Read Alladian Ɔwɔ-mɛ̀n-yrikàn 16 Bible Online

Ɔwɔ-mɛ̀n-yrikàn 16 - Alladian bible

Ɔwɔ-mɛ̀n-yrikàn 16

¹Zɛtɛn mɛ̀n yá esùva cüìcüì tɔ̀n dú Ɔwɔ-cice-wɔn mɛ̀n nvà kɩ kɛ dɔ́ Ɔwɔ-kùyüre-bɔ̀ ɔbɔ̀ɛn lɔ le: “Nyɛ́n hɔ́n ɛnhi wú nyɛ́n cüe Ɔwɔ-mɛ̀nhyì-grashɛ̀n ɔbɔ̀ɛn hɔ̀n lɔ!”

²Kpàkpà Wɔ-kùyüre-wrɔn lɔ hɔ̀n kɩ cüe nɛ́n grashɛ̀n lɔ ɛnhi wú. Zɛtɛn ɛcífɔn gbàngbàn hɔ̀n léyi kɛ hán yɛ kán ɛgbàn nɔn, ke ku anwrɔnẅì edòmɛ̀n yɔ léyi ɔnɔ̀n nrɛ̀n dɛ́ yɔ edòmɛ̀n, kɩ kɛ sɛ́n ɔnɔ̀n lɔ nɛ́n picɛ̀ lɔ nɔn.

³Anhyrɛmɛ̀n Wɔ-kùyüre-wrɔn lɔ cüe nɛ́n grashɛ̀n lɔ ecüemɛ̀n. Ecüe shi lɔ srɔ owú-wrɔn tɔ̀n krɛ̀ kɩ ɛci-kɔrɛkɔrɛ hɔ̀n lɔ fɛn léyi dú ecüemɛ̀n nɔn nwù.

⁴Anhɔ́n mɛ̀n Wɔ-kùyüre-wrɔn lɔ cüe nɛ́n grashɛ̀n lɔ mancüè hɔ̀n mán ɛnshi-bɛ́ hɔ̀n mɛ̀n, kɩ ɛnshi hɔ̀n lɔ srɔ ɛnkrɛ̀.

⁵Zɛtɛn mɛ̀n yá Ɔwɔ-kùyüre-wrɔn léyi ẅɛn ɛkɔrɛ̀levri ɛnshi hɔ̀n wú nɔn, kɛ dɔ̀ le: “Vɛ́n léyi è dú Prɔnprɔn, e dù kɩ e gɔ́ dù, è yé le è dú ɛnyrɔnnan-mrɛ̀nci-wrɔn.

⁶Annanwɔrɛ mɛ̀n lɔ anwrɔn hɔ̀n léyi dú vɛtɛn mán v'ɔmùan-wú-ankà-dɔ́-bɔ̀ mɛhi, yɛ hán y'ɛnkrɛ̀ cüe, kɩ zɛtɛ̀ lɔ ɛ̀ tán yɔ ɛnkrɛ̀ yɔ mì. Yɔ cɔ́ eci léyi vɛn yɔ nɔn!”

⁷Zɛtɛn mɛ̀n yá esùva tɔ̀n dú ɛcice tɛbrɛ̀ wú nvà kɩ kɛ dɔ̀ le: “Hɛ̀ɛ̀, Ɛẅɛnwrɔn, ɛkɔrɛ̀srɔn Wɔ, v'ɛmrɛ̀ncì dú annanwɔrɛ kɩ nyrɔn!”

⁸Anzɔmɛ̀n Wɔ-kùyüre-wrɔn cüe nɛ́n grashɛ̀n lɔ ɛnbri wú, nɛ́n léyi yɛ tán nɛ̀n ɛkɔrɛ̀levri nɛ̀n bɩ́ n'ɛnhyà lɔ nɛ̀n bíɛ anwrɔnẅì nɔn.

⁹Kɩ anwrɔnẅì biɛ ɛnhyà-dɔ̀nwrɔ̀n shishi tɔ̀n mɛ̀n; yɔ wora Ɔwɔ bi, nɛ́n léyi nɛ̀n ẅɛn ɛgbàn-hán-ci hɔ̀n lɔ dú n'ɛkɔrɛ̀srɔn wú nɔn, tɛ́n yɔ krɔ yɔ sɩ́ ji yɔ crɔn y'eci-hán-ci, ô yɔ zrɔ nɛ̀n eci.

