Read Alladian Ɔwɔ-mɛ̀n-yrikàn 21 Bible Online

Ɔwɔ-mɛ̀n-yrikàn 21 - Alladian bible

Ɔwɔ-mɛ̀n-yrikàn 21

¹Zɛtɛn mɛ̀n kán anhobɩ́ wrù tɔ̀n mán ɛnhi wrù tɔn. Ɛnvrakpà hobɩ́ mán ɛnvrakpà hi cɔ́wá kɩ ecüe ke sɩ̀ vrù dùɛ.

²Kɩ mɛ̀n kán anmàn prɔnprɔn, Zherüzalɛmɛ̀n wrù léyi Ɔwɔ yüre dú anhobɩ́ kakɛ, krɔn kpehɛ́n hán ɛncɔnwrɔn-hi léyi fi n'edomɛ̀n kɛ̀ hɔ́n nɛ́n cüì ɛsù nɔn.

³Mɛ̀n yá esùva cüìcüì tɔ̀n dú ɛgbú-tòbù wú kɛ và kɩ kɛ dɔ̀ le: “Zɛtɛ̀ lɔ Ɔwɔ-dúyri dú anwrɔnẅiemɛ̀n! Nɛ́n mán yɔ mɛhi yɔ le dù kɩ yɔ lɛ srɔ nɛ́n fɛcüè-bɔ̀. Ɔwɔ dùku mán ke le dú yɔ ɛmɛ̀n, ne le dú y'Ɔwɔ.

⁴Ne le wurɛn y'anvɛ-shi lɔ fɛn. Owù ke sɩ̀ vru dùɛ, ɛbrà ke sɩ̀ vru dùɛ, obòtò ke sɩ̀ vru dùɛ, ɛgbànkàn ke sɩ̀ vru dùɛ. Annanwɔrɛ mɛ̀n lɔ ɛnbiɛhɛ́n-ci hɔ̀n lɔ kɛ lɛ zrɛ́n.”

⁵Zɛtɛn ɔwrɔn léyi yɛ́ ɛgbú-tòbù wú nɔn kɛ dɔ̀ le: “Zɛtɛ̀ lɔ mɛ hán ecì hɔ̀n lɔ fɛn owrù.” Zɛtɛn nɛ dɔ́ mɛ̀n le: “È merɛ́n ndɔ lɔ, ɔmuhi m'ɔmùan-ankà-dɔ̀ hɔ̀n dú annanwɔrɛ kɩ ẅɛn esɛ́ nɔn.”

⁶Kɩ nɛ dɔ̀ le: “Ɔmu lɔ de ndù nɔn! Mɛ̀n dú ɛnkrubɔmɛ̀n mán ɔtrɔmɛ̀n. Ɔwrɔn léyi ɛnshi-mùanwù kɛ ẅɛ̀n nɔn, mɛ lɛ tán nɛ̀n ɛnshi ne le mi ankora ɛwúvà-shi-bɛ́ mɛ̀n.

⁷Ɔwrɔn totɔtɔ̀n léyi kɛ lɛ kɔ̀nkà nɔn, nɛ lɛ cɔ́ m'antamɛ̀n ecice ndɔ lɔ; me le dú n'Ɔwɔ, kɩ ne le dú m'ɛnẅì.

⁸Zɛtɛn, nyɛ́n anbrá-di-bɔ̀, anmùan-anhyrɛ̀-dí-bɔ̀, ɛci-gbàngbàn-hán-bɔ̀, anwrɔn-wri-bɔ̀, ɛci-gbangbàn-kɔ̀hɔ̀n-hán-bɔ̀, seke-kɔ̀hɔ̀n-hán-bɔ̀, antɛ̀buri-sɛ́n-bɔ̀ mán anhyɔ̀n-bɔ̀ lɔ fɛn, ny'ɛyri dú ɛnhyà-ẅì nɛ́nbà lɔ mɛ̀n, nɛ́n de nɛ̀n dú anhyrɛmɛ̀n wù lɔ nɔn.”

