Read Alladian Ɔwɔ-mɛ̀n-yrikàn 6 Bible Online

Ɔwɔ-mɛ̀n-yrikàn 6 - Alladian bible

Ɔwɔ-mɛ̀n-yrikàn 6

¹Zɛtɛn mɛ̀n kán Ɔwɔ kɔ̀kɔ̀sɛ́ ẅi srú ɛci-tɔn-ci hɔ̀n ɔbɔ̀ɛn lɔ kpàkpà tɛn lɔ, kɩ mɛ̀n yá ɛci kɔrɛkɔrɛ hɔ̀n anzɔ̀ lɔ, ɔtɔ̀n esùva mùan kɛ dɔ́ ankà ke shrì kɛ hán ɛwú kùdì hɔ́: “Và!”

²Mɛ̀n nyan kɩ mɛ̀n kán kpàngɔ wosu tɔ̀n. Ɔwrɔn léyi yɛ́ kpàngɔ lɔ wú nɔn, anlɛbɛn tɔ̀n dú nɛ̀n antamɛ̀n kɩ yɛ tán nɛ̀n ɛnkrusɔn-cì tɔ̀n. Nɛ̀n hɔ́n ɛkɔ̀nká mɛ̀n, ô nɛ̀n vru nɛ̀n kɔ̀nkà.

³Ɛnvra léyi Ɔwɔ kɔ̀kɔ̀sɛ̀ ẅì srú anhyrɛmɛ̀n ci-tɔ́n-ci lɔ nɔn, mɛ̀n yá anhyrɛmɛ̀n cí kɔrɛkɔrɛ lɔ kɛ dɔ̀ le: “Và!”

⁴Zɛtɛn kpangɔ nyantɛn tɔ̀n sɔ́n vá esì, nɛ̀n di edùwru wɔnsɛn. Ɔwrɔn léyi yɛ́ nɛ̀n ɛwú nɔn, cɔ́ ɛkɔrɛ̀srɔn kɛ̀ kɛ́n anwɔwɔ lɔ fɛn ɛnhi wú kɛ̀ sɔhɔ́, ô anwrɔnẅì ke wri y'edomɛ̀n. Yɛ tán nɛ̀n anhà-kɔ́n-nyan she tɔ̀n.

⁵Ɛnvra léyi Ɔwɔ kɔ̀kɔ̀sɛ̀ ẅì srú anhɔ́n mɛ̀n ci-tɔ́n-ci lɔ nɔn, mɛ̀n yá anhɔ́n mɛ̀n cí kɔrɛkɔrɛ lɔ kɛ dɔ̀ le: “Và!” Mɛ̀n nyan kɩ mɛ̀n kán kpangɔ yɔwɔ tɔ̀n. Ɔwrɔn léyi yɛ́ nɛ̀n ɛwú nɔn, ẅɛn eci-wɔɛn-ci tɔ̀n anta.

⁶Mɛ̀n yá hán esùva tɔ̀n hɔ́, dú ɛci kɔrɛkɔrɛ hɔ̀n anzɔ̀ lɔ anwanzi srɔ kɩ kɛ dɔ̀ le: “Dùdu sɔ́n boasɛ́ zri dú nbɩ zri kɔ̀hɔ̀n-hán wɔ̀ɛn-dì, kɩ́ ɛnjüì boasɛ́ anhɔ̀n dú nbɩ zri kɔhɔ̀n-hán wɔ̀ɛn-dì. Tɛ́n ɛkɔrɛ̀ ke bɩ́ tɛ́ mɛ́n ɛnzhì mán ɛntàn wɔsɛ́n.”

⁷Ɛnvra léyi Ɔwɔ-kɔ̀kɔ̀sɛ̀-ẅì srú anzɔ̀mɛ̀n ci-tɔ́n-ci lɔ nɔn, mɛ̀n yá anzɔmɛ̀n ci kɔrɛkɔrɛ lɔ kɛ dɔ̀ le: “Và!”

