Read Јаҥы Кереес Матфей 8 Bible Online

Матфей 8 - Јаҥы Кереес bible

Матфей 8

¹Иисус кырдаҥ тӱжӱп келерде, Оны ээчий кӧп улус барды.

²Је бат, капкаш балулу[5] кижи базып келеле, Ого бажырып, айтты: — Кайракан, мени арутайын дезеҥ, арутап ийериҥ.

³Иисус колын сунуп, ого тийип, айтты: — Арутайын, ару бол. Бу ла тарый ол капкаш балудаҥ аруталды.

⁴Иисус ого айтты: — Калак, кижиге неме айтпа. Је барып, абыска кӧрӱн, Моисейдиҥ јакарганыла тайылга эт, улуска кере болзын.

⁵Иисус Капернаумга кирерде, јӱс јуучылдыҥ јааны Ого базып келеле, сурап, айтты:

⁶— Кайракан! Айлымда јалчым курулып калган коркышту шыралап јадыры.

⁷— Мен барып, оны јазайын — деп, Иисус ого айтты.

⁸Јӱс јуучылдыҥ јааны дезе каруу јандырды: — Кайракан! Сени айлыма кийдирерге турбас кижи эдим. Бир ле сӧс айт, јалчым јазылар.

⁹Бажым билер бийлӱ де болзом, башкарып турган черӱчилдерим бар. Кажы бирӱзин «бар» дезем, барат, бирӱзин «кел» дезем, келет; јалчымды «мыны эт» дезем, эдет.

¹⁰Мыны угала, Иисус кайкады, кийнинде келип јаткан улуска айтты: — Чынын айдадым слерге: мынайда бӱдӱп турганды Израильдеҥ де таппадым.

¹¹Айдып турум слерге: кӱнчыгыштаҥ ла кӱнбадыштаҥ кӧп улус келип, Авраамла, Исаакла, Иаковло кожо Теҥеридеги Каандыкта кыйын отурып алар.

¹²Каандыктыҥ уулдары дезе, тыш караҥуйга чыгара сӱрдӱрер. Анда ый ла тиш кыјырты болор.

¹³Оноҥ Иисус јӱс јуучылдыҥ јаанына айтты: — Бар, бӱдӱмјиҥле, сеге болгой. Ол ло тарый јалчы јазыла берди.

¹⁴Иисус Петр-эшке келеле, оныҥ кайын энезиниҥ эди-каны изип-кӱйӱп, оорып јатканын кӧрди.

¹⁵Оныҥ колына тийерде, ол јазыла берди. Ӧрӧ туруп, олорды кӱндӱледи.

¹⁶Эҥир кирерде, Иисуска ӧзӧк-буурында шилемирлӱ кӧп улусты экелдилер. Ол јелбистерди сӧслӧ чыгарып, ончо јоболдуларды јазып ийди,

¹⁷Исаия деген јарлыкчы ажыра мынайда айдылганы бӱтсин деп: «Ол оору-јоболысты Бойына алынып, кыйын-шырабысты апарды».

¹⁸Кӧп улус Оны айландыра турганын кӧрӧлӧ, Иисус ӱренчиктерине: — Сууныҥ ол јанына кечигер — деди.

¹⁹Ого бир бичикчи базып келеле, айтты: — Ӱредӱчи, Сен кайдаар да барзаҥ, Сениле кожо барарым.

²⁰Иисус ого айтты: — Тӱлкӱ болзо ичегендӱ, куш болзо уйалу, Кижи Уулыныҥ дезе баш та јӧлӧӧр јери јок.

²¹Ӱренчиктердиҥ бирӱзи Ого айтты: — Кайракан, мен озо адамныҥ сӧӧгин јууп саларга барып келейин бе?

²²Је Иисус ого: — Мени ээчий бар — деди. — Ӧлгӧн улус ӧлгӧндӧриниҥ сӧӧгин бойлоры јуузын.

²³Иисус кемеге отурарда, кийнинеҥ ӱренчиктери барып, база отурдылар.

²⁴Је бат, олор јӱскилеп барадарда, талай тыҥ чайбалып, толкулар кемеге кирип турды. Иисус дезе уйуктап јаткан.

²⁵Ӱренчиктер јууктап келеле, Оны ойгозып, айттылар: — Кайракан, бисти аргадазаҥ! Чӧҥӱп барадырыс!

²⁶— Не андый коркынчак болдыгар, ас бӱдеечи улус? — дейле, Ол, ӧрӧ туруп, јотконды ла талайды токтозын деп јакарып ийерде, тып-тымык боло берди.

²⁷Улус дезе кайкажып, айдыжып турдылар: — Салкын да, талай да Оныҥ сӧзин угуп турарда, бу кем болотон?

²⁸Иисус талайдыҥ ол јанындагы Гергеса деп ороонго кечип чыгарда, Ого ӧзӧк-буурында шилемирлӱ эки кижи туштады. Олор сӧӧк салган куй-таштаҥ чыгып келгендер. Олордыҥ калју-казырынаҥ улам ол јолло кем де јӱрӱп болбос болгон.

²⁹Је бат, олор кыйгырыжа бердилер: — Бисти кайдайын деп туруҥ, Кудайдыҥ Уулы? Сен бери ӧй јеткелекте бисти кинчектеерге келгеҥ.

³⁰Ыраагында јаан ӱӱр чочколор кӱдӱде турган.

³¹Шилемирлер Иисусты сурай бердилер: — Бисти сӱрер болзоҥ, ӱӱрлӱ чочколорго кирерге ий.

³²Иисус: — Барыгар — деди. Олор чыгып, чочколорго барып кирдилер. Је бат, ончо ӱӱр кажаттаҥ талайга калып, чӧҥӱп калды.

³³Кӱдӱчилер дезе сыр-јӱгӱрӱкле барып, калага келеле, ончозын јарладылар, ӧзӧк-буурында шилемирлӱ улусла не болгонын база айттылар.

³⁴Каланыҥ кӧдӱре улузы Иисуска удура чыкты. Оны кӧрӧлӧ, олордыҥ јеринеҥ јӱре берзин деп сурадылар.