Read Alladian Ɔwɔ-mɛ̀n-yrikàn 10 Bible Online

Ɔwɔ-mɛ̀n-yrikàn 10 - Alladian bible

Ɔwɔ-mɛ̀n-yrikàn 10

¹Zɛtɛn mɛ̀n vru mɛ̀n kán Ɔwɔ kùyüre-wrɔn nyantɛn tɔ̀n dú anhobɩ́ kakɛ. Nɛ̀n dú ɛnwì-gbú tɔ̀n mɛ̀n kɩ nyàngɔ̀dɛ̀n dú n'ɛnkrusɔn-ci; n'ezì ndù cá ɛnbri hɔ́ kɩ n'annan hɔ̀n ndù hán ɛbùnan-hyà hɔ́.

²Owrú cɛ́ tɔ̀n vuru dú nɛ̀n antamɛ̀n. Ezì-kɔrɛ̀ nán dú nɛ̀n ecüe wú kɩ ebrì nán dú nɛ̀n ɛnhi wú.

³Nɛ̀n dí nkù ecüemɛ̀n hán gɔngɔ̀sɔvɛ̀ léyi esuvamɛ̀n ke shrì nɔn hɔ́. Ɛwú-kù-di ɔbɔ̀ɛn mrɛ́n n'ɛnkù-dì lɔ ɔmùan.

⁴Mɛ vá ankà léyi nɛ́n dɔ̀ nɔn e merɛ́n yri, tɛ́n mɛ̀n yá esùva tɔ̀n dú anhobɩ́ kɛ tán mɛ̀n ɛnyanmàn ndɔ lɔ: “Ɛwú kù-dì ɔbɔ̀ɛn mɛẅi ankà lɔ, kè dú v'ankà bán ankà; e bɩ́ merɛ́n nɛ̀n.”

⁵Zɛtɛn Ɔwɔ kùyüre-wrɔn léyi mɛ́n kàn nyɔn ecüe wú mán ɛnhi wú nɔn, sɩ́ ezì-kɔrɛ̀ màn ɛwú anhobɩ́

⁶kɩ wá ɔmùan tɔ̀n, Ɔwɔ léyi dú ɛnvra lɔ fɛn, hán anhobɩ́ mán ɛnhi, ecüe mán eci lɔ fɛn léyi dú nɛ̀n ɛmɛ̀n nɔn, n'ebɩ́mɛ̀n. Ɔwɔ-kùyüre-wrɔn lɔ dɔ̀ le: “Ye sɩ̀ vru wá ɛnvra ha!

⁷Tɛ́n ɛnvra léyi ɔbɔ̀ɛn mɛ̀n Wɔ-kùyüre-wrɔn lɔ ke le mú ɛbrɛ̀n nɔn, zɛtɛn Ɔwɔ kɛ lɛ hán n'ankɔ́nda ci-bán-ci lɔ, hán ɔmu le nɛ̀n dɔ́ n'eci-bɩ̀tan-bɔ̀ léyi dú n'ɔmùan-wú-ankà-dɔ́-bɔ̀ nɔn.”

⁸Zɛtɛn esùva léyi mɛ́n gɔ̀ yá dú anhobɩ́ nvà nɔn, vru kɛ dɔ́ mɛ̀n ankà ndɔ lɔ: “Ɛ̀ hɔ̀n bɩ́ owrú cɛ léyi ye vuru dú Ɔwɔ-kùyüre-wrɔn antamɛ̀n, nɛ́n léyi nɛ̀n nyɔn ɛwú ecüemɛ̀n mán ɛnhi wú nɔn.”

⁹Mɛ́n sɔ̀nbá Ɔwɔ-kùyüre-wrɔn lɔ ɛtɛ̀sɛ̀n kɩ mɛ dɔ́ nɛ̀n, nɛ̀n tán mɛ̀n owrú cɛ lɔ. Nɛ̀n mrɛ́n mɛ̀n ɔmùan le: “Bɩ owrú lɔ, ô ɛ̀ rá nɛ̀n: nɛ lɛ drɔ mɛ́n ɛmɛ̀ntɛ̀ mɛ̀n, tɛ́n v'anmùan mɛ̀n lɔ, nɛ lɛ zrɔ kɛ lɛ hán anjɔ hɔ́.”

¹⁰Mɛ̀n bɩ́ owrú cɛ lɔ, Ɔwɔ-kùyüre-wrɔn tamɛ̀n kɩ mɛ̀n rá owrú lɔ. M'anmùan mɛ̀n lɔ nɛ̀n zrɔ̀ hán anjɔ hɔ́; tɛ́n ɛnvra léyi mɛ̀n sɔ́n nɛ̀n nmù nɔn, nɛ̀n drɔ́ mɛ̀n ɛmɛ̀ntɛ̀ mɛ̀n.

¹¹Zɛtɛn yɛ dɔ́ mɛ̀n le: “Ke ji le è vru ɛ̀ dɔ́ ankà léyi Ɔwɔ wá hɛ́n kè dú fɛcüè, ɛnhi wú anmàn hɔ̀n, ɛnbrɛ̀ hɔ̀n mán ɛnnɛ̀ncüì bobrebe hɔ̀n tɛn nɔn.”