Read Alladian 2 Zhan 1 Bible Online

2 Zhan 1 - Alladian bible

2 Zhan 1

¹Ebinyan ndɔ lɔ dú Ecüìcüì-wrɔn yri kɛ và nɔn, dú Ɛnnyɔnwrɔn léyi Ɔwɔ mrɛ́n bɩ, nɛ́n mán n'ɛẅì hɔ̀n léyi mɛ cüɛn annanwɔrɛ mɛ̀n nɔn tɛn. Kè sɩ̀ dù mɛ́n zri de mɛ cüɛn nyɛ̀n nɔn, tɛ́n anwrɔn hɔ̀n lɔ fɛn léyi nyri ankaẅì annanwɔrɛ,

²ɔmuhi annanwɔrɛ dú bɔ̀ ɛmɛ̀n, kɩ ne le dú bɔ̀ ɛmɛ̀n ɛnvra lɔ fɛn nɔn.

³Ɔwɔ Zi mán Zhezü Krisì léyi dú Ɔwɔ Zi Ẅì nɔn, kɛ̀ tán bɔ̀ nboafɔ̀n, ɛgbàn-bɩce mán anwɔwɔ, ô bò dú annanwɔrɛ mán ɛcüɛ̀n wúvà mɛ̀n.

⁴Mɛ̀n dú ɛnbɔrɛ-bruemɛ̀n ɛnvra léyi mɛ́n cɔ̀ mɛ́n nyrì le v'ɛẅì hɔ̀n janbɔ̀ dú ɛwúvà annanwɔrɛ mɛ̀n hán ɔmu le Ɔwɔ Zi wá tán nɔn.

⁵Kɩ zɛtɛ̀ lɔ, nyàn eci léyi mɛ sán mɛ́n nɔn, Ɛnnyɔnwrɔn anvrɛnvrɛn: bɔ̀ cüɛn bɔ́ edomɛ̀n. Kè sɩ̀ dù ɛnyanmàn wrù de mɛ́n merɛ́n tán mɛ́n nɔn; nɛ̀n dú ɛnyanmàn léyi bɔ̀ cɔ́ ɛnkrubɔmɛ̀n nɔn.

⁶Ɛcüɛ̀n dú eci léyi kɛ wá tán bɔ̀, bɔ̀ ẅɛn ɛwúvà kè dú Ɔwɔ nyanmàn kɔrɛ̀zì-ci-hán mɛ̀n. Kɩ ɛnyanmàn léyi ye yé nyɛ̀n ɛnkrubɔmɛ̀n lɔ nɔn, dú ɛcüɛ̀n léyi ke ji le kè dú ny'ɛwúvà lɔ mɛ̀n nɔn.

⁷Anhyɔ̀n-bɔ̀ bobrebe bonyi ɛnhibù wú; yɔ sɩ́ ji yɔ nyri ɔmu le Zhezü Krisì srɔ ɔwrɔnẅì annanwɔrɛ. Ndɔ lɔ mɛ̀n de ɛyɔ̀n-wrɔn lɔ ke yé n'edomɛ̀n, Krisì Gbri-wrɔn.

⁸Nyɛ́n wá nyɛ́n mumù ny'edomɛ̀n esùva, ô nyɛ́n bɩ́ zrɛ́n b'ɔkɔ̀hɔ̀n vɔ̀nshɛ́ lɔ, tɛ́n nyɛ́n cɔ́ ny'anjakpà lɔ kɛ sɛ́n nmù.

⁹Ɔwrɔn totɔtɔ̀n léyi ke sɩ̀ dù Krisì ankà-yé lɔ mɛ̀n, tɛ́n ke wí nɛ̀n ɛwú nɔn, nɛ́n mán Ɔwɔ mɛhi yɔ sɩ̀ dú ɔbɔ̀sɔ mɛ̀n. Ɔwrɔn léyi ke dú ankà-yé ndɔ lɔ mɛ̀n nɔn, nɛ́n mán Ɔwɔ Zi mán Ɔwɔ Ẅì, yɔ dú ɔbɔ̀sɔ mɛ̀n.

¹⁰Ke dú kɛ ɔwrɔn tɔ̀n ke ji nyɛ̀n kɛ và kɩ kɛ vá sɩ́ nyɛ̀n ankà-yé nyantɛn tɔ̀n, nyɛ́n bɩ́ sɩ́ nɛ̀n ɛbemɛ̀n, kɩ nyɛ́n bɩ́ bi nɛ̀n nyɛ́n nyan mán;

¹¹ɔmuhi ɔwrɔn léyi ke bi nɛ̀n nyan nɔn, kɛ srɔ n'ɛkɔrɛ̀-wá-wrɔn n'eci-gbangbàn-hán lɔ mɛ̀n.

¹²Mɛ̀n vru mɛ̀n ẅɛn ankà bobrebe mɛ lɛ dɔ́ nyɛ̀n, tɛ́n mɛ cüɛn ɔmu le, mɛ́n bɩ́ bɩ́ owrú-shi mɛ́n merɛ́n owrú wú. Mɛ ẅɛn esɛ́ le, mɛ lɛ và cɔ́ nyɛ̀n, ô mɛ́n dùku mɛ́n dɔ́ nyɛ̀n ankà, ô bɔ́ pɔpüɛ̀-brà lɔ kɛ̀ sɛ́n nmù.

¹³Ɔmuanẅì ɛnnyɔnwrɔn léyi Ɔwɔ mrɛ́n bɩ nɔn, n'ɛẅì hɔ̀n mán ke yüre nyɛ̀n y'ebinyan.