Read Alladian Ɔwɔ-mɛ̀n-yrikàn 22 Bible Online

Ɔwɔ-mɛ̀n-yrikàn 22 - Alladian bible

Ɔwɔ-mɛ̀n-yrikàn 22

¹Ɔwɔ-kùyüre-wrɔn lɔ vru yé mɛ̀n ɔkɔrɛ mancüè shi lɔ, kɛ gbrɛ́n kɛ hán obù ẅì fífí hɔ́, dú Ɔwɔ mán Ɔwɔ Kɔ̀kɔ̀sɛ̀-ẅì gbú-tòbù wú kɛ trɛ̀n,

²kɩ kɛ gbɛ́ anmàn drɛn-mɔɛn wanzi. Ɔkɔrɛ-tɛ̀ léyi ke shi ɛẅì andɛ̀n ɛvà-anhyrɛ̀ ɛnnanwàn zri granmɛ̀n, ɛdɛ̀n zri okù lɔ fɛn mɛ̀n nɔn, dú mancüe zì mán ɛmɛẅi. N'ɛẅi hɔ̀n lɔ, ye bɩ yɛ kɔrɛ ɛnhi wú anmàn hɔ̀n.

³Ɔwɔ-ẅiɛ̀-dà ke sɩ̀ vru dú eci zriɛmɛ́n wúɛ. Ɔwɔ mán Ɔwɔ-Kɔ̀kɔ̀sɛ̀-ẅì gbú-tòbù ke le dú anmàn lɔ mɛ̀n, kɩ Ɔwɔ-ci-bɩtan-bɔ̀ ke le cüe nɛ̀n ankɔrɛ̀ ezìwúɛ.

⁴Yɔ lɛ kán nɛ̀n anvɛmɛ̀n, kɩ ye le merɛ́n n'ebi y'ezìwú.

⁵Ɛnnyran ke sɩ̀ vru dùɛ, kɩ ye sɩ̀ vru ji kɛ̀níɛn mán ɛnbrí yrikàn, ɔmuhi Ɛẅɛnwrɔn Ɔwɔ kɛ lɛ tán yɔ n'ɛyri-kàn, kɩ yɔ lɛ ẅɛn ɛyri ɛnvra lɔ fɛn nɔn.

⁶Zɛtɛn Ɔwɔ-kùyüre-wrɔn kɛ dɔ́ mɛ̀n le: “Ankà-dɔ̀ ndɔ hɔ̀n lɔ dú annanwɔrɛ kɩ ẅɛn esɛ́. Kɩ Ɛẅɛnwrɔn Ɔwɔ léyi kɛ tán n'ɔmùan-wú-ankà-dɔ́-bɔ̀ ankà-nyrì nɔn, wá n'ɛkùyüre-wrɔn ɔkɔhɔ̀n kè yé n'eci-bɩtan-bɔ̀ eci léyi kɛ lɛ wɔɛn ɛnvra bruemɛ̀n nɔn.”

⁷“Zhezü kɛ dɔ̀ le, è die nukù, mɛ vá ɛnvra bruemɛ̀n! Ɛnbɔrɛbru dú anwrɔn hɔ̀n léyi ke bɩ́ ɛshishiemɛ̀n Ɔwɔ-mùan-wú-ankà-dɔ̀ léyi dú owrú ndɔ lɔ mɛ̀n nɔn tɛ́n!”

⁸Mɛ̀n, Zhan, mɛ̀n yá kɩ mɛ̀n kán ɛci ndɔ hɔ̀n lɔ. Kɩ ɛnvra léyi mɛ̀n yá kɩ mɛ̀n kán yɔ nɔn, mɛ̀n bore Ɔwɔ kùyüre-wrɔn léyi yé mɛ̀n eci hɔ̀n lɔ nɔn, annan zìwú, ô mɛ̀n cüe nɛ̀n ankɔrɛ̀ ezìwúɛ.

⁹Tɛ́n nɛ dɔ́ mɛ̀n le: “E bɩ́ hán eci ndɔ lɔ! Mɛ̀n dú eci-bɩtan-wrɔn tɔ̀n hán vɛ́n hɔ́, hán ɔmuan-ẅì hɔ̀n Ɔwɔ-mùan-wú-ankà-dɔ̀-bɔ̀, kɩ hán anwrɔn hɔ̀n lɔ fɛn léyi kɛ ẅɛn ɛshishiemɛ̀n owrú ndɔ lɔ n'ankà-dɔ̀ hɔ̀n kɛ hɛ́n nɔn. Ɔwɔ de ke ji le è cüe ankɔrɛ̀ ezìwúɛ nɔn!”

¹⁰Zɛtɛn nɛ dɔ́ mɛ̀n le: “E bɩ́ tɛhɛ́n ɛbánmɛ̀n Ɔwɔ-mùan-wú-ankà-dɔ̀ hɔ̀n léyi dú owrú ndɔ lɔ mɛ̀n nɔn, ɔmuhi ɛci ndɔ hɔ̀n lɔ, y'ɛnvra léyi yɛ wá nɔn, kɛ́n eburi.

