Read Alladian Ɔwɔ-mɛ̀n-yrikàn 7 Bible Online

Ɔwɔ-mɛ̀n-yrikàn 7 - Alladian bible

Ɔwɔ-mɛ̀n-yrikàn 7

¹Eci ndɔ lɔ n'ɛmɛẅi lɔ, mɛ̀n kán Ɔwɔ-kùyüre-bɔ̀ anzɔ̀. Yɔ nyɔn ɛnhibù kru d'anzɔ̀ lɔ wú, yɔ kɛ́n ɛndɔ̀nwrɔ̀n anzɔ̀ hɔ̀n lɔ hɛ́n, ô y'ɛmɛ̀n lɔ nzri mán ke bɩ́ cüɛn ɛnhi wú, ecüe wú mán, antɛ̀ wú mán.

²Kɩ mɛ̀n kán Ɔwɔ-kùyüre-wrɔn nyantɛn tɔ̀n kɛ nán esù hɔ́n ɛmɛẅiemɛ̀n, kɩ Ɔwɔ kɔrɛkɔrɛ lɔ n'eci-tɔ́n-ci dú nɛ̀n antamɛ̀n. Ne di bobo ecüemɛ̀n tán Ɔwɔ-kùyüre-bɔ̀ anzɔ̀ léyi cɔ́ ɛkɔrɛ̀srɔn kɛ̀ jrɛ́ ɛnhi mán ecüe nɔn le:

³“Nyɛ́n bɩ́ jrɛ́ ɛnhi mán, ecüe mán, antɛ̀ mán, ke dú kɛ b'Ɔwɔ lɔ n'eci-bɩtan-bɔ̀ lɔ, bɔ̀ sɩ̀ dì yɔ ɛnrɛ̀n ezìwú.”

⁴Zɛtɛn ye yé mɛ̀n anwrɔn mùan léyi ye di Ɔwɔ nrɛ̀n ezìwú: yɔ dú anwrɔn tɛ̀buri kru ɛkoẅí ɔbɔ̀ɛn mán ɛẅì anzɔ̀, yɔ dú Izraɛlɛ̀n fɛcüè mɛ̀n-bɔ̀ lɔ fɛn mɛ̀n:

⁵anwrɔn tɛ̀buri kru ɛvà anhyrɛ̀ dú Zhüda mɛ̀n mɛ̀n-bɔ̀; anwrɔn tɛ̀buri kru ɛvà anhyrɛ̀ dú Rübɛ́n mɛ̀n mɛ̀n-bɔ̀; anwrɔn tɛ̀buri kru ɛvà anhyrɛ̀ dú Gadɛ̀n mɛ̀n mɛ̀n-bɔ̀;

⁶anwrɔn tɛ̀buri kru ɛvà anhyrɛ̀ dú Asɛrɛ̀n mɛ̀n mɛ̀n-bɔ̀; Anwrɔn tɛ̀buri kru ɛvà anhyrɛ̀ dú Neftali mɛ̀n mɛ̀n-bɔ̀; anwrɔn tɛ̀buri kru ɛvà anhyrɛ̀ dú Manase mɛ̀n mɛ̀n-bɔ̀;

⁷anwrɔn tɛ̀buri kru ɛvà anhyrɛ̀ dú Simeɔn mɛ̀n mɛ̀n bɔ̀; anwrɔn tɛ̀buri kru ɛvà anhyrɛ̀ dú Levi mɛ̀n mɛ̀n-bɔ̀; anwrɔn tɛ̀buri kru ɛvà anhyrɛ̀ dú Isakarɛ̀n mɛ̀n mɛ̀n-bɔ̀; anwrɔn tɛ̀buri kru ɛvà anhyrɛ̀ dú Zabülɔn mɛ̀n mɛ̀n-bɔ̀;

⁸anwrɔn tɛ̀buri kru ɛvà anhyrɛ̀ dú Jozɛfɛ̀n mɛ̀n mɛ̀n-bɔ̀; anwrɔn tɛ̀buri kru ɛvà anhyrɛ̀ dú Bɛnzhamɛn mɛ̀n mɛ̀n-bɔ̀.

