mɛ̀n lɔ, nyàn eci léyi dú Ɔwɔ cüɛ̀n nɔn: ke ji le bɔ̀ hán n'ɛnyanmàn hɔ̀n kɔrɛ̀-zì-ci. Kɩ n'ɛnyanmàn hɔ̀n mán kè sɩ̀ dù ɛshishi kɛ̀ tán bɔ̀,

⁴ɔmuhi Ɔwɔ ẅì totɔtɔ̀n kɛ lɛ kɔ̀nká ɛnhibù tɛ̀. Nyàn ɔmu le bɔ́ kɔ́nká ɛnhibù nɔn: b'ankaẅìbùtan ẅɛn mɛ̀n.

⁵Antɔn de kɛ lɛ kɔ̀nká ɛnhibù tɛ̀ nɛ́n? Ɔwrɔn léyi ke bú tán le Zhezü dú Ɔwɔ Ẅì nɔn nɛ́n zri kɩ.

⁶Zhezü Krisì dú ɔwrɔn léyi nvà nɔn; nɛ́n và nɛ́n mán n'ɛnshi-kruwa shi mán n'owú krɛ̀ mɛhi. Nɛ́n và, nɛ̀n sɩ̀ sɩ̀ ɛnshi zri kɩ, tɛ́n nɛ̀n sɩ́ ɛnshi mán ɛnkrɛ̀ mɛhi. Kɩ Ɛnhɛ́n Prɔnprɔn di dalɛfuɛ le, ndɔ lɔ dú annanwɔrɛ, ɔmuhi Ɛnhɛ́n dú ankà annawɔrɛ nɔn:

⁷Dalɛfuɛ-di-bɔ̀ anhɔ̀n de dù nɔn:

⁸Ɛnhɛ́n Prɔnprɔn, ɛnshi mán ɛnkrɛ̀, kɩ yɔ, anwrɔn anhɔ̀n lɔ fɛn ɔmùan krɔn yɔ.

⁹Bɔ́ shri anwrɔnẅì dalɛfuɛ-dì; Ɔwɔ dalɛfuɛ-dì sevri kɩ ndɔ lɔ de dú dalɛfuɛ léyi nɛ̀n di n'ɛnẅì wú nɔn.

¹⁰Ɔmu lɔ de ɔwrɔn léyi ke bú Ɔwɔ ẅì ankà kɛ tán ankaẅì nɔn, ẅɛn dalɛfuɛ-dì ndɔ lɔ dú nɛ̀n ɛmɛ̀n; tɛ́n ɔwrɔn léyi ke sɩ́ bú Ɔwɔ ankà kɛ tán ankaẅì nɔn, nɛ srɔ Ɔwɔ ɛyɔ̀n-wrɔn tɔ̀n, ɔmuhi dalɛfuɛ léyi Ɔwɔ di n'Ɛnẅì wú nɔn, nɛ̀n sɩ̀ bù tán ankaẅì.

¹¹Nyàn dalɛfuɛ-dì ndɔ lɔ: Ɔwɔ tán bɔ̀ ɛwúvà léyi ke sɩ́ trɔa nɔn kɩ ɛwúvà ndɔ lɔ bɔ̀ cɔ́ nɛ̀n n'Ɛnẅì mɛ̀n.

¹²Ɔwrɔn léyi nyri Ɛnẅì lɔ nɔn, nɛ̀n ẅɛn ɛwúvà ndɔ lɔ; ɔwrɔn léyi kè sɩ̀ nyrì Ɔwɔ Ẅì lɔ nɔn, nɛ̀n sɩ̀ ẅɛ̀n ɛwúvà lɔ.

¹³Me merɛ́n nyɛ̀n owrú ndɔ lɔ, ô nyɛ́n nyri ɔmu le, nyɛ́n ẅɛn ɛwúvà léyi ke sɩ́ trɔa nɔn, nyɛ́n léyi nyɛ́n ẅɛn ankaẅìbùtan Ɔwɔ Ẅì bɩmɛ̀n nɔn.

¹⁴Nyàn eci le kruhú léyi bɔ̀ ẅɛn esɛ́ vri Ɔwɔ zìwú: bɔ̀ nyri ɔmu le ne le die bɔ̀ nukù, ke dú kɛ bɔ́ sán nɛ̀n eci totɔtɔ̀n léyi dú n'ɛkɔrɛ̀zì-ci nɔn.

¹⁵Ɔmu lɔ, hán ɔmu le bɔ́ nyrì le, ne die bɔ̀ nukùɛ ɛnvra léyi bɔ̀ sán nɛ̀n eci tɔ̀n, bɔ́ vru bɔ́ nyri ɔmu le nɛ tán bɔ̀ eci léyi bɔ́ sán nɛ̀n nɔn.

¹⁶Ke dú kɛ ɔwrɔn tɔ̀n kɛ kán nɛ́n muanẅì kɛ hán ɛgbàn léyi ke sɩ̀ sɩ́ nɛ̀n owúemɛ̀n nɔn, ke ji le nɛ̀n sɛ̀n, kɩ Ɔwɔ kɛ lɛ tán nɛ́n muanẅì ndɔ lɔ ɛwúvà-kɔrɛ̀. Ndɔ lɔ zrɔ tán anwrɔn hɔ̀n léyi ke sɩ́ hán owú gbàn nɔn. Tɛ́n ɛgbàn tɔ̀n ndù ke sɩ́ owúemɛ̀n, kɩ mɛ́n sɩ́ wá tán yɛ sɛ́n Ɔwɔ ɛgbàn ndɔ lɔ kruhú.

¹⁷Eci-gbàngbàn-hán lɔ fɛn dú ɛgbàn, tɛ́n ɛgbàn ndɔ hɔ̀n ndù ke sɩ́ sɩ́ owúemɛ̀n.

¹⁸Bɔ́ nyri ɔmu le Ɔwɔ ẅì zriɛmɛ́n ke sɩ́ vru dú ɛgbàn hán mɛ̀n, ɔmuhi Ɔwɔ Ẅì kɛ nan nɛ̀n kɩ Eci gbangbàn-hán-wrɔn ke sɩ̀ ẅɛ̀n ɛkɔrɛ̀levri zriɛmɛ́n n'ɛwú nɔn.

¹⁹Bɔ̀ nyri ɔmu le bɔ̀ dú Ɔwɔ tɛn, kɩ ɛnhibù mumù dú eci gbangbàn-hán-wrɔn kɔrɛ̀srɔn wú.

²⁰Bɔ̀ nyri ɔmu le Ɔwɔ Ẅì nvà, kɩ nɛ̀n tán bɔ̀ ɛnkruemɛ̀n-ẅɛ̀n, ô bɔ̀ nyri Ɔwɔ annanwɔrɛ lɔ. Bɔ̀ dú Ɔwɔ annanwɔrɛ lɔ n'ɔbɔ̀sɔ̀ lɔ mɛ̀n n'Ɛnẅì Zhezü Krisì mɛ̀n. Nɛ́n de nɛ̀n dú Ɔwɔ annanwɔrɛ lɔ nɔn, nɛ́n de nɛ̀n dú ɛwúvà léyi ke sɩ́ trɔa nɔn.

²¹M'ɛẅì hɔ̀n, nyɛ́n cɔhɔ́ ɛyɔ̀n wɔ hɔ̀n tɛsɛ̀n!