Read Јаҥы Кереес Матфей 16 Bible Online

Матфей 16 - Јаҥы Кереес bible

Матфей 16

¹Фарисейлер ле саддукейлер базып келеле, Иисусты ченеп, олорго теҥеридеҥ билди кӧргӱссин деп сурадылар.

²Је Ол айтты: — Эҥирде: «Теҥери кызарды, кааҥ болор» — дейдигер.

³Эртен тура: «Теҥери кан-кызыл, бӱгӱн јут-јулакай болор» — дейдигер. Эки јӱстӱлер! Теҥериге кӧрӱп, кандый кӱн болорын билип јадыгар, је бойыгарла болуп турган керектерди кӧрӱп, кандый ӧйлӧр келгенин билбей јадыгар ба?

⁴Кал, чайдам ӱйе билди бедирейт, је Иона јарлыкчыныҥ билдизинеҥ башка, ого билди берилбес. Мынайда айдала, олорды артырып, јӱре берди.

⁵Сууныҥ ол јанына кечерде, ӱренчиктер калаш аларга ундып салган.

⁶— Калак, фарисейлер ле саддукейлердиҥ ачыткызынаҥ чеберленип јӱригер — деп, Иисус олорго айтты.

⁷Олор ичинде сананып, айдындылар: «Бисти калаш албаган деп туру».

⁸Иисус онызын билип, айтты: — Бисте калаш јок деп, ичигерде не сананып туругар, бӱдетени ас улус?

⁹Эмдиге јетире аайлабайдыгар ба? Санаагардаҥ чыга берди бе? Беш болчок калаш беш муҥ кижиге једип, арткан-калганын канча каламага јууп алган эдигер?

¹⁰Јети болчок калаш тӧрт муҥ кижиге једип, канча калама јууп алган эдигер?

¹¹Слерди фарисейлер ле саддукейлердиҥ ачыткызынаҥ чеберленип јӱригер дегеним, калашты айтканым эмес деп, канайып аайлабай турыгар?

¹²Ол калаштыҥ ачыткызынаҥ эмес, фарисейлер ле саддукейлердиҥ ӱредӱзинеҥ чеберлензин дегенин, бу тушта билип ийдилер.

¹³Филипп Кесариязы дейтен јерге келеле, Иисус ӱренчиктеринеҥ сурады: — Мени, Кижи Уулын, улус кем деп бодойт?

¹⁴Олор айдышты: — Кажызы Сени Крестеечи Иоанн дежет, кажызы Илия, ӧскӧлӧри дезе Иеремия эмезе јарлыкчылардыҥ бирӱзи дежет.

¹⁵Иисус олорго айтты: — Слер Мени кем дейдигер?

¹⁶— Сен — Христос, тирӱ Кудайдыҥ Уулы — деп, Симон-Петр каруу јандырды.

¹⁷Иисус ого айтты: — Сен кежиктӱ кижи, Иона уулы Симон, нениҥ учун дезе оны сеге кижи эмес, теҥериде јӱрген Адам ачкан.

¹⁸Оныҥ учун айдып турум сеге: сен — Петр[8], бу таштыҥ ӱстине Серкпемди тударым, оны ӧлӱм эркитеп болбос.

¹⁹Сеге Теҥери Каандыгыныҥ тӱлкӱӱрин берерим: јерде буулаганыҥ — теҥериде буулалар, јерде чечкениҥ — теҥериде чечилер.

²⁰Оноҥ Бойы Иисус Христос болгонын кижиге айтпазын деп, ӱренчиктерине јакарды.

²¹Бу ӧйдӧҥ ала Иисус Бойыныҥ Иерусалимге барарын, јаандарга, улу абыстарга ла бичикчилерге кӧп кыйнаттырарын, анда ӧлтӱртерин, је ӱчинчи кӱнде тирилер учурлузын ӱренчиктерине ачып баштады.

²²Петр Оны кедери кычырып алып, Ого удура сӧс айда берди: — Кудай Сеге буурзак, Кайракан! Сениле андый неме болбос.

²³Ол дезе кайра кӧрӱп, Петрга айтты: — Менеҥ кеде тайыл, сатана! Сен — јолымдагы буудак. Кудайдыйын эмес, кижинийин сананып јадыҥ.

²⁴Оноҥ ӱренчиктерине айтты: — Мениле кожо барайын дегенигер, бойынаҥ бойы мойноп, керӱ агажын јӱктенип, Мениҥ кийнимнеҥ барзын.

²⁵Јӱрӱмин аргадайын дегени, онызын јылыйтар. Је Меге болуп јӱрӱмин јылыйтканы, онызын таап алар.

²⁶Јер-телекейде бар немени ончозын табала, је јӱрӱмин јылыйтса, кижиге кандый туза? Эмезе кижи бойыныҥ јӱрӱминиҥ ордына нени берер?

²⁷Кижи Уулы Адазыныҥ магыла, ангелдерин алганча келип, кажы ла кижиге нени эдип јӱргениле берер.

²⁸Чынын айдадым слерге: мында тургандардыҥ кезиги Кижи Уулы Бойыныҥ Каандыгыныҥ јаҥыла келип јатканын кӧрбӧгӧнчӧ, ӧлбӧс.