⁹Ɔwɔ-kùyüre-bɔ̀ ɔbɔ̀ɛn hɔ̀n léyi ɛmɛẅitrɔ gbán-hán-ci yɩ́ grashɛ̀n ɔbɔ̀ɛn dú antamɛ̀n nɔn, ɔtɔ̀n nvà kɛ dɔ́ mɛ̀n le: “Và kɩ me le yé mɛ́n eyiri-hi lɔ, Ɔwɔ Kɔ̀kɔ̀sɛ̀-ẅì hi lɔ.”

¹⁰Ɛnhɛ́n bru mɛ̀n edù kɩ Ɔwɔ-kùyüre-wrɔn bɩ́ mɛ̀n hɔ́n nkpò tɔ̀n léyi ci ɛwú nɔn wú. Nɛ̀n yé mɛ̀n anmàn prɔnprɔn lɔ, Zherüzalɛmɛ̀n léyi Ɔwɔ yüre, dú anhobɩ́ kakɛ,

¹¹dú Ɔwɔ ci-zrɔ-gbrɛ́n mɛ̀n. Anmàn lɔ n'ɛgbrɛ́n mán n'efì kɛ cá anhàn shishi bù-ẅì hɔ̀n gbrɛ́n mán y'efì.

¹²Nɛ̀n ẅɛn ɛbù-drɛn tɔ̀n ci ɛwú, hɩ mán esù-gbàtà ɛvà-anhyrɛ̀ mɛhi, kɩ Ɔwɔ kùyüre-bɔ̀ ɛvà-anhyrɛ̀ kɛ nán esù hɔ̀n lɔ. Ɛsù-gbàtà hɔ̀n lɔ wú ye merɛ́n Izraɛlɛ̀n-mɛ̀n-kru ɛvà-anhyrɛ̀ lɔ y'ebi.

¹³Esù-gbàtà anhɔ̀n dú andrɛnkru-yri d'anzɔ lɔ: anhɔ̀n dú ɛmɛẅi, anhɔ̀n dú ezì, anhɔ̀n dú ovomɛ̀n kɩ anhɔ̀n dú ecuemɛ̀n.

¹⁴Anmàn drɛ́n lɔ yɛ́ ɛbù-hi-nan ɛvà-anhyrɛ̀ wú, y'ɛwú lɔ ye merɛ́n Ɔwɔ-Kɔ̀kɔ̀sɛ̀-ẅì kɔ̀hɔ̀n-wá-bɔ̀ ɛvà-anhyrɛ̀ lɔ y'ebi.

¹⁵Ɔwɔ-kùyüre-wrɔn léyi kɛ dɔ́ mɛ̀n ankà nɔn, eci wɔɛn-ci tɔ̀n dú antamɛ̀n, ansikɛ fisè, ye bɩ yɛ wɔɛn anmàn lɔ, n'esù gbàtà hɔ̀n mán n'andrɛ́n.

¹⁶Anmàn lɔ n'ɔgbɔmɛ̀n mán n'ɛtrɛmɛ̀n krɔn kpehɛ́n. Ɔwɔ-kùyüre-wrɔn lɔ bɩ́ ansikɛ-fisè wɔɛn anmàn lɔ: anhɛ́-kɔrɛ̀ tɛ̀buri-kru-ɛvà-anhyrɛ̀ dú n'ɔgbɔmɛ̀n mán n'ɛtrɛmɛ̀n; n'ɛtrɛmɛ̀n, n'ɛwúciemɛ̀n mán n'ɔgbɔmɛ̀n nkrɔn.

¹⁷Nɛ̀n wɔɛn andrɛn lɔ mán: ɛkɔrɛ̀-cìca ɛkɔẅi-ɔbɔ̀ɛn mán ɛẅì anzɔ̀ dú n'ɛwúciemɛ̀n, eci-wɔɛn-ci léyi nɛ́n bɩ nɔn, hi wú de nɛ krɛ̀ nɔn.