¹⁰Ɛnriemɛ̀n Wɔ-kùyüre-wrɔn lɔ cüe nɛ́n grashɛ̀n lɔ ɔnɔ̀n lɔ n'ɛgbú-tòbù wú kɩ nɛ́n nɛ̀ncüì-dúyri dú ɛyri-yɔwɔ mɛ̀n. Anwrɔnẅì kɛ kɛ́n ɔwɔ̀ɛn ɛnnyî ɛgbànkan mɛ̀n;

¹¹yɔ wora anhobɩ́-Wɔ, y'ɛgbànkàn mán y'ɛcifɔn hɔ̀n lɔ kruhú. Tɛ́n yɔ sɩ̀ crɛ̀ ejüi yɔ sɔ̀n y'eci-gbàngbàn-hán.

¹²Ɔwolemɛ̀n Wɔ-kùyüre-wrɔn lɔ cüe nɛ́n grashɛ̀n lɔ Efratɛ̀n mancüe vri lɔ mɛ̀n. Mancue shí lɔ wrú, ô kɛ̀ tán ɛnnɛ̀ncüì hɔ̀n léyi dú ɛmɛẅiemɛ̀n kɛ và nɔn, ɛnlevri kè ci.

¹³Zɛtɛn mɛ́n kán anhɛ́n gbàngbàn anhɔ̀n, cá angbràn, dú anwàn-lɛ̀brì mùan mɛ̀n srɔ, ɔnɔ̀n lɔ mùan mɛ̀n srɔ, mán ɛyɔ̀n-wɔ-mùan-wú-ankà-dɔ́-wrɔn tɔ̀n mùan mɛ̀n srɔ.

¹⁴Yɔ dú anwa-bɔ̀ hɛ́n hɔ̀n léyi kɛ hán anvɛmɛ̀n frɛ́n-ci nɔn. Yɔ hɔ́n ɛnhi mumù lɔ fɛn nɛ̀ncüì hɔ̀n tɛsɛ̀n, ô yɛ bɔrɛ yɔ ɛkru ɛkɔrɛ̀srɔn-Wɔ lɔ n'anhà-kɔ́n bì vri lɔ mɛ̀n.

¹⁵“Ɛẅɛnwrɔn kɛ dɔ̀ le, è die nukùɛ mɛ và kɛ lɛ hán ɛci-yerɛ-wrɔn hɔ́! Ɛnbɔrɛbru dú ɔwrɔn léyi ke kprí ɛvɛ̀ kɩ kɛ ẅɛn n'ɛci edòmɛ̀n, ô nɛ́n bɩ́ hɔ́n ɛsɛ̀n-kora, ô anvɛvrà kɛ ẅɛn nɛ̀n, ke dú kɛ yɛ kán nɛ̀n nɛ nyɔn ɔmu lɔ.”

¹⁶Anhɛ́n hɔ̀n lɔ borɛ ɛnnɛncüì hɔ̀n lɔ ɛkru ɛyri léyi ebre mɛ̀n ye bi Harmagedɔn nɔn.

¹⁷Ɔbɔ̀ɛn mɛ̀n Wɔ-kùyüre-wrɔn lɔ cüe nɛ́n grashɛ̀n lɔ ɔwràn mɛ̀n. Esùva cüìcüì tɔ̀n dú Ɔwɔ-cice-wɔn mɛ̀n, nɛ̀n dú ɛgbú-tòbù tɛ̀sɛ̀n nɛ và kɩ nɛ dɔ̀ le: “Yɛ hán trɔa!”

¹⁸Zɛtɛn ɛyri kpɛ́n ɛnhyà, esùva hɔ̀n dɔ́ ankà, ɛwú di nkù kɩ ɛnhi jɔkɔ́ ecüìemɛ̀n. Ɛnhi jɔ̀kɔ̀ ndɔ lɔ zeze ẅɛn ecüì kɩ, yɛ vá kán nɛ̀n ɛnbì zriɛmɛ́n mrìmrì ɔwrɔnẅì krubɔmɛ̀n hàn-hɛ́n!

¹⁹Anmàn vri lɔ vɔ́n n'edomɛ̀n anhɔ̀n kɩ ɛnhi wú anmàn hɔ̀n lɔ fɛn gbɔngbɔ̀. Ɔwɔ kè sɩ̀ tezè Babilɔnɛ̀n cüìcüì lɔ; nɛ̀n hán yi mi n'ɛntàn wɔnsɛn grashɛ̀n lɔ, n'ɛmɛ̀nhyì vri tàn wɔnsɛn lɔ.

²⁰Ɛnshiwú-vu-ta hɔ̀n lɔ fɛn zrɛ́n kɩ ye sɩ́ vru kán nkpò zriɛmɛ́n.

²¹Ɛnshi ẅian srɔnsrɔn vri dú anhobɩ́ ku anwrɔnẅì ɛwú. Kɩ anwrɔnẅi kɛ wora Ɔwɔ n'ɛgban-hán-ci hɔ̀n léyi dú ɛnshi ẅian lɔ nɔn kruhú, ɔmuhi nɛ̀n dú ɛgbàn-hán-ci shishi tɔ̀n nɔn.