⁹Eci ndɔ lɔ n'ɛmɛẅi lɔ, mɛ̀n vru mɛ̀n nyan kɩ mɛ̀n kán anwrɔn fɛcüè vri léyi ɔwrɔn zriɛmɛ́n ke sɩ̀ krɛ̀ rɔ́ nɔn. Yɔ dú ɛnhi wú anmàn lɔ fɛn, ɔkpɔsɔ lɔ fɛn, fɛcüè lɔ fɛn mán ɛnbrɛ̀ lɔ fɛn bɔ̀. Yɔ nyɔn ɛgbú-tòbù mán Ɔwɔ Kɔ̀kɔ̀sɛ̀-ẅì zìwú, yɔ cɔ́ ɛceci she wosù kɩ ɛnnangbànkɔrɛ̀ dú yɔ ɛmàn mɛ̀n.

¹⁰Yɔ di bobo ecüiemɛ̀n le: “Ɛnkrukɔrɛ̀ dú b'Ɔwɔ yri và, nɛ́n léyi nɛ̀n yɛ́ ɛgbú-tòbù wú nɛ́n mán Ɔwɔ Kɔ̀kɔ̀sɛ̀-ẅì mɛhi!”

¹¹Ɔwɔ-kùyüre-bɔ̀ lɔ fɛn gbrɛnkɛn ɛgbú-tòbù lɔ ɔmùan, ɛcüìcüì-bɔ̀ mán ɛci kɔrɛkɔrɛ hɔ̀n anzɔ̀ lɔ mán. Yɔ bore, yɔ kɛ́n ezì ɛnhi ɛgbú-tòbù zìwú, kɩ yɔ cüe Ɔwɔ ankɔrɛ̀ ezìwúɛ

¹²kɩ yɔ dɔ̀ le: “Kè dú ɔmu lɔ! Hɛ̀ɛ̀, ɛmrɛ́n, ecizrɔ, ankà-nyrì, ɛnyri-kùɛn-tán, evrisì, ɛkɔrɛ̀srɔn mán ecüì dú b'Ɔwɔ tɛn ɛnvra lɔ fɛn! Kè dú ɔmu lɔ.”

¹³Ɛcüìcüì-bɔ̀ lɔ ɔtɔ̀n ke yrɛ mɛ̀n le: “Antɔn hɔ̀n dú anwrɔn hɔ̀n léyi cɔ́ ɛceci she wosu, kɩ tɛyri de yɔ dù yɔ và nɛ́n?”

¹⁴Mɛ̀n mrɛ́n nɛ̀n ɔmùan le: “Vɛ́n de e nyrì nɔn m'ɛẅɛnwrɔn.” Zɛtɛn nɛ dɔ́ mɛ̀n le: “Yɔ dú anwrɔn hɔ̀n léyi ci ɛgbànkàn vriemɛ̀n. Yɔ jru y'ɛceci she hɔ̀n lɔ kɩ yɔ srɔ yɔ ɛwosu Ɔwɔ Kɔ̀kɔ̀sɛ̀-ẅì krɛ̀ lɔ mɛ̀n.

¹⁵Hɩ le kruhú de yɔ nyɔn Ɔwɔ gbú-tòbù zìwú kɩ yɔ sɛ́n nɛ̀n ɛnnyran mán ɛcɛ̀n, n'ecice wɔn lɔ mɛ̀n. Ɔwrɔn léyi yɛ́ ɛgbútòbù wú nɔn, kɛ lɛ wá yɔ esùva.

¹⁶Ɛcizî mán ɛnshi mùanwù ke sɩ̀ vru ẅɛn yɔ mrìmrì; ɛnbri mán ke sɩ̀ ẅɛn yɔ, kɩ ɛyriyì vri zriɛmɛ́n ke sɩ̀ vru murɛn yɔa.

¹⁷Ɔmuhi Ɔwɔ Kɔ̀kɔ̀sɛ̀-ẅì léyi nyɔn ɛgbú-tòbù wanzi nɔn, kɛ lɛ srɔ y'ɔkua-wrɔn, kɩ ke le sɩ́ yɔ ɔkɔrɛ shi-bɛ́ mùan mɛ̀n. Kɩ Ɔwɔ ke le wurɛn yɔ anvɛ-shi lɔ fɛn anvɛmɛ̀n.”