Read Јаҥы Кереес Матфей 15 Bible Online

Матфей 15 - Јаҥы Кереес bible

Матфей 15

¹Ол тушта Иисуска Иерусалимнеҥ бичикчилер ле фарисейлер келип, айттылар:

²— Јаандардыҥ јаҥдап келген јаҥын ӱренчиктериҥ не керек бузуп јадылар? Ажанар алдында колдорын јунбайдылар.

³Иисус олорго каруу јандырды: — Слер де, јаҥдап келген јаҥыгарга болуп, Кудайдыҥ јакылтазын не бузуп јадыгар?

⁴Кудай јакып айткан эди: «Ада-энеҥди тооп јӱр»; база: «Адазын эмезе энезин јаман айдып турган кижи, ары ӧлӱп калзын».

⁵Слер дезе айдадыгар: «Кижи адазына эмезе энезине: „Менеҥ алгадый немегер — Кудайга сый“ — деп јарлаза,

⁶ол адазын эмезе энезин тообозо до кем јок». Мынызыла јаҥдап келген јаҥыгарга болуп Кудайдыҥ сӧзин кеде эдип јадыгар.

⁷Эки јӱстӱлер! Слер керегинде Исаия јарлыктап јакшы айткан:

⁸«Бу улус Мени тилиле тооп јат, јӱректери дезе Менеҥ ыраак.

⁹Је кижиниҥ ӱредӱзине ле јакылтазына ӱредип, Мени темей тооп јадылар».

¹⁰Иисус улусты кычырып алып, айтты: — Угуп, кӧксигерге алыныгар.

¹¹Ооско киргени кижини быјарзыдар эмес, оостоҥ чыкканы кижини быјарзыдар.

¹²Айдарда, ӱренчиктер Ого базып келеле, айттылар: — Бу сӧсти угала, фарисейлер тарынып, кӧксине алынбаганын билериҥ бе?

¹³— Теҥеридеги Адам тарыбаган кандый ла ӧзӱм тазылы-сула кодорылар — деп, Ол каруу јандырды. —

¹⁴Олорго тийбегер, олор — сокорлордыҥ сокор башчылары. Сокорды сокор јединзе, экилези орого тӱжер.

¹⁵— Бу укаа сӧстиҥ учурын биске јартап бер — деп, Петр сурады.

¹⁶Иисус айтты: — Слер де аайлабас болдыгар ба?

¹⁷Ооско киргени, ич-карынга кирип, оноҥ тыштына чыгатанын аайлабай туругар ба?

¹⁸Оостоҥ чыкканы дезе, јӱректеҥ чыкканы, ол кижини быјарзыдып јат.

¹⁹Кижиниҥ јӱрегинеҥ чыгары бу: кара санаа, кижи ӧлтӱрери, чайдам кылынары, балыр јӱрӱм јӱрери, ууры эдери, тӧгӱн керелеери, јамандап айдары.

²⁰Кижини быјарсыдары ол. Јунбаган колло курсак јигени дезе, кижини быјарсытпас.

²¹Оноортынаҥ чыгала, Иисус Тир ле Сидон деп јерлерге јӱре берди.

²²Ол јердиҥ бир хананей ӱй кижизи Ого келип, кыйгыра берди: — Кайракан, Давид Уулы! Меге буурза! Мениҥ кызыма шилемир кирген.

²³Је Иисус унчукпады. Ӱренчиктери Ого базып келеле, сурай бердилер: — Оны барзын дезеҥ, оноҥ ӧскӧ ол кийнибистеҥ базып, кыйгырып јат.

²⁴Је Иисус: — Мен јӱк Израильдиҥ азып јӱрген койлорына ийилгем — деди.

²⁵Ӱй кижи дезе јууктай базып келеле, Ого бажырып, айтты: — Кайракан, меге болушсаҥ!

²⁶Је Ол айтты: — Балдардыҥ калажын блаап, ийттерге таштаарга јарабас.

²⁷— Эйе, Кайракан, — деп, онызы каруу јандырды, — је бийлериниҥ столынаҥ тӱшкен калаштыҥ оодыгын ийттер де јийтен эди.

²⁸Айдарда, Иисус ого айтты: — Э-э, ӱй кижи! Бӱдӱп турганыҥ улу. Сеге сениҥ кӱӱниҥле болгой. Ол ло тарый оныҥ кызы јазылып калды.

²⁹Иисус оноортынаҥ јӱре береле, Галилей талайга келди. Кырга чыгып, анда отурды.

³⁰Ого кӧп улус базып келди, бойлорыла кожо аксактарды, сокорлорды, бертиктерди, тил јокторды, ӧскӧ дӧ кӧп јоболдуларды экелип, олорды Иисустыҥ будыныҥ јанына салдылар. Иисус олорды јазып ийди.

³¹Тил јоктор эрмектенип турганын, бертиктер кадык болгонын, аксактар базып јӱргенин, сокорлор кӧрӱп турганын кайкап, улус Израильдиҥ Кудайын мактадылар.

³²Иисус дезе ӱренчиктерин кычырала, олорго айтты: — Бу улуска ичим ачыйт. Олор ӱч кӱнге чыгара Мениле кожо јӱргендер, ооско салар немези јок. Олорды ажандырбай јандырбайын деп турум, јолдо уйадабазын.

³³— Мындый кӧп улусты азыраарга, анча кире калашты бу аалга јердеҥ кайдаҥ табатаныс? — деп, ӱренчиктер айттылар.

³⁴— Слерде канча кире калаш бар? — деп, Иисус сурады. — Јети болчок калаш ла бир эмеш балык — деп, олор каруу јандырдылар.

³⁵Айдарда, Ол улусты јерге кыйын отурзын деди.

³⁶Оноҥ јети болчок калаш ла балыкты алып, алкыш јетирди. Сындырала, ӱренчиктерге берди, олор дезе — улуска.

³⁷Ончозы јиди, тойды. Јигениниҥ арткан-калганын јети каламага толтыра јуудылар.

³⁸Курсак јигендери, ӱй улустаҥ ла балдардаҥ башка, тӧрт муҥ эр кижи болгон.

³⁹Улусты јандырып ийеле, Иисус кемеге отурып, Магдала деп јерге келди.