Read Alladian 3 Zhan 1 Bible Online

3 Zhan 1 - Alladian bible

3 Zhan 1

¹Ebinyan ndɔ lɔ dú Ecüìcüì-wrɔn yri kɛ và nɔn, dú annyran anvrɛn Gahiüsɛ̀n léyi mɛ cüɛn annanwɔrɛ mɛ̀n nɔn tɛn.

²Annyran anvrɛn, mɛ cüɛ̀n le, eci lɔ fɛn kɛ̀ hɔ́n ankrankran mɛ̀n kɛ̀ tán mɛ́n, ô è dú edùsɔ mɛ̀n anẅia mɛ̀n, kɛ hán ɔmu le è dú nɛ̀n ɛnhɛ́n mɛ̀n nɔn.

³Anwrɔn-nɛ́n-muan-ẅì hɔ̀n nvà, kɩ dɔ́ mɛ̀n v'ɔmùan-zri-dì ankà annanwɔrɛ wú mán v'ɛwúvà léyi dú annanwɔrɛ ci-hán mɛ̀n nɔn yi ankà. Ndɔ lɔ tán mɛ̀n ɛnbɔrɛbru anvrɛnvrɛn.

⁴Eci zriɛmɛ́n ke sɩ̀ tán mɛ̀n ɛnbɔrɛbru kɛ̀ vrán m'ɛẅì hɔ̀n wúvà léyi dú annanwɔrɛ ci-hán mɛ̀n nɔn.

⁵Anyran anvrɛn, e di ɔmùan-zri eci lɔ fɛn léyi ɛ hán tán anwrɔn nɛ́n-muan-ẅì, yɔ hɔ̀n léyi dú ɛmɛ̀n nyàntɛn mɛ̀n-bɔ̀ nɔn mán.

⁶Yɔ di v'ɛcüɛ̀n dalɛfuɛ b'Ɔwɔ fɛcüè zìwú. Mɛ sɛ́n mɛ́n, ɛ̀ wá yɔ ɛkɔrɛ̀, ô y'ɛyri hɔ̀n lɔ kɛ̀ cüɛn Ɔwɔ ɛvɛ̀.

⁷Annanwɔrɛ mɛ̀n lɔ, yɔ bru ɛnlevri yɔ hɔ́n Krisì ci-bìtan-kɔ̀hɔ́n mɛ̀n, kɩ yɔ sɩ̀ bɩ anwrɔn hɔ̀n léyi kè sɩ̀ nyrì Ɔwɔ nɔn, y'ɛkɔrɛ̀-wá-ci zriɛmɛ́n.

⁸Bɔ̀ ẅɛn eci-hán-tán kè dú ɛkɔrɛ̀-wá-ci kɛ̀ tán anwrɔn ɔmu hɔ̀n lɔ, ô bɔ́ mán bɔ̀ wá ɛkɔrɛ̀ annanwɔrɛ ankà lɔ n'ɛdɔ́ mɛ̀n.

⁹Mɛ̀n merɛ́n ny'Ɔwɔ fɛcüe owrú kpò tɔ̀n; tɛ́n Diotrɛfɛ̀n léyi ke ji kɛ nyrɔn eci lɔ fɛn, ke sɩ́ bú ankà léyi mɛ dɔ̀ nɔn, kɛ hán ankà.

¹⁰Hɩ le kruhú de, ɛnvra léyi mɛ lɛ và nɔn, mɛ lɛ dɔ́ eci gbàngbàn léyi nɛ hán nɔn yi ankà, nɛ́n léyi nɛ dɔ́ ankà gbàngbàn mán ɛyɔ̀n ankà ku bɔ̀ ɛwú nɔn. Tɛ́n ke sɩ̀ dù fɛn: nɛ́n sɩ́ ji nɛ̀n ẅɛn anwrɔn-nɛ́n-muan-ẅì hɔ̀n léyi dú eciemɛ̀n nɔn nɛ̀nnyàn-bɔ̀, kɩ nɛ́n sɩ́ ji anwrɔn ke bɩ́ yɔ kè sɩ́ ɛbemɛ̀n, ne sî yɔ ndɔ lɔ n'ɛhán mɛ̀n, kɩ nɛ wá yɔ ɛnjansù le, nɛ lɛ wrɔ́ yɔ Ɔwɔ fɛcüè mɛ̀n.

¹¹Annyran anvrɛn, e bɩ́ ji ɛci gbangbàn-hán yri, tɛ́n ɛ̀ hán eci léyi zrɔ nɔn. Ɔwrɔn léyi kɛ hán anvrɛn kɔ̀hɔ̀n nɔn, nɛ̀n dú Ɔwɔ tɛn; ɔwrɔn léyi kɛ hán ɛgbàn nɔn, nɛ̀n sɩ̀ nyrì Ɔwɔ.

¹²Anwrɔn lɔ fɛn kɛ dɔ́ Demetrihüsɛ̀n ankà anvrɛnvrɛn, kɩ annanwɔrɛ léyi dú nɛ̀n ɛmɛ̀n nɔn, ke di nɛ̀n dalɛfuɛ. Bɔ́ mán, bo di nɛ̀n dalɛfüɛ ankrankran, kɩ e nyrì le, dalɛfuɛ-dì ndɔ lɔ dú annanwɔrɛ.

¹³Mɛ̀n vru mɛ̀n ẅɛn ankà bobrebe me ji mɛ̀n dɔ́ mɛ́n, tɛ́n mɛ́n sɩ́ ji mɛ̀n merɛ́n yɔ owrú wú.

¹⁴Mɛ̀n ẅɛn esɛ́ le mɛ lɛ kán mɛ́n ɛnvra bruemɛ̀n, kɩ zɛtɛn bɔ́ lɛ dɔ́ ankà bɔ́ ɛmɛ̀n.

¹⁵Anwɔwɔ kè dú mɛ́n ɛmɛ̀n. Ɛnyran hɔ̀n ke yüre mɛ́n y'ebinyan. Bo nyran hɔ̀n lɔ, ɛ̀ tán yɔ ɔwrɔn zri zri ebinyan.