⁸Mɛ̀n nyan kɩ mɛ̀n kán kpangɔ tɔ̀n léyi di ɛẅi wɔ̀ dùwru nɔn. Ɔwrɔn léyi yɛ́ nɛ̀n ɛwú nɔn, ye bi nɛ̀n Owù, kɩ ɛnhibùwú-bɔ̀ kɛ kɛ́n nɛ̀n ɛsɛ̀n. Yɛ tán yɔ ɛkɔrɛ̀srɔn ɛnhibù anzɔmɛ̀n cá wú, ô yɛ hán anwrɔn ke wú anhà-kɔ́n mɛ̀n, ɔmùanwúemɛ̀n, ɛnlɔẅiɛ mɛ̀n, ô annɔ̀n gbàngbàn hɔ̀n kɛ̀ hán yɔ yɔ wù.

⁹Ɛnvra léyi Ɔwɔ kɔ̀kɔ̀sɛ̀-ẅì srú ɛnriemɛ̀n ci-tɔ́n-ci lɔ nɔn, mɛ̀n kán anwrɔn hɔ̀n léyi ye wri y'ɔmùan-zri-dì kruhú Ɔwɔ ankà-dɔ́ mɛ̀n mán yɔ dalɛfuɛ ankrànkràn dìemɛ̀n nɔn, y'anhɛ́n hɔ̀n lɔ Ɔwɔ-cice-tɛbrɛ̀ krugbɛ̀n.

¹⁰Yɔ di bobo ecüiemɛ̀n: “Ankà-yé-wrɔn prɔnprɔn mán annanwɔrɛ, ɛnvra tán de ɛ wá, ô è ci ɛnhibùwú-bɔ̀ hɔ̀n ɛmrɛ̀n, ô yɔ krɛ́ ɛci yɔ tán mɛ́n b'owù lɔ wú nɛ́n?”

¹¹Y'ɛmɛ̀n lɔ, yɛ tán ɔwrɔnwrɔn ɛceci wosu she, kɩ yɛ dɔ́ yɔ le, yɔ ẅɛn ɛnbɔrɛ yɔ hɛ́n ɛnvra jan, ô yɔ muanẅì hɔ̀n mán y'ɛkɔrɛ̀-wá-bɔ̀ léyi ye le wrì kɛ̀ hán yɔ hɔ́ nɔn, kɛ̀ sá ɛkru yakɛ.

¹²Zɛtɛn mɛ̀n kán Ɔwɔ kɔ̀kɔ̀sɛ̀-ẅì srú ɔwolemɛ̀n ci-tɔ́n-ci lɔ. Zɛtɛn ɛnhi jɔkɔ ecüíemɛ̀n; ɛnbri srɔ anhyɔwɔ hán ɛbrá-càsa hɔ́; kɩ okù mumù lɔ fɛn srɔ anhɔnsɛn hán ɛnkrɛ̀ hɔ́;

¹³okùcànkro hɔ̀n ke dú anhobɩ́ ke cüe ɛnhi wú, kɛ hán antɛ̀ẅì kɔ́ léyi ɛndɔ̀nwrɔn vri ke srú cüe nɔn.

¹⁴Anhobɩ́ cɔ́wá hán owrú léyi ye serɛ nɔn hɔ́. Ɛnkpò hɔ̀n lɔ fɛn mán ɛnshi-wú-vuta hɔ̀n cɔhɔ́ y'ɛnyɔn-yri.

¹⁵Ɛnhi-wú-nɛ̀ncüì hɔ̀n, ɛkɔrɛ̀levri-bɔ̀, anhà-kɔ́n-bɔ̀ wrɔn cüicüi, ɛnnɛ̀ncüì hɔ̀n, ɛkɔrɛ̀srɔn-bɔ̀, mán anwrɔn nyantɛn hɔ̀n, anwɔ̀n-bɔ̀, anwrɔn kora hɔ̀n kɛ bán ɛbù nànmàn mɛ̀n mán ɛbù kpɔ̀ granmɛ̀n.

¹⁶Yɔ dɔ́ ɛnkpò hɔ̀n mán ɛbù hɔ̀n le: “Nyɛ́n ku bɔ̀ ɛwú, ô nyɛ́n bán bɔ̀ ɔwrɔn léyi yɛ́ ɛgbútòbù wú mán Ɔwɔ kɔ̀kɔ̀sɛ́-ẅì mɛ̀nhyì-bɩ́ tɛ̀sɛ̀n esù she mɛ̀n.

¹⁷Ɔmuhi y'ɛnbì vri mɛ̀nhyì-bɩ ncɔ̀a, kɩ anton de kɛ lɛ kɛ́n nɛ̀n ezì tɛ̀ nɛ́n?”