¹⁸Andrɛn lɔ ye bɩ́ anhàn shishi bù ye ku nɛ̀n, kɩ anmàn mumù tɛn ye bɩ́ ansikɛ-ẅì léyi bí cehɛ́n hán zancí hɔ́ nɔn ye kù.

¹⁹Anmàn drɛ́n bù-hi-nan hɔ̀n ɛvà-anhyrɛ̀ lɔ, ye bɩ́ anhàn shishi bù-ẅì hɔ̀n mɛ̀ntɛ mɛ̀ntɛ, ɛvà-anhyrɛ̀ ye wá nɛ̀n edomɛ̀n:

²⁰kpàkpà bù-hi-nan, hán kɩ cɔ́ ɛvà-anhyrɛmɛ̀n tɛn lɔ nɔn, yɔ lɔ fɛn, anhàn shishi bùẅì mɛ̀ntɛ mɛ̀ntɛ de ye bɩ yɛ wá yɔ edòmɛ̀n nɔn.

²¹Esù-gbàtà hɔ̀n ɛvà-anhyrɛ̀ lɔ dú ɛbreci hɔ̀n ɛvà-anhyrɛ̀; esù gbàtà zri ye bɩ́ ɛbreci zri yɛ hán. Anmàn drɛ́n mɔɛn lɔ dú ansikɛ-ẅì léyi kɛ kán ɛyri kɛ hán zanci hɔ́ nɔn.

²²Mɛ̀n sɩ̀ kán Ɔwɔ-cice-wɔn anmàn ndɔ lɔ mɛ̀n, ɔmuhi n'ecice-wɔn dú Ɛẅɛnwrɔn, ɛkɔrɛ̀srɔn-Wɔ lɔ, mán Ɔwɔ-Kɔ̀kɔ̀sɛ̀-ẅì mɛhi.

²³Anmàn lɔ ke sɩ́ ji ɛnbrí mán okù, ô kɛ̀ tán nɛ̀n ɛyrikàn, ɔmuhi Ɔwɔ-ci-zrɔ lɔ kɛ gbrɛ́n ku nɛ̀n ɛwú kɩ Ɔwɔ-Kɔ̀kɔ̀sɛ̀-ẅì dú nɛ́n kɛ̀niɛn nɔn.

²⁴Ɛnhi wú anmàn hɔ̀n kɛ lɛ nán esù n'ɛyrikàn lɔ mɛ̀n, kɩ ɛnhi wú nɛ̀ncüi hɔ̀n ke le sɩ́ yɔ nɛ̀ncüì-di-ci hɔ̀n lɔ.

²⁵Anmàn sùgbàtà hɔ̀n lɔ ke le srú dɛ́ ɛcɛ̀n mumù lɔ fɛn; kɩ ye sɩ̀ sɛ́n yɔ mrìmrì, ɔmuhi nanvrɛn lɔ ɛnnyran ke sɩ̀ vru dùɛ.

²⁶Nanvrɛn lɔ ye le sɩ́ ɛnhi-wú-anmàn hɔ̀n vrisì mán yɔ nɛ̀ncüì-di-ci.

²⁷Tɛ́n ɛnbrá-ci zriɛmɛ́n ke sɩ̀ bru anmàn ndɔ lɔ mɛ̀n, ɔwrɔn léyi kɛ hán ɛci-promɛ̀n mán ɛyɔ̀n kɔ̀hɔ̀n nɔn. Yɔ léyi ye merɛ́n y'ebi ɔkɔrɛ-wrú léyi dú Ɔwɔ-Kɔ̀kɔ̀sɛ̀-ẅì lɔ tɛn nɔn, yɔ zri kɩ yɔ le bru anmàn ndɔ lɔ mɛ̀n.