¹¹Kɩ ɔwrɔn léyi dú eci-gbàngbàn-hán-wrɔn nɔn, nɛ̀n dù ɛmɛ̀n nɛ̀n hán eci-gbàngbàn, kɩ ɔwrɔn léyi dú nbrá mɛ̀n nɔn, nɛ̀n yɛ́ nbrá mɛ̀n; ɔwrɔn léyi dú prɔnprɔn nɔn, nɛ̀n nán esù nɛ́n hɔ́n ezì nɛ́n prɔnprɔn dù lɔ mɛ̀n.”

¹²“Zhezü kɛ dɔ̀ le, è die nukùɛ, mɛ vá ɛnvra buriemɛ̀n! Me le sɩ́ anjakpà léyi mɛ lɛ tán ɔwrɔnwrɔn n'eci léyi nɛ̀n hán nɔn hɩ wú.

¹³Mɛ̀n dú kpàkpà mán ɛmɛẅi, ɛnkrubɔmɛ̀n mán ɔtrɔmɛ̀n.”

¹⁴Ɛnbɔrɛbru dú anwrɔn hɔ̀n léyi ke jru y'ɛceci hɔ̀n lɔ, kɩ ẅɛn ɛkɔrɛ̀levri ke le zî ɔkɔrɛ-tɛ̀ tɛ̀-ẅì hɔ̀n lɔ, ô kè ci ɛsù-gbàtà hɔ̀n mɛ̀n ke bru anmàn.

¹⁵Tɛ́n yɔ le dú anmàn mɛẅi, ɛci-propromɛ̀n-hán-bɔ̀, yɔ hɔ̀n léyi kɛ hán seke-kɔ̀hɔ̀n, anwrɔn hɔ̀n léyi kɛ hán eci-gbàngbàn-kɔ̀hɔ̀n, anwrɔn-wrì-bɔ̀, anhyɔ̀n-wɔ-sɛ́n-bɔ̀ mán anwrɔn hɔ̀n léyi kɛ cüɛn ɛyɔ̀n-ankà-dɔ̀ mán n'ɔkɔ̀hɔ̀n-hán nɔn!

¹⁶“Mɛ̀n Zhezü, mɛ̀n wá m'ɛkùyüre-wrɔn ɔkɔhɔ̀n kɛ̀ và kè yé eci ndɔ lɔ Ɔwɔ fɛcüè-bɔ̀ mɛ̀n. Mɛ̀n dú Davidɛ̀n mɛ̀n mɛ̀n mɛẅi-wrɔn, ɛcɛ̀n-dɔ̀gbɔ̀.”

¹⁷Ɛnhɛ́n mán eyiri-hi kɛ dɔ̀ le: “Và!” Ɔwrɔn léyi kɛ yá ankà ndɔ lɔ nɔn, nɛ́n mán nɛ̀n dɔ̀ le: “Và!” Ɔwrɔn léyi ɛnshi mùan-wù kɛ ẅɛ̀n nɔn, nɛ̀n và; Ɔwrɔn léyi ke ji ɔkɔrɛ shi nɔn, kɛ̀ cɔ́ ɔkɔrɛ shi lɔ ankora.

¹⁸Mɛ̀n Zhan, me yüre m'ankà-bi-dɔ̀ ɔmùan-ɛwú-siemɛ̀n mɛ tán ɔwrɔn totɔtɔ̀n léyi kɛ yá Ɔwɔ-mùan-ankà léyi dú owrú ndɔ lɔ mɛ̀n nɔn: Ke dú kɛ Ɔwrɔn tɔ̀n ke dí ankà zri ɛmɛ̀n, Ɔwɔ ke le dí n'ɛwúvà lɔ mɛ̀n ɛgbàn-hán-ci hɔ̀n léyi yɛ dɔ́ n'ankà owrú ndɔ lɔ mɛ̀n nɔn.

¹⁹Kɩ ke dú kɛ ɔwrɔn tɔ̀n kɛ mrɛ́n ankà-dɔ̀ zri ankà-dɔ̀ léyi dú owrú ndɔ lɔ mɛ̀n kɛ sɔhɔ́, Ɔwɔ kɛ lɛ mrɛ́n ɔkɔrɛ-tɛ̀ tɛ̀-ẅì léyi dú nɛ tɛn nɔn kɛ lɛ sɔhɔ́, hɩ mán anmàn prɔnprɔn léyi yɛ dɔ́ n'ankà owrú ndɔ lɔ mɛ̀n nɔn.

²⁰Ɔwrɔn léyi ke dí annanwɔrɛ ankà ndɔ lɔ nɛ́n dalɛfuɛ nɔn, kɛ dɔ̀ le: “Hɛ̀ɛ̀, mɛ vá ɛnvra buriemɛ̀n!” Annanwɔrɛ mɛ̀n! Kè dú ɔmu lɔ! Và, Ɛẅɛnwrɔn Zhezü!

²¹Ɛẅɛnwrɔn Zhezü boafɔ̀n ke dú nyɛ lɛ fɛn ɛmɛ̀n.